Achrá nej sij chraꞌa neꞌ yàtàꞌa
19
Neꞌ rùkù nej nânj ni̱ gunḯn gaꞌmin ûta gàꞌì nej guiì rìgìi neꞌ yàtàꞌa,
ni̱ gataj ninj:
Aleluya.
Gi̱nikaj ni̱ꞌña̱nj nêꞌ ni̱ gaꞌmi̱n hueꞌê nêꞌ yiꞌî Ma̱ꞌan Señor,
dadinꞌ Ma̱ꞌan huin sa ni̱ka̱j su̱n ni̱ Ma̱ꞌan huin sa giꞌhiaj gananinꞌ;
2 Dadinꞌ sa ganakaj guendâ Ma̱ꞌan Ñaꞌanj an ni̱ huin sa yàngàꞌa ni̱ sa ni̱ka̱a;
dadinꞌ hia̱j ni̱ giꞌhia kastîgu siyànà guduꞌhuêj staꞌu ma̱ꞌan
dadinꞌ huê siyànà nânj huin sa giꞌhiaj kï̱j nï̀nꞌ gàchràꞌ riñan hioꞌóo dadinꞌ gidiganj si ginùn ña̱ꞌa̱nj nej guiì riñan nej ñaꞌanj giꞌhiaj ra̱ꞌa nej síi,
ni̱ rayiꞌî dan ni̱ dàñùn giꞌhiaj Ma̱ꞌan Ñaꞌanj an kastîgu nngaj guendâ ûta gañan tun nej sôꞌ gunânj gi̱tsi riñan Ma̱ꞌan Ñaꞌanj an.
3 Ni̱ gataj ñûn nej sa màn neꞌ yàtàꞌa:
—Aleluya.
Ni̱ nìgànj chre ga̱hui̱ gatse̱ gaka siyànà dânj.
4 Huê danj ni̱ ganikïnꞌ rúdàkòj ni̱ ginun ña̱ꞌa̱nj nej ko̱ ga̱ꞌanj síchìj achij dânj ngà nej ga̱ꞌanj sa hua̱ nìꞌnàꞌ dânj riñan Ma̱ꞌan Ñaꞌanj an nne riñan chrun yîla,
ni̱ gataj nej sôꞌ:
—Huê danj huin na̱nj ánj.
Aleluya.
5 Ni̱ ñan ni̱kï̱nꞌ chrun yilâ nne Ma̱ꞌan Ñaꞌanj an,
gaꞌminꞌ ꞌngo̱ sa gaꞌmin ni̱ gata:
Ga̱ꞌmi̱n hueꞌê daranꞌ nej suj gunânj gi̱tsi riñan Daꞌanj nêꞌ,
nej suj nu̱n yuꞌhuiꞌ ruhuâ ni̱ dagahuin nej suj,
ni̱ nej suj nitaj sun nikaj ngà nej suj ni̱ka̱j sun yàkàan,
na̱nj ánj.
Giꞌñanj ga̱ra̱n ràꞌa Matsïj lij
6 Ni̱ gunḯn gaꞌmin ûta gàꞌì nej guiì rìgìi ni̱ gaꞌmin ninj dàj rûnꞌ gahuin nga nda garï̱n chre gunânj kïn,
ni̱ gahuin dàj rûn gahuin nga nda garï̱n chre gaguâj nej duꞌhui,
ni̱ gataj ninj:
Aleluya,
hia̱j ni̱ gàꞌ ganakaj su̱n Ma̱ꞌan Daꞌanj nêꞌ.
7 Ga̱huin nìhiàꞌ staꞌu ruhuâ nêꞌ,
ni̱ ga̱ꞌmi̱n hueꞌê nêꞌ rayiꞌî Ma̱ꞌan Ñaꞌanj an:
Dadinꞌ gàꞌ guyumân gui ga̱ra̱n ra̱ꞌa Ma̱ꞌan Jesús ngà nikaj.
Ni̱ gàꞌ hua̱ yu̱gui nikaj nne ga̱ya̱ka na̱nj ánj.
