Huìj yuku nùkuaj xi
13
Ni̱ nìkï̀nj duꞌhua nne ña̱ꞌa̱nj,
ni̱ giniꞌín gahui ꞌngo̱ yuku nùkuaj xi dan ruhuâ nne ña̱ꞌa̱nj ni̱ hua chij ahui xuj ni̱ nnùn chi̱ꞌ sikú xuj;
ni̱ nun diadema ra nej chi̱ꞌ sikú xuj,
ni̱ hio xuj nnûn siyu̱gui xuj sa kï̱j hua xi.
2 Ni̱ yuku giniꞌín dan hua dàj rûnꞌ hua sniꞌhiô,
ni̱ dàj rûnꞌ hua dakó oso hua dakó xuj,
ni̱ dàj rûnꞌ hua duꞌhua sigeꞌej e hua duꞌhua xuj.
Ni̱ nagaꞌhuiꞌ yukuá du̱ꞌhui si-su̱n yôꞌ raꞌa xuj ni̱ huê danj na̱nj gaꞌnḯnj yôꞌ gane xuj ginikaj su̱n xuj ñan gane yôꞌ ginikaj su̱n yôꞌ,
ni̱ ganahuin ra̱ꞌa xuj ûta nìko suun giꞌhiaj yôꞌ.
3 Ni̱ giniꞌín si giranꞌ yiꞌì ꞌngo̱ nej ahui yuku nùkuaj xi dânj ni̱ dàj rûn huaj si gàhuìꞌ xuj huaj,
sani̱ neꞌ rùkù ni̱ ganahuin xuj;
huê danj ni̱ ûta gahuin nìhiàꞌ ruhuâ daranꞌ nej guiì nga ganahuin ahui yuku dânj ñan giranꞌ yiꞌij huê danj ni̱ ginikòꞌ ninj rukû yuku nùkuaj xi dânj,
4 ni̱ ginûn ña̱ꞌa̱nj nej guiì yukuá du̱ꞌhui giꞌhiaj ganakaj su̱n yuku nùkuaj xi dânj,
ni̱ huê danj na̱nj ginûn ña̱ꞌa̱nj ninj riñan yuku nùkuaj xi dânj ni̱ gataj ninj:
Nitaj aꞌngô sa ni̱ka̱j sun doj gàꞌ daꞌ yuku nùkuaj xi dânj mánj.
—Ni̱ ahuin si gùnùkuaj gùtàꞌ ngà yuku nùkuaj xi na̱nj ràꞌaj.
5 Ni̱ huê danj na̱nj ganakaj su̱n yuku nùkuaj xi nânj giꞌhiaj nej guiì ni̱ ginikaj su̱n xuj huìj xia huìj ahuii;
ni̱ ûta gachîn gaꞌmin xuj ni̱ ûta kï̱j gaꞌmin xuj riñan Ma̱ꞌan Ñaꞌanj an.
6 Ni̱ gaꞌmin xuj ni̱ gataj si huin xuj dàj rûnꞌ huin Ma̱ꞌan Ñaꞌanj an,
ni̱ huê danj na̱nj gaꞌmin kï̱j xuj rayiꞌî siyu̱gui Ma̱ꞌan Ñaꞌanj an,
ni̱ huê danj na̱nj gaꞌmin kï̱j xuj rayiꞌî si-nùhuì Ma̱ꞌan Ñaꞌanj an ni̱ huê danj na̱nj gaꞌmin kï̱j xuj rayiꞌî nej sa màn gunânj gi̱tsi yàtàꞌa.
7 Ni̱ gutaꞌ xuj ngà nej sôꞌ dagahuin nej sun giyiꞌnïnꞌ su̱n giꞌhiaj Ma̱ꞌan Ñaꞌanj an,
ni̱ gunùkuaj xuj giꞌhiaj ga̱nan xuj nej sôꞌ.
Ni̱ huê danj na̱nj gaꞌnï̂nj Ma̱ꞌan Ñaꞌanj an si gi̱nikaj su̱n xuj riñan daranꞌ nej yiꞌnïnꞌ nej guiì,
nej yumanꞌan,
nej país ni̱ nej nânj màn ruhuâ yumiguìi.
8 Ni̱ daranꞌ nej guiì nitaj si tàj siyu̱gui riñan si-librû Ma̱ꞌan Jesús,
ni̱ huê ninj huin nej guiì ginûn ña̱ꞌa̱nj yuku nùkuaj xi dânj ni̱ màn ninj nï̀nꞌ gàchràꞌ riñan hioꞌóo,
dadinꞌ àsìj nga giꞌhiaj Ma̱ꞌan Ñaꞌanj an nej guiì,
ni̱ gàꞌ hua yugui si gàꞌhuìꞌ Ma̱ꞌan Jesús rayiꞌî si-ga̱kïnꞌ ninj.
9 Ni̱ si hua̱ ꞌngo̱ nej suj tá hiuꞌuj u rakïj ni̱ gu̱nïn nej suj.
10 Ni̱ si hua̱ ꞌngo̱ nej suj giriꞌ nìꞌhiaj ga̱tu̱ dukuâ gaꞌa ni̱ daꞌhui nej suj ni̱ ga̱tu̱ nej suj dukuâ gaꞌa;
ni̱ si hua̱ ꞌngo̱ nej suj giriꞌ nìꞌhiaj gàhuìꞌ ngà yîti ni̱ ngà yîti daꞌhui nej suj gàhuìꞌ nej suj.
