22
Neꞌ rùkù ni̱ gidiganj ꞌngo̱ kïn ꞌna̱ꞌ nne hua̱ aka chre ni̱ nne dânj gi̱ꞌhiaj ga̱ nìꞌnòꞌ,
ni̱ dàj rûnꞌ akà hua riñan biriu huê danj akà hua riñan nne nânj,
ni̱ gahui nne dânj ñan ni̱kï̱nꞌ chrun yilâ nne Ma̱ꞌan Ñaꞌanj an ngà ñan nne Ma̱ꞌan Jesús.
2 Ni̱ da̱nï̱n chrej gàchràꞌ huaj ruhuâ yumanꞌ snàꞌànj nânj gachîn ꞌngo̱ kïn ni̱ ànèj ané kïn dânj ni̱kï̱nꞌ chrun gahiu chruj yo̱ꞌ ni̱ ga̱ne nìgùnꞌ,
ni̱ daꞌ ahuii gahiu yùhuìj chruj yo̱ꞌ raa̱ chrun dânj,
ni̱ koj màn raꞌa chrun dânj huin koj gònòꞌò niꞌñanj ga̱ra̱n sun nej país nga gaꞌnanꞌ ninj.
3 Ni̱ si̱ gaꞌnaꞌ gàꞌ si ꞌngo̱ sañuun riñan nej guiì gimàn ruhuâ yumanꞌ snàꞌànj dânj ni̱ ruhuâ yumanꞌ snàꞌànj dânj ga̱ne Ma̱ꞌan Ñaꞌanj an gi̱nikaj sunj ni̱ huê hiuj dânj ga̱ne Ma̱ꞌan Jesús,
ni̱ gimàn nej sôꞌ gunânj gi̱tsi riñan Maꞌan ginùn ña̱ꞌa̱nj nej sôꞌ riñanj,
4 ni̱ gi̱niꞌin daranꞌ nej sij riñan Ma̱ꞌan Ñaꞌanj an ni̱ ginu̱n siyu̱gui Ma̱ꞌan hio nej sij.
5 Ni̱ si̱ ga doj neꞌ ñànꞌan hiuj dânj,
ni̱ huê danj na̱nj si̱ garânj sun nej sij ñaꞌan lampara,
ni̱ si̱ giniꞌñanj nej sij si gu̱du̱gun gui riñan nej sij,
dadinꞌ Ma̱ꞌan Ñaꞌanj an huin sa gu̱du̱gun riñan nej sij,
ni̱ nìgànj chre ga̱ne nej sij hiuj dânj.
Gàꞌ gahuin nichrunꞌ nànìkàj ñûn Ma̱ꞌan Jesús
6 Ni̱ gata gu̱nḯn:
—Nuguanꞌ nânj huin nuguanꞌ daꞌhuiꞌ darûnꞌ gùyùmàn ruhuôꞌ dadinꞌ huin nuguanꞌ yàngàꞌa.
Ni̱ Ma̱ꞌan Señor,
ni̱ka̱j ñuꞌunj riñan nanè nimân nej profeta huej huin sa gaꞌnḯn gaꞌnaꞌ si-ángel guendâ ga̱ta̱j naꞌanj ninj nej sa ga̱huin raꞌña̱nj doj.
7 —Hia̱j rûꞌhuaj,
ni̱ râꞌñanj gàꞌnàj.
Ni̱ ga̱na̱huin nìhiàꞌ ruhuâ nej sôꞌ da̱gahuin dàj rûnꞌ taj nej nuguanꞌ nnùn riñan ñanj nânj dadinꞌ gaꞌmin dàj ga̱huin.
8 Ñùnj huin Juan ni̱ gunḯn ni̱ giniꞌín nej nânj,
ni̱ neꞌ rùkù nga gunḯn ni̱ giniꞌín rayiꞌî nej nânj ni̱ ganikïn rúdàkò yiꞌî ángel dadinꞌ ruhuaj ginu̱n ñànꞌàn ángel gidigân nej nânj.
9 Sani̱ gataj ángel dânj gu̱nḯn:
—Ni̱ꞌhiaj,
ni̱ si̱ giꞌhiâꞌ dan mánj;
dadinꞌ ñùnj huin ꞌngo̱ sí gunânj gi̱tsi riñan Ma̱ꞌan Ñaꞌanj an,
dàj rûnꞌ gunânj gi̱tsíꞌ riñan Ma̱ꞌan Ñaꞌanj an,
ni̱ dàj rûnꞌ huin nej dinḯnt gataj dàj gahuin,
dadinꞌ nej sôꞌ huin sa dagahuin dàj rûnꞌ taj riñan librû nânj.
Ginu̱n ña̱ꞌa̱nj sòꞌ Ma̱ꞌan Ñaꞌanj an na̱nj ánj.
10 Ni̱ gata gu̱nḯn:
—Si̱ gachrîj huìꞌ nej nuguanꞌ taj dàj ga̱huin nnùn riñan librû nan,
dadinꞌ gàꞌ gahuin nichrun diû na̱nj ánj.
11 Nej guiì giꞌhiaj gakï̱nꞌïn,
ni̱ du̱gunïnꞌ ninj gi̱ꞌhiaj ninj doj gakï̱nꞌïn;
ni̱ guiì giꞌhiaj kï̱j ma̱ꞌan ni̱ du̱gunïnꞌ ninj ni̱ na̱gi̱ꞌhiaj kï̱j ninj doj ma̱ꞌan ninj;
ni̱ guiì giꞌhiaj sa ni̱ka̱a ni̱ du̱guꞌnïnꞌ ninj gi̱ꞌhiaj ninj doj sa ni̱ka̱a;
ni̱ guiì dugumîn ma̱ꞌan riñan gakï̱nꞌïn ni̱ du̱guꞌnïnꞌ ninj du̱gumîn ninj doj ma̱ꞌan ninj riñan gakï̱nꞌïn.
