Ganahuin nàkà yàtàꞌa ni̱ ganahuin nàkà hioꞌóo
21
Ni̱ giniꞌín ganahuin nàkà yàtàꞌa ni̱ ganahuin nàkà hioꞌóo;
dadinꞌ yàtàꞌ gàꞌ ga si̱nï̱n ni̱ hioꞌóo gàꞌ ga si̱nï̱n ni̱ nitaj si hua̱ ngue ni̱ huê danj na̱nj si̱ ga nne ña̱ꞌa̱nj nej gàꞌ mánj.
2 Ni̱ ñùnj huin Juan ni̱ giniꞌín yumanꞌ snàꞌànj huin sa gèe,
ni̱ huej huin Jerusalén huin sa nàkàa,
ni̱ nìkoj yàtàꞌ ñan nne Ma̱ꞌan Ñaꞌanj an,
ni̱ huaj dàj rûnꞌ hua ꞌngo̱ siyànà ña̱n ga̱ya̱ka̱j nika dadinꞌ gàꞌ hua̱ yugui ni̱ nagiꞌhiaj sàꞌaj ma̱ꞌan.
3 Ni̱ gunḯn gaꞌmin nùkuaj ꞌngo̱ sa gaꞌmin neꞌ yàtàꞌa ni̱ gata:
—Ni̱ hiuj nan huin ñan nne Ma̱ꞌan Ñaꞌanj an ngà nej guiì,
ni̱ ga̱ne Ma̱ꞌan ngà ninj;
ni̱ ga̱huin ninj yiñán Ma̱ꞌan,
ni̱ Ma̱ꞌan ga̱huin Daꞌanj ninj.
4 Ni̱ ga̱na̱ꞌhui Ma̱ꞌan Ñaꞌanj an nne rune ñan nej guiì;
ni̱ nitaj guiì gàhuìꞌ hiuj dânj,
ni̱ nitaj guiì du̱gueꞌe,
ni̱ nitaj guiì ga̱gua̱j hia,
ni̱ nitaj guiì gi̱ranꞌ sa̱ñu̱n;
dadinꞌ si̱ ga nej sa giranꞌ si̱nï̱n ninj gàꞌ mánj.
5 Ni̱ gataj Ma̱ꞌan sa nne riñan chrun yilâ hiuj dânj:
—Hia̱j ni̱ nagiꞌhiaj nàkàj daranꞌanj.
Ni̱ huê danj gata gunḯn:
Ga̱chru̱n dadinꞌ nej nuguanꞌ nânj huin sa gùyùmàn ruhuôꞌ ni̱ huej huin sa yàngàꞌa.
6 Ni̱ gata gunḯn:
—Gàꞌ gisîj daranꞌanj na̱nj ánj.
Ñùnj huin letra A ni̱ huê huin letra Z,
ni̱ huê huin sa si̱nï̱ïn ni̱ huê huin sa ganahuij.
Ni̱ guiì ganakô nnee,
ni̱ gàꞌhuìj nne hia̱j gachi ni̱ta goꞌo ninj ni̱ sê si̱ gi̱ran ninj nne dânj mánj ni̱ ga̱ nìꞌnàꞌ nìgànj ninj gi̱ꞌhiâ.
7 Ni̱ guiì gunùkuaj giꞌhiaj ga̱nan ni̱ ga̱na̱huin ra̱ꞌa ninj daranꞌ nej nânj,
ni̱ ñùnj ga̱huin Daꞌanj ninj,
ni̱ ninj ga̱huin daꞌnîn.
8 Sani̱ nej guiì yuꞌhuiꞌ gi̱ranꞌ sa̱ñu̱n yiꞌî si-nùguànꞌ Ma̱ꞌan Ñaꞌanj an ni̱ nej guiì naꞌhuej gùyùmàn ruhuâ niꞌin si-nùguànꞌ Ma̱ꞌan Ñaꞌanj an,
ni̱ nej guiì kï̱j hua hia ni̱ nej guiì dagahuiꞌ guiì,
ni̱ nej guiì aché ni̱ nne sìgìchràꞌ ninj,
ni̱ nej guiì stuꞌhuaj a,
nej guiì nnùn ña̱ꞌa̱nj riñan ñaꞌanj giꞌhiaj ra̱ꞌa nej síi ni̱ daranꞌ nej guiì gidigañuꞌunj ni̱ ga̱ꞌanj ninj ruhuâ dahue̱ aka ñaꞌaan ngà hioꞌó asufri,
ni̱ huê nan huin si gàꞌ gisîj huàꞌ gahuiꞌ ninj na̱nj ánj.
