Nej ángel ꞌnï̱nj raꞌa chij sa yiꞌìi
15
Ni̱ giniꞌín aꞌngô daꞌngaꞌ nìko xi neꞌ yàtàꞌa,
ni̱ ûta gahuin ña̱ꞌanj ruhuâj si huaj:
Ni̱ ni̱kï̱nꞌ chi̱j ángel ni̱ ꞌnï̱nj raꞌa ninj chi̱j sa yìꞌì ga̱ꞌna̱ꞌ neꞌ ña̱n doj;
ni̱ ngà nej sa yìꞌì nânj ni̱ ganahuij sa gaꞌman ruhuâ Ma̱ꞌan Ñaꞌanj an niꞌin nej guiì.
2 Ni̱ giniꞌín ꞌngo̱ dan ni̱ dàj rûnꞌ hua nne ña̱ꞌa̱nj huaj sani̱ biriu huin ni̱ ꞌnï̱nj ñaꞌaan siganïn;
ni̱ riñanj ni̱kï̱nꞌ nej sôꞌ gunùkuaj giꞌhiaj ga̱nan ni̱ ni̱ka̱j nej sôꞌ arpa nikïnꞌ nej sôꞌ,
dadinꞌ nun ginùn ña̱ꞌa̱nj nej sôꞌ riñan yuku nùkuaj xi dânj ngà riñan ñan du̱ꞌhua yôꞌ ni̱ huê danj na̱nj nun ga̱ꞌnï̱n nej sôꞌ ma̱ꞌan nej sôꞌ ga̱chri̱ nej sij daꞌngaꞌa,
huê danj ni̱ nun gìyìꞌìj número huin siyu̱gui yuku dânj nej sôꞌ mánj.
3 Ni̱ gachrá nej sôꞌ chraꞌ gachrá Moisés huin si musû Ma̱ꞌan Ñaꞌanj an,
ni̱ gachrá nej sôꞌ chraꞌ gachrá Ma̱ꞌan Matsïj lij,
ni̱ gataj nej sôꞌ:
Ûta nìko hua sa giꞌhiaj Ma̱ꞌan rèꞌ ni̱ huin ña̱ꞌanj ruhuâ nej ñûnj dàj huaj,
ni̱ huê rèꞌ huin Ma̱ꞌan Señor sa giꞌhiaj daranꞌanj;
ni̱ giꞌhiá rèꞌ sa ni̱ka̱a,
ni̱ chrej gidigân rèꞌ huin chrej yàngàꞌa,
ni̱ huê Ma̱ꞌan rèꞌ huin Rey ni̱ka̱j sun riñan nej sí dugumîn Ma̱ꞌan riñan gakï̱nꞌïn.
4 Ahuin sí si̱ ginun yuꞌhuiꞌ ruhuâ niꞌin sòꞌ,
huin rèꞌ Señor ni̱ ga̱ꞌmi̱n hueꞌê sôꞌ rayiꞌî siyu̱gui Ma̱ꞌan rèꞌ ràꞌaj.
Ni̱ ꞌngo̱ rïn rèꞌ huin Ma̱ꞌan Ñaꞌanj gè staꞌu;
huê dan ni̱ ga̱ꞌna̱ꞌ daranꞌ nej país ni̱ ginu̱n ña̱ꞌa̱nj nej sij Ma̱ꞌân rèꞌ,
dadinꞌ gàꞌ niꞌin nej sij si huê Ma̱ꞌan rèꞌ huin sa ni̱ka̱a.
5 Neꞌ rùkù nej nânj ni̱ giniꞌhia yàtàꞌa,
ni̱ giniꞌín ganayiꞌnï̂nj riñan si-nùhuì Ma̱ꞌan Ñaꞌanj an;
6 ni̱ ruhuâ nuhuî dânj gahui nej chi̱j ángel ni̱ka̱j nej chi̱j sa yìꞌìi,
ni̱ nu̱n ninj atsîj lino riñan àuj sàꞌ xi ni̱ nda raa̱n chre riñanj,
ni̱ gudutâj ganikàj yiꞌñanj ninj ngà yiri̱ki huin agaꞌ oro.
7 Ni̱ ꞌngo̱ nej ga̱ꞌanj sa hua̱ nìꞌnàꞌ dânj gaꞌhuiꞌ chi̱j kopa huin agaꞌ oro raꞌa daꞌ goꞌngo̱ nej ángel,
ni̱ ruhuâ nej kopa nânj man nej sa naꞌan staꞌu ruhuâ Ma̱ꞌan Ñaꞌanj an niꞌin nej guiì nitaj si dagahuin riñanj,
ni̱ Ma̱ꞌan huin sa nne gachîn ꞌngo̱ sientu hioꞌo,
ni̱ gachîn aꞌngô sientu hioꞌo ni̱ nìgànj nï̀nꞌ.
8 Ni̱ ûta nìko nikaj su̱n Ma̱ꞌan Ñaꞌanj an ni̱ nda gachra chre gatse̱ꞌe ruhuâ si-nùhuì Ma̱ꞌan dadinꞌ huin Ma̱ꞌan Ñaꞌanj nùkuaj staꞌu;
ni̱ nitaj gàꞌ si ꞌngo̱ guiì huaj ga̱tu̱ ruhuâ nuhuî dânj nda gisîj ganûn suun giꞌhiaj nej chi̱j sa yìꞌì ni̱ka̱j daꞌ goꞌngo̱ nej ángel.