Nej chi̱j seyu
6
Ni̱ giniꞌín nga gutù Ma̱ꞌan Jesús ꞌngo̱ seyu si̱nï̱ïn,
ni̱ gunḯn gaꞌmin ꞌngo̱ nej ga̱ꞌanj nej sa hua̱ nìꞌnàꞌ dânj ni̱ dàj rûnꞌ nùkuaj gaguâj duꞌhui huê danj nùkuaj gaꞌmin ninj ni̱ gataj ninj:
—Gu̱hua̱ꞌ ni̱ gi̱niꞌhiaj râj.
2 Ni̱ giniꞌhiâ,
ni̱ giniꞌín ꞌngo̱ guahiû gàtsìi;
ni̱ tàj ꞌngo̱ síi yichrá yôꞌ ni̱ ꞌnï̱nj raꞌa sôꞌ ꞌngo̱ chrun stuneꞌe;
ni̱ ganahuin ra̱ꞌa sôꞌ ꞌngo̱ korona guendâ gi̱nun ahui sôꞌ,
ni̱ gahui sôꞌ gaꞌanj sôꞌ guendâ giꞌhiaj ga̱nan sôꞌ.
3 Ni̱ nga gutuj seyu huìj i,
ni̱ gunḯn gaꞌmin sa nìꞌnàꞌ huin sa huìj i ni̱ gata:
—Gu̱hua̱ꞌ ni̱ gi̱niꞌhiaj râj.
4 Ni̱ gahui ngo̱ guahiû hui̱ꞌi;
ni̱ tàj ꞌngo̱ síi yichrá yôꞌ ni̱ ganahuin ra̱ꞌa sí dânj suun guendâ ga̱ꞌne̱ sôꞌ si ga̱ nìn riñan hioꞌóo,
ni̱ gi̱ꞌhiaj sôꞌ si dagahuiꞌ ꞌngo̱ ni̱ aꞌngô nej guiì duguiꞌ ninj;
ni̱ ganahuin ra̱ꞌa sôꞌ ꞌngo̱ spâda nìko xi.
5 Ni̱ nga gutuj seyu huàꞌnï̀nj ïn,
ni̱ gunḯn gaꞌmin sa huàꞌnï̀nj ni̱ gata:
—Gu̱hua̱ꞌ ni̱ gi̱ni̱ꞌhiaj râj.
Ni̱ giniꞌhiâ,
ni̱ giniꞌín ꞌngo̱ guahiû ma̱ruu,
ni̱ tàj ꞌngo̱ síi yichrá yôꞌ ni̱ nï̱nj ꞌngo̱ achruꞌ da̱ꞌnga̱ꞌa raꞌa sôꞌ.
6 Ni̱ gunḯn gaꞌmin ꞌngo̱ sa gaꞌmin siganï̂nj nej ga̱ꞌanj sa hua̱ nìꞌnàꞌ dânj,
ni̱ gata:
—Ga̱ꞌ duꞌhue ꞌngo̱ kilu arru,
dàj rûnꞌ giꞌhiaj ga̱nunꞌ ꞌngo̱ gui,
ni̱ ga̱ duꞌhue huàꞌnï̀nj kilu sebada,
dàj rûnꞌ giꞌhiaj ga̱nunꞌ ꞌngo̱ gui;
sani̱ si̱ giꞌhiaj yìꞌìꞌ gasîti ngà nne bino mánj.
7 Ni̱ nga gutuj seyu ga̱ꞌanj,
ni̱ gunḯn gaꞌmin sa nìꞌnàꞌ huin sa ga̱ꞌanj dânj ni̱ gata:
—Gu̱hua̱ꞌ ni̱ giniꞌhiaj râj.
8 Giniꞌhiâ,
ni̱ giniꞌín ꞌngo̱ guahiû ma̱hia̱j a,
ni̱ sí tàj yichrá guahiû dânj gùꞌnàj sí dagahuiꞌi.
Ni̱ rukû nânj nikòꞌ sí ni̱ka̱j sun riñan nej guiì gàꞌ gahuiꞌi,
ni̱ giriꞌ nìꞌhiaj sí dagahuiꞌi gi̱nikaj su̱n sôꞌ riñan nda da̱ꞌa̱j sa ànèj hioꞌóo,
ni̱ dagahuiꞌ sôꞌ ngà spâda nej guiì,
ni̱ huê danj na̱nj giꞌhiaj sôꞌ si gàhuìꞌ nej guiì gi̱ꞌhiaj yiꞌnaa,
ni̱ ûta gahuiꞌ nej guiì giꞌhiaj yiꞌìi,
ni̱ huê danj na̱nj gahuiꞌ nej guiì giꞌhiaj nej yuku hu̱e màn riñan hioꞌóo.
