3
Si yàngàꞌ gàꞌ ganaꞌnï̂nj nej suj ngà Ma̱ꞌan Cristo siganï̂nj nej nîman,
ni̱ ga̱nï̱n ruhuâ nej suj rayiꞌî nej sa màn yàtàꞌa,
ñan nne Ma̱ꞌan Cristo raꞌa neꞌ huàꞌ Ma̱ꞌan Ñaꞌanj an.
2 Gàꞌnï̀nj ñan nej suj riñan nej rasu̱n màn yàtàꞌa sani̱ si̱ gaꞌnḯn ñan nej suj riñan nej rasu̱n màn riñan hioꞌó mánj.
3 Dadinꞌ gàꞌ gahuiꞌ nej suj riñan nej guiì màn ruhuâ yumiguìi,
sani̱ giꞌhiaj Ma̱ꞌan Ñaꞌanj an si huin nej suj guiì hua̱ nìꞌnàꞌa ngà Ma̱ꞌan Cristo Jesús.
4 Nga ga̱ꞌna̱ꞌ ñûn Ma̱ꞌan Cristo ni̱ gane nej suj ngà Ma̱ꞌan,
ni̱ ûta hueꞌê ga̱ ga̱ne nej suj ñan ga̱ne Ma̱ꞌan.
Ni̱na̱nj gakï̱nꞌïn ganahuij ruhuâ ꞌngo̱ guiì giꞌhiaj ninj nga nï̀nꞌ ga̱chin gi̱ni̱ꞌin ninj Ma̱ꞌan Jesús
5 Gi̱ꞌhiaj nej suj si gàhuìꞌ daranꞌ sa garanꞌ ruhuâ nneè kú nej suj:
Guendâ ga̱che̱ sìgìchràꞌ nej suj,
sa kï̱j hua garanꞌ ruhuâ nej suj,
ni̱ si̱ giꞌhiaj nej suj sa ganï̂n ruhuâ ni̱ sa garanꞌ ruhuâ nneè kú nej suj,
ni̱ si gàꞌ huaj riñan nej suj ni̱ si̱ ganï̂n ruhuâ nej suj gaj doj riñan nej suj,
dadinꞌ dàj rûnꞌ huin si nnùn ña̱ꞌa̱nj nej suj riñan ñaꞌanj giꞌhiaj ra̱ꞌa síi huin na̱nj ánj.
6 Ni̱ rayiꞌî nej gakï̱nꞌ nânj huin ni̱ ginaꞌan ruhuâ Ma̱ꞌan Ñaꞌanj an niꞌin nej guiì,
ni̱ rayiꞌî dânj ni̱ gàꞌnïn gùyùmàn sañuun riñan ninj guendâ naꞌhuej ruhuâ ninj da̱gahuin ninj riñanj.
7 Nga nï̀nꞌ gàchin gi̱ni̱ꞌin nej suj Ma̱ꞌan Cristo ni̱ huê nej gakï̱nꞌ nânj giꞌhiaj nej suj.
8 Sani̱ hia̱j ni̱ gudunâj nej suj nej gakï̱nꞌ nânj:
Sa hu̱e chre dan,
sa ginaꞌan ruhuâ dan,
sa yìꞌì chre dan,
nuguanꞌ kï̱j ï,
nuguanꞌ dugu̱ꞌna hua gaꞌmin nej suj.
9 Si gàꞌ gudunâj nej suj nej gakï̱nꞌ giꞌhiaj nej suj àsìj nâ,
huê danj ni̱ si̱ gidigañuꞌunj nej suj ꞌngo̱ ni̱ aꞌngô nej duguiꞌ nej suj mánj,
10 hia̱j ni̱ na̱du̱na̱ nej suj sa gi̱ꞌhiaj nej suj ni̱ ga̱na̱huin nej suj guiì nàkàa,
ni̱ daꞌ gui ni̱ ga̱na̱huin hueꞌê sa gi̱ꞌhiaj nej suj dàj rûnꞌ hua hueꞌê Ma̱ꞌan Ñaꞌanj an dadinꞌ huê Ma̱ꞌan huin sa giꞌhiaj nej suj ni̱ ꞌngo̱ gui ni̱ gi̱ni̱ꞌin nej suj dàj hueꞌê nï̀nꞌ ruhuâ hua Ma̱ꞌan.
