Cristo huin Ma̱ꞌan sa du̱naꞌhuej rayiꞌîꞌ
2
Nuguanꞌ nânj gachrûnj riñan nej suj ri̱ña̱n gidigán si-nùguànꞌ Ma̱ꞌan Ñaꞌanj an,
daꞌnga ni̱ si giꞌhiaj nej suj gakï̱nꞌïn;
ni̱ si hua̱ ꞌngo̱ nej suj giꞌhiaj gakï̱nꞌïn,
ni̱ ni̱kï̱nꞌ Ma̱ꞌan Jesús guendâ du̱naꞌhue rayiꞌî nej suj riñan Ma̱ꞌan Reꞌ Ñaꞌanj an,
dadinꞌ Ma̱ꞌan giꞌhiaj sa ni̱ka̱ nï̀nꞌïn.
2 Ni̱ huê Ma̱ꞌan Jesús huin sa gahuiꞌ rayiꞌî si-ga̱kïnꞌ nêꞌ;
sani̱ sê man rayiꞌî ꞌngo̱ rïn si-ga̱kïnꞌ nêꞌ gahuij mánj,
gahuij rayiꞌî daranꞌ nej guiì màn nï̀nꞌ gàchràꞌ ruhuâ yumiguìi.
3 Ni̱ si dagahuînꞌ sun gaꞌnïnꞌ Ma̱ꞌan Ñaꞌanj an riñunꞌ,
hiôꞌ ni̱ yìtï̀nj huaj si niꞌînꞌ Ma̱ꞌan Ñaꞌanj an na̱nj ánj.
4 Guiì gataj:
“Niꞌín Ma̱ꞌan Ñaꞌanj an”,
sani̱ nitaj si dagahuin ninj sun gaꞌnïnꞌ Ma̱ꞌan Ñaꞌanj an riñan ninj,
ni̱ huin ninj guiì gidigañuꞌunj huê danj ni̱ nitaj sa yàngàꞌa hua ruhuâ nimân ninj mánj;
5 sani̱ guiì dagahuin sun gaꞌnïnꞌ Ma̱ꞌan Ñaꞌanj an,
ni̱ chru̱n ninj ga̱ ꞌì ruhuâ ninj dadinꞌ Ma̱ꞌan Ñaꞌanj an gidigân rayiꞌî dan gahuin chru̱n ninj ga ꞌì ruhuaj ninj,
huê danj ni̱ niꞌînꞌ si ni̱ka̱j duguîꞌ ngà Ma̱ꞌan Ñaꞌanj an.
6 Guiì gataj si ni̱kï̱nꞌ ran ninj ngà Ma̱ꞌan Jesús,
ni̱ daꞌhuî ninj gi̱ꞌhiaj ninj dàj rûnꞌ giꞌhiaj Ma̱ꞌan na̱nj ánj.
ꞌNgo̱ nuguanꞌ nàkà giyiꞌnïnꞌ su̱n riñunꞌ
7 Sê rayiꞌî ꞌngo̱ sun giyiꞌnïnꞌ nàkà gachrûnj riñan nej suj man di̱nï̂nj,
gachrûnj riñan nej suj rayiꞌî sun gàꞌ ganahuin ràꞌa nej suj àsìj si̱nï̱ïn,
ni̱ sun dânj huin sun nâ gàꞌ giyiꞌnïnꞌ su̱n riñan nej suj ni̱ huin nuguanꞌ gàꞌ gunïn nej suj àsìj si̱nï̱ïn.
8 Sani̱ sa giꞌhiâ,
huin si gachrûnj riñan nej suj ni̱ nagiꞌhiaj nàkà ñún riñan nej suj,
rayiꞌî sun yàngàꞌ gàꞌ ganahuin ràꞌa nej suj giꞌhiaj Ma̱ꞌan Jesús ni̱ gàꞌ niꞌin nej suj dàj gaꞌnïnꞌ sùnj riñan nej suj,
dadinꞌ daꞌ gachín diû ni̱ dànanj gahuin nìko sa yigï̀ïn riñan sa ru̱mi̱nꞌin na̱nj ánj.
