6
Ni̱ nej suj gàꞌ nìkòꞌ rukû Ma̱ꞌan Cristo ni̱ si nï̀nꞌ huin nej suj sí giꞌhiaj sun chre riñan si-yi̱ruꞌhue nej suj,
ni̱ gi̱ꞌhiaj sun hueꞌê nej suj ni̱ gi̱nikaj chrej nej suj riñan nej sôꞌ,
daꞌnga ni̱ si̱ gaꞌmin kï̱j nej sôꞌ yiꞌî Ma̱ꞌan Ñaꞌanj an ni̱ yiꞌî nej yìꞌnï̀nꞌ si-nùguànꞌ Ma̱ꞌan Ñaꞌanj an.
2 Ni̱ nej suj yiruꞌhue gàꞌ guyumân ruhuâ niꞌin Ma̱ꞌan Ñaꞌanj an,
ni̱ sê guendâ huin nej sôꞌ dinï̂nt ni̱ gi̱ꞌhiaj nej suj si huin nej sôꞌ sí ninaj doj mánj,
dànanj gi̱ꞌhiaj sun hueꞌê nej suj riñan nej sôꞌ,
guendâ guyumân ruhuâ nej sôꞌ niꞌin nej sôꞌ Ma̱ꞌan Ñaꞌanj an,
dadinꞌ giꞌhiaj sun nej suj riñan ꞌngo̱ sí ꞌì ruhuâ nej suj,
dadinꞌ huê danj na̱nj ginûn ñan nej sôꞌ Ma̱ꞌan Ñaꞌanj an.
Ni̱ huê dànanj gi̱di̱gânꞌ ni̱ du̱naꞌngaꞌ riñan aꞌngô nej dinï̂nt.
Hua̱ nìhiàꞌ ruhuâ sí dagahuin hueꞌê
3 Ni̱ si hua̱ ꞌngo̱ sí ni̱nï̱n gidigân,
ni̱ nitaj si hua̱ ruhuâ sôꞌ ngà nuguanꞌ gidigân Ma̱ꞌan Jesucristo ni̱ nitaj si hua̱ ruhuâ sôꞌ ngà nej yìꞌnï̀nꞌ nuguanꞌ gu̱ru̱gûñuꞌunj aꞌngôꞌ nej guiì,
4 ni̱ ûta huin nej sôꞌ ruhuâ nej sôꞌ,
sani̱ nitaj nùnj niꞌin nej sôꞌ,
dadinꞌ man si giri ra̱ nej sôꞌ rayiꞌî aꞌngô nej nuguanꞌan,
ni̱ man si garán nej sôꞌ huaj nej sôꞌ ngà nej si-nùguànꞌ nej sôꞌ,
huê danj ni̱ gayi̱ꞌij ni̱ gaꞌnga nuguanꞌ huin yìkòj rûhua,
nuguanꞌ gunïnꞌ,
ni̱ gaꞌmin nuguanꞌ kï̱j huaa,
ni̱ gàꞌ nitaj nùnj huaj sani̱ man si ganï̂n aꞌnanꞌ ruhuâ nej sôꞌ,
5 man ni̱na̱nj si gunïnꞌ nej sôꞌ,
ni̱ giꞌhiaj nej sôꞌ dànanj dadinꞌ naꞌhue ga̱ya̱ka̱j guendâ hueꞌê nej sôꞌ,
dadinꞌ nitaj si niꞌin nej sôꞌ nuguanꞌ yàngàꞌa,
ni̱ garânj sun nej sôꞌ si-nùguànꞌ Ma̱ꞌan Ñaꞌanj an guendâ gìrìꞌ nej sôꞌ doj sanꞌanj an ga̱ riñan nej sôꞌ;
ni̱ gu̱xu̱njꞌ ma̱ꞌânꞌ ni̱ si̱ ginikaj duguiꞌ ngà nej sí giꞌhiaj dànanj mánj.
6 Sani̱ nga ganarîꞌ si-nùguànꞌ Ma̱ꞌan Ñaꞌanj an ni̱ dànanj nìko du̱ꞌhue̱ gàꞌ daꞌ sa ga̱huin yi̱ruꞌhueꞌ,
ni̱ hua̱ nìhiàꞌ ruhuô dadinꞌ huin sa giꞌhiaj ga̱nunꞌ;
7 Dadinꞌ gaꞌnôꞌ ruhuâ yumiguìi sani̱ nitaj nùnj ginikoꞌ gaꞌnôꞌ,
huê danj ni̱ nga gàhuìꞌ ni̱ nitaj nùnj ginikoꞌ gu̱nꞌ.