Yumanꞌ snàꞌànj gùꞌnàj Jerusalén sa nàkàa
9 Hiôꞌ ni̱ gaꞌnaꞌ ꞌngo̱ nej ángel ꞌnï̱nj raꞌa nej chi̱j kopa,
ni̱ nda nìchra chre ruhuaj mân nej sa yìꞌì ga̱ꞌna̱ꞌ neꞌ ña̱n doj,
ni̱ gaꞌmin ngàj,
ni̱ gata:
—Gu̱hua̱ꞌ neꞌ dànanj,
ni̱ gi̱di̱gán siyànà gàꞌ nne chru̱n ga̱ya̱ka̱j nika,
dadinꞌ huej gahuin nika Ma̱ꞌan Matsïj hua̱ lij na̱nj ánj.
10 Ni̱ ginikaj Ma̱ꞌan Espíritu gaꞌan ñùnj ra ꞌngo̱ kïj hua̱ nìko ni̱ hua̱ yàkàan,
ni̱ gidiganj ñùnj yumanꞌ snàꞌànj huin sa gè gùꞌnàj Jerusalén,
ni̱ nìkòꞌ yumanꞌ snàꞌànj dânj gaꞌnaj neꞌ yàtàꞌa,
ñan nne Ma̱ꞌan Ñaꞌanj an.
11 Ni̱ huê gè Ma̱ꞌan Ñaꞌanj an huin sa giꞌhiaj ni̱ nda yigï̀n chre riñan yumanꞌ snàꞌànj dânj,
ni̱ nda gira̱n chre riñanj ni̱ huaj dàj rûn hua riñan hiëj hua nìhiàꞌ staꞌu,
ni̱ dàj rûnꞌ hua hiëj jaspe,
ni̱ dàj rûnꞌ akà hua riñan hiëj gùꞌnàj diafana.
12 Ni̱ ganikàj neꞌ rùkuj nikïnꞌ chran yàkàan ni̱ nìko huaj ni̱ nun yùhuìj rahueꞌe riñanj;
ni̱ ni̱kï̱nꞌ ꞌngo̱ ángel duguminj riñan daꞌ goꞌngo̱ nej rahueꞌ dânj,
ni̱ nnùn siyu̱gui nej yùhuìj sôꞌ huin daꞌní Israel riñan nej rahueꞌ dânj;
13 ni̱ nu̱n huàꞌnï̀nj rahueꞌe riñan chran yàkàn giniꞌhiaj neꞌ gisîj gui;
ni̱ nu̱n huàꞌnï̀nj rahueꞌe riñan chran yàkàn giniꞌhiaj neꞌ yìchràj a;
ni̱ nu̱n huàꞌnï̀nj rahueꞌe riñan chran yàkàn giniꞌhiaj neꞌ ri̱ki;
ni̱ nu̱n huàꞌnï̀nj rahueꞌe riñan chran yàkàn giniꞌhiaj neꞌ gatûj gui.
14 Ni̱ yiꞌî chran yàkàn yàchìj ganikàj rukû yumanꞌ snàꞌànj nânj nngaj yùhuìj chran nìko,
ni̱ riñan nej chran nânj nnûn siyu̱gui nej yùhuìj apóstol gunânj gi̱tsi riñan Ma̱ꞌan Jesús.
15 Ni̱ ꞌnï̱nj ꞌngo̱ metru huin ni̱na̱nj agaꞌ oro raꞌa sa ni̱kï̱nꞌ gaꞌmin ngàj,
guendâ gi̱ri̱ñunj dàj hua yumanꞌ snàꞌànj dânj ni̱ dàj yàchìj rahueꞌ nu̱n riñan yumanꞌ snàꞌànj dânj,
ni̱ dàj nìko yàchìj chran ni̱kï̱nꞌ ganikàj rukû yumanꞌ snàꞌànj dânj.
16 Ni̱ hua gàchràꞌ yumanꞌ snàꞌànj dânj,
ni̱ huê dàj rûnꞌ yèꞌej huê danj hua gàchraj;
ni̱ giriñun ángel yumanꞌ snàꞌànj dânj ngà metru ꞌnï̱nj raꞌa huê danj ni̱ gisîj huìj mîn tá ahuîj siêntu kilometru;
ye̱ꞌej,
ni̱ huê danj gàchraj ni̱ huê danj hua yàkanj,
ni̱ gu̱ña̱n chre hua daranꞌanj.
17 Ni̱ giriñun ángel chran yàkàn yàchìj xi ni̱ hua mmanj man huàꞌnï̀nj xia ga̱ꞌanj metru,
ni̱ metru garânj sun nej guiì garânj sun ángel dânj.
