4
Nej suj huin yiruꞌhue dan,
ni̱ gi̱ꞌhiaj nej suj sa nìkàa ngà nej musû ꞌnï̱nj giꞌhiaj sun chre riñan nej suj,
dadinꞌ gàꞌ niꞌin nej suj si Ma̱ꞌan Ñaꞌanj nne yàtàꞌa ni̱ giniꞌhia dàj giꞌhiaj nej suj ngà nej sôꞌ.
2 Du̱guꞌnïnꞌ nej suj ga̱ꞌmi̱n nej suj ngà Ma̱ꞌan Ñaꞌanj an,
ni̱ daranꞌ diû du̱gumîn hueꞌê nej suj ma̱ꞌan nej suj ni̱ gàꞌhuìꞌ nej suj si guruhuâ Ma̱ꞌan Ñaꞌanj an;
3 ni̱ huê danj na̱nj gàchìnj nìꞌhiaj nej suj rayiꞌî nej ñûnj,
daꞌnga ni̱ ganaꞌnï̂nj Ma̱ꞌan Señor rahueꞌe ga̱ꞌmi̱n nej ñûnj si-nùguànꞌ Ma̱ꞌan Ñaꞌanj an riñan nej guiì,
ni̱ ga̱na̱di̱gân nej ñûnj nuguan ꞌnïnj huì rayiꞌî Ma̱ꞌan Cristo,
dadinꞌ huê rayiꞌî nuguanꞌ dânj ꞌnï̂n dukuâ gaꞌa na̱nj ánj,
4 daꞌnga ni̱ gaꞌhue gànàtàj si-nùguànꞌ Ma̱ꞌan Ñaꞌanj an nda nîꞌnïnj chre riñan nej guiì dàj daꞌhuí ga̱ꞌmi̱n na̱nj ánj.
5 Ga̱che̱ nej suj ngà nej guiì nàsìnùnj un sani̱ sàꞌ gayakaj guendâ nej suj dàj gi̱ꞌhiaj nej suj,
ga̱ra̱n sun hueꞌê nej suj diû.
6 Ni̱ nuguanꞌ ga̱ꞌmi̱n nej suj daranꞌ diû ga̱huin nuguanꞌ ga̱ra̱nꞌ ruhuâ nej guiì,
ni̱ dàj rûnꞌ dàj yâ nihia nga ꞌnïnj ñaan ni̱ huê danj ni̱ꞌña̱nj ga̱ si-nùguànꞌ nej suj na̱nj ánj.
Gaꞌnḯn sij nuguanꞌ ni̱ꞌña̱nj ganahuij riñan nej dinï̂nt
7 Ni̱ dàj raꞌán ni̱ daranꞌ diû gànàtàꞌ dinï̂nt Tíkiko riñan nej suj,
dadinꞌ ꞌì ruhuâ neꞌ niꞌin sij dadinꞌ huin sij ꞌngo̱ sí ûta hueꞌê dagahuin,
ni̱ huin sij ꞌngo̱ musû giꞌhiaj sun chre ngà nêꞌ riñan Ma̱ꞌan Señor Jesús.
8 Rayiꞌî dan ni̱ gaꞌnḯn nej ñûnj huaj sij ñan màn nej suj,
ni̱ gànàtàꞌ sij dàj hua mân nej ñûnj,
ni̱ na̱gi̱ꞌhiaj nùkuaj sij ruhuâ nimân nej suj,
9 ni̱ huê danj na̱nj huaj Onésimo ngà sij,
dadinꞌ huin sôꞌ ꞌngo̱ sí ꞌì ruhuâ nêꞌ ni̱ hueꞌê dagahuin sôꞌ,
ni̱ gànàtàꞌ sôꞌ dàj hua mân nej ñûnj neꞌ dànanj riñan nej suj na̱nj ánj.
10 Ni̱ gaꞌnḯn Aristarco sôꞌ nne dukuâ gaꞌa ngàj ꞌngo̱ nuguanꞌ ni̱ꞌña̱nj an huaj riñan nej suj,
ni̱ huê danj na̱nj gaꞌnḯn Marcos sôꞌ huin tukunꞌ Bernabé ꞌngo̱ nuguanꞌ ni̱ꞌña̱nj an huaj riñan nej suj,
ni̱ huê rayiꞌî sôꞌ huin sa gaꞌnïnꞌ sùnj riñan nej suj,
ni̱ ga̱na̱huin ràꞌa nej suj sôꞌ nga gùchìꞌ sôꞌ ñan màn nej suj.