11 Hioꞌ ni̱ sê sa ña̱ꞌa̱n huin si ga̱huînꞌ sí griego nej si ga̱huînꞌ sí judío,
ni̱ sê si̱ ña̱ꞌa̱n huaj si gìyìꞌnèꞌ nnïnj arán raa̱ nneè nòꞌòꞌ,
nej si ga̱huînꞌ sí ꞌnaꞌ aꞌngô país,
nej si nitaj si chru̱nꞌ,
nej si ga̱huin si giꞌnïnj giꞌhiaj sun chre,
nej si giyiꞌnï̂nj riñunꞌ,
dadinꞌ Ma̱ꞌan Cristo huin sa gaꞌnïnꞌ riñan daranꞌanj,
ni̱ huej huin sa nikaj sun riñan daranꞌanj.
12 Ni̱ dagahuin nej suj dàj rûnꞌ giꞌhiaj nej guiì dagahuin ni̱ ganagui Ma̱ꞌan Ñaꞌanj an ninj,
ni̱ ga̱huin nej suj guiì gèe,
ni̱ du̱guꞌnïnꞌ nej suj ni̱ gu̱ru̱gûñuꞌunj nej suj aꞌngô nej guiì,
ni̱ si̱ giꞌhiaj nej suj si ûta huin nej suj,
ni̱ ga̱huin nej suj sí nìin,
ni̱ ga̱ nùkuaj ruhuâ nej suj.
13 Ga̱ nùkuaj ruhuâ nej suj niꞌin nej suj ꞌngo̱ ni̱ aꞌngô nej duguiꞌ nej suj,
ni̱ si garânj ruhuâ ꞌngo̱ nej duguiꞌ nej suj rayiꞌî nej suj ni̱ gi̱nikaj nej suj nimân nìko rayiꞌî nej sôꞌ,
dàj rûnꞌ giꞌhiaj Ma̱ꞌan Cristo nga ginika nimân nìko rayiꞌî nej suj ni̱ huê danj gi̱ꞌhiaj nej suj.
14 Sani̱ sa ña̱ꞌa̱n doj daꞌhui nej suj da̱gahuin nej suj huin si ga̱ ꞌì ruhuâ nej suj niꞌin nej suj nej duguiꞌ nej suj,
ni̱ daꞌhui nej suj gà nùguànꞌàn ruhuâ nej suj ni̱ nânj huin sa nìkà nï̀nꞌ ruhuâ.
15 Ni̱ sa dïnꞌïnj hua̱ riñan Ma̱ꞌan Ñaꞌanj an gi̱nikaj su̱n ruhuâ nimân nej suj,
dadinꞌ huê gue̱nda̱ dan huin gakḯn Ma̱ꞌan Ñaꞌanj an nej suj guendâ ga̱huin nej suj ꞌngo̱ rïn nneè kúu;
ni̱ gàꞌhuìꞌ nej suj si guruhuâ Ma̱ꞌan.
16 Ni̱ ga̱chra nìko si-nùguànꞌ Ma̱ꞌan Cristo ruhuâ nimân nej suj,
ni̱ gi̱di̱gân nej suj ꞌngo̱ ni̱ aꞌngô nej duguiꞌ nej suj,
ni̱ nagiꞌhiaj yìtï̀nj nej suj ruhuâ nej duguiꞌ nej suj ngà nuguanꞌ chru̱n nï̀nꞌ ruhuâ,
ni̱ gàꞌhuìꞌ nej suj si guruhuâ Ma̱ꞌan Ñaꞌanj an nga ruhuâ nimân nej suj nga gachrá nej suj chraꞌ salmo,
chraꞌ himno,
ni̱ chraꞌ nnùn ña̱ꞌa̱nj nej suj riñan Ma̱ꞌan Ñaꞌanj an.
