Nej guiì nanikàj ñûn giꞌhiaj gakï̱nꞌïn
4
Sani̱ nda nîꞌnïnj chre gataj Ma̱ꞌan Espíritu Santo si diû ꞌna̱ꞌ neꞌ ñàan,
ni̱ hua̱ da̱ꞌa̱j nej guiì nìkòꞌ rukû Ma̱ꞌan Jesús ni̱ nànìkàj ñûn ninj gi̱ꞌhiaj ninj gakï̱nꞌïn ni̱ si̱ guyumân ruhuâ ninj niꞌin ninj Ma̱ꞌan Ñaꞌanj an,
ni̱ dànanj ga̱na̱daꞌa ninj nej nuguanꞌ ga̱ꞌmi̱n nej espíritu gidigañuꞌunj ni̱ ga̱na̱huin ràꞌa ninj nej yìꞌnï̀nꞌ nej nuguanꞌ gi̱digân nej sa kï̱j ï;
2 ni̱ dànanj ga̱ya̱ka̱j guendâ nej sij sa ga̱ꞌmi̱n nej sí ûta sa chru̱n gidigañuꞌunj,
dadinꞌ gàꞌ ûta gataꞌ miin daꞌngaꞌ nu̱n ruhuâ nimân nej sij ni̱ nitaj si giniꞌin nej sij sa aꞌnanꞌ giꞌhiaj nej sij mánj,
3 ni̱ si̱ ga̱ꞌhuej nej sí dânj ga̱ra̱n ràꞌa nej guiì,
ni̱ huê danj na̱nj na̱gi̱ꞌhiaj ha̱i̱ nej sôꞌ ya̱ nej guiì nneè da̱ꞌa̱j nej yuku,
sani̱ Ma̱ꞌan Ñaꞌanj an huin sa giꞌhiaj daranꞌ nej yuku,
sani̱ sa gi̱ꞌhiaj nej guiì nìkòꞌ rukû Ma̱ꞌan Jesús ni̱ nej guiì gunïn nuguanꞌ yàngàꞌa huin si gàꞌhuìꞌ ninj si guruhuâ Ma̱ꞌan Ñaꞌanj an ni̱ ga̱ꞌhue ya̱ ninj nneè nej yuku.
4 Dadinꞌ daranꞌ sa giꞌhiaj Ma̱ꞌan Ñaꞌanj an ni̱ sa sàꞌa huin ni̱ si̱ gaꞌhue ge̱rë̱ꞌë̱ mánj,
sa gi̱ꞌhio huin si gàꞌhuìꞌ si guruhuâ Ma̱ꞌan Ñaꞌanj an ni̱ na̱gi̱ꞌhiaj sàꞌ Ma̱ꞌan Ñaꞌanj an rayiꞌij na̱nj ánj;
5 dadinꞌ nga si-nùguànꞌ Ma̱ꞌan Ñaꞌanj an ni̱ si gàchìnj niꞌhiôꞌ riñan Ma̱ꞌan rayiꞌî nihia dânj ni̱ ga̱na̱huin sàꞌaj na̱nj ánj.
Sí dagahuin hueꞌê riñan Ma̱ꞌan Jesucristo
6 Ni̱ si huê dànanj gi̱di̱gânꞌ riñan nej dinï̂nt,
ni̱ ga̱huînꞌ ꞌngo̱ sí gànàtàꞌ hueꞌê si-nùguànꞌ Ma̱ꞌan Jesucristo,
ni̱ huînꞌ ꞌngo̱ sí ûta nìko niꞌin si-nùguànꞌ Ma̱ꞌan Ñaꞌanj an ni̱ nìko guyumân ruhuâꞌ ni̱ niꞌin hueꞌêꞌ dàj hua nej yìꞌnï̀nꞌ nuguanꞌ hueꞌê gidigânꞌ.
7 Gu̱du̱naj sôꞌ nej guentû garanꞌ ruhuâ nej guiì màn ruhuâ yumiguìi ni̱ huê danj na̱nj gu̱du̱naj sòꞌ nej nuguanꞌ nâ.
Ni̱ gi̱ꞌhiaj yu̱guiꞌ ma̱ꞌanꞌ ni̱ ga̱ ruhuâꞌ gu̱ru̱gûñuꞌunj aꞌngô nej guiì;
8 dadinꞌ nga dusikiꞌ nneè kuꞌ ni̱ doj nï̀nꞌ gurugûñuꞌun ñùnꞌ,
sani̱ guendâ gu̱ru̱gûñuꞌunꞌ aꞌngô nej duguiꞌ ni̱ ûta nìko gurugûñuꞌun ñùnꞌ,
ni̱ gàꞌ riki Ma̱ꞌan Ñaꞌanj an si-nùguànꞌanj riñunꞌ ni̱ gata si hua̱ sa ri̱kij riñunꞌ ngà nï̀nꞌ nneꞌ riñan hioꞌó nânj,
ni̱ huê danj na̱nj gata si hua̱ sa sàꞌ ri̱kij riñunꞌ nej gui ga̱ꞌna̱ꞌ neꞌ ñaan.
