Nuguan gaꞌanj riñan nej dinï̂nt nne ruhuâ yumanꞌ snàꞌànj Efeso
2
’Ga̱chru̱n sòꞌ riñan sôꞌ ni̱ka̱j ñuꞌunj riñan nej dinï̂nt màn ruhuâ yumanꞌ snàꞌànj Efeso:
“Ma̱ꞌan sa ni̱ka̱j chi̱j atïꞌï raꞌa neꞌ huàꞌaj,
Ma̱ꞌan sa aché siganï̂nj nej chi̱j agaꞌ oro tàj ñaꞌaan gataj dànanj:
2 Niꞌín rayiꞌî nej sa giꞌhiâꞌ,
ni̱ ûta ganahuij ruhuâꞌ giꞌhiaj sunꞌ ni̱ huê danj na̱nj ûta nùkuaj ruhuâꞌ;
ni̱ nitaj si garanꞌ ruhuâꞌ sa giꞌhiaj nej sí kï̱j huaa,
ni̱ huê danj na̱nj garânj hueꞌ nej sí gataj si huin nej sôꞌ apóstol ni̱ giniꞌînꞌ si sê danj huin nej sôꞌ,
dadinꞌ ganariꞌ si huin nej sôꞌ sí gidigañuꞌunj un;
3 ni̱ giranꞌ sa̱ñu̱nꞌ,
sani̱ ga nùkuaj ruhuâꞌ,
ni̱ ûta ganahuij ruhuâꞌ giꞌhiaj sunꞌ rayiꞌî guendâ ꞌì ruhuâꞌ niꞌînꞌ siyu̱guí sani̱ nun gi̱ni̱na̱j mánj.
4 Sani̱ nun ga̱ranꞌ ruhuâj sa giꞌhiâꞌ,
dadinꞌ nitaj si ꞌì ruhuâꞌ niꞌînꞌ ñùnj dàj rûnꞌ ga ꞌì ruhuâꞌ niꞌînꞌ ñùnj àsìj si̱nï̱ïn mánj.
5 Ga̱na̱nun ruhuâ sòꞌ,
dàj hueꞌê gi̱ꞌhiâꞌ nga giniꞌînꞌ si-nùguànꞌ Ma̱ꞌan Ñaꞌanj an,
ni̱ gànànìkàj ruhuâꞌ rayiꞌî guendâ ganahuin nu̱huîꞌ,
ni̱ gàyìꞌìꞌ ni̱ gi̱ꞌhiâꞌ nej sa hueꞌê giꞌhiaj si̱nï̱nꞌ,
dadinꞌ sisi̱ si̱ gayiꞌì ñûnꞌ gi̱ꞌhiáꞌ nej sa hueꞌê dânj,
ni̱ râꞌñanj gàꞌnàj riñanꞌ,
ni̱ ga̱ꞌne̱ agaꞌ oro tàj ñaꞌan rikîj riñanꞌ ni̱ na̱du̱naj ñan gita̱a,
ni̱ si hua̱ nun gànànìkàj ruhuâꞌ rayiꞌî guendâ ganahuin nu̱huîꞌ.
6 Sani̱ aꞌngô sa giꞌhiâꞌ huin si gininj ꞌì riñanꞌ nej sa aꞌnanꞌ giꞌhiaj nej sôꞌ nìkòꞌ rukû sí gùꞌnàj Nicolás,
ni̱ huê danj na̱nj gininj ꞌì nej sí nìkòꞌ rukû Nicolás riñânj.
7 Nej guiì tàj hiuꞌuj rakïj,
ni̱ gu̱nïn ninj nej nuguanꞌ gataj Ma̱ꞌan Espíritu Santo riñan nej guiì nìkòꞌ rukû Ma̱ꞌan Jesús.
Ni̱ nej guiì gunùkuaj giꞌhiaj ga̱nan,
ni̱ gàꞌhuìj ya̱ ninj nej chruj tsìꞌ gahiu raa̱ chrun gi̱ꞌhiaj ga̱ nìꞌnòꞌ,
dadinꞌ ni̱kï̱nꞌ chrun dânj da̱nï̱n yumanꞌ ña̱ꞌa̱nj huin siꞌhiaj Ma̱ꞌan Ñaꞌanj an.”
