5
Sani̱ rayiꞌî diû ni̱ àmàn ga̱huin,
ni̱ nitaj si niꞌñanj nej suj si ga̱chru̱n nej ñûnj riñan nej suj mánj.
2 Dadinꞌ nda hueꞌê chre ni̱ gàꞌ niꞌin nej suj si gui ga̱ꞌna̱ꞌ Ma̱ꞌan Señor ni̱ ga̱huin dàj rûnꞌ huin gui nga ga̱ꞌna̱ꞌ sí tu̱u neꞌ ñànꞌan.
3 Nga ga̱ta̱j nej guiì:
“Gàꞌ gahuin dïnꞌïnj ni̱ gàꞌ hua yìtï̀nj mân nêꞌ”,
hiôꞌ ni̱ nda ra̱ꞌñanj chre gùyùmàn sañuun riñan ninj,
ni̱ dàj rûnꞌ raꞌñanj gayiꞌij aꞌnïnj staꞌu riki ꞌngo̱ siyànàa guendâ gaꞌnga daꞌnin,
huê danj gi̱ranꞌ nej guiì ni̱ si̱ gahuin hio ninj gunânj ninj riñanj sañun nânj mánj.
4 Di̱nï̂nj,
sani̱ si̱ gaꞌhue ga̱nï̱n ruhuâ nej suj dàj rûnꞌ ganï̂n ruhuâ nej sí nitaj si niꞌin si-nùguànꞌ Ma̱ꞌan Ñaꞌanj an,
dadinꞌ nej sôꞌ ni̱ nitaj si chru̱n nej sôꞌ ga̱ya̱ka̱j guendâ nej sôꞌ àmàn nànìkàj ñûn Ma̱ꞌan Señor ga̱ꞌna̱j,
ni̱ nej suj ni̱ daꞌhui nej suj ga̱ yu̱gui nej suj daꞌnga ni̱ si̱ giranꞌ nej suj dàj rûnꞌ giranꞌ nej sí ri̱ña̱n guyumân sí tu̱u.
5 Daranꞌ nej suj nìkòꞌ rukû Ma̱ꞌan Señor Jesús ni̱ gàꞌ giyigï̀n daꞌngaꞌ nej suj ni̱ huin nej suj dàj rûnꞌ huin neꞌ gui.
Ni̱ nitaj si huin nej suj neꞌ ñànꞌan ngà sa ru̱mi̱nꞌin dadinꞌ nitaj si hua̱ ru̱mi̱nꞌ daꞌnga nej suj gàꞌ mánj.
6 Huê danj,
ni̱ si̱ gatoj nêꞌ dàj rûnꞌ gatoj aꞌngô nej guiì mánj,
sa gi̱ꞌhiaj nêꞌ huin si du̱gumîn hueꞌê nêꞌ ma̱ꞌan nêꞌ ni̱ daꞌngaꞌ hueꞌê gè gi̱ꞌhiaj nêꞌ.
7 Nej gui nitaj si ganaꞌhuìj àmàn nànìkàj ñûn Ma̱ꞌan Señor huin nej gui giꞌhiaj dàj rûnꞌ giꞌhiaj nej guiì gatoj neꞌ ñànꞌan,
dadinꞌ man ni̱na̱nj gakï̱nꞌïn ganahuij ruhuâ ninj gi̱ꞌhiaj ninj ni̱ man si ganahuij ruhuâ ninj nagunïn ninj ni̱ dàj rûnꞌ huin nej guiì nne ñan ru̱mi̱nꞌin huin ninj.
8 Sani̱ nêꞌ,
gàꞌ niꞌin si-nùguànꞌ Ma̱ꞌan Ñaꞌanj an ni̱ hueꞌê du̱gumînꞌ mu̱ꞌunꞌ,
dàj rûnꞌ giꞌhiaj stadû garán ma̱ꞌan ngà atsîj agaꞌa ni̱ huê danj gùyùmàn yìtï̀nj ruhuôꞌ ni̱ huê danj na̱nj ga̱ ꞌì ruhuôꞌ niꞌînꞌ nej duguiꞌ,
ni̱ gànàhuìꞌ si ga̱na̱ni̱nꞌ dàj rûnꞌ giꞌhiaj stadû nun raa̱ nahui ruj agaꞌa.
9 Dadinꞌ nun gàkï̀nj Ma̱ꞌan Ñaꞌanj an ga̱ꞌno̱ꞌ guendâ ga̱na̱huin roꞌôꞌ kastîgu mánj,
gakḯn Ma̱ꞌan gaꞌnôꞌ guendâ gìrìꞌ nìꞌhiôꞌ ga̱na̱ni̱nꞌ giꞌhiaj Ma̱ꞌan Señor Jesucristo,
10 dadinꞌ gahuiꞌ Ma̱ꞌan Señor rayiꞌîꞌ ni̱ ga̱ꞌhue si ga̱neꞌ nìꞌnòꞌ doj,
nej si gàhuìꞌ,
sani̱ ga̱neꞌ nùgùnꞌùnꞌ ngà Ma̱ꞌan Señor.
11 Rayiꞌî dan ni̱,
gàꞌhuìꞌ nej suj chrej nùkuaj rûhua riñan ꞌngo̱ ni̱ aꞌngô nej duguiꞌ nej suj ni̱ ga̱na̱chinikaj nej suj ꞌngo̱ ni̱ aꞌngô nej duguiꞌ nej suj,
dàj rûnꞌ giꞌhiaj nej suj nda gui hia̱j.