8 Huê danj ni̱ si hua̱ sa yo̱ꞌ ni̱ hua̱ atsîj i gi̱nunꞌ,
ni̱ ga̱ gu̱ña̱n ruhuôꞌ ni̱ si̱ nanaꞌhuîꞌ doj sa ga̱ riñunꞌ gàꞌ mánj.
9 Dadinꞌ nej sí ganï̂n ruhuâ ga̱huin yi̱ruꞌhue ni̱ gininj nej sôꞌ riñan yinùu nga duguaneꞌ sichre gakï̱nꞌïn riñan nej sôꞌ,
dadinꞌ ûta huin ruhuâ nej sôꞌ gaj doj riñan nej sôꞌ,
sani̱ nitaj nùnj gue̱nda̱ niꞌñanj sa giꞌhiaj nej sôꞌ dadinꞌ man sa yìꞌìi giꞌhiaj nej sôꞌ,
ni̱ girëꞌ nej sôꞌ giꞌhia,
huê danj ni̱ gaꞌanj ni̱ꞌhia nej sôꞌ.
10 Dadinꞌ daranꞌ nej sa yìꞌìi ni̱ gayiꞌìj nga ûta ꞌì ruhuôꞌ niꞌînꞌ sanꞌanj an,
dadinꞌ huê danj ûta gahuin ruhuâ aꞌngô nej sôꞌ ga̱ doj sanꞌanj an riñan nej sôꞌ,
ni̱ gaꞌanj ni̱ꞌhia nej sôꞌ ni̱ gudunâj nej sôꞌ sa guyumân ruhuâ nej sôꞌ,
ni̱ ûta gutaꞌ nej sôꞌ sun giꞌhiaj nej sôꞌ huê danj ni̱ ûta giranꞌ sa̱ñu̱n nej sôꞌ.
Guendâ guyumân ruhuâꞌ ni̱ gunukuaj gi̱ꞌhiaj ga̱nan
11 Sani̱ sòꞌ,
huînꞌ sí gunânj gi̱tsi riñan Ma̱ꞌan Ñaꞌanj an,
ni̱ gu̱xu̱nꞌ ma̱ꞌânꞌ riñan nej nânj,
ni̱ du̱guꞌnïnꞌ gi̱ꞌhiâꞌ sa nìkàa,
ni̱ gu̱ru̱gûñuꞌunj,
ni̱ gùyùmàn ruhuâꞌ,
ni̱ ga̱ ꞌì ruhuâꞌ,
ni̱ ga̱ nùkuaj ruhuâꞌ,
ni̱ du̱guꞌnï̂nꞌ ga̱huînꞌ sí ni̱in.
12 Du̱guꞌnï̂nꞌ sòꞌ gùyùmàn ruhuâꞌ ni̱ gi̱ꞌhiaj guesâꞌ gi̱ꞌhiaj ga̱nanꞌ,
dàj rûnꞌ giꞌhiaj guesâ sí duku rumin ni̱ giꞌhiaj ga̱nan sôꞌ,
ni̱ ga̱ gudadûꞌ ni̱ si̱ gaꞌanj ni̱ꞌhia̱ꞌ nìgànj mánj,
dadinꞌ gakḯn Ma̱ꞌan Ñaꞌanj an gaꞌnôꞌ guendâ gi̱ꞌhiaj ganûnꞌ,
ni̱ dùgùnàj giꞌhiâꞌ gidigânꞌ si guyumân ruhuâ nikôꞌ rukû Ma̱ꞌan Jesús giniꞌin gàꞌì nej guiì.
