Nguèj sí giniꞌin
11
Ni̱ rikij ꞌngo̱ metru raꞌá,
ni̱ gata gu̱nḯn:
—Gànàyùmàn sòꞌ,
ni̱ giriñunꞌ si-nùhuì Ma̱ꞌan Ñaꞌanj an,
ni̱ huê danj na̱nj giriñunꞌ si-na Ma̱ꞌan Ñaꞌanj an,
ni̱ gahiaꞌ daranꞌ nej guiì màn nnûn ña̱ꞌa̱nj Ma̱ꞌan Ñaꞌanj an hiuj dânj.
2 Sani̱ neꞌ ye̱ꞌ nuhuî dan ni̱ gu̱du̱nâj,
ni̱ si̱ giriñunꞌ mánj;
dadinꞌ lugâ dan gùnàj guendâ ganahuin ra̱ꞌa nej sí nàsìnùnj un;
ni̱ gùrùn nej sij hiuj dânj nga gi̱nikaj su̱n nej sij huìj xia huìj ahui riñan yumanꞌ snàꞌànj Jerusalén.
3 Sani̱ gàꞌnï̀n ga̱ꞌna̱ꞌ huìj sí ga̱na̱nï̱n rayiꞌí riki ꞌngo̱ mîn tá huìj siêntu tá huaꞌnï̂nj xia gui ni̱ gànàtàꞌ nguèj sôꞌ sa ga̱huin,
ni̱ gi̱nun nguèj sôꞌ atsîj riñan ni̱ñanj xi huin duhuê guâhiu.
4 Ni̱ nguèj sôꞌ ga̱na̱nï̱n,
huin nguèj chrun olibo ni̱ nguèj kantil ni̱kï̱nꞌ riñan Ma̱ꞌan Ñaꞌanj an nï̀nꞌ gàchràꞌ riñan hioꞌóo.
5 Ni̱ si hua̱ ꞌngo̱ sí ruhuâ gàꞌhuìꞌ niꞌhiaj nguèj sí nânj,
ni̱ gahui ñaꞌaan ruhuâ duꞌhua nguèj sôꞌ ni̱ orâ chre ni̱ ganahuij nej sí dânj gaka giꞌhiaj nguèj sôꞌ;
ni̱ si hua̱ ꞌngo̱ sí ruhuâ gi̱ꞌhiaj yìꞌì ngà nguèj sôꞌ,
ni̱ huê dànanj daꞌhui nej sí dânj gàhuìꞌ sôꞌ gi̱ꞌhiaj nguèj sij.
6 Ni̱ ni̱ka̱j sun nguèj sij guendâ garán nguèj sij yàtàꞌa ni̱ si̱ gamanꞌ nej gui nga gànàtàꞌ nguèj sij nej sa ga̱huin riñan hioꞌóo,
ni̱ ga̱ꞌhue gi̱ꞌhiaj nguèj sij si ga̱na̱huin nnee tun,
ni̱ ga̱ꞌhue gi̱ꞌhiaj nguèj sij ga̱ꞌna̱ꞌ,
andaj na̱nj ma̱ꞌan sa yìꞌì garanꞌ ruhuâ nguèj sij riñan hioꞌóo.
7 Ni̱ nga ganahuij diû ganataꞌ nguèj sij si-nùguànꞌànj riñan nej guiì,
ni̱ ga̱hui̱ ꞌngo̱ yuku nùkuaj xi ruhuâ hiuꞌuj gu̱nu̱n xi nun riki hioꞌóo ni̱ gutaꞌ yôꞌ ngà nguèj sij,
ni̱ gi̱ꞌhiaj ga̱nân yôꞌ ni̱ dagahuiꞌ yôꞌ nguèj sij.