8 Ni̱ giriꞌ nìꞌhiaj nikaj gi̱nuunj atsîj lino sàꞌ xi,
ni̱ nda gàtsì chre hua riñan atsîj dânj ni̱ nda ran chre hua riñanj,
dadinꞌ lino sàꞌ xi dânj huin sa ni̱ka̱ giꞌhia daꞌ goꞌngo̱ nej guiì dugumîn ma̱ꞌan riñan nej gakï̱nꞌïn na̱nj ánj.
9 Ni̱ gataj ángel dânj gunḯn:
—Ga̱chru̱n sòꞌ:
“Ga̱na̱huin nìhiàꞌ ruhuâ nej guiì gakḯn Ma̱ꞌan Ñaꞌanj an ga̱ꞌna̱ꞌ ninj giꞌñanj ga̱huin stiꞌnï̀ïn nga ga̱ra̱n ra̱ꞌa Ma̱ꞌan Jesús ngà nikaj.”
Ni̱ gata gunḯn:
—Nej nuguanꞌ nânj huin nuguanꞌ yàngàꞌ gaꞌmin Ma̱ꞌan Ñaꞌanj an na̱nj ánj.
10 Ni̱ ganikïnꞌ rúdàkò yiꞌî ángel guendâ ginu̱n ñànꞌàn ángel dânj.
Sani̱ gata gunḯn:
—Si̱ giꞌhiâꞌ dan mánj;
dadinꞌ ñùnj huín ꞌngo̱ musû gunânj gi̱tsi riñan Ma̱ꞌan Ñaꞌanj an dàj rûnꞌ huînꞌ,
ni̱ dàj rûnꞌ huin nej dinï̂nt dadinꞌ guyumân ruhuâ nej eꞌ niꞌin nej eꞌ nej nuguanꞌ gaꞌmin Ma̱ꞌan Jesús.
Ginu̱n ña̱ꞌa̱njꞌ Ma̱ꞌan Ñaꞌanj an;
dadinꞌ nej sôꞌ ganataꞌ si-nùguànꞌ Ma̱ꞌan Ñaꞌanj an huin nej sôꞌ gidigân nej nuguanꞌ ganataꞌ dàj gahuin.
Ma̱ꞌan sa tàj yichrá guahiû gàtsìi
11 Ni̱ giniꞌín hua niꞌnï̂nj yàtàꞌa,
huê danj ni̱ giniꞌín ꞌngo̱ guahiû gàtsìi,
ni̱ Ma̱ꞌan sa tàj yichrá guahiû dânj gùꞌnàj Ma̱ꞌan sa hueꞌê dagahuin ni̱ Ma̱ꞌan sa yàngàꞌa dadinꞌ nda ni̱ka̱ chre nikaj sùnj ni̱ ûta hueꞌê gutaj ngà nej guiì gunïnꞌ nngaj.
12 Ni̱ rune ñanj hua dàj rûnꞌ hua ñaꞌaan nga ganayumanj,
ni̱ nu̱n gàꞌì diadema ahui;
ni̱ hua̱ ꞌngo̱ siyu̱gui sani̱ nitaj gàꞌ si ꞌngo̱ nej guiì niꞌin dadinꞌ man ꞌngo̱ rïn Ma̱ꞌan niꞌin ahuin si huin siyu̱gui.
13 Ni̱ nu̱nj ꞌngo̱ atsîj giyîꞌij nï̀nꞌ tun;
ni̱ siyu̱gui huin:
SI-NÙGUÀNꞌ MA̱ꞌAN ÑAꞌANJ AN.
14 Ni̱ rukuj nikòꞌ ꞌngo̱ yiꞌnïn nìko xi nej stadû màn neꞌ yàtàꞌa ni̱ tàj nej sôꞌ yichrá guahiû gàtsìi,
ni̱ nu̱n daꞌ goꞌngo̱ nej sôꞌ atsîj lino gàtsì sàꞌ xi ni̱ nitaj gàꞌ si do̱j díin hua riñan siganꞌ nej sôꞌ.
