ꞌNgo̱ mîn hioꞌo
20
Ni̱ giniꞌín gininj ꞌngo̱ ángel gaꞌnaj neꞌ yàtàꞌa,
ni̱ ꞌnï̱nj raꞌa ꞌngo̱ agaꞌ ra̱ꞌa ganaꞌnï̂nj riñan hiuꞌuj gu̱nu̱n xi nun riki hioꞌóo,
ni̱ huê danj na̱nj nï̱nj raꞌa ꞌngo̱ agaꞌ kadena.
2 Ni̱ gidaꞌa yukuá du̱ꞌhui ni̱ yuku nânj huin yukuá nâ ni̱ huê yôꞌ huin sa nàsàꞌa ni̱ huê yôꞌ huin sichre,
ni̱ gumin yôꞌ ꞌngo̱ mîn hioꞌo;
3 ni̱ gudugue gaꞌanj yôꞌ ruhuâ hiuꞌuj gu̱nu̱n xi nu̱n riki hioꞌóo,
ni̱ ganaran duꞌhua hiuꞌuj nânj,
ni̱ gachri si-seyuj riñan rahueꞌ nu̱n riñan hiuꞌuj dânj,
daꞌnga ni̱ si̱ gahui yôꞌ ni̱ gidigañuꞌunj yôꞌ doj nej guiì màn ruhuâ nej país,
nda ga̱na̱huij ꞌngo̱ mîn hioꞌo;
ni̱ nda neꞌ rùkù nej nânj ni̱ ga̱na̱chi Ma̱ꞌan Ñaꞌanj an doj sînj diû yôꞌ.
4 Ni̱ giniꞌín ñan màn chrun yîla,
ni̱ gaꞌanj ga̱ne nej sôꞌ ganahuin ra̱ꞌa suun guendâ gi̱nikaj su̱n nej sôꞌ;
ni̱ giniꞌín ma̱ꞌan nimân nej sôꞌ gahuiꞌ nga gaꞌneꞌ nej sí dânj ahui nej sôꞌ,
guendâ gahuin nej sôꞌ sí gananï̂n si-nùguànꞌ Ma̱ꞌan Ñaꞌanj an ni̱ huê danj na̱nj gananï̂n nej sôꞌ rayiꞌî Ma̱ꞌan Jesús,
ni̱ huê danj na̱nj nun ginu̱n ña̱ꞌa̱nj nej sôꞌ yuku nùkuaj xi dânj ngà ñan du̱ꞌhua yôꞌ,
ni̱ nun ga̱ꞌnï̱n nej sôꞌ si gìyìꞌìj daꞌnga hio nej sôꞌ ngà raꞌa nej sôꞌ,
ni̱ ganaꞌnï̂nj nej sôꞌ ni̱ gane nej sôꞌ ni̱ ginikaj su̱n nej sôꞌ ngà Ma̱ꞌan Cristo ꞌngo̱ mîn hioꞌo.
5 Sani̱ nda gisîj ꞌngo̱ mîn hioꞌo daꞌnga gàꞌnàꞌnï̀nj aꞌngô nej nîman.
Ni̱ nânj huin sa si̱nï̱n ganaꞌnïnj nej sôꞌ.
6 Ga̱na̱huin nìhiàꞌ ruhuâ nej guiì ganaꞌnï̂nj si̱nï̱n;
dadinꞌ huin ninj yumanꞌ gèe,
ni̱ si̱ gahuiꞌ ñûn ninj gàꞌ mánj,
dadinꞌ ga̱huin ninj rej riñan Ma̱ꞌan Ñaꞌanj an ni̱ riñan Ma̱ꞌan Cristo,
ni̱ gi̱ni̱kaj su̱n ninj ngà Ma̱ꞌan Cristo ꞌngo̱ mîn hioꞌo.
7 Nga gisîj ꞌngo̱ mîn hioꞌo,
ni̱ ga̱na̱chi nej sij ni̱ ga̱hui̱ sichre ruhuâ dukuâ gaꞌ ñan nne,
8 gahui ni̱ ga̱ꞌa̱nj gidigañuꞌun riñan daranꞌ nej país màn neꞌ yìchràj a,
neꞌ ri̱ki,
neꞌ gisîj gui,
neꞌ gatûj gui,
riñan hioꞌó Gog,
ngà Magog,
guendâ gi̱ꞌhia ga̱na̱huin chre̱ꞌ daranꞌ nej sôꞌ ni̱ gùtàꞌ nej sôꞌ;
ni̱ dàj rûnꞌ mân hioꞌó chru̱u duꞌhua nne ña̱ꞌa̱nj huê danj gimàn nej sôꞌ.
