Gàꞌ gininj Babilonia nìko xi
18
Neꞌ rùkù nej nânj ni̱ giniꞌín gininj aꞌngô ángel ni̱ka̱j sun nìko gaꞌnaj neꞌ yàtàꞌa;
ni̱ nda giyigï̀n chre riñan hioꞌóo giꞌhiaj sa gira̱n hua̱j.
2 Ni̱ ûta nùkuaj gaꞌmin,
ni̱ gata:
—Gàꞌ girëꞌ,
ni̱ gàꞌ girëꞌ Babilonia nìko xi,
ni̱ gahuin ñan nne nej sa kï̱j ï ni̱ ñan màn daranꞌ nej nanè kï̱j huaa,
ni̱ hiuj dânj huin ñan màn sigitï̱nj nu̱n daranꞌ nej yataj nìko kï̱j hua nitaj si yôꞌ.
3 Ni̱ daranꞌ nej país girânj nej rasu̱n du̱ꞌhue̱ guduꞌhue;
ni̱ huê danj na̱nj girânj nej rey ni̱ka̱j su̱n riñan hioꞌóo nej rasu̱n guduꞌhue ni̱ huê danj na̱nj gahuin yi̱ruꞌhue daranꞌ nej sí girânj ni̱ naduꞌhuêj nej rasu̱n guduꞌhuêj siyànà nânj.
4 Ni̱ gunḯn gaꞌmin aꞌngô sa gaꞌmin neꞌ yàtàꞌa,
ni̱ gata:
—Nej suj nìkòꞌ rukú ni̱ ga̱hui̱ nej suj ruhuâ yumanꞌ snàꞌànj Babilonia,
ni̱ si̱ giꞌhiaj nej suj gakï̱nꞌ giꞌhiaj nej guiì màn ruhuâ yumanꞌ snàꞌànj dânj,
hiôꞌ ni̱ si̱ gunuta nej suj sa yìꞌì xi gàꞌhuìj gi̱ranꞌ sa̱ñu̱n nej guiì màn ruhuâ yumanꞌ snàꞌànj dânj;
5 ni̱ gananun ruhuâ Ma̱ꞌan Ñaꞌanj an niꞌin daranꞌ nej sa kï̱j hua giꞌhiaj nej guiì màn hiuj dânj,
dadinꞌ gàꞌ gisîj si-ga̱kïnꞌ ninj nda yàtàꞌa.
6 Gàꞌhuìꞌ nej suj kastîgu ga̱na̱huin ra̱ꞌa,
dàj rûnꞌ gaꞌhuij kastîgu riñan aꞌngô nej guiì ni̱ ûta sàꞌ gahuin ruhuâ ninj giꞌhia,
ni̱ gi̱ꞌhiaj nej suj si nda huàꞌ gi̱ranꞌ sa̱ñunj ni̱ ûta sàꞌ ga̱huin ruhuaj rayiꞌî sa̱ñu̱n ganahuin ra̱ꞌa.
7 Ni̱ nga ganï̂n ruhuaj si nitaj nùnj ga̱chin riñanj,
ni̱ nne ûta ganahuin nìhiàꞌ ruhuaj,
ni̱ du̱guaꞌì nej suj ni̱ gi̱ranꞌ sa̱ñu̱n staꞌu gi̱ꞌhiaj nej suj ni̱ nda du̱gueꞌe giꞌhiaj nej suj,
dadinꞌ gata ngà nda ruhuâ nimanj:
“Nda achij chre nné dadinꞌ reina huín,
ni̱ sê siyànà mi̱nj i̱n huín,
ni̱ nitaj àmàn dugueꞌé mánj.”
8 Rayiꞌî dan ni̱ ꞌngo̱ rïn gui ni̱ gùyùmàn nej sa yìꞌì nìko xi dan riñanj;
ni̱ gu̱du̱gue̱ꞌe staꞌuj,
ni̱ ûta ga̱na̱chinj yiꞌnaa riki,
ni̱ gaka gi̱ꞌhiaj ñaꞌaan;
ni̱ ga̱huij,
dadinꞌ Ma̱ꞌan Ñaꞌanj an huin Ma̱ꞌan Señor nne ganakaj guendâ,
ni̱ sa ni̱ka̱j su̱n nï̀nꞌ ruhuâ.
