Chraꞌ gachrá sientu tá huìj xia ga̱ꞌanj mîn
14
Neꞌ rùkù ni̱ giniꞌhiâ,
ni̱ giniꞌín nikïnꞌ Ma̱ꞌan Jesús ra kïj gùꞌnàj Sión,
ni̱ màn ꞌngo̱ sientu tá huìj xia ga̱ꞌanj mîn nej síi nngaj hiuj dânj,
ni̱ nnùn siyu̱gui Ma̱ꞌan hio nej sôꞌ ngà siyu̱gui Ma̱ꞌan Re Ñaꞌanj an.
2 Ni̱ gunḯn gaꞌmin ꞌngo̱ sa gaꞌmin neꞌ yàtàꞌa ni̱ dàj rûnꞌ huin nga nda gari̱n huaj nnee,
ni̱ dàj rûnꞌ nùkuaj gaguâj duꞌhui huê danj nùkuaj gagua;
ni̱ dàj rûnꞌ huin nga mân nej sí gidigaꞌ raꞌa riñan ñâꞌanj an huê danj gahuin.
3 Ni̱ màn nej sij gachrá nej sij ꞌngo̱ chraꞌ nàkàa neꞌ ña̱n ñan ni̱kï̱nꞌ chrun yilâ nne Ma̱ꞌan Ñaꞌanj an,
ni̱ riñan nej ga̱ꞌanj sa hua̱ nìꞌnàꞌa,
ni̱ riñan nej síchìj achij i,
ni̱ gàꞌ si ꞌngo̱ nej guiì naꞌhue ga̱huin chru̱n ga̱chra̱ chraꞌ dânj,
man ꞌngo̱ sientu tá ahuîj xia ga̱ꞌanj mîn nej sôꞌ dânj gahuin chru̱n gachrá.
4 Ni̱ nun ga̱ nika nej sí nânj,
ni̱ sí ña̱an gahuin nej sôꞌ.
Ni̱ nìkòꞌ nej sôꞌ rukú Ma̱ꞌan Jesús dànèꞌ gahuin huaj Ma̱ꞌan,
ni̱ gàꞌ girânj Ma̱ꞌan nej sôꞌ ni̱ ganaguij nej sôꞌ siganï̂nj nej síi ni̱ gahuin nej sôꞌ sí si̱nï̱ïn riñan Ma̱ꞌan Ñaꞌanj an ni̱ riñan Ma̱ꞌan Jesús;
5 ni̱ gàꞌ si ꞌngo̱ nuguanꞌ digañuꞌunj un nun ga̱ꞌmi̱n nej sôꞌ ni̱ gàꞌ si ꞌngo̱ gakï̱nꞌ lij nitaj si giꞌhiaj nej sôꞌ riñan Ma̱ꞌan Ñaꞌanj an mánj.
Nuguanꞌ gataj nej huàꞌnï̀nj ángel
6 Ni̱ giniꞌín si gita siga̱chi aꞌngô ángel gaꞌnaj neꞌ yàtàꞌa,
ni̱ ni̱ka nuguanꞌ gi̱ꞌhiaj ga̱na̱ni̱n nìgànj nej guiì,
guendâ gànàtaj riñan daranꞌ nej guiì màn riñan hioꞌóo,
riñan daranꞌ nej país,
riñan daranꞌ nej yiꞌnïnꞌ nej guiì,
nej yumanꞌan ni̱ nej nânj aꞌmin nej guiì màn ruhuâ yumiguìi,
7 ni̱ ûta nùkuaj gaꞌmin ni̱ gata:
—Gi̱nun yuꞌhuiꞌ ruhuâ nej suj ni̱ si̱ giꞌhiaj nej suj gakï̱nꞌïn riñan Ma̱ꞌan Ñaꞌanj an,
ni̱ ga̱ꞌmin hueꞌê nej suj rayiꞌî Ma̱ꞌan Ñaꞌanj an na̱nj ánj,
dadinꞌ gàꞌ guyumân orâ ga̱na̱ka̱j guendâ Ma̱ꞌan Ñaꞌanj an sa giꞌhiaj nej guiì;
ni̱ ginu̱n ña̱ꞌa̱nj nej suj riñan Ma̱ꞌan sa giꞌhiaj yàtàꞌa,
Ma̱ꞌan sa giꞌhiaj hioꞌóo,
Ma̱ꞌan sa giꞌhiaj nne ña̱ꞌa̱nj,
Ma̱ꞌan sa giꞌhiaj daranꞌ ñan gaꞌnga nnee.
