Librû ni̱ Matsïj hua̱ lij
5
Ni̱ giniꞌín si ꞌnï̱nj raꞌa neꞌ huàꞌ Ma̱ꞌan sa nne riñan chrun yilâ dânj ꞌngo̱ librû ni̱ màn letra neꞌ ye̱ꞌe ni̱ màn letra neꞌ rùhuàꞌ librû dânj,
ni̱ ꞌnïnj si-da̱ꞌnga chi̱j seyu riñan librû dânj.
2 Ni̱ giniꞌín ꞌngo̱ ángel ni̱ ûta nìko nikaj sunj gaꞌmin ni̱ gata:
—Ahuin si giriꞌ nìꞌhiaj gùchràꞌ ni̱ ga̱na̱ꞌnï̱n riñan seyu nânj ràꞌaj.
3 Sani̱ gàꞌ yàtàꞌa ni̱ gàꞌ riñan hioꞌóo ni̱ gàꞌ riki hioꞌóo ni̱ nitaj sa ga̱ꞌna̱ꞌnï̱n ni̱ gi̱ni̱ꞌhiaj riñan librû dânj.
4 Ni̱ ûta dugueꞌé,
dadinꞌ nitaj gàꞌ si ꞌngo̱ sí giriꞌ nìꞌhiaj ga̱na̱ꞌnï̱n ni̱ ga̱hia̱ ni̱ gi̱niꞌhiaj riñan librû nânj.
5 Ni̱ gataj ꞌngo̱ nej síchìj achij dânj gunḯn:
—Ni̱ si̱ dugueꞌêꞌ mánj.
Dadinꞌ ꞌngo̱ nej daꞌnin si̱ꞌnï̱n David sôꞌ dugûꞌnàj nej sij sigeꞌej ni̱kï̱nꞌ riñan estado Judea,
ni̱ sôꞌ gunùkuaj gùtù seyu ni̱ ga̱na̱ꞌnï̱n sôꞌ riñan librû.
6 Giniꞌhiâ,
ni̱ giniꞌín si da̱ꞌa̱j ñan ni̱kï̱nꞌ chrun yilâ ni̱ ñan ni̱kï̱nꞌ ga̱ꞌanj nej sa hua̱ nìꞌnàꞌ dânj ni̱ ñan màn nej ko̱ ga̱ꞌanj síchìj achij i,
ni̱kï̱nꞌ ꞌngo̱ sôꞌ hua̱ dàj rûnꞌ hua Matsïj hua̱ lij ni̱ dàj rûnꞌ hua̱ ꞌngo̱ yuku gahuiꞌi,
ni̱ nnùn chi̱j sikú xuj,
ni̱ nnùn chi̱j rune ñan xuj,
ni̱ nej nânj huin nej chi̱j si-espíritu Ma̱ꞌan Ñaꞌanj an nej sa gaꞌanj nï̀nꞌ gàꞌchràꞌ riñan hioꞌóo.
