ꞌNïnj raꞌa nej ángel nej kopa nu̱n sa naꞌan ruhuâ Ma̱ꞌan Ñaꞌanj an
16
Ni̱ gunḯn gaꞌmin nùkuaj ꞌngo̱ sa gaꞌmin ruhuâ nûhui nne hiuj dânj riñan nej chi̱j ángel ni̱ gata:
—Ga̱ꞌa̱nj nej suj ni̱ dagamanꞌ nej suj nej chi̱j yiꞌì nu̱n ruhuâ kopa dan riñan hioꞌóo dadinꞌ naꞌan ruhuâ Ma̱ꞌan Ñaꞌanj an niꞌin nej guiì.
2 Gaꞌanj ángel si̱nï̱n dânj ni̱ dagamanj yiꞌì nun ruhuâ kopa ꞌnï̱nj raꞌa dânj riñan hioꞌóo ni̱ gahui nnuj riꞌhiuj kï̱j hua xi riñan nneè kú nej guiì ni̱ gïnꞌ ri̱ꞌhiuj ninj,
ni̱ man nej guiì ginûn ña̱ꞌa̱nj ñan du̱ꞌhua yuku nùkuaj xi dânj ni̱ nej guiì ꞌnï̱nj si-da̱ꞌnga yôꞌ gahui nnuj dânj.
3 Ni̱ dagamanꞌ ángel huìj yiꞌì nun ruhuâ kopa ꞌnï̱nj raꞌa dânj riñan nne ña̱ꞌa̱nj,
ni̱ dàj rûnꞌ huaj si gahuiꞌ nej guiì ruhuâ nne ña̱ꞌa̱nj huaj dadinꞌ ganahuin nne ña̱ꞌa̱nj tun,
ni̱ gahuiꞌ daranꞌ nej yuku màn ruhuâ nne ña̱ꞌa̱nj.
4 Ni̱ dagamanꞌ ángel huàꞌnï̀nj ïn sa nu̱n ruhuâ kopa ꞌnï̱nj raꞌa dan riñan nej kïn,
ngà ñan gaꞌnga nej nnee ni̱ ganahuin daranꞌanj tun.
5 Ni̱ gunḯn gaꞌmin ángel ni̱ka̱j su̱n riñan nne ña̱ꞌa̱nj ni̱ gata:
—Sa giꞌhiaj sa ni̱ka̱a huin Ma̱ꞌân rèꞌ na̱nj Señor,
ni̱ huê Ma̱ꞌân rèꞌ huin hia̱j ni̱ huê Ma̱ꞌân rèꞌ gahuin,
ni̱ Ma̱ꞌân rèꞌ huin sa gè staꞌuu,
dadinꞌ ganakaj guendâ Ma̱ꞌân rèꞌ rayiꞌî sa giꞌhiaj nej sí nânj.
6 Dadinꞌ giꞌhiaj nej sij si giranꞌ yiꞌì ni̱ gahuiꞌ nej sôꞌ gataj dàj gahuin ngà nej sôꞌ nìkòꞌ rukú Ma̱ꞌan Jesús,
ni̱ hua̱ ni̱ña̱n si go̱ꞌo̱ nej sij tun rayiꞌî guendâ ga̱ninï̀nꞌ hua nej sij.
7 Ni̱ huê danj na̱nj gunḯn gaꞌmin aꞌngô sa gaꞌmin,
nda ñan ni̱kï̱nꞌ si-na Ma̱ꞌan Ñaꞌanj an ni̱ gata:
—Yàngàꞌ hia nï̀nꞌ ni̱ huê Ma̱ꞌân rèꞌ huin Ñaꞌanj an ni̱ huin rèꞌ sa ni̱ka̱j su̱n,
ni̱ yàngàꞌ hia ni̱ ni̱ka̱ hua nej sa ganakaj guendâ Ma̱ꞌân rèꞌ ni̱ hua ni̱ña̱n si gàꞌhuìꞌ rèꞌ kastîgu riñan nej guiì.
8 Ni̱ dagamanꞌ ángel ga̱ꞌanj sa nu̱n ruhuâ kopa ꞌnï̱nj raꞌa riñan gui,
huê danj ni̱ ûta ganahuin ña̱ꞌan gui ni̱ giꞌhia si ganûn ñaꞌaan nej guiì ni̱ gaka ninj giꞌhia.
9 Ni̱ ûta gahuin ña̱ꞌan ni̱ gaka nej guiì giꞌhia nân,
huê danj ni̱ gaꞌmin kï̱j ninj riñan Ma̱ꞌan Ñaꞌanj an dadinꞌ gàꞌ niꞌin ninj si ga̱ꞌhue gi̱ꞌhiaj Ma̱ꞌan si gànàgàꞌ sa ña̱ꞌan nânj,
sani̱ gàꞌ dânj ni̱ nun gànànìkàj ruhuâ ninj rayiꞌî si-ga̱kïnꞌ ninj guendâ ga̱ꞌmi̱n hueꞌê ninj rayiꞌî Ma̱ꞌan Ñaꞌanj an mánj.
10 Ni̱ dagamanꞌ ángel ùnꞌùnꞌun sa nu̱n ruhuâ kopa nika,
huê danj ni̱ gahuin ru̱mi̱nꞌ ñan nne yuku nùkuaj nikaj su̱n;
ni̱ gayiꞌì nej guiì ni̱ yâ ninj hia ninj dadinꞌ ûta naꞌan nneè kú ninj,
11 ni̱ gaꞌmin kï̱j ninj riñan Ma̱ꞌan Ñaꞌanj nne yàtàꞌa rayiꞌî guendâ ûta naꞌan nneè ninj giꞌhiaj nnuj riꞌhiuj màn nneè kú ninj,
sani̱ gàꞌ dânj ni̱ nun gànànìkàj ruhuâ ninj rayiꞌî nej gakï̱nꞌ giꞌhiaj ninj mánj.