8 Huê danj ni̱ gaꞌmin aꞌngô ángel huìj i ni̱ gata:
—Gàꞌ girëꞌ,
ni̱ gàꞌ girëꞌ yumanꞌ snàꞌànj xi gùꞌnàj Babilonia,
dadinꞌ giꞌhia dàj rûnꞌ giꞌhiaj ꞌngo̱ siyànà guduꞌhuêj nneè kú dadinꞌ huej huin sa gidigân giꞌhiaj daranꞌ nej país màn ruhuâ yumiguì gakï̱nꞌïn.
9 Ni̱ ûta nùkuaj gaꞌmin ángel huàꞌnï̀nj ïn ni̱ gata:
—Ni̱ si hua̱ da̱ꞌa̱j nej suj ginûn ña̱ꞌa̱nj yuku nùkuaj xi dânj ngà ñan du̱ꞌhua xuj,
ni̱ gaꞌnḯnj nej suj si ga̱chri̱ nej síi daꞌngaꞌa raꞌa neꞌ huàꞌ nej suj nej si ga̱chri̱ nej sôꞌ daꞌngaꞌa hio nej suj,
10 ni̱ ûta ginaꞌan ruhuâ Ma̱ꞌan Ñaꞌanj an sa giꞌhiaj nej suj ni̱ rayiꞌî dan ni̱ ûta ganahuin ra̱ꞌa nej suj kastîgu gi̱ꞌhiaj Ma̱ꞌan Ñaꞌanj an ni̱ ûta gaꞌman yàngàꞌ ruhuâ Ma̱ꞌan sa giꞌhiaj nej suj ni̱ gi̱ꞌhia si gùyùmàn kastîgu nìko xi riñan nej suj;
ni̱ gi̱ni̱ꞌin daranꞌ nej ángel ni̱ huê danj na̱nj gi̱ni̱ꞌin Ma̱ꞌan Jesús si ga̱ka̱ nej suj gi̱nun nej suj riñan ñaꞌan aka ngà hioꞌó asufri;
11 ni̱ ûta giranꞌ sa̱ñu̱n nej sij mân nej sij ruhuâ rúnâko dadin gaka nej sij daranꞌ diû,
ni̱ gàꞌ neꞌ gui ni̱ neꞌ ña̱nꞌan ni̱ nitaj àmàn huaj gìyìchìnꞌ si gi̱ranꞌ sa̱ñu̱n nej sij ni̱ huê danj na̱nj nitaj àmàn huaj gìyìchìnꞌ si ga̱hui̱ gatse̱ꞌe ñan màn nej sij mánj,
giranꞌ nej sij dànanj guendâ ginûn ña̱ꞌa̱nj nej sij yuku nùkuaj xi dânj ngà ñan duꞌhua xuj ni̱ gaꞌnḯnj nej sij ma̱ꞌan nej sij giyiꞌij daꞌngaꞌa.
12 Ni̱ daꞌhui ga̱huin chru̱n nej sôꞌ nìkòꞌ rukú Ma̱ꞌan Jesús ga̱ nùkuaj ruhuâ nej sôꞌ ni̱ gùyùmàn yìtï̀nj ruhuâ nej sôꞌ,
ni̱ da̱gahuin nej sôꞌ dàj rûnꞌ hua sun giyiꞌnïnꞌ riñan nej sôꞌ giꞌhiaj Ma̱ꞌan Ñaꞌanj an.
13 Ni̱ gunḯn gaꞌmin sa gaꞌmin neꞌ yàtàꞌa ni̱ gata gunḯn:
—Ga̱chru̱n sòꞌ:
“Ni̱ àsìj hia̱j ni̱ gayakaj gaꞌanj neꞌ ña̱an ni̱ ga̱na̱huin nìhiàꞌ ruhuâ nej guiì gahuiꞌ ni̱ guyumân ruhuâ ninj niꞌin ninj Ma̱ꞌan Señor.”