9 Ni̱ nga gutuj seyu ùnꞌùnꞌun,
ni̱ giniꞌín mân ûta gàꞌì ma̱ꞌan nimân nej guiì ganikïnꞌ ran,
yiꞌî si-na ñaꞌanj an,
dadinꞌ gahuiꞌ ninj rayiꞌî si-nùguànꞌ Ma̱ꞌan Ñaꞌanj an,
ni̱ dagahuin hueꞌê ninj riñan Ma̱ꞌan Ñaꞌanj an
10 Ni̱ ûta gachín nìꞌhiaj ninj ni̱ gataj ninj:
—Señor,
Ñaꞌanj an yàngàꞌa huin Ma̱ꞌân rèꞌ,
ni̱ nda àmàn na̱gi̱ꞌhiaj Ma̱ꞌân rèꞌ guendâ ni̱ gi̱ꞌhiaj Ma̱ꞌan rèꞌ kastîgu nej guiì giꞌhiaj gahuiꞌ nej dinḯn nej ñûnj nï̀nꞌ gàchràꞌ riñan hioꞌóo ràꞌaj.
11 Ni̱ ganahuin ra̱ꞌa nej sôꞌ atsîj gàtsìi gi̱nun nej sôꞌ,
ni̱ gunïn su̱n nej sôꞌ si ga̱na̱ra̱n ruhuâ nej sôꞌ doj diû,
nda gìsìj número daꞌhui gàhuìꞌ aꞌngô nej dinḯn nej sôꞌ dàj rûnꞌ gahuiꞌ nej sôꞌ.
12 Ni̱ giniꞌhia nga gutuj seyu huàtànꞌanj,
ni̱ gayiꞌij ni̱ gaꞌhuij ꞌngo̱ ñûn nùkuaj xi;
ni̱ nda ma̱ru chre gahuin riñan gui giꞌhiaj hioꞌó hiaj ni̱ huaj dàj rûnꞌ hua ma̱ru riñan atsîj riñanj ni̱ñanj xi,
ni̱ dàj rûnꞌ hua ma̱re tun huê danj ganahuin ma̱re riñan ahuii;
13 ni̱ gininj nej atïꞌ màn yàtàꞌa riñan hioꞌóo,
dàj rûnꞌ gininj chruj îgu riñan hioꞌóo nga nnunj raa̱ chrun îgu giꞌhiaj nanèe.
14 Ni̱ ga̱na̱rë̱ꞌ yàtàꞌa dàj rûnꞌ narumin nej sij ꞌngo̱ ñanj;
ni̱ ganadunâ ñan ni̱kï̱nꞌ daranꞌ nej kïj ï ni̱ ganaduna ñan ni̱kï̱nꞌ daranꞌ nej hioꞌó nu̱n ruhuâ nnee.
15 Ni̱ giyiꞌîj huì daranꞌ nej rey ni̱ka̱j su̱n riñan hioꞌóo,
ni̱ daran nej sí ni̱ka̱j sun nìko,
nej sí yi̱ruꞌhuee,
nej kapitán ni̱ka̱j ñuꞌunj riñan nej stâdu,
nej sí yiruꞌhue nìko xi,
nej guiì huin musu,
ni̱ daranꞌ nej guiì nàsìnùnj un,
ni̱ gaꞌanj gìyìꞌìj huì ninj ruhuâ nej huej màn riki kïj ï;
16 ni̱ gataj ninj gu̱nïn nej kïj ï ngà nej huej e:
—Gi̱ni̱nj nej suj yichrá nej ñûnj,
ni̱ gìyìꞌìj huì nej ñûnj riñan Ma̱ꞌan sa nne riñan chrun yîla nìko,
dadinꞌ ûta ginaꞌan ruhuâ Ma̱ꞌan niꞌin nej ñûnj ni̱ huê Ma̱ꞌan huin sa gùꞌnàj Matsïj ï na̱nj ánj;
17 dadinꞌ gàꞌ guyumân gui nìko xi gi̱ranꞌ sa̱ñu̱n nej guiì gi̱ꞌhiaj Ma̱ꞌan Ñaꞌanj an;
ni̱ ahuin guiì gùnùkuaj ga̱chi̱n riñan sañun dânj ràꞌaj.