APOCALIPSIS
Nuguanꞌ nânj huin gachrûn Juan
Gidigân Ma̱ꞌan Jesucristo nej sa ga̱huin riñan Juan
1
Nuguanꞌ nânj ganahuin ra̱ꞌa Ma̱ꞌan Jesucristo,
ni̱ Ma̱ꞌan Ñaꞌanj an gaꞌhuiꞌ nej nuguanꞌ nânj riñanj,
ni̱ nadiganj ni̱ gananï̂nj nej nuguanꞌ nânj riñan nej sôꞌ gunânj gi̱tsi riñanj,
nej sa daꞌhui ga̱huin rânꞌñanj;
ni̱ gaꞌnïn gaꞌnaꞌ gànàtàꞌ si-ángel riñan sachij Juan,
2 ni̱ sôꞌ ganataꞌ rayiꞌî si-nùguànꞌ Ma̱ꞌan Ñaꞌanj an,
ni̱ sôꞌ huin si gananï̂n rayiꞌî Ma̱ꞌan Jesucristo,
ni̱ gananï̂n sôꞌ rayiꞌî daranꞌ nej sa giniꞌin sôꞌ.
3 Ga̱na̱huin nìhiàꞌ ruhuâ nej guiì ahia ni̱ nej guiì gunïn nej nuguanꞌ dàj ga̱huin,
ni̱ dagahuin ninj nuguanꞌ nnùn riñan ñânj librû nânj;
dadinꞌ gàꞌ gahuin nichrunꞌ diû.
Gaꞌnḯn Juan nuguanꞌ ni̱ꞌña̱nj an riñan nej chi̱j yiꞌnïnꞌ nej dinï̂nt huin si-nùhuì Ma̱ꞌan Jesús nne riñan hioꞌó Asia
4 Ñùnj huin Juan,
ni̱ gaꞌnï̂n ñanj librû nan hua riñan nej chi̱j yiꞌnïnꞌ nej dinï̂nt huin si-nùhuì Ma̱ꞌan Jesús màn riñan hioꞌó Asia:
Ni̱ si-su̱nu̱j ni̱ sa hua̱ dïnꞌïnj ruhuâ Ma̱ꞌan sa huin hia̱j,
sa gahuin,
ni̱ sa ga̱ꞌna̱ꞌa,
ni̱ nej chi̱j espíritu ni̱kï̱nꞌ ñan nikïnꞌ chrun yilâ nne Ma̱ꞌan Ñaꞌanj an;
5 ni̱ huê danj na̱nj ga̱na̱huin ra̱ꞌa nej suj si-su̱nu̱j ni̱ sa hua̱ dïnꞌïnj ruhuâ Ma̱ꞌan Jesucristo,
dadinꞌ Ma̱ꞌan huin sa ganataꞌ sa yàngàꞌ hia,
ni̱ Ma̱ꞌan huin sa ganaꞌnï̂nj si̱nï̱n siganï̂nj nej nîman,
ni̱ Ma̱ꞌan huin sa ni̱ka̱j su̱n riñan daranꞌ nej síchìj presidente ni̱ka̱j su̱n riñan hioꞌóo.
Ni̱ Ma̱ꞌan huin sa ꞌì ruhuâ niꞌin nêꞌ,
ni̱ Ma̱ꞌan huin sa giꞌhiaj ganaruhui si-ga̱kïnꞌ nêꞌ ngà tun,
6 ni̱ giꞌhia si ga̱huînꞌ rey ni̱ ga̱huînꞌ rej guendâ Ma̱ꞌan Ñaꞌanj,
huin Rej Ma̱ꞌan;
ni̱ huej huin sa nìko,
ni̱ sa ni̱ka̱j su̱n riñan daranꞌanj daꞌ gachîn ꞌngo̱ sientu hioꞌo ni̱ daꞌ gachîn ꞌngo̱ sientu hioꞌo.
Ni̱ huê danj huin rûꞌhuaj.