Huê danj huin yàngàꞌ,
gataj Ma̱ꞌan Espíritu,
ni̱ ga̱na̱ra̱n ruhuâ ninj ngà nej sun ga riñan ninj riñan hioꞌóo,
sani̱ ga̱ gè nej sa sàꞌ giꞌhiaj ninj nga guchiꞌ ninj ñan ga̱ne nìgànj ninj na̱nj ánj.
Gaꞌneꞌ ninj daranꞌ nej trigû gàꞌ achij i
14 Giniꞌhia,
ni̱ giniꞌín ꞌngo̱ nnga gàtsì chre;
ni̱ riñan nnga dânj nne ꞌngo̱ sa nne ni̱ dàj rûnꞌ hua ꞌngo̱ síi huaj,
ni̱ nun ahui ꞌngo̱ korona huin agaꞌ oro,
ni̱ ꞌnï̱nj raꞌa ꞌngo̱ agaꞌ hoz ra sìhià chre.
15 Ni̱ ruhuâ nuhuî nne hiuj dânj gahui aꞌngô ángel,
ni̱ ûta nùkuaj gaꞌmin riñan sí nne riñan nnga dânj ni̱ gata gu̱nïn sôꞌ:
—Ga̱chri̱ sòꞌ agaꞌ hoz ꞌnï̱nj raꞌâꞌ dan ni̱ gàꞌnèꞌ nej sa màn riñan hioꞌóo;
dadinꞌ gàꞌ gisîj ora gìyìꞌnèꞌ ninj,
dadinꞌ gàꞌ hua̱ yu̱gui ninj guendâ gìyìꞌnèꞌ ninj.
16 Huê danj ni̱ gachrîj sôꞌ nne riñan nnga dânj hoz ꞌnï̱nj raꞌa sôꞌ riñan hioꞌóo,
huê danj ni̱ gaꞌneꞌ sôꞌ daranꞌ nej trigû màn riñan hioꞌóo.
17 Huê danj ni̱ gahui aꞌngô ángel ruhuâ nuhuî nne yàtàꞌa,
ni̱ huê danj na̱nj ꞌnï̱nj raꞌa ꞌngo̱ agaꞌ hoz ra sìhià chre.
18 Ni̱ ñan ni̱kï̱nꞌ nna dânj gahui aꞌngô ángel ni̱ ni̱ka̱j sûnj riñan ñaꞌaan,
ni̱ ûta nùkuaj gaꞌmin ni̱ gakïn ángel ꞌnï̱nj raꞌa agaꞌ hoz ra sìhià chre dânj ni̱ gata:
—Ga̱chri̱ sòꞌ hoz ra̱ sìhià ꞌnï̱nj raꞌâꞌ dan,
ni̱ ga̱ꞌne̱ꞌ daranꞌ nej sichrín chruj uba màn riñan hioꞌóo,
dadinꞌ gàꞌ ganê daranꞌanj na̱nj ánj.
19 Huê danj ni̱ garrûn ángel dânj hoz ꞌnï̱nj raꞌa riñan hioꞌóo,
ni̱ gaꞌnej nej sichrín uba màn riñan hioꞌóo,
ni̱ gachra daranꞌ nej sichrín dânj ñan hua̱ yu̱gui guendâ ga̱nïn nej sij chruj uba ni̱ nânj huin nga ûta gi̱ranꞌ sa̱ñu̱n nej guiì giꞌhiaj Ma̱ꞌan Ñaꞌanj an dadinꞌ ûta naꞌan ruhuâj niꞌin ninj rayiꞌî nej gakï̱nꞌ giꞌhiaj ninj.
20 Ni̱ ganï̂n nej sij nej chruj uba dânj neꞌ ye̱ꞌ yumanꞌ snàꞌànj dânj,
huê danj ni̱ gaché tun nej uba ganï̂n nej sij hiuj dânj ni̱ gisi nda ñan nnùn si-freno guâhiu,
ni̱ gunan gaꞌan nda huàꞌnï̀nj sientu kilometru riñan hioꞌóo.