ꞌNgo̱ sientu tá huìj xia ga̱ꞌanj mîn nej Israelita
7
Neꞌ rùkù nej nânj ni̱ giniꞌín nikïnꞌ ga̱ꞌanj ángel niꞌhiaj ninj riñan hioꞌóo ni̱ ꞌngoj nikïnꞌ giniꞌhiaj neꞌ yìchràj a,
aꞌngôj nikïnꞌ giniꞌhiaj neꞌ ri̱ki,
aꞌngôj nikïnꞌ giniꞌhiaj neꞌ gisîj gui ni̱ aꞌngôj nikïnꞌ giniꞌhiaj neꞌ gatûj gui,
ni̱ ni̱kï̱nꞌ ninj guendâ ga̱ra̱nꞌ ñuꞌunj ninj sisi̱ si̱ gachîn nanèe riñan hioꞌóo,
ni̱ si̱ gaꞌhuiꞌ gàꞌ si do̱j nanèe riñan hioꞌóo,
ni̱ si̱ gaꞌhuij riñan nne ña̱ꞌa̱nj,
ni̱ si̱ gaꞌhuiꞌ gàꞌ si do̱j sînj riñan nej chrun.
2 Ni̱ giniꞌín gaꞌnaꞌ aꞌngô ángel neꞌ gisîj gui,
ni̱ nika si-seyu Ma̱ꞌan Ñaꞌanj hua̱ nìꞌnàꞌa;
ni̱ ûta nùkuaj gagua riñan nej ga̱ꞌanj ángel ganakaj su̱n guendâ gi̱ꞌhiaj yìꞌì ninj riñan hioꞌóo ngà nne ña̱ꞌa̱nj,
ni̱ gata:
3 —Si̱ giꞌhiaj yìꞌì nej suj hioꞌóo,
ni̱ nne ña̱ꞌa̱nj ni̱ gàꞌ si giꞌhiaj yìꞌì nej suj nej chrun mánj,
nda gisîj gachrîj nej ñûnj daꞌngaꞌa hio nej guiì huin si-musû Ma̱ꞌan Daꞌanj nej ñûnj.
4 Ni̱ gunḯn si giyiꞌij daꞌngaꞌa:
ꞌNgo̱ sientu tá huìj xia ga̱ꞌanj mîn nej guiì màn siganï̂nj nej yùhuìj yiꞌnïnꞌ huin nej dùguìꞌ Israelita.
5 Yiꞌnïnꞌ nej dùguìꞌ Judá,
huin yùhuìj mîn giyiꞌij daꞌngaꞌa.
Yiꞌnïnꞌ nej dùguìꞌ Rubén,
huin yùhuìj mîn giyiꞌij daꞌngaꞌa.
Yiꞌnïnꞌ nej dùguìꞌ Gad,
huin yùhuìj mîn giyiꞌij daꞌngaꞌa.
6 Yiꞌnïnꞌ nej dùguìꞌ Aser,
huin yùhuìj mîn giyiꞌij daꞌngaꞌa.
Yiꞌnïnꞌ nej dùguìꞌ Neftalí,
huin yùhuìj mîn gayiꞌij daꞌngaꞌa.
Yiꞌnïnꞌ nej dùguìꞌ Manasés,
huin yùhuìj mîn giyiꞌij daꞌngaꞌa.
7 Yiꞌnïnꞌ nej dùguìꞌ Simeón,
huin yùhuìj mîn giyiꞌij daꞌngaꞌa.
Yiꞌnïnꞌ nej dùguìꞌ Leví,
huin yùhuìj mîn giyiꞌij daꞌngaꞌa.
Yiꞌnïnꞌ nej dùguìꞌ Isacar,
huin yùhuìj mîn giyiꞌij daꞌngaꞌa.
8 Yiꞌnïnꞌ nej dùguìꞌ Zabulón,
huin yùhuìj mîn giyiꞌij daꞌngaꞌa.
Yiꞌnïnꞌ nej dùguìꞌ José,
huin yùhuìj mîn giyiꞌij daꞌngaꞌa.
Yiꞌnïnꞌ nej dùguìꞌ Benjamín,
huin yùhuìj mîn giyiꞌij daꞌngaꞌa.