9 Sí taj si gàꞌ niꞌin sôꞌ Ma̱ꞌan Cristo,
sani̱ hua̱ na̱nj gininj ꞌì dinḯn sôꞌ riñan sôꞌ,
hiôꞌ ni̱ hua̱ na̱nj nun gi̱ni̱ꞌin sôꞌ Ma̱ꞌan Cristo mánj.
10 Sí ꞌì ruhuâ niꞌin dinḯn,
ni̱ yàngàꞌ ni̱ gàꞌ niꞌin sôꞌ Ma̱ꞌan Jesús,
ni̱ nitaj si giꞌhiaj nej sôꞌ gakï̱nꞌïn gàꞌ mánj.
11 Sani̱ sí gininj ꞌì dinḯn riñan ni̱ hua̱ gakï̱nꞌïn riñan sôꞌ,
ni̱ gaché sôꞌ ñan ru̱mi̱nꞌin,
ni̱ nun niꞌin daꞌngaꞌ sôꞌ sa giꞌhiaj sôꞌ,
dadinꞌ nej gakï̱nꞌ giꞌhiaj sôꞌ dânj giꞌhiaj ni̱ gahuin ru̱mi̱nꞌ daꞌnga nej sôꞌ.
12 Gachrûnj nuguanꞌ nânj riñan nej suj na̱nj daꞌnînj lij,
dadinꞌ ngà siyu̱gui Ma̱ꞌan Jesús ni̱ gàꞌ ginikaj Ma̱ꞌan Ñaꞌanj an nimân nìko rayiꞌî nej si-ga̱kïnꞌ nej suj.
13 Gachrûnj nuguanꞌ nânj riñan nej suj sí achij doj,
dadinꞌ gàꞌ niꞌin nej suj si Ma̱ꞌan Jesús huin sa si̱nï̱n nï̀nꞌïn.
Ni̱ gachrûnj riñan nej suj sí huin ña̱n dan,
dadinꞌ gàꞌ gunùkuaj nej suj giꞌhiaj ga̱nan nej suj riñan sichre.
Ni̱ gachrûnj riñan nej suj huin daꞌnî lij,
dadinꞌ gàꞌ giniꞌin nej suj Ma̱ꞌan Reꞌ Ñaꞌanj an.
14 Gachrûnj nuguanꞌ nânj riñan nej suj sí achij doj,
dadinꞌ gàꞌ niꞌin nej suj si Ma̱ꞌan Jesús huin sa si̱nï̱n nï̀nꞌïn.
Ni̱ gachrûnj riñan nej suj sí huin ña̱n dan,
dadinꞌ hua̱ guesâ nej suj,
dadinꞌ màn si-nùguànꞌ Ma̱ꞌan Ñaꞌanj ruhuâ nimân nej suj,
ni̱ gunùkuaj nej suj giꞌhiaj ga̱nan nej suj riñan sichre.
15 Si̱ ga ꞌì ruhuâ nej suj niꞌin nej suj nej sa garanꞌ ruhuâ nej guiì nun niꞌin Ma̱ꞌan Ñaꞌanj an mánj,
ni̱ si̱ ga ꞌì ruhuâ nej suj niꞌin nej suj nej rasu̱n duguaneꞌ yumiguìi riñan nej suj mánj.
Ni̱ si hua̱ ꞌngo̱ nej suj ꞌì ruhuâ niꞌin nej sa màn ruhuâ yumiguìi,
ni̱ nitaj si nne sa ꞌì ruhuâ Maꞌan Reꞌ Ñaꞌanj an ruhuâ nimân nej suj mánj.