15 Ni̱ ruhuâ duꞌhua gahui ꞌngo̱ spâda ra̱ sìhià chre guendâ gu̱du̱ranꞌ yiꞌìj nej país màn ruhuâ yumiguìi,
ni̱ nga gi̱nikaj sunj ni̱ ga̱ra̱n sunj niꞌî a̱gaꞌa;
ni̱ Ma̱ꞌan huin sa gùrùn riñan nej chruj uba ni̱ ga̱hui̱ nne chruj uba,
dânj huin nga ûta huin ruhuaj gi̱ꞌhia kastîgu nej guiì dadinꞌ ûta naꞌan ruhuâ Ma̱ꞌan Ñaꞌanj an niꞌin nej guiì rayiꞌî nej gakï̱nꞌ giꞌhiaj ninj ni̱ Ma̱ꞌan Ñaꞌanj an huin sa ni̱ka̱j su̱n nï̀nꞌ ruhuâ.
16 Ni̱ riñan siganꞌanj ni̱ riñan daꞌmanj nnûn siyu̱gui ni̱ ta:
“REY NI̱KA̱J SU̱N RIÑAN DARANꞌ NEJ REY NI̱ SEÑOR NI̱KA̱J SU̱N RIÑAN DARANꞌ NEJ SEÑOR.”
17 Ni̱ giniꞌín nikïnꞌ ga̱hia ꞌngo̱ ángel riñan gui,
ni̱ ûta nùkuaj gagua,
ni̱ gata:
—Ga̱ꞌna̱ꞌ daranꞌ nej suj nej yataj aché yàtàꞌa,
ni̱ ga̱na̱huin chre̱ꞌ nej suj dadinꞌ ga̱ ꞌngo̱ nihia nìko xi gi̱ꞌhiaj Ma̱ꞌan Ñaꞌanj an ga̱huin stiꞌnï̀n nej suj,
18 Ni̱ ya̱ nej suj nneè nej rey nneè nej kapitán,
ni̱ nneè nej stadû ûta hue,
ni̱ nneè nej guâhiu,
ni̱ nneè nej sí tàj yichrá nej guâhiu,
ni̱ ya̱ nej suj nneè daranꞌ nej sí giꞌhiaj sun si-su̱n ma̱ꞌan ngà nej sí ꞌnï̱nj giꞌhiaj sun chre,
ni̱ huê danj na̱nj ya̱ nej suj nneè nej sí nitaj sun nikaj,
ngà nneè nej sí ni̱ka̱j sun yàkàan.
19 Ni̱ giniꞌín nikïnꞌ yuku nùkuaj xi dânj ngà nej rey ni̱ka̱j su̱n riñan hioꞌóo ni̱ màn nej si-stadû nej sôꞌ ngà nej sôꞌ,
ni̱ màn chreꞌ nej sôꞌ guendâ ruhuâ nej sôꞌ gùtàꞌ nej sôꞌ ngà Ma̱ꞌan sa tàj yichrá guâhiu gàtsìi ni̱ ngà nej stadû hua̱j ngà Ma̱ꞌan.
20 Ni̱ gidaꞌa nej sij gumînj nej sij yuku nùkuaj xi dânj,
ni̱ huê danj na̱nj gidaꞌa nej sij gumînj nej sij profeta gidigañuꞌunj un dadinꞌ huê sôꞌ huin sí giꞌhiaj si-da̱ꞌngaꞌ yuku nùkuaj dânj ni̱ rayiꞌî dan ni̱ guyumân ruhuâ nej guiì ni̱ gaꞌnï̂nj ninj ma̱ꞌan ninj giyiꞌij si-da̱ꞌngaꞌ yuku nùkuaj dânj ninj,
ni̱ huê danj na̱nj ginûn ña̱ꞌa̱nj ninj si-da̱ꞌngaꞌ yuku nùkuaj dânj.
Ni̱ hua̱ nìꞌnàꞌ yuku nùkuaj nânj ngà profeta gidigañuꞌunj un ni̱ guduguêj nej sij gaꞌanj nguèj sôꞌ ruhuâ dahue̱ ñan aka ñaꞌaan ngà hioꞌó asufri.
21 Ni̱ gahuiꞌ aꞌngô nej guiì giꞌhiaj spâda gahui ruhuâ duꞌhua sa tàj yichrá guâhiu dânj,
huê danj ni̱ gaꞌnaꞌ nej yataj aché yàtàꞌa ni̱ yâ nej yôꞌ nneè daranꞌ nej guiì gahuiꞌi nda gunumân riki nej yôꞌ.