Dàj daꞌhui ga̱ sí ga̱ꞌhue ga̱huin si-obispo Ma̱ꞌan Ñaꞌanj an
3
Nuguanꞌ yàngàꞌa huin nânj:
Ni̱ si hua̱ ꞌngo̱ sí ganï̂n ruhuâ gi̱nikaj ñuꞌunj riñan ꞌngo̱ yiꞌnïnꞌ nej dinï̂nt nìkòꞌ rukû Ma̱ꞌan Jesús,
ni̱ dùgùnàj hua sa ganï̂n ruhuâ sôꞌ.
2 Sani̱ dùgùnàj huaj si sí ni̱ka̱j ñuꞌunj riñan ꞌngo̱ nûhui ni̱ ga̱ gu̱dadû sôꞌ ma̱ꞌan sôꞌ ni̱ du̱guꞌnïnꞌ sôꞌ gi̱ꞌhiaj sôꞌ sa ni̱ka̱a,
ni̱ daꞌhui sôꞌ ni̱ ga̱ ꞌngo̱ rïn nika sôꞌ,
ni̱ daꞌnga hueꞌê gi̱ꞌhiaj sôꞌ,
ni̱ hueꞌê ga̱ya̱ka̱j guendâ sôꞌ,
ni̱ hueꞌê gi̱ꞌhiaj sôꞌ,
ni̱ gàꞌhuìꞌ sôꞌ hueꞌe gùnàj nej dinï̂nt,
ni̱ ga̱ yu̱gui sôꞌ guendâ gi̱digân sôꞌ riñan nej dinï̂nt;
3 ni̱ si̱ ga̱huin sôꞌ sí àyìnï̀ïn,
ni̱ si̱ ganahuij ruhuâ sôꞌ gu̱nï̱nꞌ sôꞌ,
ni̱ si ꞌnï̱nj sôꞌ duꞌhuêj sôꞌ ni̱ si̱ gachrîj du̱ꞌhue staꞌu sôꞌ nej rasu̱n duꞌhuej sôꞌ,
niꞌñanj ga̱ ruhuâ sôꞌ,
ni̱ dïnꞌïnj ga̱ ruhuâ sôꞌ,
ni̱ si̱ ûta ga̱huin ruhuâ sôꞌ gaj doj riñan sôꞌ mánj.
4 Ni̱ hueꞌê gi̱ni̱kaj ñuꞌunj sôꞌ riñan nej duguiꞌ ma̱ꞌan sôꞌ,
ni̱ hueꞌê da̱gahuin nej daꞌní sôꞌ riñan sôꞌ ni̱ si̱ giꞌhiaj nej sílìj dânj si huin staꞌu nej sôꞌ,
5 (dadinꞌ sí nitaj si ni̱ka̱j su̱n riñan nej daꞌní ngà riñan nika,
ni̱ dàj gi̱ꞌhiaj sôꞌ ga̱ꞌhue du̱gumîn hueꞌê sôꞌ si-nùhuì Ma̱ꞌan Ñaꞌanj an ràꞌaj);
6 sí hia̱j gayiꞌì ni̱ si̱ gaꞌhue gi̱nikaj su̱n sôꞌ ruhuâ nûhui,
dadinꞌ ga̱nï̱n ruhuâ sij si ûta huin sij huê danj ni̱ gi̱ni̱nj sij riñan gakï̱nꞌïn dàj rûnꞌ gininj sa nàsàꞌa huê danj ni̱ ga̱na̱huin ràꞌa sij kastîgu.
7 Huê danj na̱nj ña̱ꞌa̱n huaj si gi̱ni̱ꞌin nej guiì màn neꞌ ye̱ꞌe si yàngàꞌ hia dagahuin sij,
dadinꞌ si nuhuij ni̱ si̱ guyumân ruhuâ ninj niꞌin ninj sij,
ni̱ huê danj na̱nj gu̱du̱ninj sa nàsàꞌa riñan yinùu sí dânj na̱nj ánj.
Dàj daꞌhui ga̱ sí ga̱ꞌhue ga̱huin si-diákono Ma̱ꞌan Ñaꞌanj an
8 Nej sí huin diákono ni̱ daꞌhui nej sôꞌ ni̱ ga̱ꞌmi̱n achij nej sôꞌ,
ni̱ si̱ gahuin nej sôꞌ si gidigañuꞌunj ni̱ si̱ ga̱huin nej sôꞌ sí àyìnï̀ïn,
ni̱ si ꞌnï̱nj nej sôꞌ sun guduꞌhuêj ni̱ si̱ gachrîj du̱ꞌhue̱ staꞌu sôꞌ nej rasu̱n guduꞌhuej sôꞌ mánj;
9 ni̱ daꞌhui nej sôꞌ ni̱ du̱gumîn nej sôꞌ nuguanꞌ guyumân ruhuâ nej sôꞌ,
dadinꞌ gahuin nuguanꞌ giꞌnïnj huì,
ni̱ dàj rûnꞌ gaꞌnḯn Ma̱ꞌan Ñaꞌanj an daꞌngaꞌ nej sôꞌ ni̱ du̱guꞌnïnꞌ nej sôꞌ ni̱ gi̱ꞌhiaj nej sôꞌ sa hua̱ hueꞌê.
