9
Ni̱ gaꞌñânj ángel ùnꞌùnꞌun chrun âꞌñànj an,
ni̱ giniꞌín gininj ꞌngo̱ atïꞌ màn yàtàꞌa riñan hioꞌóo;
ni̱ huê danj na̱nj ganahuin ra̱ꞌa ángel dânj agaꞌ ra̱ꞌa ganaꞌnï̂nj riñan hiuꞌuj gu̱nu̱n xi nun riki hioꞌóo.
2 Ni̱ ganaꞌnï̂nj ángel dânj riñan hiuꞌuj gu̱nu̱n xi nu̱n riki hioꞌóo,
ni̱ gahui gatse̱ꞌe ruhuâ hiuꞌuj dânj ni̱ dàj rûnꞌ hua nga gahui gatse̱ꞌe ruhuâ ꞌngo̱ guchrún nìko xi huê danj huaj;
ni̱ gahuin ru̱mi̱nꞌ riñan gui ni̱ huê danj na̱nj ganarëꞌ nanèe giꞌhiaj gatse̱ꞌ gahui ruhuâ hiuꞌuj dânj.
3 Ni̱ siganï̂nj gatse̱ꞌ nânj gahui yirikí staꞌnaj a ni̱ gayaꞌnï̂n nej yôꞌ nï̀nꞌ gàchràꞌ riñan hioꞌóo;
ni̱ gayatâj nej yôꞌ dàj rûnꞌ gayatâj nej yikïn màn riñan hioꞌóo.
4 Ni̱ giyiꞌnïnꞌ suun riñan nej yôꞌ si si̱ yâ nej yôꞌ nej koj màn riñan hioꞌóo ni̱ gàꞌ si ꞌngo̱ nej chrinꞌ mare̱e,
ni̱ gàꞌ si ꞌngo̱ nej chrun,
ni̱ man sa duguaꞌì nej yôꞌ huin nej guiì nitaj si ꞌnï̱nj si-seyu Ma̱ꞌan Ñaꞌanj an hio.
5 Ni̱ giyiꞌnïnꞌ suun riñan nej yôꞌ,
guendâ ga̱ya̱ta̱ nej yôꞌ nej guiì riki ùnꞌùnꞌ ahuii,
sani̱ sê si̱ dagahuiꞌ nej yôꞌ nej guiì dânj mánj;
man si ginaꞌan gaꞌngaj dàj rûnꞌ gaꞌngaj naꞌan nga gayatâj yikïïn huê danj gi̱ranꞌ nej guiì giꞌhiaj nej yôꞌ.
6 Ni̱ nej gui dânj ni̱ ga̱nï̱n ruhuâ nej guiì gayatâj nej yuku nânj gàhuìꞌ ninj,
sani̱ si̱ gahuiꞌ ninj mánj;
ni̱ ûta ga̱huin ruhuâ ninj gàhuìꞌ ninj sani̱ si̱ gahuiꞌ ninj mánj.
7 Ni̱ hua̱ nej yirikí staꞌnaj nânj dàj rûnꞌ hua guahiû hua̱j ñan ûta nej síi;
ni̱ dàj rûnꞌ huaj si tàj ahui nej xuj ꞌngo̱ korona agaꞌ oro;
ni̱ dàj nun riñan nej guiì huê daꞌngaꞌ danj nun riñan nej yôꞌ;
8 ni̱ nìkòꞌ duhuê ahui nej xuj ni̱ huaj dàj rûnꞌ hua duhuê ahui nej siyànàa,
ni̱ dàj rûnꞌ hua ñanꞌ sigeꞌej e huê danj hua ñanꞌ nej xuj;
9 ni̱ arán nneè kú nej xuj ngà atsîj agaꞌa ni̱ dàj rûnꞌ garaꞌaj nga gachín nej karreta gunukuaj nej guâhiu unânj huaj ñan ûta nej sij,
huê danj garaꞌaj nga gita siga̱chi nej xuj;
10 ni̱ dàj rûnꞌ hua duneꞌ yikïïn hua duneꞌ nej xuj,
ni̱ tàj si-tanj nej xuj;
ni̱ ùnꞌùnꞌ ahuii ga̱ya̱ta̱ nej xuj ngà si-tanj nej xuj nej guiì.
11 Ni̱ rey ni̱ka̱j ñuꞌunj riñan nej xuj huin ángel ni̱ka̱j ñuꞌunj riñan hiuꞌuj nìko xi nu̱n riki hioꞌóo,
ni̱ nânj hebreo gùꞌnàj ángel dânj Abadón ni̱ nânj griego gùꞌnàj ángel dânj Apolión.
12 Ni̱ gachîn sañun si̱nï̱ïn;
sani̱ hua̱ na̱nj ga̱chin,
ga̱ꞌna̱ꞌ ahuîj sañuun rukû nej nânj.