9 Ni̱ nda gachra chre riñan hioꞌóo gaꞌnaꞌ nej sij,
ni̱ gàꞌ ꞌngo̱ duguachrin nej sij rukû ñan màn nej sôꞌ dagahuin hueꞌê riñan Ma̱ꞌan Ñaꞌanj an ni̱ ñan nngaj yumanꞌ snàꞌànj ꞌì ruhuâ Ma̱ꞌan Ñaꞌanj an;
ni̱ giꞌhiaj Ma̱ꞌan Ñaꞌanj an si ga̱ꞌna̱ꞌ ñaꞌaan neꞌ yàtàꞌa,
ni̱ gàꞌ ꞌngo̱ ganahuij daranꞌ nej sij gaka giꞌhiaj ñaꞌaan na̱nj ánj.
10 Ni̱ gi̱da̱ꞌa Ma̱ꞌan Ñaꞌanj an sa nàsàꞌa ni̱ gu̱du̱gue ruhuâ dahue̱ huin hioꞌó asufri,
ñan nne yuku nùkuaj xi dânj ngà profeta gidigañuꞌunj un;
ni̱ gi̱ranꞌ sa̱ñu̱n nej sij neꞌ gui ngà neꞌ ñànꞌan ni̱ nìgànj chre.
Nga ga̱ꞌa̱nj ga̱ne Ma̱ꞌan Ñaꞌanj an riñan chrun yîla ga̱tsi̱i ni̱ na̱gi̱ꞌhia guenda ngà nej guiì
11 Ni̱ giniꞌín nne Ma̱ꞌan Ñaꞌanj an riñan chrun yilâ gàtsì nìko xi,
ni̱ orâ chre ni̱ giyiꞌîj huì hioꞌó ngà yàtàꞌa riñanj,
ni̱ nitaj dànèꞌ giniꞌín ngue gàꞌ mánj.
12 Ni̱ giniꞌín nikïnꞌ ga̱hia nej nîman,
ni̱ ni̱kï̱nꞌ nej nîman nitaj sun ginikaj ni̱ ni̱kï̱nꞌ nej nîman ginikaj sun yàkàan;
ni̱ ganayiꞌnï̂nj riñan nej librû,
ni̱ huê danj na̱nj ganayiꞌnï̂nj riñan aꞌngô librû,
ni̱ librû dânj huin librû tàj siyu̱gui nej nîman gàꞌ huin daꞌní Ma̱ꞌan Ñaꞌanj an;
ni̱ nagiꞌhiaj Ma̱ꞌan Ñaꞌanj an guendâ ngà daꞌ goꞌngo̱ nej nîman dàj taj ma̱ꞌan riñan nej librû,
ni̱ dàj hua ma̱ꞌan sa giꞌhiaj ninj nga gane ninj riñan hioꞌó.
13 Ni̱ gahui ma̱ꞌan nimân nej guiì gaꞌanj ruhuâ rúnâko,
ni̱ da̱ꞌa ganakaj duguiꞌ ngà nneè kú ninj sa nngaj ruhuâ nne ña̱ꞌa̱nj ni̱ aꞌngô da̱ꞌa ganakaj duguiꞌ ngà nneè kú ninj sa nngaj raa̱ guchrùꞌu ni̱ ganaꞌnï̂nj ninj;
ni̱ nagiꞌhiaj Ma̱ꞌan Ñaꞌanj an guenda ngà daꞌ goꞌngo̱ ninj dàj na̱nj hua ma̱ꞌan sa giꞌhiaj ninj nga nï̀nꞌ gane ninj riñan hioꞌóo.
14 Huê danj ni̱ gahui ma̱ꞌan nimân nej sij ruhuâ rúnâko,
ni̱ ganakaj duguiꞌij ngà nneè kú nej sij sa gingaj ra guchrùꞌu ni̱ ganaꞌnï̂nj nej sij,
ni̱ nga gisîj nagiꞌhiaj Ma̱ꞌan Ñaꞌanj an guenda ngà nej sij ni̱ gudugue gaꞌanj nej sij ruhuâ dahue̱ ñan aka ñaꞌaan,
ni̱ ruhuâ dahue̱ nânj ga̱ne nej sij ni̱ nânj huin gàꞌ gisîj huìj gahuiꞌ nej sij.
15 Ni̱ nej guiì nitaj si tàj siyu̱gui riñan librû tàj siyu̱gui nej sôꞌ huin daꞌní Ma̱ꞌan Ñaꞌanj an,
ni̱ guduguêj nej sôꞌ gaꞌanj ninj ruhuâ dahue̱ ñan aka ñaꞌaan.