Gi̱ranꞌ sa̱ñu̱n staꞌu siyànà guduꞌhuêj nneè kú
17
Hiôꞌ ni̱ gaꞌnaꞌ ꞌngo̱ nej chi̱j ángel ni̱ka̱j nej chi̱j kopa,
ni̱ gata gunḯn:
—Gu̱hua̱ꞌ neꞌ dànanj,
ni̱ gi̱di̱gán dadinꞌ gàꞌ giriꞌ nìꞌhiaj siyànà duꞌhuêj staꞌu ma̱ꞌan si ga̱na̱huin ra̱ꞌa kastîgu,
ni̱ nne riñan gàꞌì ñan nu̱n nne ña̱ꞌa̱nj;
2 ni̱ ganakaj duguiꞌ nej rey ni̱ka̱j su̱n ruhuâ yumiguìi ngà siyànà nânj ni̱ girânj nej sôꞌ sa guduꞌhue,
ni̱ huê danj na̱nj ûta ganahuij ruhuâ nej guiì màn riñan hioꞌóo girânj ninj rasu̱n du̱ꞌhue̱e dàj rûn giꞌhiaj siyànà nânj.
3 Hiôꞌ ni̱ ginikaj Ma̱ꞌan Espíritu Santo gaꞌan ñùnj riñan hioꞌó nàkòo;
ni̱ giniꞌín nne ꞌngo̱ siyànàa yichrá yuku nùkuaj ma̱re xi ni̱ nda ganahuij nï̀nꞌ gàchràꞌ yôꞌ nnûn siyu̱gui yôꞌ sa kï̱j huaa,
ni̱ nnùn chi̱j ahui yôꞌ ni̱ nnùn chi̱ꞌ sikú yôꞌ.
4 Ni̱ nu̱n siyànà dan atsîj kua̱n sàꞌ xi ngà atsîj ma̱re ni̱ nagiꞌhiaj nìhiàꞌ nej sij riñan atsîj dânj ngà agaꞌ oro,
ni̱ nnùn hiëj nìhiàꞌa riñanj,
ni̱ nnùn perla riñanj,
ni̱ ꞌnï̱nj raꞌa siyànà dânj ꞌngo̱ basu ni̱ ruhuâ basû dânj nun daranꞌ nej gakï̱nꞌ kï̱j hua xi ni̱ huê danj na̱nj nu̱n daranꞌ nej sa kï̱j hua giꞌhia ngà nej ñaꞌanj digañuꞌunj un;
5 ni̱ hio siyànà dânj nnûn siyu̱gui,
huin ꞌngo̱ sa huìi:
“NI̱ TA BABILONIA SA NÌKO,
NNI NEJ SIYÀNÀ DUꞌHUÊJ MA̱ꞌAN,
NI̱ NEJ SA GIꞌHIAJ KÏ̱J RIÑAN HIOꞌÓO.”
6 Ni̱ giniꞌín si ûta ayinï̀n siyànà dânj ngà tun nej sôꞌ gèe ni̱ nej sôꞌ nânj huin sa gahuiꞌ guendâ gananï̂n nej sôꞌ rayiꞌî Ma̱ꞌan Jesús;
ni̱ nga giniꞌín ni̱ ûta gahuin ña̱ꞌanj ruhuâj.
7 Ni̱ gataj ángel gunḯn:
—Nùnj huin saj ni̱ gahuin ña̱ꞌanj ruhuâ ràꞌaj.
Ñùnj gataj gu̱nïnꞌ rayiꞌî nuguanꞌ hua̱ huì rayiꞌî siyànà nânj ni̱ huê danj na̱nj gànàtàj rayiꞌî yuku nùkuaj gata gaꞌnaꞌ siyànà nânj,
dadinꞌ nnùn chi̱j ahui xuj ni̱ nnùn chi̱ꞌ sikú xuj.
8 Yuku nùkuaj xi giniꞌînꞌ dan huin yuku gàꞌ gane si̱nï̱n,
sani̱ hia̱j ni̱ nitaj si nne xuj gàꞌ mánj,
sani̱ ga̱hui̱ ñûn xuj ni̱ ga̱ꞌna̱ꞌ xuj ruhuâ hiuꞌuj gu̱nu̱n xi nu̱n riki hioꞌóo sani̱ neꞌ rùkù ni̱ gi̱rë̱ꞌ xuj;
ni̱ gahuin ña̱ꞌanj ruhuâ nej guiì màn riñan hioꞌóo nga giniꞌin ninj yuku nùkuaj xi dânj,
ni̱ nej guiì dânj huin sa nitaj si tàj siyu̱gui riñan librû tàj siyu̱gui nej guiì ga̱ne nìgànj nï̀nꞌ àsìj nga gayi̱ꞌij gaꞌanj gimàn nej guiì riñan hioꞌóo ni̱ yuku nùkuaj giniꞌin ninj dânj huin yuku gàꞌ gaꞌnaꞌ sani̱ nitaj si nne yôꞌ gàꞌ mánj,
sani̱ ga̱ꞌna̱ꞌ ñûn yôꞌ.
