Nnùn ñaꞌanj nej ángel màn yàtàꞌa Ma̱ꞌan Jesús
4
Neꞌ rùkù nânj giniꞌhia ni̱ giniꞌín,
si hua̱ nîꞌnïnj riñan ꞌngo̱ rahueꞌe nda yàtàꞌa;
ni̱ sa gunïn si̱nï̱n nï̀nꞌïnj huin,
ni̱ gahuin dàj rûnꞌ nùkuaj gaꞌñânj chrun âꞌñànj an,
ni̱ gaꞌmin ngàj,
ni̱ gata gu̱nḯn:
—Ga̱hui̱ ga̱ꞌna̱ꞌ neꞌ dànanj,
ni̱ gi̱di̱gán nej sa ga̱huin neꞌ rùkù nej nânj na̱nj ánj.
2 Ni̱ nda nanè chre ni̱ gidigân Ma̱ꞌan Espíritu Santo ñùnj,
ni̱ giniꞌín ni̱kï̱nꞌ ꞌngo̱ chrun yîla nda yàtàꞌa,
ni̱ riñan chrun yîla dânj nne ꞌngo̱ sa nne.
3 Ni̱ Ma̱ꞌan sa nne hiuj dânj hua dàj rûnꞌ hua hiëj gùꞌnàj jaspe ngà hiëj kornalina;
ni̱ ganikàj rukû chrun yilâ dânj nikïnꞌ ꞌngo̱ yukuá gu̱ꞌlûj,
ni̱ dàj rûnꞌ hua hiëj gùꞌnàj esmeralda hua yukuá gu̱ꞌluj.
4 Ni̱ ganikàj rukú chrun yilâ nìko dânj nikïnꞌ aꞌngô ko̱ ga̱ꞌanj chrun yîla,
ni̱ riñan nej chrun yîla dânj nne ko̱ ga̱ꞌanj nej síchìj achij i,
ni̱ nu̱n nej sôꞌ atsîj gàtsìi,
ni̱ nu̱n ahui nej sôꞌ korona huin agaꞌ oro.
5 Ni̱ ñan ni̱kï̱nꞌ chrun yilâ dânj gahui sinàn duꞌhui,
ni̱ huê danj na̱nj gaguâj duꞌhui ni̱ gunḯn gaꞌmin guiì hiuj dânj,
ni̱ neꞌ ri̱ña̱n ñan ni̱kï̱nꞌ chrun yilâ dânj nikïnꞌ chi̱j chrun tàj ñaꞌan gudugùun,
ni̱ nej chi̱j chrun ñaꞌan nânj huin nej chi̱j si-espíritu Ma̱ꞌan Ñaꞌanj an.
6 Ni̱ neꞌ ri̱ña̱n ñan ni̱kï̱nꞌ chrun yilâ dânj nun nne ña̱ꞌa̱nj ni̱ nda akà chre hua riñanj ni̱ dàj rûnꞌ akà hua riñan biriu huaj.
Ni̱ nìchrùnꞌ ganikàj rukû chrun yilâ dânj ni̱kï̱nꞌ ga̱ꞌanj nej sa hua̱ nìꞌnàꞌa ni̱ ûta gàꞌì rune ñan nej sa hua̱ nìꞌnàꞌ dânj hua,
ni̱ manj neꞌ ri̱ña̱n ni̱ ganikàj neꞌ rukû nej sa hua̱ nìꞌnàꞌ dânj.
7 Ni̱ dàj rûnꞌ hua sigeꞌej e hua sa si̱nï̱n ïn;
ni̱ dàj rûnꞌ hua rô hua sa huìj i;
ni̱ dàj rûnꞌ hua síi hua sa huàꞌnï̀nj;
ni̱ dàj rûnꞌ hua yataa nga nun yôꞌ riñan nanèe hua sa ga̱ꞌanj.
8 Ni̱ nnùn huàtànꞌ sigàchi daꞌ goꞌngo̱ nej ga̱ꞌanj nej sa hua̱ nìꞌnàꞌ dânj,
ni̱ nnùn gàꞌì rune ñan ninj neꞌ ye̱ꞌe ngà neꞌ rùhuà ninj,
ni̱ neꞌ gui ngà neꞌ ñànꞌan ni̱ nitaj àmàn giyichinꞌ ruhuâ nej sa hua̱ nìꞌnàꞌ dânj guendâ ga̱ta̱j ninj:
Sa gèe,
sa gèe,
sa gèe,
huin Ma̱ꞌan Señor giꞌhiaj daranꞌanj,
sa gahuin,
ni̱ sa huin hia̱j,
ni̱ sa ga̱ꞌna̱ꞌa.
9 Ni̱ daranꞌ diû ni̱ gaꞌmin hueꞌê ni̱ nagiꞌhiaj nìko ni̱ gaꞌhuiꞌ nej sa hua̱ nìꞌnàꞌ dânj si guruhuâ Ma̱ꞌan sa nne riñan chrun yilâ,
10 ni̱ huê danj na̱nj ganikïnꞌ rúdàkòj nej ko̱ ga̱ꞌanj nej síchìj achij dânj riñan Ma̱ꞌan sa nne riñan chrun yilâ,
ni̱ ginûn ña̱ꞌa̱nj nej sôꞌ riñan Ma̱ꞌan sa nne nìꞌnàꞌ daranꞌ diû,
ni̱ guduguêj nej sôꞌ si-ko̱rona nej sôꞌ neꞌ ña̱n ñan ni̱kï̱nꞌ chrun yilâ nne Ma̱ꞌan sa nne hiuj dânj,
ni̱ gataj nej sôꞌ:
11 Señor,
hua̱ ni̱ña̱n si gi̱nikaj su̱n Ma̱ꞌân rèꞌ riñan nej ñûnj
ni̱ hua̱ ni̱ña̱n si ga̱ꞌmi̱n hueꞌê nej ñûnj ni̱ gi̱nikaj chre̱j nej ñûnj riñan Ma̱ꞌân rèꞌ,
dadinꞌ Ma̱ꞌân rèꞌ huin sa giꞌhiaj daranꞌanj,
ni̱ Ma̱ꞌân rèꞌ garanꞌ ruhuâ rayiꞌî dan gahuin daranꞌ nej sa màn giniꞌhioꞌ,
ni̱ Ma̱ꞌân rèꞌ garanꞌ ruhuâ rayiꞌî dan nï̀nꞌ hua daranꞌanj.