Dàj gi̱ꞌhiôꞌ ngà nej dinï̂nt gàꞌ guyumân ruhuâ niꞌin Ma̱ꞌan Jesús
5
Si̱ dugunïn gàꞌìꞌ nej síchìj achij ni̱kï̱nꞌ riñan nej sôꞌ nìkòꞌ rukû Ma̱ꞌan Jesús mánj,
gi̱ꞌhiàꞌ ngà nej sij dàj rûnꞌ giꞌhiàꞌ ngà rêt ni̱ du̱naꞌngaꞌ riñan nej sij si da̱gahuin hueꞌê nej sij;
ni̱ dàj rûnꞌ giꞌhiâꞌ ngà dinï̂nt ni̱ huê danj gi̱ꞌhiáꞌ ngà nej sí ña̱an.
2 Dàj rûn ginikaj chre̱jꞌ ngà nnît ni̱ huê danj gi̱ni̱kaj chre̱jꞌ ngà nej siyànà achij ij;
ni̱ dàj rûnꞌ ginikaj chre̱jꞌ ngà yuguej huê danj gi̱nikaj chre̱j ngà nej siyànà ñaan ni̱ si̱ ganï̂n aꞌnanꞌ ruhuâ niꞌînꞌ ninj mánj.
3 Gi̱nikaj chre̱j ni̱ gu̱ru̱gûñuꞌunj nej siyànà minj hua̱ ni̱ña̱n daꞌhuîꞌ gu̱ru̱gûñuꞌunj.
4 Sani̱ si hua̱ ꞌngo̱ siyànà mi̱nj hua daꞌní,
ni̱ hua̱ daꞌnin si̱ꞌnï̱n,
ni̱ ga̱huin chru̱n nej sôꞌ ni̱ gu̱ru̱gûñuꞌunj nej sôꞌ ni̱ gàꞌhuìꞌ nej sôꞌ sa ga̱chin riñan siyànà dânj dadinꞌ huê dànanj gi̱ꞌhiaj nej sôꞌ ngà rej nej sôꞌ,
ni̱ huê nânj huin sa sàꞌa ni̱ sa garanꞌ ruhuâ Ma̱ꞌan Ñaꞌanj an.
5 Sani̱ siyànà yàngàꞌ huin siyànà minj in ni̱ gunâj ꞌngo̱ rïn,
ni̱ man ꞌngo̱ rïn Ma̱ꞌan Ñaꞌanj an ginûn ñanj,
ni̱ ûta hio guendâ gàchìnj ni̱ꞌhia ni̱ gaꞌmin ngà Ma̱ꞌan Ñaꞌanj an neꞌ gui ngà neꞌ ñànꞌan.
6 Sani̱ siyànà mi̱nj ganahuin nìhiàꞌ ruhuâ ngà nneè kú ni̱ hua̱ nìꞌnaj riñan nej guiì sani̱ riñan Ma̱ꞌan Ñaꞌanj an ni̱ huin guiì gàꞌ gahuiꞌi na̱nj ánj.
7 Ni̱ gàꞌnï̀nꞌ suun riñan daranꞌ nej sij si gi̱ꞌhiaj nej sij dàj rûnꞌ gaꞌnḯn suun riñanꞌ,
daꞌngaꞌ ni̱ gahuin nej sij sí ni̱ka̱a.
8 Dadinꞌ si hua̱ ꞌngo̱ nej sí nitaj si gaꞌhuiꞌ ya nej duguiꞌ,
ni̱ nitaj si gaꞌhuiꞌ nej sôꞌ ya rej nej sôꞌ ngà nni nej sôꞌ,
ni̱ giꞌhiaj nej sôꞌ dàj rûnꞌ giꞌhiaj nej sí nitaj si guyumân ruhuâ niꞌin Ma̱ꞌan Ñaꞌanj an,
ni̱ dànanj ganinï̀nꞌ hua nej sôꞌ doj gàꞌ daꞌ nej sí nitaj si guyumân ruhuâ niꞌin Ma̱ꞌan Ñaꞌanj an na̱nj ánj.