Nuguan gaꞌanj riñan nej dinï̂nt nne ruhuâ yumanꞌ snàꞌànj Esmirna
8 ’Ga̱chru̱n sòꞌ riñan sôꞌ ni̱ka̱j ñuꞌunj riñan nej dinï̂nt màn ruhuâ yumanꞌ snàꞌànj Esmirna:
“Ma̱ꞌan sa si̱nï̱ïn ni̱ Ma̱ꞌan sa gahuin neꞌ rùkù nï̀nꞌïn,
Ni̱ Ma̱ꞌan sa gahuiꞌ sani̱ ganaꞌnï̂n siganï̂nj nej nîman,
ni̱ huê Ma̱ꞌan huin sa gataj dànanj:
9 Niꞌín rayiꞌî nej sa giꞌhiâꞌ,
si gata ràꞌa nej sij sòꞌ,
ni̱ huê danj na̱nj giranꞌ àkoꞌ (sani̱ hua̱ yi̱ruꞌhueꞌ),
ni̱ niꞌín si gaꞌmin kï̱j nej sí gataj si huin nej sôꞌ judío riñanꞌ,
sani̱ sê judío huin nej sôꞌ mánj,
dadinꞌ huin nej sôꞌ ꞌngo̱ yiꞌnïnꞌ nìkòꞌ rukû Sichre.
10 Gàꞌ si do̱j sînj si̱ guyuꞌhuîꞌ si gi̱ranꞌ sa̱ñu̱nꞌ mánj.
Hia̱j gàyìꞌì sa nàsàꞌa ni̱ ga̱chri da̱ꞌa̱j nej suj dukuâ gaꞌa,
guendâ ga̱ya̱ka daꞌngaꞌa ngà nej suj,
ni̱ ga̱ta̱ ràꞌa nej sij chi̱ꞌ gui nej suj.
Sani̱ ga̱nikïnꞌ ranꞌ nej suj ngà si-nùguànꞌ Ma̱ꞌan Ñaꞌanj an nda gui gàhuìꞌ nej suj,
ni̱ ri̱kij korona ginun raa̱ nej suj ni̱ ga̱ne nìgànj nej suj na̱nj ánj.
11 Nej guiì tàj hiuꞌuj rakïj,
ni̱ gu̱nïn ninj nej nuguanꞌ gataj Ma̱ꞌan Espíritu Santo riñan nej guiì nìkòꞌ rukû Ma̱ꞌan Jesús.
Nej guiì gunùkuaj gananin,
ni̱ si̱ giranꞌ sa̱ñu̱n ninj dàj rûnꞌ giranꞌ sa̱ñu̱n aꞌngô nej guiì gaꞌanj ni̱ꞌhia̱ mánj.”
Nuguan gaꞌanj riñan nej dinï̂nt nne ruhuâ yumanꞌ snàꞌànj Pérgamo
12 ’Ga̱chru̱n sòꞌ riñan sôꞌ ni̱ka̱j ñuꞌunj riñan nej dinï̂nt màn ruhuâ yumanꞌ snàꞌànj Pérgamo:
“Ma̱ꞌan sa ni̱ka̱j spâda raa̱ sìhià chre hua̱ huà huìj riñan ni̱ dànanj gata:
13 Niꞌín rayiꞌî nej sa giꞌhiâꞌ,
ni̱ niꞌín dàj hua ñan nnêꞌ,
ni̱ niꞌín si ruhuâ yumanꞌ snàꞌànj nnêꞌ dan ni̱ hiuj dan nne sichre nikaj sunj;
dadinꞌ nùnj huin si giranꞌ sa̱ñu̱nꞌ sani̱ ganatâꞌ riñan nej sí dânj si nìkòꞌ rukú,
ni̱ nun gu̱du̱naj si guyumân ruhuâꞌ si niꞌînꞌ siyu̱guí mánj,
ni̱ ruhuâ yumanꞌ snàꞌànj dânj nne sichre nikaj sunj,
ni̱ nùnj huin si dagahuiꞌ nej sí dânj Antipas sôꞌ ûta gaꞌmin hueꞌê rayiꞌí sani̱ gàꞌ dânj ni̱ nun gu̱dunâjꞌ guendâ guyumân ruhuâꞌ niꞌînꞌ ñùnj mánj.