11 Huê danj na̱nj gaꞌnḯn Jesús sôꞌ gùꞌnàj Justo ꞌngo̱ nuguanꞌ nìꞌñànj an huaj riñan nej suj;
ni̱ huê nej sôꞌ nânj huin do̱j nej sí judío giyiꞌneꞌ nnïnj arán raa̱ nneè nàꞌàj,
sani̱ guyumân ruhuâ nej sôꞌ niꞌin nej sôꞌ Ma̱ꞌan Señor Jesús ni̱ giꞌhiaj sun nej sôꞌ ngà si-su̱n Ma̱ꞌan Ñaꞌanj an,
ni̱ ûta narikî nej sôꞌ chrej nùkuaj rûhua riñânj.
12 Huê danj na̱nj gaꞌnḯn Epafras ꞌngo̱ nuguanꞌ ni̱ꞌña̱nj huaj riñan nej suj,
dadinꞌ sôꞌ huin ꞌngo̱ musû giꞌnïnj giꞌhiaj sun chre riñan Ma̱ꞌan Cristo,
ni̱ daranꞌ diû ûta àko gachín nìꞌhiaj sôꞌ rayiꞌî nej suj si ganikïn ran nej suj riñan Ma̱ꞌan Ñaꞌanj an,
ni̱ ga̱huin nej suj sí nìkàa ni̱ ga̱ nùguànꞌan ruhuâ nej suj ngà daranꞌ sun ruhuâ Ma̱ꞌan Ñaꞌanj an gi̱ꞌhiaj sun nej suj riñanj.
13 Ni̱ niꞌín dàj gi̱ꞌhiaj Epafras ngà nej suj dadinꞌ ûta ganahuij ruhuâ sôꞌ,
ni̱ huê danj na̱nj ganahuij ruhuâ sôꞌ niꞌin sôꞌ nej dinï̂nt màn Laodisea,
ni̱ nej dinï̂nt màn Hierápolis.
14 Ni̱ huê danj na̱nj gaꞌnḯn Lucas nuguanꞌ ni̱ꞌña̱nj an huaj riñan nej suj,
ni̱ sôꞌ huin doctor niꞌin gonoꞌô snàꞌànj an ni̱ ûta ꞌì ruhuâ nej ñûnj niꞌin nej ñûnj sôꞌ.
Ni̱ huê danj na̱nj gaꞌnḯn Demas nuguanꞌ ni̱ꞌña̱nj an huaj riñan nej suj.
15 Ni̱ nàgàꞌhuìꞌ nej suj nuguanꞌ ni̱ꞌña̱nj an riñan nej dinï̂nt màn Laodisea,
ni̱ nàgàꞌhuìꞌ nej suj nuguanꞌ ni̱ꞌña̱nj an riñan Ninfa ni̱ huê danj na̱nj nàgàꞌhuìꞌ nej suj nuguanꞌ ni̱ꞌña̱nj an riñan nej dinï̂nt huin si-nùhuì Ma̱ꞌan Jesús màn dukuâ Ninfa.
16 Neꞌ rùkù nga gisîj gahia nej suj ñanj karta nânj,
ni̱ gàꞌnï̀nj nej suj gàꞌan riñan nej dinï̂nt màn Laodisea ni̱ gahia nej sôꞌ ñanj karta nânj;
ni̱ huê danj na̱nj ga̱hia̱ nej suj ñanj karta guchiꞌ riñan nej sôꞌ nej na̱nj ánj.
17 Ga̱ta̱j nej suj gu̱nïn Arquipo:
“Niꞌhiaj sòꞌ ni̱ da̱gahuin hueꞌêꞌ sun ganahuin ràꞌâꞌ giꞌhiaj Ma̱ꞌan Señor.”
18 Ñùnj huin Pablo ni̱ gachrûn ràꞌa nuguanꞌ ni̱ꞌña̱nj an huaj riñan nej suj,
ni̱ ga̱na̱nun ruhuâ nej suj niꞌin nej suj ñùnj dadinꞌ nné dukuâ gaꞌa.
Ni̱ si-su̱nu̱j Ma̱ꞌan Señor ga̱ riñan nej suj.
Ni̱ huê danj huin ruꞌhuaj na̱nj ánj.