Ga̱ꞌna̱ꞌ ñûn Ma̱ꞌan Jesús
3
ꞌÌ ruhuâj niꞌín nej suj di̱nï̂nj,
ni̱ nan huin gisîj huìj ñanj karta gachrûnj huaj riñan nej suj,
ni̱ gu̱ña̱n aꞌmin ngue dadinꞌ ruhuâj si gàꞌnàꞌnï̀nj ñan nej suj ni̱ dunaꞌngâj riñan nej suj si hueꞌê ga̱ra̱n daꞌnga ruhuâ nej suj,
2 daꞌnga ni̱ ga̱na̱nun ruhuâ nej suj rayiꞌî nej nuguanꞌ gàꞌ gaꞌmin nej sôꞌ gè gataj dàj ga̱huin gimân àsìj nâ,
ni̱ huê danj na̱nj ga̱na̱nun ruhuâ nej suj rayiꞌî nuguanꞌ guchruj su̱n nej sôꞌ gaꞌanj gidigân si̱nï̱n rayiꞌî Ma̱ꞌan Señor gi̱ꞌhiaj ga̱na̱ni̱n nêꞌ.
3 Ni̱ ruhuâj si gi̱ni̱ꞌin si̱nï̱n nej suj rayiꞌî nej nânj,
si nej gui ꞌna̱ꞌ neꞌ ñàan ni̱ ga̱ꞌna̱ꞌ nej sí ga̱ꞌmi̱n duku,
ni̱ gi̱ꞌhiaj nej sôꞌ sa garanꞌ ruhuâ nneè kú nej sôꞌ,
4 ni̱ gataj nej sôꞌ:
“Dànèꞌ gunâj nuguanꞌ gaꞌhuiꞌ nej sôꞌ si-nùguànꞌ nej sôꞌ ni̱ gataj nej sôꞌ si râꞌñanj nànìkàj ñûn Ma̱ꞌan Cristo ga̱ꞌna̱j ràꞌaj.
Dadinꞌ gàꞌ gahuiꞌ yi nêꞌ ngà rej nêꞌ ni̱ huê dàj rûnꞌ huaj àsìj giꞌhiaj Ma̱ꞌan Ñaꞌanj an yumiguìi ni̱ huê danj hua gej nda gui hia̱j ràꞌaj.”
5 Ni̱ nun niꞌin daꞌngaꞌ nej guiì nânj si àsìj nâ ni̱ daranꞌ nej sa màn guruguiꞌ giniꞌhioꞌ,
ni̱ ngà nuguanꞌ gaꞌmin Ma̱ꞌan Ñaꞌanj an ni̱ gahuin yàtàꞌa ni̱ huê danj na̱nj gahuin hioꞌóo,
ni̱ ngà nnee giꞌhiaj Ma̱ꞌan Ñaꞌanj an guruguiꞌ hioꞌóo ni̱ da̱nï̱n nnee nun hioꞌóo,
6 rayiꞌî dan ni̱ yumiguì ga nga gane sachij Noé ni̱ ganahui dadinꞌ guna riki nnee;
7 sani̱ yàtàꞌ hua̱ ngà hioꞌó hua̱ diû hia̱j,
ni̱ ma̱ꞌan nuguanꞌ giꞌhiaj si ga̱huin ra̱n doj ga̱na̱hui,
ni̱ gàꞌ hua̱ yu̱gui guendâ ga̱kaj nga gùyùmàn gui ga̱na̱nikïnꞌ nej guiì riñan Ma̱ꞌan Ñaꞌanj an nga na̱gi̱ꞌhia guenda ngà ninj,
ni̱ gui danj huin gui ga̱ꞌa̱nj ni̱ꞌhia̱ daranꞌ nej guiì nitaj si guyumân ruhuâ niꞌin Ma̱ꞌan Ñaꞌanj an na̱nj ánj.
8 Aꞌngô sa ruhuâj huin di̱nï̂nj,
si si̱ giniꞌñûn nej suj nej nânj:
Dadinꞌ guendâ Ma̱ꞌan Señor ni̱ ꞌngo̱ gui ni̱ huin dàj rûnꞌ huin ꞌngo̱ mîn hioꞌo,
ni̱ ꞌngo̱ mîn hioꞌo ni̱ huin dàj rûnꞌ huin ꞌngo̱ gui.
9 Sê si̱ gahuin ra̱n Ma̱ꞌan Señor guendâ gu̱du̱si nuguanꞌ gata mánj,
guendâ da̱ꞌa̱j nej guiì ni̱ ûta gahuin ra̱n Ma̱ꞌan Señor gu̱du̱si nuguanꞌ gata,
sani̱ sa giꞌhiaj Ma̱ꞌan Señor huin si ûta nùkuaj hua ruhuaj niꞌin nêꞌ,
sani̱ nun ga̱ra̱nꞌ ruhuâ Ma̱ꞌan Señor si ga̱ꞌa̱nj ni̱ꞌhia̱ gàꞌ si ꞌngo̱ nej guiì mánj,
ni̱ sa ruhuâ Ma̱ꞌan Señor huin si gànànìkàj ruhuâ daranꞌ nej guiì rayiꞌì si-ga̱kïnꞌ ninj na̱nj ánj.
10 Sani̱ gui ga̱ꞌna̱ꞌ Ma̱ꞌan Señor ni̱ ga̱huin dàj rûnꞌ gahuin nga gaꞌnaꞌ sí tu̱u neꞌ ñànꞌan ni̱ nda gari̱n xi ni̱ nda nnï̱n ni̱ nnï̱n ga̱huin yàtàꞌa,
ni̱ ga̱na̱huij nej yumiguì hua̱ yàtàꞌa ngà nej atïꞌ màn yàtàꞌa ga̱ka̱,
ni̱ huê danj na̱nj ga̱ka̱ hioꞌóo ngà daranꞌ nej sa màn riñanj.