14 Sani̱ nitaj si hua̱ ruhuâj rayiꞌî do̱j nej sa aꞌnanꞌ giꞌhiâꞌ:
Dadinꞌ gaꞌnï̂nj mân nej sôꞌ naꞌhuej ruhuâ gu̱du̱naj nej nuguanꞌ gidigân Balam,
dadinꞌ Balam huin sí nagaꞌhuiꞌ chrej yìꞌìi ni̱ gataj sôꞌ si du̱naꞌnga Balac si ya̱ nej Israelita nej nihia gataꞌ riñan nej ñaꞌanj giꞌhiaj ra̱ꞌa nej síi ni̱ huê danj na̱nj dunaꞌnga sôꞌ si ga̱che̱ sìgìchràꞌ nej Israelita.
15 Ni̱ huê danj na̱nj gaꞌnï̂njꞌ mân nej sôꞌ guyumân ruhuâ niꞌin nej nuguanꞌ gidigân sôꞌ gùꞌnàj Nicolás,
ni̱ hua̱ hia ni̱ nitaj si gininj hueꞌê nej sôꞌ riñânj mánj.
16 Huê danj ni̱,
nànìkàj ruhuâꞌ rayiꞌî nej nânj;
dadinꞌ si si̱ gananikàj ra̱ꞌña̱nj ruhuâ,
ni̱ râꞌñanj gàꞌnàj riñanꞌ,
ni̱ ngà nuguanꞌ ga̱hui̱ ruhuâ duꞌhuá ni̱ rìkìj kastîgu riñanꞌ ngà riñan nej guiì dagahuin nuguanꞌ gidigân Nicolás.
17 Nej guiì tàj hiuꞌuj rakïj,
ni̱ gu̱nïn ninj nej nuguanꞌ gataj Ma̱ꞌan Espíritu Santo riñan nej guiì nìkòꞌ rukû Ma̱ꞌan Jesús.
Nej guiì gunùkuaj giꞌhiaj ga̱nan,
ni̱ gàꞌhuìj ya̱ ninj rachrún maná ꞌnïnj huì,
ni̱ huè danj na̱nj gàꞌhuìj ꞌngo̱ hiëj gàtsì lij raꞌa ninj,
ni̱ riñan hiëj dânj gachrûnj siyu̱gui ninj sa nàkàa,
ni̱ gàꞌ si ꞌngo̱ nej guiì nun niꞌin sa nnùn riñan hiëj dânj man ꞌngo̱ rïn Ma̱ꞌan sa ganahuin ra̱ꞌa ninj huin sa niꞌin na̱nj ánj.”
Nuguan gaꞌanj riñan nej dinï̂nt nne ruhuâ yumanꞌ snàꞌànj Tiatira
18 ’Ga̱chru̱n sòꞌ riñan sôꞌ ni̱ka̱j ñuꞌunj riñan nej dinï̂nt màn ruhuâ yumanꞌ snàꞌànj Tiatira:
“Ni̱ rune ñan Ma̱ꞌan Daꞌní Ma̱ꞌan Ñaꞌanj an hua dàj rûnꞌ ganayumàn ñaꞌaan,
ni̱ dàj rûnꞌ gira̱n agaꞌ bronse huê danj gi̱ran dakó Ma̱ꞌan,
ni̱ gata dànanj:
19 Niꞌín rayiꞌî nej sa giꞌhiâꞌ,
ni̱ niꞌín si ꞌì ruhuâꞌ niꞌînꞌ ñùnj,
ni̱ niꞌín si guyumân ruhuâꞌ niꞌînꞌ ñùnj,
ni̱ niꞌín si gunânj gi̱tsîꞌ riñan aꞌngô nej duguîꞌ,
ni̱ niꞌín si nùkuaj hua ruhuâꞌ,
ni̱ niꞌín si dànanj giꞌhiaj sunꞌ doj hia̱j gàꞌ daꞌ nga gayiꞌì si̱nï̱nꞌ giniꞌînꞌ ñùnj.