9 Nuguanꞌ yàngàꞌa huin nânj,
ni̱ nuguanꞌ hua̱ hueꞌê ganahuin ràꞌa darûnꞌ huin.
10 Ni̱ huê rayiꞌî nuguanꞌ nânj huin sa giꞌhiaj sun nej ñûnj ni̱ huê danj na̱nj giranꞌ sa̱ñu̱n nej ñûnj ni̱ giriꞌ nej ñûnj sí gunïnꞌ ngà nej ñûnj,
dadinꞌ ganaꞌhuìj nej ñûnj si Ma̱ꞌan Ñaꞌanj nìꞌnàꞌa,
huin sa gi̱ꞌhiaj ga̱na̱ni̱n daranꞌ nej guiì sani̱ gi̱ꞌhia ga̱na̱ni̱n nej guiì guyumân ruhuâ niꞌin Ma̱ꞌan.
11 Huê dànanj gàꞌnï̀nꞌ su̱nꞌ ni̱ huê dànanj gi̱di̱gânꞌ.
12 Ga̱ gudadû sòꞌ ma̱ꞌanꞌ hiôꞌ ni̱ si̱ giꞌhiaj ninaj nej sij sòꞌ guendâ huînꞌ si ña̱an,
ni̱ daꞌhuîꞌ ga̱huînꞌ sí gutaꞌ chrej e neꞌ ña̱an ni̱ gi̱digânꞌ si guyumân ruhuâꞌ niꞌin Ma̱ꞌan Jesús ni̱ dagahuînꞌ ngà si-nùguànꞌ,
ni̱ hueꞌê giꞌhiâꞌ,
ni̱ ga̱ ꞌì ruhuâꞌ,
ni̱ ga sàꞌ nanè nimânt,
ni̱ ga̱huînꞌ sí guyumân ruhuâ,
ni̱ dugumînꞌ ma̱ꞌan ni̱ si̱ giꞌhiâꞌ gakï̱nꞌïn mánj.
13 Nga nï̀nꞌ gàchin gùchìj ñan nneꞌ,
ni̱ du̱guꞌnïnꞌ sòꞌ ni̱ ga̱hia̱ꞌ riñan ñanj si-nùguànꞌ Ma̱ꞌan Ñaꞌanj an,
ni̱ du̱naꞌngaꞌ riñan nej dinï̂nt ni̱ gi̱di̱gânꞌ riñan nej sij.
14 Si̱ giniꞌñûn sòꞌ sun nìko riki Ma̱ꞌan Ñaꞌanj an riñanꞌ,
dadinꞌ gataj nej sij si ga̱na̱huin ràꞌaꞌ sun dânj nga gutaꞌ nej sôꞌ nìkòꞌ rukû Ma̱ꞌan Jesús raꞌa nej sôꞌ ahuît.
15 Ga̱na̱huij ruhuâ sòꞌ niꞌînꞌ rayiꞌî nej nuguanꞌ gatâ;
ni̱ du̱guꞌnïnꞌ gi̱ꞌhiâꞌ nej nânj,
daꞌnga ni̱ gùrùguìꞌij gi̱ni̱ꞌin daranꞌ nej guiì si garânj sun hueꞌêꞌ nej nânj.
16 Ga̱ gu̱dadû sôꞌ ma̱ꞌânꞌ ni̱ huê danj na̱nj ga̱ gudadûꞌ nej yìꞌnï̀nꞌ nuguanꞌ gidigânꞌ riñan aꞌngôꞌ nej guiì;
ni̱ du̱gumîn hueꞌê sòꞌ nej nuguanꞌ dânj,
ni̱ si huê danj gi̱ꞌhiáꞌ ni̱ ga̱na̱ni̱nꞌ ni̱ si gaꞌânj ni̱ꞌhiaꞌ ni̱ huê danj na̱nj gi̱ꞌhiâꞌ si ga̱na̱ni̱n nej guiì gunïn nuguanꞌ gaꞌminꞌ na̱nj ánj.