9 Ni̱ àsìj ni̱ ûta ganahuin nìhiàꞌ ruhuâ nej rey ni̱ka̱j su̱n riñan hioꞌóo ngà siyànà nânj,
dadinꞌ girânj nej sôꞌ nej rasu̱n du̱ꞌhue̱ guduꞌhue ni̱ nga gi̱ni̱ꞌin nej sôꞌ gi̱ranꞌ sa̱ñunj ni̱ ûta gu̱du̱ꞌgue̱ꞌe nej sôꞌ,
ni̱ gaguâj hia nej sôꞌ nga giniꞌin nej sôꞌ ganayumàn gatse̱ꞌe gaka nda yàtàꞌa,
10 ni̱ nda ga̱nꞌ nikïnꞌ nej sôꞌ giniꞌhiaj nej sôꞌ dadinꞌ yuꞌhuiꞌ nej sôꞌ guendâ giniꞌin nej sôꞌ ganahuin ra̱ꞌa kastîgu,
ni̱ gataj nej sôꞌ:
—Ûta giranꞌ sa̱ñu̱n,
ûta giranꞌ sa̱ñu̱n,
yumanꞌ snàꞌànj nìko xi gùꞌnàj Babilonia,
dadinꞌ gahuin ꞌngo̱ yumanꞌ snàꞌànj xi ginikaj su̱n;
dadinꞌ ꞌngo̱ rïn ora ni̱ guyumân kastîgu riñanj.
11 Ni̱ ûta gudugueꞌe ni̱ gaguâj hia nej sí girânj naduꞌhuej nej rasu̱n màn riñan hioꞌóo,
dadinꞌ gàꞌ si ꞌngo̱ nej guiì naꞌhuej gi̱ra̱n nej rasu̱n guduꞌhuêj nej sôꞌ;
12 dadinꞌ naꞌhue gànèꞌ agaꞌ oro,
agaꞌ plata,
nej hiëj nìhiàꞌa,
hiëj perla,
atsîj lino sàꞌ xi,
atsîj kua̱n sàꞌ xi,
atsîj seda,
atsîj ma̱re sàꞌ xi,
daranꞌ nej chrun gïnꞌ da̱j a,
daran nej rasu̱n giꞌhiaj nej sij ngà kú sàꞌ xi,
daranꞌ nej sa giꞌhiaj nej sij ngà chrun sàꞌ xi,
agaꞌ kobre,
agaꞌa,
hiëj mármol;
13 kḯ kanela,
koj gïnꞌ dàj a,
sikíi,
mirra,
sikí gïnꞌ dàj a,
nne bino,
gasîti,
chru rachrúun,
ka̱n trigu,
yuku nùkuaj,
matsïj ï,
guâhiu ni̱ karru,
nej sí ꞌhiaj sun chre,
sí guduꞌhuêj ma̱ꞌan nimân nej guiì.
14 Ni̱ ga̱ta̱j nej sôꞌ:
—Nitaj si huaj gìrìꞌ nej chruj tsìꞌ ûta garanꞌ ruhuâꞌ ma̱ꞌan nimânt ya̱ꞌ ni̱ nej sa dàj garanꞌ ruhuâꞌ ya̱ꞌ,
hia̱j ni̱ nìgànj girëꞌ nej sa sàꞌ xi ga riñanꞌ ni̱ huê danj na̱nj si̱ ga yi̱ruꞌhueꞌ gàꞌ mánj.
15 Ni̱ ûta gahuin yi̱ruꞌhue nej sí girânj ni̱ naduꞌhuêj nej rasu̱n nânj,
ni̱ nda gànꞌ ga̱nikïnꞌ nej sôꞌ gi̱ni̱ꞌhiaj nej sôꞌ dadinꞌ ûta yuꞌhuiꞌ nej sôꞌ guendâ giranꞌ sa̱ñunj,
ni̱ gu̱du̱gue̱ꞌe nej sôꞌ ni̱ gaguâj hia nej sôꞌ mân nej sôꞌ,
16 ni̱ gataj nej sôꞌ:
—Ûta giranꞌ sa̱ñu̱n,
ûta giranꞌ sa̱ñu̱n,
siyànà huin staꞌu doj,
dadinꞌ ginunj atsîj lino sàꞌ xi,
atsîj kua̱n sàꞌ xi,
ni̱ atsîj ma̱re sàꞌ xi,
ni̱ màn oro yichrá atsîj sàꞌ xi nunj,
ni̱ màn hiëj nìhiàꞌa yichra,
ni̱ màn sa ran gùꞌnàj perla riñan siganꞌanj.
