Ángel ꞌnï̱nj raꞌa ꞌngo̱ librû hua̱ lij
10
Ni̱ giniꞌín gininj aꞌngô ángel nùkuaj gaꞌnaj yàtàꞌa riki nnga,
ni̱ neꞌ a̱hui tá ꞌngo̱ yukuá gu̱ꞌluj;
ni̱ dàj rûnꞌ nùkuaj gudugùn duꞌhuej gui huê danj nùkuaj gudugunj,
ni̱ nda ganayumàn chre anûn ñaꞌaan nguèj dako.
2 Ni̱ ꞌnï̱nj raꞌa ꞌngo̱ librû hua̱ lij,
ni̱ ganïnj neꞌ huàꞌ dako ruhuâ nne ña̱ꞌa̱nj,
ni̱ dako neꞌ chrïn nikïnꞌ riñan hioꞌóo;
3 ni̱ ûta nùkuaj gaꞌmin,
ni̱ gahuin duꞌhua dàj rûnꞌ huin duꞌhua sigeꞌej e;
ni̱ nga gisîj ûta nùkuaj gaꞌmin,
ni̱ nda chi̱j gaguâj duꞌhui nga gisîj gaꞌmin.
4 Ni̱ nga gisîj gaguâj chi̱j duꞌhui ni̱ ganï̂n ruhuâj gàchrùnj;
sani̱ gunḯn gaꞌmin ꞌngo̱ sa gaꞌmin neꞌ yàtàꞌa ni̱ gata:
Si̱ gachrûnꞌ mánj.
—Man si gàꞌnï̀nj sàꞌ nej nuguanꞌ gunï̂nꞌ gaꞌmin nej duꞌhui dan.
5 Ni̱ giniꞌín ganachi nikaj ángel ni̱kï̱nꞌ dakó ruhuâ nne ña̱ꞌa̱nj ngà riñan hioꞌóo raꞌa yàtàꞌa,
6 giꞌhiaj yi̱tïn si-nùguànꞌanj ni̱ gata si ꞌngo̱ rïn Ma̱ꞌan Ñaꞌanj an huin sa niꞌin daranꞌanj,
dadinꞌ huê Ma̱ꞌan huin sa giꞌhiaj yàtàꞌa ni̱ daranꞌ nej sa màn yàtàꞌa,
ni̱ huê Ma̱ꞌan huin sa giꞌhiaj hioꞌóo ngà daranꞌ nej sa màn riñan hioꞌóo,
ni̱ huê Ma̱ꞌan huin sa giꞌhiaj nne ña̱ꞌa̱nj ngà daranꞌ nej sa màn ruhuâ nne ña̱ꞌa̱nj,
ni̱ gata:
—Nitaj si hua̱ nìko diû gàꞌ mánj;
7 dadinꞌ nga gùyùmàn gui,
ga̱ꞌña̱nj ángel chi̱j i chrun âꞌñànj an,
hiôꞌ ni̱ ga̱na̱huij daranꞌ nej sa hua̱ huì giꞌhiaj Ma̱ꞌan Ñaꞌanj an,
dàj rûnꞌ gata gu̱nïn nej sôꞌ gataj dàj ga̱huin nej sôꞌ gunânj gi̱tsi chre riñanj.
8 Ni̱ gunḯn gaꞌmin ñûn Ma̱ꞌan sa gaꞌmin neꞌ yàtàꞌa,
ni̱ gata gunḯn:
—Ga̱che̱ ga̱ꞌa̱njꞌ ni̱ gi̱daꞌaꞌ ñanj librû lij hua̱ niꞌnï̂nj riñan ꞌnïnj raꞌa ángel ni̱kï̱nꞌ ꞌngo̱ dakó ruhuâ nne ña̱ꞌa̱nj ngà riñan hioꞌóo.
9 Ni̱ gaꞌân riñan ángel ni̱kï̱nꞌ hiuj dânj,
ni̱ gata si ri̱kij librû lij dânj riñânj.
Ni̱ gata gu̱nḯn:
—Gi̱daꞌa sòꞌ ni̱ ya̱ꞌ;
sani̱ sa àìꞌi gahuin nga gi̱nin ruhuâ rikît sani̱ dàj rûnꞌ tsìꞌ gata gatsiꞌ yutan huê danj ga̱na̱huin tsìꞌ ruhuâ duꞌhuât gi̱ꞌhia.
10 Huê danj ni̱ gidaꞌâ librû lij dânj raꞌa ángel nânj,
ni̱ yaj;
ni̱ dàj rûnꞌ tsìꞌ gataꞌ gatsiꞌ yutan huê danj giꞌhia ruhuâ duꞌhuá,
sani̱ nga gisîj yaj,
ni̱ ganahuin àìꞌ ruhuâ rikí giꞌhiaj librû nânj.
11 Ni̱ gata gunḯn:
—Ña̱ꞌa̱n huaj si gànàtàꞌ ñûnꞌ dàj ga̱huin riñan ûta gàꞌì nej yumanꞌan,
riñan nej país màn ruhuâ yumiguìi,
riñan nej nânj aꞌmin nej guiì màn ruhuâ yumiguìi ni̱ riñan nej rey ni̱ka̱j su̱n riñan hioꞌóo na̱nj ánj.