16 Dadinꞌ daranꞌ nej sa màn ruhuâ yumiguìi,
ni̱ sa garanꞌ ruhuâ nneè kûꞌ gi̱ꞌhia huin nej dânj,
ni̱ sa garanꞌ ruhuâ rune ñunꞌ gi̱niꞌhia,
ni̱ si ûta nne̱ꞌ nga hua yi̱ruꞌhueꞌ,
ni̱ sê sa garanꞌ ruhuâ Ma̱ꞌan reꞌ Ñaꞌanj an huin nej dânj mánj,
sa garanꞌ ruhuâ sichre nne ruhuâ yumiguìi huin nej dânj na̱nj ánj.
17 Do̱j diû ni̱ ga̱chi̱n nej sa duguaneꞌ yumiguìi riñan nej suj;
sani̱ nej guiì giꞌhiaj sa garanꞌ ruhuâ Maꞌan Ñaꞌanj an ni̱ gìrìꞌ ninj ñan ga̱ne nìgànj ninj na̱nj ánj.
Sí gidigañuꞌunj ni̱ gataj sôꞌ sí huê sôꞌ huin Cristo
18 Daꞌnînj lij,
gàꞌ niꞌin nej suj si giriꞌ nìꞌhiaj nêꞌ ga̱neꞌ diû ꞌna̱ꞌ ga̱na̱huij;
ni̱ gàꞌ gunïn nej suj si ꞌna̱ꞌ sí ga̱ta̱j si huê sôꞌ huin Ma̱ꞌan Cristo;
huê danj ni̱ hia̱j ni̱ gahui ûta gàꞌì nej sí ga̱ta̱j si huê nej sôꞌ huin Ma̱ꞌan Cristo;
rayiꞌî dan ni̱ giniꞌînꞌ si gàꞌ ꞌnaꞌ ga̱na̱huij diû.
19 Gàꞌ ꞌnïnj nej sí dânj siganï̂nj nêꞌ sani̱ ni̱nï̱n gidigân nej sôꞌ dadinꞌ gayiꞌì nej sôꞌ gidigañuꞌunj nej sôꞌ,
huê danj ni̱ gahui nej sôꞌ siganï̂nj nêꞌ,
dadinꞌ sê sí gi̱ni̱kaj duguiꞌ ngà nêꞌ gahuin nej sôꞌ;
dadinꞌ si gahuin nej sôꞌ sí ni̱ka̱j duguiꞌ ngà nêꞌ,
ni̱ hua̱ na̱nj nikaj duguiꞌ nej sôꞌ ngà nêꞌ;
sani̱ gahui nej sôꞌ siganï̂nj nêꞌ daꞌnga ni̱ guruguiꞌij si sê daranꞌ nej sôꞌ huin sí dagahuin mánj.
20 Sani̱ gàꞌ ganahuin ràꞌa nej suj Ma̱ꞌan Espíritu Santo giꞌhiaj Ma̱ꞌan Señor Jesucristo,
ni̱ gàꞌ niꞌin nej suj daranꞌ sa yàngàꞌa.
21 Si̱ ganï̂n ruhuâ nej suj si̱ gachrûnj nuguanꞌ nânj guendâ nun niꞌin nej suj rayiꞌî nuguanꞌ yàngàꞌa mánj,
gachrûnj dadinꞌ gàꞌ niꞌín si garânj daꞌngaꞌ hueꞌê ruhuâ nej suj rayiꞌî nuguanꞌ yàngàꞌa,
ni̱ gàꞌ niꞌin nej suj si gàꞌ si ꞌngo̱ nuguanꞌ digañuꞌunj un nitaj si gahui siganï̂nj nuguanꞌ yàngàꞌa mánj.
22 Ahuin sí huin sí gidigañuꞌunj un ruhuâ nej suj ràꞌaj.
Sí gidigañuꞌunj un huin sí gataj si sê Cristo huin Ma̱ꞌan Jesús.