9 Ni̱ man siyu̱gui nej siyànà mi̱nj ga ꞌngo̱ rïn nika ni̱ gachín ninj riñan hioꞌ huàꞌnï̀nj xia huin sa daꞌhui gitàj riñan lista guendâ gu̱ru̱gûñuꞌunj nej suj,
10 ni̱ si hia giniꞌin nej suj si yàngàꞌ giꞌhiaj ninj sa hua̱ hueꞌê,
ni̱ gi̱niꞌin nej suj si gidigân hueꞌê ninj si-chrej Ma̱ꞌan Ñaꞌanj an riñan nej daꞌní ninj;
ni̱ gaꞌhuiꞌ ninj dukuâ ninj gunâj nej sôꞌ nìkòꞌ rukû Ma̱ꞌan Jesús nitaj ñan gùnàj;
ni̱ si ganaꞌnïnꞌ ninj dakó nej dinï̂nt gaché ganataꞌ si-nùguànꞌ Ma̱ꞌan Ñaꞌanj an,
ni̱ si gurugûñuꞌunj ninj nej dinï̂nt giran sa̱ñu̱n,
ni̱ si ûta hueꞌê giꞌhiaj ninj daranꞌanj.
11 Sani̱ nej siyànà mi̱nj hua̱ lij ni̱ si̱ gu̱ru̱guñuꞌunj nej suj;
dadinꞌ nga ruhui nneè kú ninj,
ni̱ si̱ dagahuin ninj riñan Ma̱ꞌan Cristo dadinꞌ ga̱nï̱n ruhuâ ninj ga̱ya̱ka̱j ñûn ninj nika ninj.
12 Ni̱ gininj ninj riñan gakï̱nꞌïn,
guendâ nitaj si dagahuin ninj riñan nuguanꞌ guyumân si̱nï̱n ruhuâ ninj.
13 Ni̱ aꞌngô sa huin chru̱n ninj huin sun rùmìn chre dadinꞌ gaché ninj ganûn ninj daꞌ hueꞌe;
ni̱ sê man ꞌngo̱ rïn sa gahuin chru̱n ninj huin sun rùmìin mánj,
dadinꞌ gahuin chru̱n ninj ga̱ꞌmi̱n ninj nuguanꞌ hia̱a ni̱ gu̱rij ninj gi̱di̱gïj ninj si-nùguànꞌ ninj,
ni̱ gaꞌmin ninj nuguanꞌ nun daꞌhui ninj ga̱ꞌmi̱n ninj.
14 Ruhuâj si nej siyànà mi̱nj hua̱ lij,
ni̱ ga̱ꞌhue ga̱ra̱n ràꞌa ñûn ninj,
ni̱ ga̱ daꞌní ninj,
ni̱ du̱gumîn hueꞌê ninj nej daꞌní ninj;
ni̱ nitaj si gaꞌnï̂nj ninj si ga̱ꞌmi̱n yìꞌì sí gata rùhuà nêꞌ nga huaj ga̱ꞌhue.
15 Dadinꞌ hua̱ da̱ꞌa̱j ninj ni̱ gàꞌ nanikòꞌ ninj rukû sichre.
16 Ni̱ si hua̱ ꞌngo̱ nej suj guyumân ruhuâ niꞌin Ma̱ꞌan Jesús,
ni̱ si hua̱ ꞌngo̱ duguiꞌ nej suj huin siyànà mi̱nj in,
ni̱ dùgùnàj huaj si gu̱ru̱gûñuꞌunj nej suj siyànà mi̱nj dânj,
daꞌnga ni̱ si̱ gutïnꞌ staꞌu nej dinï̂nt nìkòꞌ rukû Ma̱ꞌan Cristo rayiꞌî nej siyànà dânj,
daꞌnga ni̱ gaꞌhue gu̱ru̱gûñuꞌunj nikò nej sij doj sa gàchin riñan aꞌngô nej siyànà minj,
niꞌñanj hia si gu̱ru̱gûñuꞌunj nej sij.
17 Nej dinï̂nt achij ni̱ka̱j ñuꞌunj hueꞌê riñan nej dinï̂nt nìkòꞌ rukû Ma̱ꞌan Jesús,
ni̱ si nitaj si gachej giꞌhiaj nej sôꞌ ni̱ hua̱ ni̱ña̱n si ûta hueꞌê ga̱na̱ka̱j guendôꞌ ni̱ ga̱ ꞌì ruhuôꞌ niꞌînꞌ nej sôꞌ,
ni̱ dànanj hua̱j doj ga̱ ꞌì ruhuôꞌ niꞌînꞌ si ganataꞌ nej sôꞌ ni̱ gidigân nej sôꞌ si-nùguànꞌ Ma̱ꞌan Ñaꞌanj an.
