Nuguan gaꞌanj riñan nej dinï̂nt nne ruhuâ yumanꞌ snàꞌànj Sardis
3
’Ga̱chru̱n sòꞌ riñan sôꞌ ni̱ka̱j ñuꞌunj riñan nej dinï̂nt màn ruhuâ yumanꞌ snàꞌànj Sardis:
“Ma̱ꞌan sa ni̱ka̱j chi̱j si-espíritu Ma̱ꞌan Ñaꞌanj an ni̱ Ma̱ꞌan sa ni̱ka̱j chi̱j atïꞌï gataj dànanj:
Niꞌín rayiꞌî nej sa giꞌhiâꞌ,
dadinꞌ gataj si hua̱ nìꞌnà sani̱ gahuîꞌ na̱nj ánj.
2 Dugumîn hueꞌê sòꞌ ma̱ꞌanꞌ,
ni̱ na̱gi̱ꞌhiaj ni̱ka̱ꞌ aꞌngô nej sa hua̱ hueꞌê giꞌhiâꞌ dadinꞌ sisi̱ si̱ duguꞌnï̂nꞌ na̱giꞌhiaj ni̱ka̱ꞌ nej sa hua̱ hueꞌê giꞌhiâꞌ ni̱ gàꞌ ꞌngo̱ gi̱rëꞌ nï̀nꞌ;
dadinꞌ niꞌín si nitaj si hua̱ ni̱ka̱ sa giꞌhiâꞌ riñan Ma̱ꞌan Ñaꞌanj an mánj.
3 Ga̱na̱nun ruhuâ sòꞌ,
ahuin sa ganahuin ra̱ꞌâꞌ ni̱ ahuin sa gunïnꞌ;
ni̱ du̱gumîn nej sa hua̱ hueꞌê doj giꞌhiâꞌ ni̱ nànìkàj ruhuâꞌ rayiꞌî nej sa aꞌnanꞌ giꞌhiâꞌ.
Dadinꞌ si nitaj si dugumînꞌ ma̱ꞌan,
ni̱ gàꞌnàj riñanꞌ dàj rûnꞌ gaꞌnaꞌ sí tu̱u,
ni̱ si̱ giniꞌînꞌ dàj orâ gàꞌnàj riñanꞌ mánj.
4 Sani̱ màn do̱j nej guiì nìkòꞌ rukú ruhuâ yumanꞌ snàꞌànj Sardis giꞌhiâꞌ ni̱ nitaj si giꞌhiaj ninj gakï̱nꞌïn riñânj;
ni̱ ni̱ka̱j duguiꞌ ninj ngàj dadinꞌ dagahuin hueꞌê ninj riñânj ni̱ nun ga̱che̱j giꞌhiaj ninj mánj,
ni̱ dàj rûnꞌ hua guiì nun atsîj gàtsìi huê danj nitaj si hua̱ gakï̱nꞌïn riñan ninj mánj.
5 Ni̱ guiì gunùkuaj giꞌhiaj ga̱nan ni̱ gàꞌhuìj atsîj gàtsìi gi̱nun ninj;
ni̱ si̱ nadurëꞌë́ siyu̱gui ninj riñan librû tàj siyu̱gui nej guiì gàꞌ giriꞌ nìꞌhiaj ga̱ne nìgànj,
ni̱ huê danj na̱nj gànàtàj si niꞌín siyu̱gui ninj riñan Ma̱ꞌan Rê ni̱ huê danj na̱nj gànàtàj si niꞌín siyu̱gui ninj riñan nej ángel na̱nj ánj.
6 Nej guiì tàj hiuꞌuj rakïj,
ni̱ gu̱nïn ninj nej nuguanꞌ gataj Ma̱ꞌan Espíritu Santo riñan nej guiì nìkòꞌ rukû Ma̱ꞌan Jesús.”