Ni̱ sí nânj huin si gunïnꞌ ngà Ma̱ꞌan Cristo,
ni̱ nitaj si guyumân ruhuâ sôꞌ si Ñaꞌanj an huin Ma̱ꞌan Reꞌ Ñaꞌanj an,
ni̱ huê danj na̱nj nitaj si guyumân ruhuâ sôꞌ si Ñaꞌanj an huin Ma̱ꞌan Jesús Daꞌní Ma̱ꞌan Ñaꞌanj an mánj.
23 Daranꞌ nej guiì nitaj si guyumân ruhuâ niꞌin Ma̱ꞌan Jesús,
ni̱ huê danj na̱nj nitaj si guyumân ruhuâ ninj niꞌin ninj Ma̱ꞌan Reꞌ Ñaꞌanj an.
Ni̱ guiì ganataꞌ du̱ꞌhua si Jesús huin Ñaꞌanj an ni̱ guyumân ruhuâ ninj niꞌin ninj Ma̱ꞌan Ñaꞌanj an na̱nj ánj.
24 Huê danj ni̱ gàꞌnï̀nj sàꞌ nej suj ruhuâ nimân nej suj nuguanꞌ gunïn nej suj àsìj si̱nï̱ïn,
ni̱ dugumîn hueꞌê nej suj nuguanꞌ gunïn nej suj àsìj si̱nï̱ïn,
ni̱ ganikïnꞌ ran nej suj ngà Ma̱ꞌan Jesús ni̱ ngà Ma̱ꞌa Reꞌ Ñaꞌanj an.
25 Ni̱ rikî Ma̱ꞌan Jesús si-nùguànꞌanj riñunꞌ ni̱ gata si gùyùmàn ruhuôꞌ niꞌînꞌ Ma̱ꞌan ni̱ ga̱ne nìgùnꞌ nngaj.
26 Ni̱ gachrûnj nej nuguanꞌ nânj riñan nej suj rayiꞌî nej sí gidigañuꞌunj un.
27 Sani̱ rikî Ma̱ꞌan Jesús Ma̱ꞌan Espíritu Santo riñan nej suj ni̱ hua̱ na̱nj nne ngà nej suj,
hiôꞌ ni̱ nitaj si niꞌñanj nej suj si gi̱di̱gân aꞌngô nej síi nej suj gàꞌ mánj;
dadinꞌ huê gè Ma̱ꞌan Espíritu Santo huin sa gi̱di̱gan ni̱ ga̱ꞌhue ga̱ra̱n daꞌngaꞌ ruhuâ nej suj daranꞌ sa chìꞌ huaa,
ni̱ sa yàngàꞌa huin sa gidigân Ma̱ꞌan Espíritu Santo dadinꞌ nitaj àmàn gidigañuꞌunj Ma̱ꞌan mánj,
huê danj ni̱ gùyùmàn yìtï̀nj ruhuâ nej suj niꞌin nej suj Ma̱ꞌan Cristo dàj rûnꞌ gidigân Ma̱ꞌan Espíritu Santo riñan nej suj.
28 Huê danj ni̱ gi̱nun yìtï̀nj ruhuâ nej suj niꞌin nej suj Ma̱ꞌan Jesús na̱nj daꞌnînj lij,
ni̱ nga ga̱ꞌna̱ꞌ ñûn Ma̱ꞌan ni̱ hua̱ na̱nj hua̱ yìtï̀nj ruhuâ nêꞌ gànàrìꞌij nêꞌ,
ni̱ nga gùyùmanj ni̱ si̱ giꞌhiaj ane riñanj nêꞌ,
hiôꞌ ni̱ si̱ girîꞌ sinàꞌàj a mánj.
29 Ni̱ si niꞌin nej suj si sa ni̱ka̱a huin Ma̱ꞌan Jesús,
ni̱ ña̱ꞌa̱n huaj si gi̱ni̱ꞌin nej suj si nej guiì giꞌhiaj sa ni̱ka̱a ni̱ gàꞌ gaꞌnga nàkà ñûn ninj giꞌhiaj Ma̱ꞌan na̱nj ánj.