12 —Hia̱j ni̱ ûta raꞌñânj gàꞌnàj,
ni̱ gàꞌ hua̱ yu̱gui ꞌngo̱ rasu̱un nàgàꞌhuìj raꞌa,
daꞌ goꞌngo̱ nej guiì dàj na̱nj hua ma̱ꞌan sa giꞌhiaj ninj.
13 Ñùnj huin dàj rûnꞌ gayiꞌì si̱nï̱n letra A ni̱ huê huin neꞌ rùkù nï̀nꞌïn dàj rûnꞌ huin letra Z,
huê huin sa si̱nï̱ïn ni̱ huê huin sa ꞌna̱ꞌ neꞌ rùkù nï̀nꞌïn.
14 Ga̱na̱huin nìhiàꞌ ruhuâ nej guiì nitaj si ganahuij ruhuâ gi̱ꞌhiaj gakï̱nꞌïn,
dadinꞌ giꞌhiaj ninj dàj rûnꞌ giꞌhiaj nej guiì ganahuij ruhuâ ginán siganꞌ,
ni̱ guiì nânj huin sa hua̱ nani̱ꞌhiaj ya̱ chruj gahiu raa̱ chrun màn chruj ya̱ ninj ni̱ ga̱ne nìgànj ninj,
ni̱ huê ninj huin guiì ga̱ꞌhue ga̱tu̱ riñan rahueꞌ tàj riñan yumanꞌ snàꞌànj nânj.
15 Sani̱ nej guiì ga̱ninï̀nꞌ huaa ni̱ huin ninj dàj rûnꞌ huin yuhue ni̱ gùnàj ninj neꞌ ye̱ꞌe,
ni̱ aꞌngô nej guiì gùnàj neꞌ ye̱ꞌe huin nej guiì stuꞌhuaa,
nej guiì aché sìgìchràꞌ,
nej guiì dagahuiꞌ guiì,
nej guiì nnùn ña̱ꞌa̱nj nej ñaꞌanj giꞌhiaj ra̱ꞌa nej síi,
ni̱ daranꞌ nej guiì ûta garanꞌ ruhuâ gi̱di̱gañuꞌunj.
16 —Ñùnj huin Ma̱ꞌan Jesús ni̱ gaꞌnï̂n guchiꞌ gànàtàꞌ si-angél riñan nej sôꞌ nìkòꞌ rukû Ma̱ꞌán.
Ñùnj huin nej duguiꞌ David,
ni̱ hué huin daꞌnin si̱ꞌnï̱n sôꞌ,
ni̱ dàj rûnꞌ gira̱n riñan atïꞌ ni̱kï̱n neꞌ ruhuâ giyigï̀n man huê danj garânj daꞌngaꞌ ruhuâ nej guiì giꞌhia.
17 Ni̱ gataj Ma̱ꞌan Espíritu Santo ngà nika Ma̱ꞌan Jesús riñan nej guiì:
—Gu̱hua̱ꞌ nej suj.
Ni̱ ga̱ta̱j nej guiì gunïn riñan duguiꞌ ninj:
—Gu̱hua̱ꞌ nej suj.
Ni̱ si nakô nej suj nnee,
ni̱ si ruhuâ nej suj ni̱ ga̱ꞌhue go̱ꞌo̱ chre nej suj nnee ni̱ gi̱ꞌhiaj ga̱ nìꞌnàꞌ nìgànj nej suj.
18 Ni̱ gatâ gu̱nïn daranꞌ nej guiì gunïn dàj taj nej nuguanꞌ ga̱huin nnùn riñan ñanj librû nânj:
Ni̱ si hua̱ ꞌngo̱ nej guiì gùnùtàꞌ doj yichrá nej nuguanꞌ nnùn riñan ñanj nânj,
ni̱ gi̱ꞌhiaj Ma̱ꞌan Ñaꞌanj an si ga̱ꞌna̱ꞌ nej sa yìꞌì nnùn riñan ñanj librû nânj riñan ninj.
19 Ni̱ si hua̱ ꞌngo̱ nej guiì ga̱ꞌne̱ nej nuguanꞌ gataj dàj ga̱huin nnùn riñan ñanj nânj,
ni̱ na̱du̱rëꞌ Ma̱ꞌan Ñaꞌanj an siyu̱gui ninj riñan librû tàj siyu̱gui nej guiì huin daꞌní Ma̱ꞌan,
ni̱ huê danj na̱nj si̱ gaꞌnï̂nj Ma̱ꞌan Ñaꞌanj an ga̱ne ninj ruhuâ yumanꞌ snàꞌànj dânj dàj rûnꞌ taj riñan librû nânj.
20 Ma̱ꞌan sa ganataꞌ rayiꞌî nej nuguanꞌ nânj gataj:
—Yàngàꞌ hia ni̱ raꞌñanj gàꞌnàj.
Ni̱ huê danj huin rûꞌhuaj;
Ga̱ꞌhue ga̱ꞌna̱ꞌ Ma̱ꞌân rèꞌ,
na̱nj Señor Jesús.
21 Si-su̱nu̱j Ma̱ꞌan Señor Jesús ga̱ ngà daranꞌ nej suj.
Ni̱ huê danj huin rûꞌhuaj na̱nj ánj.