8 Ni̱ gingaj nneè kú nguèj sij da̱nï̱n ñan naraꞌhuiꞌ nej guiì ruhuâ yumanꞌ snàꞌànj Jerusalén ni̱ huej gùꞌnàj Sodoma ngà Egipto,
ni̱ huê hiuj nânj huin ñan dunikòꞌ rùgùtsì nej sij Ma̱ꞌan Señor Jesús riñan rugutsìi.
9 Ni̱ giniꞌin daranꞌ nej yumanꞌan,
nej yiꞌnïnꞌïn,
nej nânj aꞌmin nej guiì màn ruhuâ yumiguìi,
nej país màn nï̀nꞌ gàchràꞌ nneè kú nguèj sij,
sani̱ nun ga̱ꞌhue̱j nej sôꞌ si gàchìnꞌ nneè kú nguèj sij huê danj ni̱ ginga huàꞌnï̀nj gui tá da̱ꞌa̱j.
10 Ni̱ ûta ga̱na̱huin nìhiàꞌ ni̱ ga̱huin nne̱ nej guiì màn nï̀nꞌ gàchràꞌ riñan hioꞌóo guendâ gahuiꞌ nguèj sí nânj,
ni̱ gaꞌhuiꞌ ninj regalo riñan ꞌngo̱ ni̱ aꞌngô nej duguiꞌ ninj;
dadinꞌ ûta giranꞌ sa̱ñu̱n nej guiì màn nï̀nꞌ gàchràꞌ riñan hioꞌóo giꞌhiaj nguèj profeta nânj.
11 Sani̱ nga gachîn huàꞌnï̀nj gui tá ané ni̱ ganaꞌnï̂nj nguèj sij giꞌhiaj Ma̱ꞌan Ñaꞌanj an,
ni̱ gananikïnꞌ ga̱hia nguèj sij ni̱ gaché nguèj sij,
huê danj ni̱ ûta guyuꞌhuiꞌ nej guiì nga giniꞌin ninj ganaꞌnï̂nj nguèj sij.
12 Ni̱ gunïn nguèj sij gaꞌmin nùkuaj staꞌu Ma̱ꞌan sa gaꞌmin neꞌ yàtàꞌa ni̱ gata:
—Ga̱hui̱ nguèj eꞌ ga̱ꞌna̱ꞌ nguèj eꞌ neꞌ dànanj na̱nj ánj.
Huê danj ni̱ gahui nguèj sij ni̱ gaꞌanj nguèj sij riñan nnga neꞌ yàtàꞌa;
ni̱ giniꞌin ri̱ña̱n nej guiì gunïnꞌ ngà nguèj sij nga gahui nguèj sij gaꞌanj nguèj sij yàtàꞌa.
13 Ni̱ orâ dânj ni̱ gaꞌhuij ꞌngo̱ ñûn nùkuaj xi ni̱ ganahuij daꞌngaꞌ ꞌngo̱ si da̱ꞌa̱j sa da̱ꞌa̱j a nej hueꞌ màn ruhuâ yumanꞌ snàꞌànj dânj gane,
ni̱ gahuiꞌ daꞌngaꞌ ꞌngo̱ si chi̱j mîn nej síi giꞌhiaj ñûn nùkuaj xi dânj,
huê danj ni̱ guyuꞌhuiꞌ nej guiì nun gahuiꞌ,
ni̱ gaꞌmin hueꞌê ninj rayiꞌî Ma̱ꞌan Ñaꞌanj nne yàtàꞌa.
14 Huê danj ni̱ gachîn sañun huìj i;
sani̱ hia̱j ni̱ nda râꞌñanj chre ni̱ gùyùmàn sañun huàꞌnï̀nj ïn.
Gaꞌña̱nj ángel chi̱j i chrun âꞌñànj an
15 Ni̱ gaꞌñânj ángel chi̱j i chrun âꞌñànj an,
ni̱ ûta nùkuaj gaꞌmin nej sa gaꞌmin neꞌ yàtàꞌa ni̱ gataj ninj:
Hia̱j ni̱ gi̱ni̱kaj su̱n Maꞌan Ñaꞌanj an ngà Ma̱ꞌan Cristo;
Riñan daranꞌ nej guiì màn ruhuâ yumiguìi;
ni̱ nìgànj nï̀nꞌ gi̱nikaj su̱n Ma̱ꞌan riñan nej guiì.