17 Ni̱ daranꞌ nej nuguanꞌ gaꞌmin nej suj,
ni̱ daranꞌ nej sa gi̱ꞌhiaj nej suj,
ni̱ gi̱ꞌhiaj nej suj ngà siyu̱gui Ma̱ꞌan Señor Jesús,
ni̱ gàꞌhuìꞌ nej suj si guruhuâ Ma̱ꞌan Ñaꞌanj huin Rej nêꞌ rayiꞌî sa giꞌhiaj Ma̱ꞌan Cristo ngà nêꞌ.
Sa daꞌhui nej sôꞌ nìkòꞌ rukû Ma̱ꞌan Jesús dagahuin nej sôꞌ siganï̂nj nej guiì
18 Nej suj siyànà hua̱ nika dan,
ni̱ da̱gahuin nej suj sa taj nika nej suj,
dadinꞌ si yumân ruhuâ nej suj niꞌin nej suj Ma̱ꞌan Señor ni̱ huê dànanj daꞌhui nej suj gi̱ꞌhiaj nej suj.
19 Nej suj sí hua̱ nika,
ni̱ ga̱ ꞌì ruhuâ nej suj niꞌin nej suj nika nej suj,
ni̱ si̱ ga hue staꞌu nej suj ngà nika nej suj mánj.
20 Nej suj hua nï̀nꞌ nne riñan rej,
ni̱ da̱gahuin nej suj daranꞌ sa gataj rej nej suj,
dadinꞌ huê dànanj huin sa garanꞌ ruhuâ Ma̱ꞌan Señor gi̱ꞌhiaj nej suj.
21 Nej suj hua̱ daꞌní,
ni̱ si̱ ginaꞌan ma̱ꞌan nï̀nꞌ ruhuâ nej suj niꞌin nej suj daꞌní nej suj,
daꞌnga ni̱ si̱ giꞌhiaj nej suj si gi̱ni̱chre ruhuâ nej sôꞌ mánj.
22 Da̱gahuin nej suj,
nej musû giꞌnïnj giꞌhiaj sun chre dan riñan si-patrón nej suj nne riñan hioꞌó nânj,
ni̱ sê man nga nikïnꞌ nej sôꞌ giniꞌhiaj nej sôꞌ ni̱ gi̱ꞌhiaj nej suj si ûta giꞌhiaj sun nej suj,
guendâ ruhuâ nej suj gùnàj hueꞌê nej suj ngà nej sôꞌ mánj,
gi̱ꞌhiaj sun nej suj ngà daranꞌ nimân nej suj riñan nej sôꞌ,
ni̱ gi̱nun yuꞌhuiꞌ ruhuâ nimân nej suj niꞌin nej suj Ma̱ꞌan Ñaꞌanj an.
23 Daranꞌ nej sun giꞌhiaj nej suj,
ni̱ gi̱ꞌhiaj nej suj ngà daranꞌ nimân nej suj,
gi̱ꞌhiaj nej suj guenda si riñan Ma̱ꞌan Señor giꞌhiaj sun nej suj ni̱ si ganï̂n ruhuâ nej suj si riñan nej síi giꞌhiaj sun nej suj mánj.
24 Ni̱ gàꞌ niꞌin nej suj si na̱ri̱ki̱ Ma̱ꞌan Señor ꞌngo̱ rasu̱un raꞌa nej suj rayiꞌî sun giꞌhiaj nej suj ni̱ gànàrìꞌ nej suj nanìꞌhiaj nej suj,
dadinꞌ riñan Ma̱ꞌan Cristo huin Ma̱ꞌan Señor gunânj gi̱tsi nej suj.
25 Sani̱ nej guiì giꞌhiaj gakï̱nꞌïn,
ni̱ ga̱na̱huin ràꞌa ninj kastîgu rayiꞌî nej gakï̱nꞌ giꞌhiaj ninj,
dadinꞌ nitaj guiì gininj hueꞌê doj riñan Ma̱ꞌan Ñaꞌanj an mánj.