13 Ni̱ gaꞌñânj ángel huàtànꞌan chrun âꞌñànj an,
ni̱ gunḯn gaꞌmin ꞌngo̱ sa gaꞌmin siganï̂nj nej ga̱ꞌânj sikú rô tàj riñan nna huin agaꞌ oro ni̱kï̱nꞌ neꞌ ri̱ña̱n Ma̱ꞌan Ñaꞌanj an,
14 ni̱ gataj ángel chi̱j ni̱ka̱j chrun âꞌñànj an:
—Ga̱na̱chi sòꞌ nej ga̱ꞌanj ángel ni̱kï̱nꞌ duꞌhua kïn gùꞌnàj Eufrates na̱nj ánj.
15 Ni̱ ganachi nej sôꞌ nej ga̱ꞌanj ángel ni̱ gàꞌ ni̱kï̱nꞌ chrun ninj ahuin orâ,
gui,
ahui,
hioꞌ,
guendâ gàyìꞌì ninj da̱gahuiꞌ ninj gachîn riñan da̱ꞌa̱j sa da̱ꞌa̱j nej guiì.
16 Ni̱ gunḯn,
si huìj siêntu millón huin nej sí stâdu tàj yichrá guâhiu.
17 Ni̱ huê danj na̱nj ganï̂n Ma̱ꞌan Ñaꞌanj an riñânj ni̱ giniꞌín nej guâhiu ni̱ giniꞌín si tàj nej síi yichrá nej xuj,
ni̱ garán agaꞌ ma̱re yiꞌñanj nej sôꞌ ni̱ dàj rûnꞌ hua ñaꞌaan huaj,
ni̱ huê danj na̱nj hua̱ kua̱n man dàj rûnꞌ hua hiëj Zafiro ni̱ hua̱ ma̱hia̱j man dàj rûnꞌ hua hioꞌó asufri.
Ni̱ hua̱ ahui nej guahiû dânj dàj rûnꞌ hua ahui sigeꞌej e;
ni̱ gahui ñaꞌaan ruhuâ duꞌhua xuj,
ni̱ gahui gatse̱ꞌe ni̱ hioꞌó asufri ruhuâ duꞌhua xuj.
18 Nej huàꞌnï̀nj sa yìꞌì xi nânj giꞌhiaj ni̱ gahuiꞌ da̱ꞌa̱j sa da̱ꞌa̱j nej guiì,
gahuiꞌ ninj giꞌhiaj ñaꞌaan,
gahuiꞌ ninj giꞌhiaj gatse̱ꞌe,
gahuiꞌ ninj giꞌhiaj hioꞌó asufri gahui ruhuâ duꞌhua nej guahiû dânj.
19 Ni̱ ñan nùkuaj doj huin duꞌhua nej guahiû dânj ngà duneꞌ nej yôꞌ;
dadinꞌ dàj rûnꞌ hua yukuáa hua duneꞌ nej yôꞌ;
ni̱ nnùn ahui duneꞌ nej yôꞌ ni̱ yâ ahui duneꞌ nej yôꞌ nej guiì.
20 Sani̱ aꞌngô da̱ꞌa̱j nej guiì nun gàhuìꞌ giꞌhiaj nej sa yìꞌì nânj,
ni̱ gàꞌ dânj ni̱ nun gànànìkàj ruhuâ ninj ngà rayiꞌî nej gakï̱nꞌ giꞌhiaj ninj mánj,
ni̱ gàꞌ danj ni̱ nun gu̱du̱nâj ninj guendâ ginu̱n ña̱ꞌa̱nj ninj nej sa kï̱j ï,
ni̱ gàꞌ dânj ni̱ nun gu̱du̱nâj ninj guendâ ginu̱n ña̱ꞌa̱nj ninj riñan nej daꞌnga oro giꞌhiaj ra̱ꞌa nej síi,
nej daꞌnga huin agaꞌ plata,
nej daꞌngaꞌ huin agaꞌ bronse,
nej daꞌngaꞌ huin hiëj,
nej daꞌngaꞌ huin chrun,
dadinꞌ nitaj si guruguiꞌ giniꞌhiaj nej daꞌngaꞌ dânj,
ni̱ huê danj na̱nj naꞌhue gu̱nïn ninj,
ni̱ naꞌhue ga̱che̱ ninj mánj.
21 Sani̱ gàꞌ dânj ni̱ nun gànànìkàj ruhuâ nej guiì rayiꞌî guendâ dagahuiꞌ ninj,
ni̱ guendâ giꞌhiaj stuꞌhuaj ninj,
ni̱ guendâ gaché sìgìchràꞌ ninj,
ni̱ guendâ giꞌhiaj tu̱ ninj mánj.