2
Ruhuâj si ga̱ra̱n daꞌngaꞌ ruhuâ nej suj si ûta giꞌhiaj guesâj ngà si-nùguànꞌ Ma̱ꞌan Ñaꞌanj an riñan nej suj,
ni̱ huê danj na̱nj giꞌhia ngà nej dinï̂nt nne ruhuâ yumanꞌ Laodisea,
ni̱ huê danj na̱nj giꞌhia ngà nej sôꞌ nitaj àmàn giniꞌin ñùnj;
2 ni̱ giꞌhiaj guesâj si na̱gi̱ꞌhiaj nùkuaj nej sôꞌ nimân nej sôꞌ,
ni̱ ga̱ ꞌì ruhuâ nej sôꞌ ni̱ ga̱ gu̱ña̱n ruhuâ nej sôꞌ,
nda gùnùkuaj nej sôꞌ hueꞌê ga̱ra̱n daꞌngaꞌ ruhuâ nej sôꞌ,
ni̱ gi̱ni̱ꞌin nej sôꞌ nuguanꞌ giꞌnïnj huì giꞌhiaj Ma̱ꞌan Ñaꞌanj huin Rej nêꞌ,
ni̱ huej huin rej Ma̱ꞌan Cristo,
3 ni̱ riñan Ma̱ꞌan Cristo giꞌnïnj huì sa ûta nìko huaj ga̱huin chru̱n nï̀nꞌ ruhuôꞌ ni̱ gi̱ni̱ꞌin nï̀nꞌ ruhuôꞌ.
4 Ni̱ huê dànanj gatâ gu̱nïn nej suj daꞌnga ni̱ si̱ gidigañuꞌunj gàꞌ si ꞌngo̱ nej síi nej suj ngà nuguanꞌ nda nne chre gaꞌmin nej sôꞌ.
5 Dadinꞌ nùnj huin si nuhuí nikïnꞌ siganï̂nj nej suj,
sani̱ nne nanè nimânj ngà nej suj,
ni̱ ganahuin nìhiàꞌ ruhuâj ni̱ giniꞌhia si dagahuin hueꞌê nej suj,
ni̱ hua̱ yìtï̀nj ruhuâ nej suj ni̱ guyumân ruhuâ nej suj niꞌin nej suj Ma̱ꞌan Cristo.
6 Huê danj ni̱,
si gàꞌ ganahuin ràꞌa nej suj Ma̱ꞌan Señor Jesucristo,
ni̱ da̱gahuin nej suj riñanj dàj rûnꞌ garanꞌ ruhuaj.
7 Dàj rûnꞌ giꞌhiaj ꞌngo̱ chrun nga gaꞌanj gùnùn hiaꞌaj ni̱ huê danj nìko gùyùmàn ruhuâ nej suj,
ni̱ ga̱na̱daꞌa nej suj nej nuguanꞌ gidigân Ma̱ꞌan Cristo,
ni̱ na̱gi̱ꞌhiaj yìtï̀nj nej suj ruhuâ nej suj ni̱ gùyùmàn ruhuâ nej suj niꞌin nej suj Ma̱ꞌan,
dàj rûnꞌ gahuin chru̱n nej suj,
ni̱ huê danj nìko gàꞌhuìꞌ nej suj si guruhuâ Ma̱ꞌan Ñaꞌanj an.
Cristo gi̱ꞌhiaj ni̱ ga̱ꞌhue ga̱na̱huin nìꞌnàꞌ nimûnꞌ
8 Gi̱niꞌhiaj nej suj ni̱ ga̱ gudadû nej suj ni̱ si̱ gidigañuꞌunj gàꞌ si ngo̱ nej síi nej suj,
ngà nej nuguanꞌ chru̱n nej sí màn ruhuâ yumiguì nânj dadinꞌ nitaj si niꞌñanj nej nuguanꞌ dânj,
dadinꞌ huin nuguanꞌ gahuin chru̱n nej sôꞌ ruhuâ yumiguì nânj,
ni̱ huin chrej yìñànj ni̱ka̱j nej sôꞌ,
ni̱ sê nuguanꞌ niꞌñanj an huin sa gaꞌmin nej sôꞌ,
dadinꞌ sê nuguanꞌ gidigân Ma̱ꞌan Cristo huin mánj.