18 Ni̱ ni̱na̱nj hiëj gùꞌnàj gaspe garânj sun nej sij ngà ganachrâj nej sij chran yàkàn yàchìj nânj;
sani̱ man ni̱na̱nj agaꞌ oro sàꞌ hia huin yumanꞌ snàꞌànj nânj;
ni̱ dàj rûn akà hua riñan biriu nga hua sàꞌaj huê danj hua akà yumanꞌ snàꞌànj nânj.
19 Ni̱ nej hiëj ganachrâj nej sij chran ñan tàj yiꞌî chran yàkàn ganikàj rukû yumanꞌ snàꞌànj nânj garânj sun nej sij daranꞌ hiëj nìhiàꞌa.
Ni̱ chran si̱nï̱ïn,
huin hiëj jaspe;
ni̱ chran huìj i huin,
Zafiro;
ni̱ chran huàꞌnï̀nj huin,
ágata;
ni̱ chran ga̱ꞌanj huin,
esmeralda;
20 ni̱ chran ùnꞌùnꞌun huin,
ónice;
ni̱ chran huàtànꞌan huin,
cornalina;
ni̱ chran chi̱j i huin,
crisólito;
ni̱ chran tï̱nj ïn huin,
berilo;
ni̱ chran ꞌï̀ïn huin,
topasio;
ni̱ chran chi̱ꞌi huin,
crisopraso;
ni̱ chran yàan huin,
Jacinto;
ni̱ chran yùhuìj i huin,
amatista.
21 Ni̱ nej yùhuìj rahueꞌ dânj huin yùhuìj perla;
ni̱ daꞌ goꞌngo̱ nej rahueꞌ dânj huin perla,
ni̱ chrej gàchràꞌ nun ruhuâ yumanꞌ snàꞌànj dan huin ni̱na̱nj agaꞌ oro sàꞌ nï̀nꞌïn,
ni̱ dàj rûnꞌ niꞌnï̂nj guruguiꞌ giniꞌhio giꞌhiaj biriu huê danj nîꞌnï̱nj guruguiꞌ giniꞌhioꞌ giꞌhia na̱nj ánj.
22 Ni̱ nitaj gàꞌ si ꞌngo̱ hueꞌ huin nûhui giniꞌín hiuj dânj mánj;
dadinꞌ Ma̱ꞌan Señor Ñaꞌanj an giꞌhiaj daranꞌanj ngà Ma̱ꞌan Jesús huin nûhui hiuj dânj.
23 Ni̱ nitaj si niꞌñanj yumanꞌ snàꞌànj nngaj hiuj nânj si gu̱du̱gun gui ni̱ gu̱du̱gun ahui riñanj mánj;
dadinꞌ sira̱n Ma̱ꞌan Ñaꞌanj an giꞌhiaj yigï̀n hiuj nânj,
ni̱ Ma̱ꞌan Jesús huin sa gudugùn.
24 Ni̱ nej país gàꞌ gananin ni̱ ga̱che̱ ninj ngà sa gudugùn giꞌhiaj Ma̱ꞌan Ñaꞌanj an;
ni̱ huê danj na̱nj hueꞌê ga̱ꞌmi̱n nej rey ni̱ka̱j su̱n riñan hioꞌó rayiꞌî yumanꞌ snàꞌànj nânj ni̱ gi̱nikaj nej sôꞌ nej rasu̱n du̱ꞌhue̱ hua̱ riñan nej sôꞌ ga̱ꞌna̱ꞌ nej sôꞌ riñan yumanꞌ snàꞌànj nânj.
25 Ni̱ nitaj àmàn huaj ga̱na̱rán riñan nej rahueꞌ nu̱n riñan yumanꞌ snàꞌànj nânj neꞌ gui,
dadinꞌ nitaj àmàn ga̱ neꞌ ñànꞌan hiuj dânj.
26 Ni̱ gi̱nikaj nej guiì nej rasu̱n du̱ꞌhue̱ hua̱ riñan nej país ñan nne ninj nga ga̱ꞌa̱nj gi̱niꞌhiaj ninj yumanꞌ snàꞌànj nânj,
ni̱ huê danj na̱nj gi̱nikaj chre̱j ninj riñanj na̱nj ánj.
27 Ni̱ gà si ꞌngo̱ nej guiì giꞌhiaj gakï̱nꞌïn,
giꞌhiaj sa kï̱j huaa,
guiì gidigañuꞌunj,
ni̱ si̱ gaꞌhue ga̱tu̱ ninj ruhuâ yumanꞌ snàꞌànj nânj,
man nej guiì taj siyu̱gui riñan si-librû Ma̱ꞌan Jesús huin sa ga̱ꞌhue ga̱tu̱ na̱nj ánj.