10 Dadinꞌ gàꞌ si̱nï̱n daꞌhuîꞌ ga̱ya̱ko̱ꞌ daꞌngaꞌa dàj giꞌhiaj nej sôꞌ,
ni̱ si dagahuin nej sôꞌ ni̱ neꞌ rùkù ni̱ ga̱ꞌhue ga̱huin nej sôꞌ diákono,
si huin nej sôꞌ sí giꞌhiaj sa ni̱ka̱a.
11 Huê danj na̱nj nej siyànàa ni̱ daꞌhui ninj ga̱huin ninj guiì ga̱ꞌmi̱n achij,
ni̱ si̱ gahuin ninj guiì ga̱na̱chi nikaj nuguanꞌ digañuꞌunj un mánj,
daꞌhui ninj ga̱huin ninj siyànà ga̱ꞌmi̱n daꞌngaꞌ hueꞌê,
ni̱ daranꞌ diû ni̱ ga̱ꞌmi̱n ninj nuguanꞌ yàngàꞌa.
12 Ni̱ daꞌhui ga ꞌngo̱ rïn nika sí diákono,
ni̱ daꞌhui nej sij gi̱nikaj su̱n nej sij riñan nej daꞌní nej sij ni̱ huê danj na̱nj gi̱nikaj su̱n nej sij riñan nika nej sij.
13 Dadinꞌ si nej diákono ni̱ ni̱ka̱j su̱n hueꞌê nej sôꞌ ni̱ dagahuin nej sôꞌ,
ni̱ giꞌhiaj ga̱nan nej sôꞌ si ûta ga̱ ꞌì ruhuâ nej guiì niꞌin ninj nej sôꞌ,
ni̱ ûta ginu̱n ñan ninj nej sôꞌ ni̱ guyumân ruhuâ ninj niꞌin ninj Ma̱ꞌan Cristo Jesús gi̱ꞌhiaj sôꞌ.
Nìko hua Ma̱ꞌan sa giꞌnïnj huì
14 Huê dànanj gachrûnj riñanꞌ,
sani̱ hua̱ yìtï̀nj ruhuâj gùchìꞌ râꞌñan ñan neꞌ,
15 ni̱ asàꞌ gahuin rànj gùchìj,
ni̱ gàꞌ niꞌînꞌ dàj daꞌhuîꞌ gi̱ꞌhiâꞌ ngà nej sôꞌ huin si-nùhuì Ma̱ꞌan Ñaꞌanj an,
dadinꞌ huê nej sôꞌ huin si-nùhuì Ma̱ꞌan Ñaꞌanj nìꞌnàꞌa,
dadinꞌ huin nej sôꞌ dàj rûnꞌ huin chran kastiyu ngà hiëj yìngà xi rayiꞌî sa yàngàꞌ giꞌhiaj nej sôꞌ.
16 Nitaj si huaj ga̱ꞌmi̱n chìꞌ,
dadinꞌ yàngàꞌ hia ni̱ ûta nìko hua sa giꞌnïnj huì sani̱ hia̱j ni̱ gàꞌ nadigân Ma̱ꞌan Ñaꞌanj an riñunꞌ ni̱ guruguñuꞌun ñùnꞌ:
Ni̱ Ñaꞌanj an huin Ma̱ꞌan Jesús sani̱ ganahuin síi,
ni̱ gataj Ma̱ꞌan Espíritu Santo si nitaj gakï̱nꞌïn ata,
ni̱ giniꞌin nej ángel Ma̱ꞌan,
ni̱ gananï̂n nej sôꞌ yiꞌî Ma̱ꞌan Jesús riñan daranꞌ nej guiì màn ruhuâ yumiguìi,
ni̱ guyumân ruhuâ nej guiì niꞌin ninj Ma̱ꞌan,
ni̱ gahui Ma̱ꞌan Jesús gaꞌan yàtàꞌa.
Ni̱ ganahuin ràꞌa Ma̱ꞌan Ñaꞌanj an ngà daranꞌ nej ángel màn yàtàꞌa Ma̱ꞌan Jesús.