Ni̱ hiuj nan gi̱ni̱ꞌînꞌ ahuin nej suj hua̱ yìtï̀nj ruhuâ ngà Ma̱ꞌan Ñaꞌanj an,
ni̱ hua nùkuaj ruhuâ ni̱ guyumân ruhuâ niꞌin Ma̱ꞌan Ñaꞌanj an.
11 Neꞌ rùkù ni̱ giniꞌín gachi nìta aꞌngô yuku nùkuaj xi dan riki hioꞌóo;
ni̱ nnùn huìj sikú xuj ni̱ hua̱ sikú xuj dàj rûnꞌ hua sikú matsïj ñan lij,
sani̱ gaꞌmin xuj dàj rûnꞌ gaꞌmin yukuá du̱ꞌhui.
12 Ni̱ huê dàj rûnꞌ nìko ginikaj su̱n yuku nùkuaj xi gaꞌnaꞌ si̱nï̱n dânj huê danj nìko ginikaj su̱n xuj ni̱ ni̱ka̱j duguiꞌ nguèj xuj,
ni̱ giꞌhiaj xuj si ginùn ña̱ꞌa̱nj nej guiì màn nï̀nꞌ gàchràꞌ riñan hioꞌóo yuku nùkuaj xi giranꞌ yiꞌì dânj sani̱ ganahuin yôꞌ.
13 Ni̱ huê danj na̱nj ûta nìko hua daꞌngaꞌ giꞌhiaj xuj,
ni̱ giꞌhiaj xuj si gininj ñaꞌaan neꞌ yàtàꞌa ni̱ ginin riñan hioꞌóo ni̱ giniꞌin daranꞌ nej guiì sa giꞌhiaj xuj.
14 Ni̱ gidigañuꞌunj xuj nej guiì màn nï̀nꞌ gàchràꞌ riñan hioꞌóo ngà nej daꞌngaꞌ gaꞌnḯnj Ma̱ꞌan Ñaꞌanj an giꞌhiaj xuj ni̱ ni̱ka̱j duguiꞌ xuj ngà yuku nùkuaj xi gaꞌnaꞌ si̱nï̱n dânj,
ni̱ gaꞌnïnꞌ xuj suun si gi̱ꞌhiaj daranꞌ nej sí màn nï̀nꞌ gàchràꞌ riñan hioꞌóo ñan duꞌhua yuku nùkuaj xi giranꞌ yiꞌì dânj,
sani̱ ganahuin yôꞌ.
15 Ni̱ giriꞌ nìꞌhiaj yuku nùkuaj xi gaꞌnaꞌ neꞌ rùkù dânj si ga̱ꞌhue giꞌhiaj yôꞌ ga̱na̱huin nìꞌnàꞌ ñan daꞌngaꞌ huin ñan du̱ꞌhua yuku nùkuaj xi gaꞌnaꞌ si̱nï̱n dânj,
ni̱ gaꞌmin ñan daꞌngaꞌ huin ñan du̱ꞌhua yuku nùkuaj xi dânj,
ni̱ gaꞌnïnj suun riñan nej sí nìkòꞌ rukuj si da̱gahuiꞌ nej sôꞌ nej guiì naꞌhuej ginùn ña̱ꞌa̱nj riñan yuku nùkuaj xi dânj.
16 Ni̱ aꞌngô sa giꞌhiaj yuku gaꞌnaꞌ neꞌ rùkù dânj huin si gaꞌnïnꞌ yôꞌ suun si ga̱chri̱ nej sij daꞌngaꞌa raꞌa neꞌ huàꞌ ni̱ hio nej sí nitaj sun nikaj ni̱ ga̱chri̱ nej sij daꞌngaꞌa nej sí ni̱ka̱j sun yàkàn xi,
ni̱ ga̱chri̱ nej sij daꞌngaꞌa nej sí yi̱ruꞌhuee ni̱ nej sí ga̱ni̱ki,
ni̱ huê danj na̱nj ga̱chri̱ nej sij daꞌngaꞌa nej sí giꞌhiaj sun si-su̱n ma̱ꞌan ngà nej sí giꞌnïnj giꞌhiaj sun chre riñan ꞌngo̱ yiruꞌhuee.
17 Huê danj ni̱ si̱ gaꞌhue gi̱ra̱n ni̱ gu̱du̱ꞌhue̱ gàꞌ si ꞌngo̱ nej sí nun gàꞌnï̀n ma̱ꞌan gìyìꞌìj daꞌngaꞌa nej rasu̱n ga̱chin riñan nej sôꞌ,
man nej sí ga ruhuâ giyiꞌîj daꞌngaꞌa ni̱ nnùn siyu̱gui yuku nùkuaj xi dânj ngà número huin siyu̱gui yôꞌ nej sí dânj huin sa ga̱ꞌhue gi̱ra̱n ni̱ gu̱du̱ꞌhue̱.
18 Nânj huin nuguanꞌ chru̱n nï̀nꞌ ruhuâ.
Ni̱ sí chru̱n ga̱ra̱n daꞌngaꞌ ruhuâ,
ni̱ ga̱hia̱ sôꞌ número ni̱ka̱j yuku nùkuaj xi dânj,
dadinꞌ número dânj huin número ni̱ka̱j síi,
ni̱ huin huàtànꞌ sientu tá huaꞌnï̂nj xia huàtànꞌ.