9 Dadinꞌ daranꞌ nej sa hua̱ riñan Ma̱ꞌan Ñaꞌanj an ni̱ daranꞌ nej dânj hua riñan Ma̱ꞌan Cristo ni̱ gu̱ña̱n huin Ma̱ꞌan Cristo ngà Ma̱ꞌan Ñaꞌanj an.
10 Ni̱ hua̱ daranꞌanj riñan nej suj giꞌhiaj Ma̱ꞌan Cristo,
dadinꞌ huej huin sa ni̱ka̱j su̱n riñan daranꞌ nej sí huin ña̱an,
ngà sa nùkuaj.
11 Ni̱ ganahuin hueꞌê ruhuâ nimân nej suj sani̱ sê síi huin sa giꞌhiaj ganahuin hueꞌê ruhuâ nimân nej suj mánj,
dadinꞌ Ma̱ꞌan Ñaꞌanj an huin sa giꞌhiaj ganahuin hueꞌê ruhuâ nimân nej suj nga ganakaj duguiꞌ nej suj ngà Ma̱ꞌan Cristo,
huê danj ni̱ ga̱ꞌhue gu̱du̱nâj nej suj gakï̱nꞌïn;
12 nga gataꞌ nne nej suj ruhuâ nnee ni̱ gachinꞌ nej sôꞌ nej suj dàj rûnꞌ gachinꞌ nej sôꞌ Ma̱ꞌan Cristo,
ni̱ dàj rûnꞌ ganaꞌnï̂nj Ma̱ꞌan Cristo siganï̂nj nej nîman huê danj ganaꞌnï̂nj nej suj riñan gakï̱nꞌïn.
13 Aꞌngô diû ni̱ gahuin nej suj,
si gahuiꞌi rayiꞌî gakï̱nꞌ giꞌhiaj nej suj,
ngà nneè kú nej suj,
sani̱ ngà Ma̱ꞌan Cristo ni̱ giꞌhiaj Ma̱ꞌan Ñaꞌanj an si ga̱na̱huin nìꞌnàꞌ nej suj,
ni̱ ginikaj Ma̱ꞌan Ñaꞌanj an nimân nìko rayiꞌî daranꞌ si-ga̱kïnꞌ nej suj.
14 Ni̱ nadurëꞌëj ñanj gaꞌmin gakï̱nꞌ rayiꞌî nêꞌ,
dadinꞌ taj riñan ñanj dânj si hua̱ ni̱ña̱n si ga̱na̱huin ràꞌa nêꞌ kastîgu rayiꞌî gakï̱nꞌ giꞌhiôꞌ,
ni̱ gaꞌnêj Ma̱ꞌan Jesús ñanj dânj ni̱ gachrunj riñan rugutsìi,
15 ni̱ gaꞌnêj Ma̱ꞌan Ñaꞌanj an sun ginikaj nej nanè kï̱j hua huin ña̱n gunânj gi̱tsi riñan sichre,
nga riñan nej sa nùkuaj,
sani̱ giriꞌ sichre sinàꞌàj a giꞌhiaj Ma̱ꞌan Cristo dadinꞌ giniꞌin ri̱ña̱n daranꞌ nej guiì si giꞌhiaj ga̱nan Ma̱ꞌan Cristo sichre riñan rugutsìi.
Dagahuînꞌ sa garanꞌ ruhuâ Ma̱ꞌan Ñaꞌanj an nne yàtàꞌa
16 Huê danj ni̱ si̱ gaꞌnï̂nj nej suj si ga̱ꞌmi̱n nej guiì yiꞌî nej suj,
ni̱ rayiꞌî nihia ya nej suj ni̱ rayiꞌî sa goꞌo nej suj,
ni̱ rayiꞌî si nitaj si giꞌhiaj nej suj nej giꞌñanj ginikaj chre̱j nej judío,
ni̱ rayiꞌî nga nanikïnꞌ ꞌnìnj ahuii,
ni̱ rayiꞌî gui ganarânj ruhuâ.
