Seyu chi̱j i ngà agaꞌ duguaka sikíi
8
Nga gutuj seyu chi̱j i,
ni̱ dḯn chre gahuin yàtàꞌa daꞌngaꞌ ꞌngo̱ si da̱ꞌa̱j ora.
2 Ni̱ giniꞌín nikïnꞌ ga̱hia chi̱j ángel riñan Ma̱ꞌan Ñaꞌanj an;
ni̱ ganahuin ra̱ꞌa ninj chrun aꞌñànj an.
3 Hiôꞌ ni̱ gaꞌnaꞌ aꞌngô ángel ni̱ ganikïnj ñan ni̱kï̱nꞌ nna huin agaꞌ oro,
ni̱ ꞌnï̱nj raꞌa agaꞌ duguaka sikíi ni̱ màn daranꞌ nej nuguanꞌ gachín nìꞌhiaj nej dinï̂nt ruhuâ agaꞌ dânj ni̱ gachra nej sij ûta nìko sikíi ruhuâ agaꞌ dânj ni̱ gaꞌanj du̱guaka sikí dânj riñan nna huin agaꞌ oro ni̱kï̱nꞌ riñan Ma̱ꞌan Ñaꞌanj an.
4 Huê danj ni̱ gahui gatse̱ꞌe ngà nuguanꞌ gachín niꞌhiaj nej dinï̂nt gaꞌan riñan Ma̱ꞌan Ñaꞌanj an.
5 Ni̱ gidaꞌa ángel agaꞌ duguaka sikíi,
ni̱ gidaꞌa ñaꞌan ane nu̱n riñan nna agaꞌ oro ni̱kï̱nꞌ riñan Ma̱ꞌan Ñaꞌanj an;
ni̱ dagamanj ñaꞌan ane dânj riñan hioꞌóo,
ni̱ orâ ni̱ gahui sinàn duꞌhui ni̱ gaguâj duꞌhui,
ni̱ gaꞌmin sa gaꞌmin dânj,
ni̱ huê danj na̱nj gaꞌhuij ꞌngo̱ ñûn nùkuaj xi.
Nej chrun âꞌñànj an
6 Ni̱ gayiꞌì nej chi̱j ángel ni̱ka̱j chrun âꞌñànj an ni̱ gaꞌñânj ninj.
7 Huê danj ni̱ gaꞌñânj ángel si̱nï̱ïn,
ni̱ gamanꞌ gumàn a̱ta̱an,
ñaꞌaan ni̱ tun,
ni̱ gaka da̱ꞌa̱j hioꞌóo;
ni̱ gachin doj riñan da̱ꞌa̱j sa da̱ꞌa̱j a gaka nej chrun ni̱ gaka da̱ꞌa̱j nej koj mare̱e.
8 Ni̱ gaꞌñânj ángel huìj i chrun âꞌñànj an,
ni̱ dàj rûnꞌ hua ꞌngo̱ kïj xi hua ꞌngo̱ sa anûn ñaꞌaan ni̱ ginin ruhuâ nne ña̱ꞌa̱nj,
ni̱ gachîn riñan da̱ꞌa̱j sa da̱ꞌa̱j a nne ña̱ꞌa̱nj ganahuin tun.
9 Hiôꞌ ni̱ gachîn riñan da̱ꞌa̱j sa da̱ꞌa̱j a gahuiꞌ nej yuku màn ruhuâ nne ña̱ꞌa̱nj,
ni̱ huê danj na̱nj gachîn riñan da̱ꞌa̱j sa da̱ꞌaj a ganahuij nej barku girëꞌ.
10 Ni̱ gaꞌñânj ángel huàꞌnï̀nj ïn chrun âꞌñànj an,
ni̱ gininj ꞌngo̱ atïꞌ xi ni̱ anûn ñaꞌaan man ni̱ ginin neꞌ yàtàꞌa,
ni̱ gachîn da̱ꞌa̱j sa da̱ꞌa̱j a riñan nej kïn ginin,
ni̱ huê danj na̱nj ginin ñan gaꞌnga nnee.
11 Ni̱ siyu̱gui a̱tïnꞌ dânj huin sa àìꞌi,
ni̱ gachín riñan da̱ꞌa̱j sa da̱ꞌa̱j a ganahuin àìꞌ nnee;
ni̱ nga goꞌo nej guiì nne dânj ni̱ gahuiꞌ ninj giꞌhia,
dadinꞌ ganahuin àìꞌ nne dânj.
12 Ni̱ gaꞌñânj ángel ga̱ꞌanj chrun âꞌñànj an,
ni̱ gachîn riñan da̱ꞌa̱j sa da̱ꞌa̱j gui giranꞌ yiꞌì giꞌhia,
ni̱ giranꞌ yiꞌì gachîn riñan da̱ꞌa̱j sa da̱ꞌa̱j ahuii,
ni̱ giranꞌ yiꞌì gachîn riñan da̱ꞌa̱j sa da̱ꞌa̱j nej atïꞌï,
ni̱ gahuin ru̱mi̱nꞌ gachîn riñan da̱ꞌa̱j sa da̱ꞌa̱j nej atïꞌï,
ni̱ gachîn riñan da̱ꞌa̱j sa da̱ꞌa̱j gahuin ru̱mi̱nꞌ neꞌ gui,
ni̱ gachîn riñan da̱ꞌa̱j sa da̱ꞌa̱j gahuin ru̱mi̱nꞌ neꞌ ñànꞌàn.
13 Giniꞌhiâ,
ni̱ giniꞌín gachîn ꞌngo̱ ángel hua da̱ꞌa̱j yàtàꞌa,
ni̱ ûta nùkuaj agua ni̱ gata:
—Ûta gi̱ranꞌ sa̱ñu̱n nej guiì màn riñan hioꞌóo,
ûta gi̱ranꞌ sa̱ñu̱n nej guiì màn riñan hioꞌóo,
ûta gi̱ranꞌ sa̱ñu̱n nej guiì màn riñan hioꞌóo,
dadinꞌ nï̀nꞌ ga̱chin ga̱ꞌña̱nj huaꞌnï̂nj ángel chrun âꞌñànj an na̱nj ánj.