7 Ni̱ gaꞌan ni̱ gidaꞌa librû ꞌnï̱nj raꞌa neꞌ huàꞌ Ma̱ꞌan sa nne riñan chrun yîla ni̱kï̱nꞌ hiuj dânj.
8 Ni̱ nga gisîj gidaꞌa librû,
ni̱ nej ga̱ꞌanj sa hua̱ nìꞌnàꞌ dânj ni̱ nej ko̱ ga̱ꞌanj nej síchìj achij dânj ni̱ ganikïnꞌ rúdàkòj nej sôꞌ riñan Ma̱ꞌan sa hua̱ dàj rûnꞌ hua Matsïj ïj;
ni̱ nikaj daranꞌ nej sôꞌ arpa,
ni̱ ꞌnï̱nj raꞌa nej sôꞌ kopa ni̱ ruhuâ kopa dânj ni̱ nda nìchra chre mân sikíi ni̱ nej sikí dânj huin nej nuguanꞌ gachín nìꞌhiaj nej sij nitaj si giꞌhiaj gakï̱nꞌïn;
9 ni̱ gachrá nej sij ꞌngo̱ chraꞌ nàkàa,
ni̱ gataj nej sij:
Hua̱ ni̱ña̱n si ga̱na̱huin ràꞌa Ma̱ꞌan rèꞌ librû ni̱ gùchràꞌ Ma̱ꞌan rèꞌ nej seyu;
dadinꞌ huê Ma̱ꞌân rèꞌ huin sa gahuiꞌ,
ni̱ ngà tun Ma̱ꞌan rèꞌ girânj rèꞌ nej ñûnj guendâ ga̱huin nej ñûnj daꞌní Ma̱ꞌan Ñaꞌanj an,
daranꞌ nej dùguìꞌ nej guiì ni̱ daranꞌ nej nânj màn ruhuâ yumiguìi ni̱ daranꞌ nej yumanꞌ màn ruhuâ yumiguìi ni̱ daranꞌ nej país;
10 ni̱ giꞌhiá rèꞌ si ga̱huin nej ñûnj rey ni̱ rej,
ni̱ gi̱ꞌhiá rèꞌ si gi̱nikaj su̱n nej ñûnj riñan hioꞌóo.
11 Ni̱ giniꞌhia ni̱ gunḯn gaꞌmin ûta gàꞌì millón nej ángel,
ganikàj neꞌ rùkù ñan ni̱kï̱nꞌ chrun yîla nne Ma̱ꞌan Ñaꞌanj an,
ni̱ ñan màn nej sa hua nìꞌnàꞌ dânj,
ni̱ ñan màn nej ko̱ ga̱ꞌanj nej síchìj achij i;
12 ni̱ ûta nùkuaj gaꞌmin nej ángel ni̱ gataj ninj:
Hua̱ ni̱ña̱n si ga̱na̱ka̱j su̱n Ma̱ꞌan Jesús
dadinꞌ gàꞌ gahuij ni̱ ûta nìko ga̱ sa ga̱na̱huin ra̱ꞌa,
ni̱ huin sa chru̱n nï̀nꞌ ruhuâ,
ni̱ huin dàj rûnꞌ huin hiëj yìngà xi,
huê danj ni̱ gi̱nikaj chre̱ꞌ riñanj,
ni̱ ga̱ꞌmi̱n hueꞌêꞌ yiꞌij ni̱ ga̱chro̱ꞌ chraꞌa riñan Ma̱ꞌan.
13 Ni̱ gunḯn gaꞌmin daranꞌ nej sa giꞌhiaj Ma̱ꞌan Ñaꞌanj an,
nej sa màn yàtàꞌa,
nej sa màn riñan hioꞌóo,
nej sa màn riki hioꞌóo,
ni̱ nej sa màn ruhuâ nne ña̱ꞌa̱nj ni̱ gataj ninj:
Ni̱ ga̱chro̱ꞌ chraꞌa,
ni̱ gi̱nikaj chre̱ꞌ,
ni̱ ga̱ꞌmi̱n hueꞌêꞌ,
ni̱ gi̱ꞌhiôꞌ si gi̱nikaj sun Ma̱ꞌan Jesús dadinꞌ gàꞌ gahuij,
sani̱ nne nìgànj chre na̱nj ánj.
14 Ni̱ gataj nej ga̱ꞌanj sa hua̱ nìꞌnàꞌ dânj:
—Huê danj huin rûꞌhuaj na̱nj ánj.
Ni̱ ganikïnꞌ rúdàkòj nej ko̱ ga̱ꞌanj nej síchìj achij dânj ni̱ ginûn ña̱ꞌa̱nj nej sôꞌ riñan Ma̱ꞌan Ñaꞌanj an ni̱ riñan Ma̱ꞌan sa nne nìgànj daranꞌ diû.