Siyànàa ngà yukuá du̱ꞌhui ma̱re xi
12
Ni̱ guruguiꞌ ꞌngo̱ daꞌngaꞌ nìko xi neꞌ yàtàꞌa:
Ni̱ giniꞌín ꞌngo̱ siyànàa ni̱ dàj rûnꞌ nùkuaj giyigï̀n giꞌhiaj gui huê danj nùkuaj gudugunj,
ni̱ yiꞌij ni̱kï̱nꞌ ahuii,
ni̱ nu̱n ꞌngo̱ korona ahui ni̱ riñan korona dânj nnûn yùhuìj atïꞌï.
2 Ni̱ nun ri̱ki,
ni̱ guyumân gui ga̱ꞌnga̱ daꞌnin,
ni̱ gayiꞌïj ni̱ ûta gaꞌnïnj riki huê dan ni̱ gayi̱ꞌij ni̱ ûta gaguâj hia dadinꞌ gàꞌ ruhuâ gisîj orâ ga̱ꞌnga̱ daꞌnin.
3 Huê danj na̱nj guruguiꞌ aꞌngô daꞌngaꞌa neꞌ yàtàꞌa:
Ni̱ giniꞌín ꞌngo̱ yukuá du̱ꞌhui ma̱re xi ni̱ nnùn chij ahui xuj ni̱ nnùn chi̱ꞌ sikú xuj,
ni̱ nun diadema nej chij ahui xuj;
4 ni̱ gunukuaj duneꞌ xuj gachîn riñan da̱ꞌa̱j sa daꞌaj nej a̱tïnꞌ màn yàtàꞌa,
ni̱ guduninj xuj gaꞌnaꞌ nej atïꞌ dânj riñan hioꞌóo.
Huê danj ni̱ ganikïnꞌ chru̱n xuj riñan siyànà hia̱j ꞌhia ga̱ꞌnga̱ daꞌní,
guendâ ya̱ xuj ni̱ gàyàmànj xuj nda nanè chre silíj ga̱ꞌnga̱ dânj.
5 Ni̱ gaꞌnga daꞌní siyànà dânj ꞌngo̱ neꞌej naꞌhuu,
ni̱ ni̱ka̱j sôꞌ ꞌngo̱ niꞌî agaꞌa guendâ gi̱nikaj su̱n sôꞌ riñan daranꞌ nej país màn ruhuâ yumiguìi;
sani̱ gaꞌnêj nej sij sôꞌ riñan nni sôꞌ ni̱ ni̱ka̱j nej sij gaꞌanj nej sij sôꞌ ñan nne Ma̱ꞌan Ñaꞌanj an nikaj sunj.
6 Huê danj ni̱ gunânj siyànà dânj ni̱ gaꞌan riñan hioꞌóo nàkòo,
ñan gàꞌ hua yu̱gui ga̱ne giꞌhiaj Ma̱ꞌan Ñaꞌanj an,
ni̱ hiuj dânj gàꞌhuìꞌ nej sij yaj ꞌngo̱ mîn tá huìj sientu tá huaꞌnï̂nj xia gui.
7 Neꞌ rùkù ni̱ ûta gutaꞌ nej sij neꞌ yàtàꞌa:
Ni̱ gutaꞌ Miguel ni̱ nej si-angél sôꞌ ngà yukuá du̱ꞌhui;
ni̱ huê danj na̱nj ûta gutaꞌ nej yukuá du̱ꞌhui ngà nej dùguìꞌ Miguel;
8 sani̱ nun gùnùkuaj nej dùguìꞌ yukuá du̱ꞌhui gi̱ꞌhiaj ga̱nan nej yôꞌ,
huê danj ni̱ nitaj dànèꞌ hua neꞌ yàtàꞌa ga̱ne nej dùguìꞌ yôꞌ ngà nej ángel nìkòꞌ rukû yôꞌ gàꞌ mánj.
9 Huê danj ni̱ giri nej sij neꞌ ye̱ꞌe yukuá du̱ꞌhui ngà nej ángel nìkòꞌ rukú yôꞌ,
ni̱ huê yuku nânj huin yukuá nâ,
ni̱ huê yôꞌ huin sa nàsàꞌa,
ni̱ yôꞌ huin sa gidigañuꞌunj daꞌ hua nï̀nꞌ gàchràꞌ yumiguìi;
ni̱ gininj yôꞌ riñan hioꞌóo,
ni̱ huê danj na̱nj gininj nej ángel nìkòꞌ rukû yôꞌ riñan hioꞌóo.