12 Ni̱ dagamanꞌ ángel huàtànꞌ sa nu̱n ruhuâ kopa ꞌnï̱nj raꞌa ruhuâ kïn Eufrates;
huê danj ni̱ ganakò kïn nânj,
daꞌnga ni̱ ga̱ yu̱gui chrej e ga̱chi̱n nej rey ꞌna̱ꞌ neꞌ gisîj gui.
13 Ni̱ giniꞌín gahui huàꞌnï̀nj nej nanè kï̱j huaa ni̱ dàj rûnꞌ hua yirikïj hua ninj ni̱ gahui ꞌngo̱ ninj ruhuâ duꞌhua yukuá du̱ꞌhui,
ni̱ gahui ꞌngo̱ ninj ruhuâ duꞌhua yuku nùkuaj xi ni̱ gahui ꞌngo̱ ninj ruhuâ duꞌhua sí profeta gidigañuꞌunj un;
14 ni̱ huin ninj nej nanè kï̱j hua ri̱ña̱n nikaj su̱n sí kï̱j ï,
ni̱ giꞌhiaj ninj guruguiꞌ nej daꞌngaꞌa giniꞌin nej guiì ni̱ gaꞌanj ninj riñan daranꞌ nej rey ni̱ka̱j su̱un ngà riñan nej síchìj presidente ni̱ka̱j sun riñan hioꞌóo,
ni̱ gaꞌanj ninj ni̱ gataj ninj si daꞌhui ga̱na̱huin chreꞌ daranꞌ nej sôꞌ guendâ gùtàꞌ nej sôꞌ,
ni̱ gui nânj huin gui gi̱ꞌhiaj Ma̱ꞌan Ma̱ꞌan Ñaꞌanj an ûta nìko kastîgu ngà nej sij dadinꞌ huê Ma̱ꞌan huin sa ni̱ka̱j sun riñan daranꞌanj.
15 “Hia̱j ni̱ dàj rûnꞌ gaꞌnaꞌ sí tu̱u gàꞌnàj,
ni̱ ga̱na̱huin nìhiàꞌ ruhuâ nej guiì du̱gumîn hueꞌê ma̱ꞌan,
ni̱ nitaj si giꞌhiaj ninj gakï̱nꞌïn,
dadinꞌ si giꞌhiaj ninj gakï̱nꞌïn ni̱ dàj rûnꞌ hua nej guiì hua̱ nneè hua ninj rayiꞌî gakï̱nꞌ giꞌhiaj ninj.”
16 Ni̱ nagiꞌhiaj chrej daranꞌ nej sí dânj ñan gùꞌnàj Armagedón ni̱ nuguanꞌ nânj huin nânj hebreo.
17 Huê danj ni̱ dagamanꞌ ángel chi̱j i sa nun ruhuâ kopa ꞌnï̱nj raꞌa dânj riñan nanèe,
ni̱ ruhuâ nuhuî nne yàtàꞌa ni̱ ûta nùkuaj gaꞌmin ꞌngo̱ sa gaꞌmin ni̱ gata:
—Gàꞌ gisîj hua daranꞌanj hia̱j na̱nj ánj.
18 Hiôꞌ ni̱ gahui sinàn duꞌhui ni̱ gaꞌmin nej sa gaꞌmin ni̱ gaguâj duꞌhui,
ni̱ gaꞌhuij ꞌngo̱ ñûn nùkuaj riñan hioꞌóo,
ni̱ huê danj ni̱ gaꞌhuij aꞌngô ñûn nùkuaj nìko xi,
ni̱ àsìj gaꞌanj gimàn nej guiì riñan hioꞌóo ni̱ nitaj àmàn giniꞌin ninj gaꞌnaꞌ ꞌngo̱ ñûn nùkuaj nìko xi manj.
19 Huê danj ni̱ nda huàꞌnï̀nj giyichraꞌ da̱ꞌa̱j yumanꞌ snàꞌanj gùꞌnàj Babilonia,
ni̱ huê danj na̱nj ganahuij daranꞌ nej yumanꞌ snàꞌànj màn ruhuâ yumiguìi,
ni̱ gananun ruhuâ Ma̱ꞌan Ñaꞌanj an niꞌin sa aꞌnanꞌ staꞌu giꞌhiaj yumanꞌ snàꞌànj Babilonia,
ni̱ ûta naꞌan ruhuâ Ma̱ꞌan Ñaꞌanj an niꞌin yumanꞌ snàꞌànj nânj ni̱ ûta giꞌhia kastîgu ngà yumanꞌ nânj.
20 Huê danj ni̱ ganagaꞌ daranꞌ nej hioꞌó nu̱n ruhuâ nne ña̱ꞌa̱nj riki nne ña̱ꞌa̱nj,
ni̱ nitaj gàꞌ si ꞌngo̱ kï̱j yàkàn hua gàꞌ mánj.
21 Ni̱ gininj atan nìko xi neꞌ yàtàꞌa yichrá nej guiì ni̱ huaj dàj rûnꞌ hua huej e ni̱ gachîn riñan huìj xia kilu àꞌij;
ni̱ ûta kï̱j gaꞌmin nej guiì riñan Ma̱ꞌan Ñaꞌanj an rayiꞌî sa yìꞌì giꞌhiaj nej atan nìko xi nânj,
dadinꞌ ûta giranꞌ sa̱ñu̱n ninj giꞌhiaj sa yìꞌì xi dânj.