17 Daranꞌ nej dânj ni̱ huin ꞌngo̱ gayu̱nꞌun rayiꞌî nej sa ga̱ꞌna̱ꞌ;
sani̱ sa yàngàꞌ hia huin Ma̱ꞌan Cristo.
18 Huê danj ni̱ si̱ gaꞌnï̂nj nej suj si na̱gi̱ꞌhiaj ha̱i̱ nej sôꞌ si ga̱na̱ka̱j nej suj ꞌngo̱ rasu̱un rayiꞌî sun giꞌhiaj sun hueꞌê nej suj mánj,
ni̱ si̱ gayakaj nej suj guenda sa gaꞌmin nej sí ginun ña̱ꞌa̱nj riñan nej ángel,
ni̱ si̱ gayakaj nej suj guenda sa gaꞌmin nej sí taj si ganahuin ràꞌa nej sôꞌ ꞌngo̱ nej sa rikî Ma̱ꞌan Ñaꞌanj an sani̱ si̱ gidigañuꞌunj nej sôꞌ,
dadinꞌ taj nej sôꞌ si ûta huin nej sôꞌ ngà rayiꞌî nej sa giri ra̱ nej sôꞌ.
19 Ni̱ nitaj si ni̱ka̱j duguiꞌ nej sí nânj ngà Ma̱ꞌan Cristo,
dadinꞌ Ma̱ꞌan Cristo huin sa gaꞌhuiꞌ daranꞌanj ni̱ giꞌhia gahuin ran ruhuâ nej sôꞌ nìkòꞌ rukuj ni̱ giꞌhia si ni̱ka̱j dugui daꞌ goꞌngo̱ nej sôꞌ nìkòꞌ rukuj ni̱ giriꞌ nej sôꞌ guesâ ni̱ giꞌhiaj Ma̱ꞌan Ñaꞌanj an si ga̱chi̱j daꞌ goꞌngo̱ nej sôꞌ.
20 Gàꞌ gahuiꞌ nej suj ngà Ma̱ꞌan Cristo,
huê danj ni̱ nitaj si huaj nànìkàj nej suj gu̱na̱nj gi̱tsi nej suj riñan sa si̱nï̱n gahuin chru̱n nej suj giꞌhiaj yumiguìi.
Nùnj huin saj ni̱ giꞌhiaj nej suj dàj rûnꞌ giꞌhiaj nej suj nga dagahuin nej suj riñan yumiguìi ràꞌaj,
dadinꞌ hua̱ na̱nj dagahuin nej suj riñan sun giyiꞌnïnꞌ riñan nej suj àsìj nâ:
21 Dadinꞌ taj nej sôꞌ:
“Si̱ garânj sun nej suj nânj,
ni̱ si̱ ya nej suj nânj,
ni̱ si̱ gatsïj nej suj nânj.”
22 Ni̱ hua̱ gu̱ña̱n ruhuâ nej suj ngà nej sun gaꞌnïnꞌ su̱n nej síi ni̱ ngà nej yìꞌnï̀nꞌ nej sa gidigân nej sôꞌ riñan nej suj,
sani̱ daranꞌ nej nânj ni̱ sa gi̱rë̱ꞌ huin.
23 Yàngàꞌ hia ni̱ nej nuguanꞌ nânj ni̱ dàj rûnꞌ hua nuguanꞌ hua̱ hueꞌê huaj,
dadinꞌ gidiganj dàj gi̱nikaj chre̱j nej síi riki ꞌngo̱ yiꞌnïnꞌ dàj guyumân ruhuâ nej sôꞌ,
ni̱ gidiganj si daꞌhui nej sôꞌ ga̱huin nej sôꞌ sí ninaj doj ni̱ gidiganj dàj duguaꞌì nej sí danj nneè kú nej sôꞌ,
sani̱ nitaj si niꞌñanj nej nuguanꞌ nânj,
dadinꞌ dànanj duguꞌnïnꞌ nej sôꞌ giꞌhiaj nej sôꞌ doj gakï̱nꞌïn giꞌhia na̱nj ánj.