17 Ni̱ man ꞌngo̱ rïn ora ni̱ ganahuij daranꞌ nej rasu̱n du̱ꞌhue̱ ga riñanj.
Ni̱ nda ga̱nꞌ ganikïnꞌ daranꞌ nej kapitán ni̱ka̱j su̱n riñan nej barku,
ni̱ huê danj na̱nj màn daranꞌ nej guiì hua̱j ruhuâ barku,
ni̱ huê danj na̱nj màn nej sí giꞌhiaj su̱n ruhuâ barku,
ni̱ màn nej sí giꞌhiaj sun riñan nne ña̱ꞌa̱nj ni̱ màn daranꞌ nej sij giniꞌhiaj nej sij;
18 ni̱ gaka man ni̱ nda garrù chre nayumàn gatse̱ꞌe,
ni̱ gataj nej síi nga giniꞌin nej sôꞌ:
—Ahuin ꞌngo̱ yumanꞌ snàꞌànj giran dàj rûnꞌ giranꞌ yumanꞌ snàꞌànj nânj ràꞌaj.
19 Ni̱ dagamanꞌ nej sij hia̱j ahui nej sij,
ni̱ gaꞌmin nej sij,
ni̱ gudugueꞌe nej sij ni̱ gaguâj hia nej sij ni̱ gataj nej sij:
—Ûta giranꞌ sa̱ñu̱n,
ûta giranꞌ sa̱ñu̱n yumanꞌ snàꞌànj xi nânj,
dadinꞌ ûta gahuin yi̱ruꞌhue nej sí ni̱ka̱j barku giꞌhia ngà nej rasu̱n du̱ꞌhue̱ hua̱ riñanj;
dadinꞌ ꞌngo̱ rïn ora ni̱ gàꞌ ꞌngo̱ ganahui na̱nj ánj.
20 Ga̱na̱huin nìhiàꞌ ruhuâ nej suj màn neꞌ yàtàꞌa,
ni̱ huê danj na̱nj ga̱na̱huin nìhiàꞌ ruhuâ,
nej suj huin apóstol,
ni̱ nej suj sí gataj dàj ga̱huin;
dadinꞌ giꞌhiaj Ma̱ꞌan Ñaꞌanj an kastîgu riñan siyànà nânj guendâ giꞌhia giranꞌ sa̱ñu̱n nej suj.
21 Ni̱ gidaꞌa ꞌngo̱ ángel ni̱ka̱j sun nìko ꞌngo̱ hiëj hua̱ dàj rûnꞌ hua hiëj to guduguâj molino ni̱ gudugueꞌe hiëj dânj ruhuâ nne ña̱ꞌa̱nj,
ni̱ gata:
—Ni̱ huê dàj rûnꞌ nùkuaj gininj hiëj nânj ruhuâ nne ña̱ꞌa̱nj ni̱ huê danj nda nanè chre ga̱na̱huij Babilonia yumanꞌ snàꞌànj huin sa nìko xi,
ni̱ nitaj àmàn huaj gi̱ni̱ꞌin ñûnꞌ man gàꞌ mánj.
22 Ni̱ nitaj àmàn gu̱nïn nej ñûnj gimàn nej sí ga̱chra̱ ngà arpa,
ngà rihiaa,
ngà chrun aꞌña̱nj an;
ni̱ nitaj àmàn huaj gimàn nej sí gi̱ꞌhiaj suun riñanꞌ,
ni̱ huê danj na̱nj si̱ gunïn nej ñûnj gu̱du̱gue̱ꞌe agaꞌ molino riñanꞌ gàꞌ mánj.
23 Ni̱ nitaj àmàn huaj gìyï̀gï̀n daꞌan lampara riñanꞌ,
ni̱ nitaj àmàn gu̱nïnꞌ ga̱ra̱n ra̱ꞌa nej guiì riñanꞌ;
dadinꞌ nej sí guduꞌhuêj nej rasu̱un riñanꞌ huin nej sí aꞌnïnꞌ riñan hioꞌóo,
ni̱ ngà nej sun stuꞌhuaj giꞌhiâꞌ ni̱ gunukuáꞌ gidigañuꞌunj nej país màn ruhuâ yumiguìi.
24 Dadinꞌ yichrá yumanꞌ snàꞌànj nânj tá tun daranꞌ nej sôꞌ gahuiꞌ nï̀nꞌ gàchràꞌ riñan hioꞌóo,
nej sôꞌ gataj dàj gahuin nej sôꞌ dugumîn ma̱ꞌan riñan gakï̱nꞌïn.