Ñânj kartâ si̱nï̱n nânj huin gachrûn Apóstol
JUAN
Nuguanꞌ gi̱ꞌhiaj ga̱na̱huin nìꞌnòꞌ
1
Dàj gaj àsìj si̱nï̱ïn,
ni̱ dàj hua sa gunïn nej ñûnj,
ni̱ dàj hua sa giniꞌin nej ñûnj ngà rune ñan nej ñûnj,
ni̱ nadigiꞌñûn nej ñûnj rayiꞌî nej dânj,
ni̱ gaganꞌ raꞌa nej ñûnj Ma̱ꞌan Jesús sa gi̱ꞌhiaj ga̱na̱huin nìꞌnàꞌ nej guiì.
2 Ni̱ nuguanꞌ nìꞌnàꞌ dânj huin Ma̱ꞌan Jesucristo,
ni̱ giniꞌin nej ñûnj Ma̱ꞌan,
ni̱ rayiꞌî dan ganataꞌ nej ñûnj riñan nej suj,
si huej huin sa gi̱ꞌhiaj si gànàrìꞌ nej guiì ñan ga̱ne nìgànj ninj ni̱ gàꞌ si̱nï̱n gane Ma̱ꞌan ngà Ma̱ꞌan Reꞌ Ñaꞌanj an,
sani̱ gidiganj Maꞌan riñan nej ñûnj;
3 sa giniꞌin nej ñûnj ni̱ sa gunïn nej ñûnj,
duyingaꞌ nej ñûnj,
daꞌnga ni̱ ginikaj duguiꞌ nùguànꞌàn nej suj ngà nej ñûnj;
dadinꞌ ni̱ka̱j duguiꞌ yàngàꞌ nej ñûnj ngà Ma̱ꞌan Reꞌ Ñaꞌanj an,
ni̱ huê danj na̱nj ni̱ka̱j duguiꞌ yàngàꞌ nej ñûnj ngà Ma̱ꞌan Daꞌnî Jesucristo.
4 Ni̱ gachrûn nej ñûnj rayiꞌî nej nânj,
daꞌnga ni̱ ganahuin nìhiàꞌ ruhuâ daranꞌ nêꞌ.
Ñaꞌanj an huin sa yigï̀ïn
5 Huê nuguanꞌ nânj huin sa gunïn nej ñûnj rayiꞌî Ma̱ꞌan Jesús,
ni̱ duyingaꞌ nej ñûnj riñan nej suj:
Ni̱ Ma̱ꞌan Ñaꞌanj an huin sa yigï̀ïn,
ni̱ nitaj gàꞌ si do̱j sa ru̱mi̱nꞌin hua riñanj mánj.
6 Ni̱ si gataj nêꞌ si ni̱ka̱j duguîꞌ ngà Ma̱ꞌan Jesús,
sani̱ giꞌhiôꞌ gakï̱nꞌïn,
ni̱ huînꞌ ꞌngo̱ guiì gidigañuꞌunj un,
ni̱ nitaj si dagahuînꞌ riñan sa yàngàꞌa mánj;
7 ni̱ si gachéꞌ ñan yigï̀ïn,
dàj rûnꞌ gaché Ma̱ꞌan Jesús ñan yigï̀ïn ni̱ ni̱ka̱j duguîꞌ ngà ꞌngo̱ ni̱ aꞌngô nej duguîꞌ,
ni̱ tun Ma̱ꞌan Jesucristo huin Daꞌní Ma̱ꞌan Ñaꞌanj an naꞌnïnꞌ riñan daranꞌ si-ga̱kï̂nt.
8 Ni̱ si ga̱to̱ꞌ si nitaj gakï̱nꞌïn giꞌhiôꞌ,
ni̱ gidigañuꞌunꞌ mu̱ꞌunꞌ,
ni̱ nitaj sa yàngàꞌa hua riñunꞌ mánj.
9 Ni̱ si ganatôꞌ si-ga̱kï̂nt riñan Ma̱ꞌan,
ni̱ Ma̱ꞌan huin sa yàngàꞌa ni̱ Ma̱ꞌan huin sa giꞌhiaj sa ni̱ka̱a ni̱ ga̱ꞌhue gi̱nika nimân nìko rayiꞌî si-ga̱kï̂nt,
ni̱ huê danj na̱nj gànàꞌnïnj daranꞌ si-ga̱kï̂nt;
ni̱ ga̱ꞌhue gànàꞌnïnj daranꞌ nej gakï̱nꞌ hua riñunꞌ na̱nj ánj.
10 Ni̱ si ga̱to̱ꞌ si nitaj gakï̱nꞌïn giꞌhiôꞌ,
ni̱ giꞌhiôꞌ si huin Ma̱ꞌan sa gidigañuꞌunj,
huê danj ni̱ nitaj si-nùguànꞌ Ma̱ꞌan nne ngà nêꞌ gàꞌ mánj.