9 ’Nuguanꞌ nânj huin,
guendâ nej sí sìkàꞌ raa̱ ni̱ niꞌin nï̀nꞌ ruhuâ nej sôꞌ,
ni̱ raa̱ nej chi̱j kïj nânj nne siyànà nânj;
ni̱ nej chi̱j ahui siyànà nânj huin chi̱j rey.
10 Ni̱ ùnꞌùnꞌ rey gàꞌ girëꞌ;
ni̱ ni̱ka̱j sun ꞌngo̱ sôꞌ,
sani̱ hua̱ na̱nj ga̱chin ga̱ꞌna̱ꞌ aꞌngô sôꞌ,
sani̱ nga gùyùmàn aꞌngô sôꞌ dânj ni̱ do̱j nï̀nꞌ diû gi̱nikaj su̱n sôꞌ.
11 Ni̱ yuku nùkuaj xi gane si̱nï̱n dânj huin sa ginikaj su̱n,
sani̱ hia̱j ni̱ nitaj si ni̱ka̱j su̱n yôꞌ,
ni̱ huê yôꞌ gahuin rey huin sa tï̱nj ïn;
ni̱ huê yôꞌ huin goꞌngo̱ nej chi̱j rey ginikaj su̱n,
sani̱ ga̱na̱ka̱j su̱n ñûn yôꞌ sani̱ neꞌ rùkù ni̱ dàñùn gi̱rë̱ꞌ yôꞌ.
12 ’Ni̱ nej chi̱ꞌ sikú yuku giniꞌînꞌ dânj huin,
chi̱ꞌ rey,
sani̱ hua̱ na̱nj nun ga̱na̱ka̱j su̱n nej sôꞌ gàꞌ mánj;
sani̱ ꞌngo̱ rïn ora ni̱ ga̱na̱ka̱j su̱n nej sôꞌ ni̱ ga̱huin nej sôꞌ rey ni̱ gi̱ni̱kaj su̱n nej sôꞌ nga ginikaj su̱n yuku nùkuaj xi dânj.
13 Ni̱ gu̱ña̱n chre ganï̂n ruhuâ nej sôꞌ gi̱ꞌhiaj sun nej sôꞌ,
ni̱ gaꞌnï̂nj nej sôꞌ si gi̱ni̱kaj su̱n yuku nùkuaj dânj riñan nej sôꞌ.
14 Huê danj ni̱ gùtàꞌ nej sí dânj ngà Ma̱ꞌan Jesús,
sani̱ gi̱ꞌhiaj ga̱nan Ma̱ꞌan Jesús nej sí dânj,
ni̱ huê danj na̱nj gi̱ꞌhiaj ga̱nan nej sôꞌ ni̱ka̱j duguiꞌ ngà Ma̱ꞌan nej sí dânj,
dadinꞌ Ma̱ꞌan huin sa ganagui ni̱ Ma̱ꞌan hui sa gakḯn nej sí ni̱ka̱j duguiꞌ nngaj ni̱ dagahuin yìtï̀nj nej sôꞌ riñanj,
ni̱ Ma̱ꞌan huin Señor ni̱ka̱j su̱n riñan nej síi ni̱ Ma̱ꞌan huin Rey ni̱ka̱j su̱n riñan nej rey.
15 Ni̱ huê danj na̱nj gata gunḯn:
—Nej nne nu̱n giniꞌînꞌ ñan nne siyànà guduꞌhuêj ma̱ꞌan dânj,
huin nej yumanꞌan,
nej guiì rìgìi,
nej país ni̱ nej nânj aꞌmin nej guiì màn nï̀nꞌ gàchràꞌ ruhuâ yumiguìi.
16 Ni̱ nej chi̱ꞌ sikú yuku nùkuaj xi giniꞌînꞌ dânj,
ni̱ ga̱ta̱ rùhuà ninj ni̱ nun gi̱ni̱nj hueꞌê siyànà guduꞌhuêj ma̱ꞌan dânj riñan ninj,
ni̱ gi̱ꞌhiaj ninj si ûta gi̱ranꞌ sa̱ñu̱n siyànà dânj ni̱ gaꞌnêj ninj daran nej sa huin siꞌhiaj ñûnꞌ,
ni̱ ya̱ ninj nneè ñûnꞌ,
ni̱ huê danj na̱nj ga̱chri̱ ñaꞌan ninj ñûnꞌ;
17 dadinꞌ Ma̱ꞌan Ñaꞌanj an huin sa gaꞌnḯn ruhuâ ma̱ꞌan nimân nej sij,
ni̱ rayiꞌî dan ni̱ gu̱ña̱n chre guchiꞌ nej sij ꞌngo̱ duꞌhua,
guendâ du̱nahuij nej sij siyànà guduꞌhuêj ma̱ꞌan dânj:
Ni̱ gaꞌnï̂nj nej sij si gi̱nikaj su̱n yuku nùkuaj xi dânj riñan nej sij,
nda gànùn nuguanꞌ nnùn riñan ñanj si-nùguànꞌ Ma̱ꞌan Ñaꞌanj an.
18 Ni̱ siyànà giniꞌînꞌ dan huin yumanꞌ snàꞌànj xi ni̱ka̱j sun riñan nej rey ni̱ka̱j su̱n màn ruhuâ yumiguìi.