7 Ni̱ riñan nej nnga ga̱ꞌna̱ꞌ Ma̱ꞌan Jesús,
ni̱ gi̱ni̱ꞌin daranꞌ nej guiì Ma̱ꞌan,
ni̱ gi̱ni̱ꞌin nej guiì giꞌhiaj giranꞌ yiꞌì Ma̱ꞌan ni̱ ûta ga̱huin ruhuâ ninj,
ni̱ huê danj na̱nj ûta ga̱huin ruhuâ daranꞌ nej guiì màn nï̀nꞌ gàchràꞌ ruhuâ yumiguìi nga gi̱ni̱ꞌin ninj Ma̱ꞌan;
ni̱ ûta gu̱du̱gue̱ꞌe ninj ni̱ ga̱gua̱j hia daranꞌ ninj.
Ga̱ꞌhue na̱nj ánj.
Ni̱ huê danj huin rûꞌhuaj.
8 “Ñùnj huin letra A ni̱ huê huin letra Z sa si̱nï̱ïn ni̱ huê huin sa ganahuij”,
Ma̱ꞌan sa huin hia̱j,
ni̱ Ma̱ꞌan sa gahuin ni̱ Ma̱ꞌan sa ga̱ꞌna̱ꞌ,
ni̱ Ma̱ꞌan sa ni̱ka̱j su̱n.
Ganï̂n Ma̱ꞌan Jesús nej sa ga̱huin riñan Juan
9 Ñùnj huin Juan ni̱ huín dinḯn nej suj,
ni̱ dàj rûnꞌ giranꞌ sa̱ñu̱n nej suj ni̱ huê danj giranꞌ sàñùnj,
sani̱ guendâ guyumân ruhuâj niꞌín Ma̱ꞌan Jesús ni̱ ga nùkuaj ruhuâj giꞌhiaj Ma̱ꞌan ni̱ ꞌngo̱ gui ni̱ ga̱ne nìgàn ñan gi̱nikaj sun Ma̱ꞌan,
ni̱ rayiꞌî si-nùguànꞌ Ma̱ꞌan Ñaꞌanj an ni̱ rayiꞌî Ma̱ꞌan Jesucristo,
nné riñan hioꞌó nu̱n da̱nï̱n nne ña̱ꞌa̱nj ni̱ gu̱ꞌna Patmos.
10 Sani̱ ꞌngo̱ gui gu̱dûngu huin ni̱ gaꞌnaꞌ Ma̱ꞌan Espíritu Santo riñânj;
ni̱ gunḯn gaꞌmin nùkuaj staꞌu ꞌngo̱ sa gaꞌmin neꞌ rùkùj ni̱ dàj rûnꞌ nùkuaj gaꞌñânj chrun âꞌñànj an huê danj nùkuaj gaꞌmin,
11 ni̱ gata:
—Ñùnj huin dàj rûnꞌ gayiꞌì si̱nï̱n letra A ni̱ huê huin neꞌ rùkù nï̀nꞌïn dàj rûnꞌ huin letra Z.
Ga̱chru̱n sòꞌ riñan ꞌngo̱ librû sa giniꞌhiajꞌ,
ni̱ gàꞌnï̀nj ga̱ꞌan riñan nej chi̱j yiꞌnïnꞌ nej dinï̂nt huin si-nùhuì Ma̱ꞌan Jesús màn riñan hioꞌó Asia:
Gàꞌnï̀nj sòꞌ ga̱ꞌan riñan nej dinï̂nt màn Efeso;
riñan nej dinï̂nt màn Esmirna;
riñan nej dinï̂n màn Pérgamo;
riñan nej dinï̂nt màn Tiatira;
riñan nej dinï̂nt màn Sardis;
riñan nej dinï̂nt màn Filadelfia;
riñan nej dinï̂nt màn Laodisea.