Guiì rìgì nun atsîj gàtsìi
9 Neꞌ rùkù nânj giniꞌhia,
ni̱ giniꞌín mân nìko xi nej guiì rìgì,
màn daranꞌ nej país,
daranꞌ nej yiꞌnïnꞌïn,
daranꞌ nej yumanꞌan,
daranꞌ nej nânj aꞌmin nej guiì màn ruhuâ yumiguìi,
ni̱ gàꞌ siꞌ ꞌngo̱ nej guiì naꞌhue gùnùkuaj ga̱hia̱ nej guiì nânj,
ni̱ màn ninj neꞌ ri̱ña̱n ñan ni̱kï̱nꞌ chrun yilâ nne Ma̱ꞌan Ñaꞌanj an ngà Ma̱ꞌan Jesús,
ni̱ nu̱n daranꞌ ninj atsîj gàtsìi,
ni̱ ꞌnïnj ꞌngo̱ ñun raꞌa ninj;
10 ni̱ gaguâj nùkuaj staꞌu ninj,
ni̱ gataj ninj:
Ma̱ꞌan Ñaꞌanj nne riñan chrun yîla,
ni̱ Ma̱ꞌan huin sa gi̱ꞌhiaj ga̱na̱ni̱n nêꞌ,
ngà Ma̱ꞌan Jesús.
11 Ni̱ nda ganikàj chre neꞌ rùkù ñan nne Ma̱ꞌan Ñaꞌanj an ngà ñan màn nej síchìj achij i ni̱ nej ga̱ꞌanj sa hua̱ nìꞌnàꞌ dânj nikïnꞌ gahia nej ángel;
ni̱ ganikïnꞌ rúdàkòj daranꞌ nej sij ni̱ gàꞌ ꞌngo̱ ganûn hio nej sij riñan hioꞌóo ni̱ ginûn ña̱ꞌa̱nj nej sij Ma̱ꞌan Ñaꞌanj an,
12 ni̱ gataj nej sij:
Huê danj huaj.
Ni̱ ga̱ꞌmi̱n hueꞌê nêꞌ,
ni̱ na̱gi̱ꞌhiaj nìko nêꞌ Ma̱ꞌan,
dadinꞌ Ma̱ꞌan huin sa niꞌin nï̀nꞌ ruhuâ,
ni̱ ga̱ꞌmi̱n hueꞌêꞌ rayiꞌî sunuj ganahuin roꞌôꞌ giꞌhiaj Ma̱ꞌan,
ni̱ gi̱ni̱kaj chre̱jꞌ riñanj,
dadinꞌ Ma̱ꞌan huin sa gunùkuaj giꞌhiaj ga̱nan riñan daranꞌanj,
ni̱ Ma̱ꞌan huin sa ni̱ka̱j su̱n,
ni̱ daranꞌ nej nânj huin sa ga̱na̱huin ra̱ꞌa Ma̱ꞌan Daꞌanj nêꞌ,
nìgànj nï̀nꞌ.
Ni̱ huê danj huin rûꞌhuaj.
13 Hiôꞌ ni̱ gachín naꞌanj ꞌngo̱ nej síchìj achij dânj ñùnj ni̱ gataj sôꞌ:
—Ahuin sí huin nej sí nu̱n atsîj gàtsì nânj ni̱ dànèꞌ gaꞌnaꞌ nej sôꞌ ràꞌaj.
14 Hiôꞌ ni̱ gatâ:
—Sòꞌ huin sa niꞌin na̱nj Señor.
Hiôꞌ ni̱ gataj sij gunḯn:
—Nej sôꞌ nânj gahui siganï̂nj sañun nìko xi ga riñan hioꞌóo,
ni̱ dagahuin nej sij daranꞌ nuguanꞌ giyiꞌnïnꞌ su̱n riñan nej sij,
ni̱ ngà tun Ma̱ꞌan Jesús ganaruhui daranꞌ si-ga̱kïn nej sij.
15 Ni̱ rayiꞌî dan ni̱ gaꞌhue nikïnꞌ nej sij neꞌ riñan ñan nne Ma̱ꞌan Ñaꞌanj an,
ni̱ unânj gi̱tsi nej sij riñan Ma̱ꞌan Ñaꞌanj an neꞌ gui ngà neꞌ ñànꞌan ruhuâ si-nùhuì Ma̱ꞌan;
ni̱ du̱gumîn Ma̱ꞌan nej sij.
16 Ni̱ si̱ ganachinj yiꞌnaa riki nej sij ni̱ si̱ ganakô nej sij nnee,
huê danj na̱nj nitaj àmàn ga̱ka̱ nej sij gi̱ꞌhiaj gui ni̱ nitaj àmàn gaka nej sij gi̱ꞌhiaj nân gàꞌ mánj;
17 dadinꞌ nne Ma̱ꞌan Jesús ñan nne Ma̱ꞌan Ñaꞌanj an ni̱ huej huin sa dugumîn nej sij ni̱ huej huin si-pastor nej sij,
ni̱ huê Ma̱ꞌan huin gi̱nikaj ga̱ꞌa̱nj nej sij ñan nu̱n nne gi̱ꞌhiaj ga̱ nìꞌnàꞌ nej sij;
ni̱ huê danj na̱nj du̱nakò Ma̱ꞌan Ñaꞌanj an daranꞌ nne gañanj riñan nej sij ngà dugueꞌe nej sij na̱nj ánj.