Nuguan gaꞌanj riñan nej dinï̂nt nne ruhuâ yumanꞌ snàꞌànj Filadelfia
7 ’Ga̱chru̱n sòꞌ riñan sôꞌ ni̱ka̱j ñuꞌunj riñan nej dinï̂nt màn ruhuâ yumanꞌ snàꞌànj Filadelfia:
“Huê dànanj taj Ma̱ꞌan Ñaꞌanj an gè staꞌuu,
Ma̱ꞌan sa yàngàꞌa,
Ma̱ꞌan sa ni̱ka̱j si-yabe rey David,
Ma̱ꞌan sa ganaꞌnï̂nj rahueꞌe ni̱ nitaj gàꞌ si ꞌngo̱ gunùkuaj ganarán,
ni̱ ganaran riñan rahueꞌe ni̱ nitaj gàꞌ si ꞌngo̱ gunùkuaj ganaꞌnï̂nj:
8 Niꞌín rayiꞌî daranꞌ nej sa giꞌhiâꞌ,
hia̱j ni̱ ganï̂nj ꞌngo̱ rahueꞌ hua̱ nîꞌnï̱nj riñanꞌ ni̱ gàꞌ si ꞌngo̱ guiì si̱ gaꞌhue ga̱na̱rán;
dadinꞌ nùnj huin si do̱j sînj guesâ hua riñanꞌ,
sani̱ dagahuînꞌ si-nùguànꞌànj,
ni̱ nun gudunâj sun gaꞌnḯn riñanꞌ mánj.
9 Hia̱j ni̱ gi̱ꞌhia,
si nej sí taj si huin nej sôꞌ judío sani̱ sê judío huin nej sôꞌ dadinꞌ gahuin nej sôꞌ yiꞌnïnꞌ nìkòꞌ rukû sichre;
dadinꞌ man si gidigañuꞌunj nej sôꞌ;
ni̱ gi̱ꞌhiâ si ga̱ꞌna̱ꞌ nej sij ni̱ ga̱nikïnꞌ rúdàkòj nej sij riñanꞌ,
ni̱ ga̱na̱ka̱j guendâ nej sij si ꞌì ruhuâj niꞌín sòꞌ.
10 Rayiꞌî guendâ ga nùkuaj ruhuâꞌ ni̱ dagahuînꞌ nuguanꞌ guchruj sùnj riñanꞌ,
ni̱ rayiꞌî dan ni̱ du̱gumînj sòꞌ orâ nga ga̱ya̱ka sichre daꞌngaꞌa ngà daranꞌ nej guiì màn nï̀nꞌ gàchràꞌ ruhuâ yumiguìi,
ni̱ ga̱ra̱n huej daranꞌ nej guiì màn nï̀nꞌ gàchràꞌ riñan hioꞌóo ni̱ gi̱ni̱ꞌín ahuin nej guiì ginûn ñan ñùnj.
11 Hia̱j ni̱ râꞌña̱nj gàꞌnàj,
ni̱ du̱gumînꞌ ma̱ꞌanꞌ ni̱ si̱ gudunâj guendâ guyumân ruhuâꞌ niꞌînꞌ ñùnj,
daꞌnga ni̱ si̱ ganakaj aꞌngô nej sij si-ko̱rona mánj.
12 Ni̱ sí gunùkuaj,
ni̱ gi̱ꞌhiâ si ga̱huin sôꞌ chran kastiyu ni̱kï̱nꞌ gata hueꞌ huin si-nùhuì Ma̱ꞌan Ñaꞌanj an,
ni̱ nitaj àmàn huaj ga̱hui̱ sí dânj hiuj dânj;
ni̱ gàchrùnj siyu̱gui Ma̱ꞌân Daꞌân riñan sôꞌ,
ni̱ huê danj na̱nj gàchrùnj riñan sôꞌ siyu̱gui yumanꞌ snàꞌànj huin si-hiaj Ma̱ꞌan Daꞌân ni̱ gùꞌnàj yumanꞌ snàꞌànj dânj Jerusalén huin sa nàkàa,
ni̱ yumanꞌ snàꞌànj dânj nikòꞌ gininj gaꞌnaꞌ yàtàꞌa ni̱ huin siꞌhiaj Ma̱ꞌan Daꞌân,
ni̱ huê danj na̱nj gàchrùnj riñan nej sôꞌ siyu̱guí sa nàkàa.
13 Nej guiì tàj hiuꞌuj rakïj,
ni̱ gu̱nïn ninj nej nuguanꞌ gataj Ma̱ꞌan Espíritu Santo riñan nej guiì nìkòꞌ rukû Ma̱ꞌan Jesús.”