Dunaꞌnga Pablo riñan nej dinï̂nt
12 Ûta àko gachín nìꞌhiaj nej ñûnj,
riñan nej suj di̱nï̂nj,
si ga̱na̱ka̱j guendâ nej suj rayiꞌî nej sôꞌ giꞌhiaj sun siganï̂nj nej suj,
dadinꞌ gidigân nej sôꞌ nej suj giꞌhiaj Ma̱ꞌan Señor,
ni̱ dunaꞌnga nej sôꞌ riñan nej suj;
13 daꞌhui nej suj gi̱ni̱kaj chre̱j nej suj,
ni̱ ga̱ ꞌì ruhuâ nej suj niꞌin nej suj nej sôꞌ ni̱ rayiꞌî sun giꞌhiaj nej sôꞌ siganï̂nj nej suj,
ni̱ huê danj na̱nj ga̱ dïnꞌïnj ga̱ne nej suj ngà ꞌngo̱ ni̱ aꞌngô nej duguiꞌ nej suj.
14 Ni̱ huê danj na̱nj gachín nìꞌhiaj staꞌu nej ñûnj riñan nej suj si du̱gunïn gàꞌì nej suj nej sí rùmìin,
ni̱ nàgàꞌhuìꞌ nej suj chrej nùkuaj ruhuâ riñan nej dinï̂nt ginichre ruhuâ,
ni̱ ga̱ nùkuaj ruhuâ nej suj ngà daranꞌ nej guiì.
15 Gi̱niꞌhiaj nej suj ni̱ si hua̱ ꞌngo̱ sí giꞌhiaj sa aꞌnanꞌan ni̱ si̱ nanikàj nej suj gi̱ꞌhiaj nej suj sa aꞌnanꞌan ngà sôꞌ mánj;
daranꞌ diû gi̱ꞌhiaj nej suj sa sàꞌa ngà ꞌngo̱ ni̱ aꞌngô nej duguiꞌ nej suj,
ni̱ huê danj gi̱ꞌhiaj nej suj ngà daranꞌ nej guiì.
16 Ga̱ nìhiàꞌ ruhuâ nej suj daranꞌ diû.
17 Si̱ gaꞌnïnꞌ ruhuâ nej suj guendâ ga̱ꞌmi̱n nej suj ngà Ma̱ꞌan Ñaꞌanj an mánj.
18 Gàꞌhuìꞌ nej suj si guruhuâ Ma̱ꞌan Ñaꞌanj an rayiꞌî daranꞌ sa sàꞌa ni̱ sañun ganahuin ràꞌa nej suj,
dadinꞌ huê danj huin sa garanꞌ ruhuâ Ma̱ꞌan Ma̱ꞌan Ñaꞌanj an ngà Ma̱ꞌan Cristo Jesús gi̱ꞌhiaj nej suj.
19 Si̱ giꞌhiaj nej suj si gu̱xu̱n Espíritu Santo Ma̱ꞌan riñan nej suj mánj.
20 Si̱ gataj nej suj si nuguanꞌ gataj dàj ga̱huin ni̱ huin nuguanꞌ nitaj si niꞌñanj an mánj.
21 Na̱di̱giꞌñûn nej suj daranꞌanj,
ni̱ du̱guꞌnïnꞌ nej suj gi̱ꞌhiaj nej suj sa sàꞌa.
22 Si̱ giꞌhiaj nej suj gàꞌ si ꞌngo̱ gakï̱nꞌïn mánj.
23 Ni̱ huê gè Ma̱ꞌan Ñaꞌanj ꞌhiaj hua dïnꞌïnj,
gi̱ꞌhiaj ga̱na̱huin gè nanè nimûnꞌ,
ma̱ꞌan nimûnꞌ,
ni̱ nneè kuꞌ;
ni̱ du̱guminj ñùnꞌ riñan gakï̱nꞌïn nda gui ga̱ꞌna̱ꞌ Ma̱ꞌan Señor Jesucristo.
24 Ûta hueꞌê dagahuin Ma̱ꞌan sa gakḯn ñùnꞌ,
ni̱ huê danj du̱guminj ñûnꞌ.
Gaꞌnḯn sij nuguanꞌ ni̱ꞌña̱nj ganahuij riñan nej dinï̂nt
25 Gàchìnj nìꞌhiaj nej suj rayiꞌî nej ñûnj na̱nj di̱nï̂n.
26 Nàgàꞌhuìꞌ nej suj nuguanꞌ ni̱ꞌña̱nj an riñan daranꞌ nej dinï̂nt ni̱ huê danj na̱nj gi̱daꞌa nej suj raꞌa ꞌngo̱ ni̱ aꞌngô nej duguiꞌ nej suj.
27 Ûta àko gachín nìꞌhiaj nej ñûnj ngà siyu̱gui Ma̱ꞌan Señor riñan nej suj,
si ga̱hia̱ nej suj ñanj karta nânj riñan daranꞌ nej dinï̂nt huin sí gèe.
28 Si-su̱nu̱j Ma̱ꞌan si-Seño nêꞌ Jesucristo ga̱huin ngà nej suj.
Ni̱ huê danj huin rûꞌhuaj na̱nj ánj.