12 Ni̱ nga giniꞌhiâ ahuin sa gaꞌmin riñânj,
ni̱ nga giniꞌhiâ ni̱ giniꞌín chi̱j kandelero agaꞌ oro,
13 ni̱ da̱nï̱n nej chi̱j kandelero,
giniꞌín nikïnꞌ Ma̱ꞌan Señor Jesús,
ni̱ nu̱nj ꞌngo̱ atsîj yèꞌè xi ni̱ gininj atsîj dânj nda yihiâ yiꞌij ni̱ yiꞌñan ꞌnïnj ꞌngo̱ nnïnj sinchu huin agaꞌ oro.
14 Ni̱ dàj rûnꞌ gàtsì hua to matsïj ï ni̱ dàj rûnꞌ gàtsì hua ꞌhueꞌe,
huê danj gàtsì hua duhuê ahui;
ni̱ rune ñanj hua dàj rûnꞌ ganayumàn ñaꞌaan;
15 ni̱ dàj rûnꞌ raa̱n hua riñan agaꞌ bronse ni̱ dàj rûnꞌ gira̱n giꞌhiaj guchrún ñan anun ñaꞌaan huê danj gira̱n giꞌhiaj dakó Ma̱ꞌan;
ni̱ dàj rûnꞌ gari̱n xi huaj ꞌngo̱ kïn xi ni̱ huê danj nda gari̱n chre gaꞌmin Ma̱ꞌan.
16 Ni̱ raꞌa neꞌ huàꞌaj ni̱kï̱nꞌ chi̱j atïꞌï,
ni̱ ruhuâ duꞌhua gahui ꞌngo̱ spâda hua̱ sìhià raa̱ ni̱ hua̱ huà nguèj riñanj;
ni̱ dàj rûnꞌ giràn giꞌhiaj duꞌhuej gui nga ûta sàꞌ girinïnj huê danj giràn giꞌhiaj riñanj.
17 Ni̱ nga giniꞌín dàj hua Ma̱ꞌan,
ni̱ dàj rûnꞌ giꞌhia si gàꞌ ꞌngo̱ gahuí giꞌhia ni̱ ganatû yiꞌij.
Sani̱ gutaj raꞌa neꞌ huàꞌaj yichrâ,
ni̱ gata gunḯn:
—Si̱ guyuꞌhuîꞌ mánj;
dadinꞌ ñùnj huin sa si̱nï̱ïn ni̱ ñùnj huin sa ꞌna̱ꞌ neꞌ rùkù nï̀nꞌïn;
18 gahuí sani̱ ganahuin nìꞌnàj,
ni̱ ga̱ne nìgànj nï̀nꞌ,
ni̱ huê danj huin rûꞌhuaj na̱nj ánj.
Ni̱ ni̱ka̱j sùnj ni̱ ga̱ꞌhue gi̱ꞌhia gàhuìꞌ nej guiì garanꞌ ruhuâj ni̱ huê danj na̱nj ga̱ꞌhue gi̱ꞌhia gànàꞌnï̀nj nej guiì gàꞌ gachinꞌ nej sij.
19 Ga̱chru̱n nej sa giniꞌînꞌ,
ni̱ ga̱chru̱n nej sa hua̱ hia̱j,
ni̱ ga̱chru̱n nej sa ga̱ neꞌ rùkù nej nânj.
20 Nej sa hua̱ huì ga̱ra̱n daꞌngaꞌ ruhuâꞌ rayiꞌî nej chi̱j atïꞌ giniꞌînꞌ raꞌá neꞌ huàꞌàj,
ni̱ sa hua̱ huì rayiꞌî nej chi̱j kantil huin agaꞌ oro:
Nej chi̱j atïꞌ giniꞌînꞌ dan huin chi̱j nej ángel ni̱kï̱nꞌ riñan nej chi̱j yìꞌnï̀nꞌ nej dinï̂nt huin si-nùhuìj,
ni̱ huê danj na̱nj nej chi̱j kantil giniꞌînꞌ dan huin nej chi̱j yiꞌnïnꞌ nej dinï̂nt huin si-nùhuìj.