20 Sani̱ nitaj si hua̱ ruhuâj rayiꞌî do̱j nej sa aꞌnanꞌ giꞌhiâꞌ:
Dadinꞌ gaꞌnï̂njꞌ giꞌhiaj nej sij dàj rûnꞌ giꞌhiaj siyànà gùꞌnàj Jezabel,
siyànà gataj si huin sa ganataꞌ dàj ga̱huin ni̱ gidiganj ni̱ ni̱ka̱ mâñan dàj gidigañuꞌun nej guiì gunânj gi̱tsi riñânj,
ni̱ gata si ga̱ꞌhue ga̱che̱ sìgìchràꞌ ninj,
ni̱ ga̱ꞌhue ya̱ ninj sa gutaꞌ nej sôꞌ riñan nej ñaꞌanj gidigañuꞌunj.
21 Ni̱ gaꞌhuí diû riñanj si gànànìkàj ruhuaj rayiꞌî nej sa giꞌhia,
sani̱ naꞌhue gànànìkàj ruhuaj dadinꞌ hua̱ na̱nj dagahuin gej riñan nej ñaꞌanj gidigañuꞌunj.
22 Hia̱j ni̱ gi̱ꞌhia si ûta ga̱ꞌnanj gi̱nga riñan si-na,
ni̱ sisi̱ si̱ gananikàj ruhuâ nej guiì dagahuin sa gidiganj ni̱ gi̱ꞌhia si ûta gi̱ranꞌ sa̱ñu̱n ninj.
23 Ni̱ gi̱ꞌhia si ga̱ꞌna̱nꞌ nej guiì nun dagahuin sa gatâ ni̱ neꞌ rùkù ni̱ gàhuìꞌ ninj gi̱ꞌhia,
huê danj ni̱ giniꞌin daranꞌ nej guiì nìkòꞌ rukú si ñùnj huin sa na̱ru̱ꞌhue riñan ninj dàj na̱nj hua ma̱ꞌan sa giꞌhiaj ninj.
24 Sani̱ nej suj ni̱ aꞌngô nej dinï̂nt màn ruhuâ yumanꞌ snàꞌànj Tiatira ni̱ si nitaj si da̱gahuin nej suj nuguanꞌ gidigân Jezabel,
ni̱ si nun gi̱ri̱ñu̱n ruhuâ nej suj gi̱ni̱ꞌin nej suj sa hua̱ huì nï̀nꞌ ruhuâ niꞌin sichre.
Ni̱ nitaj aꞌngô sun gàꞌnï̀nj riñan nej suj gàꞌ mánj.
Man sa gàtà huin nej nânj;
25 ni̱ du̱gumîn nej suj sa guyumân ruhuâ nej suj,
nda gui gàꞌnàj.
26 Ni̱ guiì gunùkuaj gachîn riñan nej sa chìꞌ huaa ni̱ dagahuin ninj riñan daranꞌ sun gaꞌnḯn riñan ninj nda aꞌngô rïn gui gane ninj riñan hioꞌó nânj,
ni̱ gi̱ꞌhia si gi̱nikaj su̱n ninj riñan nej país màn ruhuâ yumiguì,
27 dàj rûnꞌ ginikaj su̱nj ni̱ huê danj gi̱nikaj sun ninj ni̱ ga̱ra̱n sun ninj niꞌî agaꞌa nga gi̱nikaj su̱n ninj riñan nej guiì,
ni̱ du̱guachranꞌ ninj nej guiì naꞌhuej da̱gahuin ni̱ dàj rûnꞌ giyichraꞌ ꞌngo̱ ruj giꞌhiaj sí giꞌhiaj ruj huê danj gi̱ranꞌ nej guiì dânj;
28 ni̱ gàꞌhuìj atïꞌ gisîj ruhuâ si̱ꞌnï̱nꞌ man raꞌa ninj.
29 Nej guiì tàj hiuꞌuj rakïj,
ni̱ gu̱nïn ninj nej nuguanꞌ gataj Ma̱ꞌan Espíritu Santo riñan nej guiì nìkòꞌ rukû Ma̱ꞌan Jesús.”