11 Ni̱ si ga̱na̱huij daranꞌ nej rasu̱n nânj,
ni̱ nùnj huin saj nitaj si ganahuij ruhuâ nej suj si gi̱ꞌhiaj anêj nej suj gakï̱nꞌïn riñan nej suj ni̱ gi̱nikaj chre̱j nej suj riñan Ma̱ꞌan Ñaꞌanj an daꞌ gui nne nìꞌnàꞌ nej suj ràꞌaj,
12 gànàꞌhuìj nej suj ni̱ ûta hio du̱guꞌnïnꞌ nej suj da̱gahuin hueꞌê nej suj riñan Ma̱ꞌan Ñaꞌanj an dadinꞌ râꞌñanj ga̱ꞌnaj,
ni̱ ga̱nu̱n ñaꞌaan nej sa màn yàtàꞌa,
ni̱ nga ga̱ka̱ man ni̱ ga̱nïnj ni̱ ga̱na̱hui na̱nj ánj.
13 Sani̱ ànàhuìj nêꞌ,
dadinꞌ gàꞌ riki Ma̱ꞌan Señor si-nùguànꞌanj,
si gi̱ꞌhiaj Ma̱ꞌan ga̱na̱huin nàkà nej yàtàꞌa ni̱ huê danj na̱nj gi̱ꞌhia ga̱na̱huin nàkà hioꞌóo,
ni̱ hiuj dânj gimàn daranꞌ sa sàꞌa ngà sa ni̱ka̱ gi̱ꞌhiaj Ma̱ꞌan Ñaꞌanj an na̱nj ánj.
14 Rayiꞌî dan di̱nï̂nj,
ni̱ si ànàꞌhuìj nej suj nej nânj,
ni̱ du̱guꞌnïn nej suj ni̱ ûta hiô na̱gi̱ꞌhiaj sàꞌ nej suj nimân nej suj ni̱ si̱ ga gàꞌ si ꞌngo̱ gakï̱nꞌïn ruhuâ nimân nej suj ni̱ ga̱ gu̱dadû nej suj ma̱ꞌan nej suj ni̱ gi̱ꞌhiaj nej suj sa ni̱ka̱a,
ni̱ ga̱ dïnꞌïnj ruhuâ nej suj.
15 Ni̱ ña̱ꞌa̱n huaj si ga̱ra̱nꞌ daꞌngaꞌ ruhuâ nej suj si Ma̱ꞌan Señor ni̱ nùkuaj hua ruhuaj dadinꞌ garanꞌ ruhuaj si ga̱na̱ni̱n nej suj;
ni̱ huê nânj huin sa garanꞌ ruhuâ dinï̂nt Pablo,
rayiꞌî dan ni̱ gachrûn sôꞌ dàj rûnꞌ gahuin chru̱n nï̀nꞌ ruhuâ sôꞌ giꞌhiaj Ma̱ꞌan Ñaꞌanj an,
16 dadinꞌ daranꞌ riñan nej ñanj karta gachrûn sôꞌ,
ni̱ gaꞌmin sôꞌ rayiꞌî nej nuguanꞌ nânj,
ni̱ siganï̂nj nej nuguanꞌ nânj ꞌnïnj da̱ꞌa̱j nuguanꞌ chìꞌ hua ga̱ꞌhue ga̱ra̱n daꞌngaꞌ ruhuôꞌ,
sani̱ nej sí nitaj si ni̱kï̱nꞌ ran,
ni̱ ñan naꞌhue ga̱ra̱n daꞌnga ruhuâ sôꞌ nej nuguanꞌ chìꞌ huaa ni̱ ni̱nï̱n ganataꞌ nej sôꞌ,
ni̱ huê danj na̱nj giꞌhiaj nej sôꞌ ngà aꞌngô nej nuguanꞌ ꞌna̱ꞌ riñan ñanj si-nùguànꞌ Ma̱ꞌan Ñaꞌanj an,
ni̱ giꞌhiaj nej sôꞌ si ga̱ꞌa̱nj ni̱ꞌhia̱ nej ma̱ꞌan nej sôꞌ.
17 Huê danj na̱nj nej suj di̱nï̂nj,
ni̱ gàꞌ niꞌin nej suj dàj gidigán,
hia̱j ni̱ ga̱ gu̱dadû nej suj ma̱ꞌan nej suj,
dadinꞌ ga̱huin ni̱ gùyùmàn ruhuâ nej suj dàj gidigân nej sí ga̱ninï̀nꞌ hua dânj,
ni̱ gi̱ni̱na̱j ruhuâ nej suj ni̱ si̱ ganikïnꞌ ran nej suj riñan Ma̱ꞌan Señor gàꞌ mánj.
18 Sa ga̱na̱huij ruhuâ nej suj huin,
si ga̱chi̱j nej suj doj ngà si-su̱nu̱j Ma̱ꞌan Ñaꞌanj an ni̱ gi̱ni̱ꞌin nej suj doj rayiꞌî Ma̱ꞌan Señor Jesucristo dadinꞌ huej huin sa gi̱ꞌhiaj ga̱na̱ni̱nꞌ.
Ni̱ ga̱ꞌmi̱n hueꞌê nêꞌ rayiꞌî Ma̱ꞌan hia̱j,
ni̱ huê danj gi̱ꞌhiaj nêꞌ nìgànj nï̀nꞌ.
Ni̱ huê danj huin rûꞌhuaj na̱nj ánj.