Gidigân Pablo dàj gàchìnj nìꞌhiôꞌ
2
Sa si̱nï̱n dunaꞌngâj riñan nej suj huin si ga̱ꞌmi̱n nej suj ngà Ma̱ꞌan Ñaꞌanj an,
ni̱ ûta àko gàchìnj nìꞌhiaj nej suj rayiꞌî aꞌngô nej guiì,
ni̱ huê danj na̱nj gàꞌhuìꞌ nej suj si guruhuâ Ma̱ꞌan Ñaꞌanj an;
2 gàchìnj nìꞌhiaj nej suj rayiꞌî nej rey ni̱ gàchìnj nìꞌhiaj nej suj rayiꞌî nej sí ni̱ka̱j sun yàkàan,
daꞌnga ni̱ gaꞌhue ga̱ dïnꞌïnj ga̱ne nej suj,
ni̱ ga̱ꞌhue ga̱na̱ra̱n ruhuâ nej suj ni̱ ga̱ꞌhue gu̱ru̱gûñuꞌunj nej suj aꞌngô nej guiì.
3 Dadinꞌ huê nânj huin sa sàꞌ hua,
ni̱ sa garanꞌ ruhuâ Ma̱ꞌan Ñaꞌanj an ni̱ huêj huin sa gi̱ꞌhiaj ga̱na̱ni̱n nêꞌ,
4 sa ruhuâ Ma̱ꞌan Ñaꞌanj an huin si ga̱ꞌna̱ꞌ daranꞌ nej guiì riñanj ni̱ gi̱ni̱ꞌin ninj nuguanꞌ yàngàꞌa,
ni̱ ga̱na̱ni̱n ninj gi̱ꞌhia.
5 Dadinꞌ ꞌngo̱ rïn Ma̱ꞌan Ñaꞌanj an hua,
ni̱ Ma̱ꞌan Jesucristo huin sa ꞌnï̱nj guchraꞌ da̱ꞌa̱j siganï̂nj Ma̱ꞌan Ñaꞌanj an ngà siganï̂nj nej síi,
6 ni̱ nga guyumân diû ni̱ ga̱ ruhuâ Ma̱ꞌan Jesús ni̱ ganadiganj Ma̱ꞌan,
ni̱ gahuij rayiꞌî darûnꞌ ni̱ giꞌhia si ga̱na̱ni̱nꞌ.
7 Huê rayiꞌî nânj huin gachrûn su̱n Ma̱ꞌan Jesús ñùnj,
si ga̱huín sí gànàtàꞌ si-nùguànꞌànꞌ Ma̱ꞌan ni̱ huê danj na̱nj gahuín sí gaꞌanj gi̱di̱gân si̱nï̱n si-nùguànꞌanj.
(Ni̱ Ma̱ꞌan huin sa niꞌin si sa yàngàꞌa huin sa ganatá,
ni̱ nitaj si gaꞌmînj nuguanꞌ digaꞌñuꞌunj un),
ni̱ huín maestrû gidigân riñan nej sí nàsìnùnj un ni̱ gidigán si gùyùmàn ruhuâ nej sôꞌ ni̱ gidigán nuguanꞌ yàngàꞌa riñan nej sôꞌ.
8 Sa ruhuâj huin,
si hua̱ sí nitaj gakï̱nꞌïn hua ruhuâ nimân,
ni̱ nitaj si giꞌhiaj nej sôꞌ si huin nej sôꞌ sí sa naꞌan chre dan ni̱ nitaj si garán riñan duguiꞌ nej sôꞌ hiôꞌ ni̱ ga̱ꞌhue ga̱na̱chi nikaj nej sôꞌ raꞌa nej sôꞌ yàtàꞌa ni̱ ga̱ꞌmi̱n nej sôꞌ ngà Ma̱ꞌan Ñaꞌanj an.
9 Huê danj na̱nj,
ruhuâj si nej siyànàa ni̱ si̱ gitá ru̱ꞌu siganꞌ ninj,
ni̱ si̱ ga nìhiàꞌ staꞌu siganꞌ ninj ni̱ si̱ ginun ninj atsîj du̱ꞌhue̱ xi,
ni̱ si̱ ganachrâj ninj lasû chìꞌ huaa duhuê ahui ninj,
ni̱ si̱ gachrîj ninj ahui ninj agaꞌ oro,
ni̱ si̱ gachrîj ninj sa ran gùꞌnàj perla ahui ninj,
10 sa ga̱na̱huij ruhuâ ninj huin si gu̱ru̱gûñuꞌunj ninj aꞌngô nej guiì,
dàj rûnꞌ giꞌhiaj nej siyànà garanꞌ ruhuâ gi̱nikaj chre̱j riñan Ma̱ꞌan Ñaꞌanj an.
11 Ni̱ ga̱huin chru̱n siyànàa dḯn ga̱ne duꞌhua ni̱ gi̱nikaj chre nga gidigân nej dinï̂nt.
12 Dadinꞌ nitaj si gaꞌnï̂n si gi̱digân nej siyànàa ni̱ si̱ gaꞌhue gàꞌnï̀nꞌ ninj riñan nej síi,
ni̱ sa gi̱ꞌhiaj ninj huin si dḯn ga̱ne duꞌhua ninj.
13 Dadinꞌ gàꞌ si̱nï̱n giꞌhiaj Ma̱ꞌan Ñaꞌanj an Adán,
ni̱ nda neꞌ rùkù giꞌhia Eva;
14 ni̱ sê Adán huin sa gidigañuꞌunj sichre mánj,
Eva huin sa gidigañuꞌun,
ni̱ nga gisîj gidigañuꞌun,
ni̱ gininj Eva riñan gakï̱nꞌïn.
15 Sani̱ ga̱na̱ni̱n nej siyànàa si dugumîn ninj ni̱ gidigân hueꞌê ninj nej daꞌní ninj,
ni̱ si ni̱kï̱nꞌ ran ninj ngà nuguanꞌ guyumân ruhuâ ninj,
ni̱ ꞌì ruhuâ ninj ni̱ gi̱ꞌhiaj sun ninj si-su̱n Ma̱ꞌan Ñaꞌanj an,
ni̱ si̱ giꞌhiaj ninj si ûta huin ninj mánj.