10 Hiôꞌ ni̱ gunḯn ûta nùkuaj gaꞌmin ꞌngo̱ sa gaꞌmin neꞌ yàtàꞌa,
ni̱ gata:
—Hia̱j ni̱ guyumân diû ga̱na̱ni̱nꞌ,
ni̱ ꞌngo̱ rïn Ma̱ꞌan Ñaꞌanj an huin sa nùkuaj taꞌu,
ni̱ ꞌngo̱ rïn Ma̱ꞌan huin sa gi̱ni̱kaj su̱n,
ni̱ huê danj na̱nj gi̱nikaj su̱n Ma̱ꞌan Cristo;
dadinꞌ gunukuaj nej sij giri nej sij neꞌ ye̱ꞌe sichre ni̱kï̱nꞌ garânj ruhuâ rayiꞌî nej dinï̂nt,
neꞌ ña̱nꞌan ngà neꞌ gu̱niꞌñanj an riñan Ma̱ꞌan Ñaꞌanj an.
11 Ni̱ ngà tun Ma̱ꞌan Jesús ni̱ ngà nuguanꞌ gananï̂n nej sij giꞌhiaj ni̱ gunùkuaj nej sij giꞌhiaj ga̱nan nej sij sichre,
ni̱ nun gu̱yuꞌhuiꞌ nej sij gàhuìꞌ nej sij mánj.
12 Rayiꞌî dan ni̱ ga̱na̱huin nìhiàꞌ ruhuâ,
nej yàtàꞌa ngà nej ángel màn hiuj dânj.
Sani̱ hia̱j ni̱ ûta gi̱ranꞌ sa̱ñu̱n nej guiì màn riñan hioꞌóo ni̱ huê danj na̱nj giranꞌ sa̱ñu̱n nne ña̱ꞌa̱nj,
dadinꞌ gininj sa nàsàꞌa ga̱ꞌnaj ñan màn ninj ni̱ ûta naꞌan ruhuâj,
dadinꞌ gàꞌ niꞌin si do̱j diû hua ga̱ne nîꞌnïn.
13 Ni̱ nga giniꞌin sichre si ginin gaꞌnaj riñan hioꞌóo,
ni̱ gayi̱ꞌij ni̱ gata rùhuaj siyànà gàꞌ gaꞌnga daꞌní neꞌej naꞌhuu.
14 Ni̱ giꞌhiaj Ma̱ꞌan Ñaꞌanj an si ganûn huìj sigàchi siyànà dânj dàj rûnꞌ hua yataj nìko xi nnùn huìj siga̱chi,
ni̱ gita siga̱chi ni̱ gaꞌan riñan nanèe ni̱ gunan gaꞌan riñan yukuá nâ riñan hioꞌó nàkòo,
ñan gàꞌ hua̱ yu̱gui,
gaꞌhuiꞌ nej sij yaj huàꞌnï̀nj hioꞌo tá ané.
15 Ni̱ dagamanꞌ yukuá dânj nne màn ruhuâ duꞌhua yôꞌ rukû siyànà dânj ni̱ dàj rûnꞌ huaj ꞌngo̱ kïn nìko xi huaj ni̱ gunan ni̱koj rukú siyànà dânj,
guendâ du̱natu siyànà dânj.
16 Sani̱ gurugûñuꞌunj hioꞌóo siyànà dânj,
dadinꞌ naguchraj duꞌhua ni̱ gayaman kïn nìkòꞌ huaj rukû siyànà dânj giꞌhiaj sichre.
17 Hiôꞌ ni̱ ûta ginaꞌan ruhuâ sichre niꞌin siyànà dânj;
ni̱ gaꞌanj sichre ni̱ gutaj ngà aꞌngô nej duguiꞌ siyànà dânj,
nej guiì dagahuin dàj runꞌ hua sun giyiꞌnïn riñan ninj giꞌhiaj Ma̱ꞌan Ñaꞌanj an ni̱ huê danj na̱nj nùkuaj ruhuâ ninj niꞌin ninj nej nuguanꞌ gidigân Ma̱ꞌan Jesucristo.
Huê danj ni̱ gaꞌanj ga̱nikïnꞌ yukuá du̱ꞌhui riñan hioꞌó chru̱u màn duꞌhua nne ña̱ꞌa̱nj.