18 Dadinꞌ sa taj si-nùguànꞌ Ma̱ꞌan Ñaꞌanj an huin:
“Ni̱ si̱ gaꞌnḯnꞌ nnanj duꞌhua rô gutïnꞌ ka trigu”;
ni̱ huê danj ña̱ꞌa̱n huaj:
“Si ga̱na̱ka̱j guendôꞌ si ga̱ duꞌhue sí giꞌhiaj suun.”
19 Nga garânj ruhuâ ꞌngo̱ guiì rayiꞌî nej dinï̂nt ni̱ka̱j ñuꞌunj riñan nej dinï̂nt nìkòꞌ rukû Ma̱ꞌan Jesús,
ni̱ gàchìnj nej suj si gi̱nikaj nej sij ga̱ꞌna̱ꞌ nej sij huìj nej huàꞌnï̀nj nej sí giniꞌin,
sani̱ si nitaj sí giniꞌin nikaj nej sij gaꞌnaꞌ nej sij ni̱ si̱ guyumân ruhuâ nej suj nuguanꞌ gataj nej sij mánj.
20 Ni̱ nej guiì ûta nìchràj ruhuâ gi̱ꞌhiaj gakï̱nꞌïn,
ni̱ hua̱ ni̱ña̱n si dugunïn gàꞌì nej suj gi̱ni̱ꞌin gàꞌì nej guiì dàj giꞌhiaj nej guiì dânj.
21 Ni̱ duguta sùnj sòꞌ riñan Ma̱ꞌan Ñaꞌanj an ni̱ riñan Ma̱ꞌan Señor Jesucristo,
ni̱ riñan nej ángel gàꞌ ganaguij,
si gànàꞌnï̀nj sàꞌ nej nuguanꞌ nânj ni̱ si̱ gaꞌmin nga nun gi̱niꞌînꞌ dàj huaj,
ni̱ si̱ ganahuînꞌ ngà ꞌngo̱ guiì si nun niꞌînꞌ dàj huaj mánj.
22 Ni̱ si̱ gaꞌhue gùtàꞌ raꞌâꞌ ahui ahuin na̱nj guiì mánj,
sa daꞌhuîꞌ gi̱ꞌhiáꞌ huin si na̱di̱giꞌñûnꞌ dàj giꞌhiaj guiì dânj,
dadinꞌ si̱ gaꞌhue si gànàtàꞌ si-ga̱kïnꞌ ninj yichráꞌ si nun niꞌînꞌ sa ꞌhiaj ninj,
ni̱ ga̱ gu̱dadûꞌ ni̱ si̱ giꞌhiâꞌ gakï̱nꞌïn mánj.
23 Ñan daranꞌ diû giꞌhiaj yìꞌij rikîꞌ huê dan ni̱ si̱ goꞌoꞌ nne huìj i gàꞌ mánj,
go̱ꞌo̱ doj sînj nne bino ni̱ gi̱ꞌhia gonoꞌô rikîꞌ.
24 Da̱ꞌa̱j nej síi ni̱ nda hueꞌê chre guruguiꞌ si-ga̱kïnꞌ nej sôꞌ giniꞌînꞌ ngà nï̀nꞌ gàchin ga̱ꞌa̱nj nej sôꞌ na̱nikïnꞌ nej sôꞌ riñan guesì,
sani̱ hua̱ aꞌngô da̱ꞌa̱j nej sôꞌ ni̱ gàꞌ do̱j sînj nitaj si guruguiꞌij sani̱ nda nanikïnꞌ nej sôꞌ riñan guesì ni̱ nda hiuj dânj gànàrùguìꞌij na̱nj ánj.
25 Huê danj na̱nj guruguiꞌ nej sa sàꞌ giꞌhiaj nej guiì dagahuin,
ni̱ da̱ꞌa̱j ninj ni̱ nda nanè chre ni̱ giniꞌînꞌ sa sàꞌ giꞌhiaj ninj,
sani̱ aꞌngô da̱ꞌa̱j ninj ni̱ naꞌhue gi̱ni̱ꞌînꞌ sa giꞌhiaj ninj mánj.
Sani̱ gàꞌ si ꞌngo̱ sa giꞌhiaj ninj si̱ gahuin huì mánj.