Nuguan gaꞌanj riñan nej dinï̂nt nne ruhuâ yumanꞌ snàꞌànj Laodisea
14 ’Ga̱chru̱n sòꞌ riñan sôꞌ ni̱ka̱j ñuꞌunj riñan nej dinï̂nt màn ruhuâ yumanꞌ snàꞌànj Laodisea:
“Huê dànanj gataj Ma̱ꞌan sa gùꞌnàj.
Huê dan huin rûꞌhuaj,
Ma̱ꞌan sa ganataꞌ nuguanꞌ yàngàꞌ hi̱a,
Ma̱ꞌan sa yàngàꞌa hi̱a,
ni̱ Ma̱ꞌan giꞌhiaj rayiꞌî dan gaꞌhue giꞌhiaj Ma̱ꞌan Ñaꞌanj an daranꞌ nej sa màn guruguiꞌ giniꞌhio,
ni̱ huê dànanj gata:
15 Niꞌín rayiꞌî daranꞌ nej sa giꞌhiâꞌ,
ni̱ nitaj si huînꞌ sa nu̱huij ni̱ nitaj si huînꞌ sa ña̱ꞌan.
Dùgùnàj huaj si ga̱huînꞌ sa nu̱huij nej si ga̱huînꞌ sa ña̱ꞌan.
16 Sani̱ guendâ huînꞌ sa gï̀ïn,
ni̱ nitaj si huînꞌ sa nu̱huij ni̱ nitaj si huînꞌ sa ña̱ꞌan,
ni̱ gùchràn sòꞌ ni̱ gahuiꞌ ruhuâ duꞌhuá.
17 Dadinꞌ sòꞌ taj:
Ni̱ yi̱ruꞌhuee huín,
ni̱ ûta hua yi̱ruꞌhuej,
ni̱ nitaj nùnj huin sa ga̱chin riñânj;
sani̱ nun niꞌînꞌ si huînꞌ gànìki chre,
ni̱ huînꞌ ꞌngo̱ sí gachín ka̱ri̱da,
ni̱ àko ranꞌ,
ni̱ duchri huînꞌ,
ni̱ nnïnj daj chre dan huaꞌ.
18 Hia̱j ni̱ nàrìkìj chrej e riñanꞌ ni̱ dùgùnàj huaj si gi̱ranꞌ agaꞌ oro sàꞌ hia sa hia̱j gachîn riñan ñaꞌaan riñânj,
daꞌnga ni̱ gahuin yi̱ruꞌhueꞌ,
ni̱ gi̱ranꞌ riñânj atsîj gàtsìi gi̱nunꞌ,
daꞌnga ni̱ si̱ guruguiꞌ si hua̱ nnèꞌ dadinꞌ nàꞌàj huaj;
ni̱ gàꞌnï̀njꞌ ruhuâ rune ñanꞌ gonoꞌô gùꞌnàj kolirio,
daꞌnga ni̱ giniꞌin hueꞌêꞌ.
19 Ni̱ du̱gunïn gàꞌìj ni̱ gaꞌhuí kastîgu riñan daranꞌ nej guiì ꞌì ruhuâj;
ni̱ du̱guꞌnïnꞌ ni̱ dagahuînꞌ,
ni̱ nànìkàj ruhuâ rayiꞌî nej gakï̱nꞌ giꞌhiâꞌ.
20 Hia̱j ni̱ nìkï̀nj riñan rahueꞌe ni̱ gakï̂n;
ni̱ si hua̱ ꞌngo̱ guiì gunïn gaꞌmînj ni̱ naꞌnï̂n ninj riñan rahueꞌe,
ni̱ ga̱ꞌhue gàtù ruhuâ ma̱ꞌan nimân ninj,
ni̱ yàj ngà ninj,
ni̱ huê danj na̱nj ya ninj ngàj.
21 Ni̱ guiì gunùkuaj ni̱ gàꞌhuìj ga̱ne ninj ñan gané ginikaj sùnj,
dàj rûnꞌ gunùkua giꞌhiaj ga̱nanj ni̱ rayiꞌî dan ni̱ gaꞌanj ga̱né ñan nne Ma̱ꞌan Rê nikaj sunj.
22 Nej guiì tàj hiuꞌuj rakïj,
ni̱ gu̱nïn ninj nej nuguanꞌ gataj Ma̱ꞌan Espíritu Santo riñan nej guiì nìkòꞌ rukû Ma̱ꞌan Jesús.”