13 Ni̱ giniꞌin Ma̱ꞌan Ñaꞌanj an ni̱ huê danj na̱nj giniꞌin Ma̱ꞌan Jesucristo,
si gaꞌnïnꞌ sùnj riñanꞌ dadinꞌ huê Ma̱ꞌan huin sa giꞌhiaj hua nìꞌnàꞌ daranꞌ nej sa màn nï̀nꞌ gàchràꞌ,
ni̱ huê danj na̱nj gidigân Jesús Ma̱ꞌan riñan Pilato si guyumân ruhuaj niꞌin Ma̱ꞌan Ñaꞌanj an,
14 du̱gumîn hueꞌêꞌ sun giyiꞌnïnꞌ riñanꞌ,
ni̱ ga̱ gudadû ni̱ si̱ giꞌhiâꞌ gakï̱nꞌïn huê danj ni̱ si̱ du̱gunïn gàꞌì gàꞌ si ꞌngo̱ nej dinï̂nt sòꞌ mánj,
nda guiì ga̱ꞌna̱ꞌ ñûn Ma̱ꞌan Jesús,
15 ni̱ nga gìsìj diû,
ni̱ huê dànanj gi̱ꞌhiaj Ma̱ꞌan Ñaꞌanj an,
dadinꞌ ꞌngo̱ rïn Ma̱ꞌan Ñaꞌanj an huin sa ga̱ nìhiàꞌ ruhuâꞌ ni̱ ꞌngo̱ rïn huin sa ni̱ka̱j su̱n riñan daranꞌanj,
ni̱ huej huin Rey ni̱ka̱j sun riñan daranꞌ nej rey,
ni̱ huej huin Ma̱ꞌan Señor ni̱ka̱j su̱n riñan daranꞌ nej señor,
16 ꞌNgo̱ rïn huin sa nitaj àmàn huaj gàhuìꞌ,
ni̱ nne ñan giyigï̀n nï̀nꞌ ni̱ gàꞌ si ꞌngo̱ guiì si̱ gaꞌhue gùchìꞌ ñan nne;
ni̱ gàꞌ si ꞌngo̱ guiì nun niꞌin riñanj ni̱ gàꞌ si̱ gaꞌhue gi̱ni̱ꞌin nej sij riñanj,
ni̱ huê riñanj huin sa gi̱nikaj chre̱j nêꞌ ni̱ huej huin sa ni̱ka̱j su̱n riñan daranꞌanj nìgànj chre.
Huê danj huin.
17 Ni̱ gaꞌnïnꞌ su̱n Ma̱ꞌan Ñaꞌanj an riñan daranꞌ nej yi̱ruꞌhue si si̱ ga yàtàꞌ staꞌu ruhuâ nej sij,
ni̱ si̱ ginûn ñan staꞌu nej sij nej rasu̱n du̱ꞌhue̱ hua̱ riñan nej sij,
dadin sê sa yìtï̀nj ïn huin,
dadinꞌ ꞌngo̱ rïn Ma̱ꞌan Ñaꞌanj hua̱ nìꞌnàꞌa huin sa yìtï̀nj ïn,
dadinꞌ huê Ma̱ꞌan huin sa rikî nìko nej rasu̱n gàchin riñunꞌ guendâ ga̱na̱huin nìhiàꞌ ruhuôꞌ.
18 Ni̱ gaꞌnïnꞌ sùnj si gi̱ꞌhiaj nej sij sa hua̱ hueꞌê,
ni̱ du̱guꞌnïnꞌ nej sij gu̱ru̱gûñuꞌunj nej sij gàꞌì nej guiì,
ni̱ gu̱ru̱gûñuꞌunj nej sij ni̱ si gaꞌnêj du̱ꞌhue̱ nej sij rayiꞌî si-su̱n nej sij.
19 Ni̱ nej sun giꞌhiaj nej sij ni̱ huin sa ga̱na̱chra sàꞌ nej sij ni̱ nìko ga̱na̱huin ra̱ꞌa nej sij nej gui ga̱ꞌna̱ꞌ neꞌ ña̱an,
ni̱ ga̱ gudadû nej sij ma̱ꞌan nej sij ni̱ ga̱ne nìgànj nej sij.
Nga ganahuij Pablo gachrûn sôꞌ ni̱ duguta su̱n sôꞌ Timoteo
20 Timoteo,
du̱gumîn sòꞌ nuguanꞌ duguta sùnj riñanꞌ,
ni̱ ga̱ gu̱dadûꞌ ni̱ si̱ gaꞌminꞌ dàj rûnꞌ gaꞌmin nej guiì nun niꞌin Ma̱ꞌan Ñaꞌanj an rayiꞌî ꞌngo̱ sa nitaj si niꞌñanj an,
ni̱ dunaꞌhuej rayiꞌî si-nùguànꞌ Ma̱ꞌan Ñaꞌanj an nda gunukuâꞌ gi̱ꞌhiaj ga̱nanꞌ,
riñan nuguanꞌ ni̱kï̱nꞌ ran nej sí gidigañuꞌunj un,
dadinꞌ taj nej sôꞌ si chru̱n nï̀nꞌ ruhuâ nej sôꞌ,
21 dadinꞌ gahuin anêj da̱ꞌa̱j nej sí taj si chru̱nꞌ nï̀nꞌ ruhuâ nej sôꞌ,
riñan nuguanꞌ guyumân ruhuâ nej sôꞌ.
Ni̱ si su̱nu̱j Ma̱ꞌan Ñaꞌanj an gane ngàꞌ.
Ni̱ huê danj huin rûꞌhuaj.