16 Ni̱ ganikïnꞌ rúdàkòj nej ko̱ ga̱ꞌanj nej síchìj achij nne riñan chrun yilâ ni̱kï̱nꞌ neꞌ ña̱n riñan Ma̱ꞌan Ñaꞌanj an,
ni̱ gàꞌ ꞌngo̱ ganûn hio nej sôꞌ riñan hioꞌóo ni̱ ginûn ña̱ꞌa̱nj nej sôꞌ riñan Ma̱ꞌan Ñaꞌanj an,
17 ni̱ gataj nej sôꞌ:
Rikî nej ñûnj si guruhuâ Ma̱ꞌân rèꞌ,
dadinꞌ Ma̱ꞌân rèꞌ huin Ma̱ꞌan Señor Ñaꞌanj an giꞌhiaj daranꞌanj,
ni̱ Ma̱ꞌân rèꞌ huin hia̱j,
ni̱ Ma̱ꞌân rèꞌ huin sa gahuin ni̱ Ma̱ꞌan rèꞌ huin sa ga̱ꞌna̱ꞌ,
dadinꞌ ganakaj Maꞌân rèꞌ sun nìko xi,
ni̱ ginikaj su̱n Ma̱ꞌân rèꞌ.
18 Ni̱ ginaꞌan ruhuâ nej sí ni̱ka̱j su̱n riñan nej país niꞌin nej sôꞌ Ma̱ꞌân rèꞌ,
sani̱ gananikàj Ma̱ꞌân rèꞌ ni̱ ginaꞌan ruhuâ Ma̱ꞌân rèꞌ niꞌîn rèꞌ nej sôꞌ,
sani̱ hia̱j ni̱ gàꞌ guyumân diû na̱gi̱ꞌhiaj Ma̱ꞌân rèꞌ guenda ngà nej sí gàꞌ gahuiꞌi,
ni̱ guyumân diû nàgàꞌhuìꞌ Ma̱ꞌân rèꞌ nanìꞌhiaj nej profeta giꞌhiaj sun si-su̱n Ma̱ꞌân rèꞌ,
ni̱ huê danj na̱nj nàgàꞌhuìꞌ Ma̱ꞌân rèꞌ nanìꞌhiaj nej sí dugumîn ma̱ꞌan riñan nej gakï̱nꞌïn,
ni̱ huê danj na̱nj nàgàꞌhuìꞌ Ma̱ꞌân rèꞌ ꞌngo̱ rasu̱un raꞌa nej sôꞌ ginikaj chre̱j ngà siyu̱gui Ma̱ꞌân rèꞌ;
ni̱ gaꞌhue si ni̱ka̱j nej sôꞌ sun yàkàan nej si nitaj sun nikaj nej sôꞌ,
ni̱ huê danj na̱nj gi̱ꞌhiá rèꞌ si gi̱ranꞌ sa̱ñu̱n nej sí gudurëꞌ hioꞌóo.
19 Huê danj ni̱ ganayiꞌnï̂nj riñan si-nùhuì Ma̱ꞌan Ñaꞌanj nne yàtàꞌa,
huê danj ni̱ giniꞌín nikïnꞌ ꞌngo̱ nna a̱gaꞌ huin oro ruhuâ si-nùhuì Ma̱ꞌan Ñaꞌanj an.
Ni̱ giniꞌín gahui sinàn duꞌhui,
ni̱ gunḯn gaꞌmin nej sa gaꞌmin,
ni̱ huê danj na̱nj gaguâj duꞌhui,
ni̱ gaꞌhuij ꞌngo̱ ñûn nùkuaj xi,
ni̱ huê danj na̱nj ûta gamanꞌ ataan.