Daranꞌ diû ga̱ nìhiàꞌ ruhuâ nej suj niꞌin nej suj Ma̱ꞌan Señor
4
Huê danj ni̱ ꞌì ruhuâj niꞌín nej suj di̱nï̂nj,
ni̱ ûta huin ruhuâj niꞌín nej suj,
ni̱ huin nìhiàꞌ ruhuâj niꞌín nej suj ni̱ huin nej suj korona ga̱na̱huin ràꞌa,
ni̱ ga̱nikïnꞌ ran nej suj ngà Ma̱ꞌan Señor.
2 Gachín nìꞌhia riñan Evodia ngà riñan Síntique,
ni̱ si niꞌin nguèj ninj Ma̱ꞌan Señor ni̱ ga̱ nùguànꞌàn ruhuâ nguèj ninj.
3 Huê danj na̱nj gachín nìꞌhia riñanꞌ,
huînꞌ ꞌngo̱ sí ûta hueꞌê ginikaj duguiꞌ giꞌhiaj sun ngàj,
si gu̱ru̱gûñuꞌunj rukû nguèj siyànà nânj dadinꞌ ûta giꞌhiaj sun nguèj ninj ni̱ huê danj na̱nj giꞌhiaj sun Clemente ni̱ guruguñuꞌunj nej sij rukú ni̱ huê danj na̱nj guruguñuꞌunj aꞌngô nej dinï̂nt nga gananï̂n nej ñûnj nuguanꞌ gi̱ꞌhiaj ga̱na̱ni̱n nej guiì,
ni̱ gàꞌ tàj siyu̱gui daranꞌ nej sôꞌ riñan librû tàj siyu̱gui daranꞌ nej gui gàꞌ gananin.
4 Ga̱na̱huin nìhiàꞌ ruhuâ nej suj niꞌin nej suj Ma̱ꞌan Señor daranꞌ diû,
ni̱ gatâ aꞌngô ñûn:
Ni̱ ga̱na̱huin nìhiàꞌ ruhuâ nej suj.
5 Ni̱ gi̱ni̱ꞌin daranꞌ nej guiì si huin nej suj guiì sàꞌa.
Ni̱ gàꞌ gahuin nìchrùnꞌ Ma̱ꞌan Señor.
6 Si̱ ûta ga̱na̱huij ruhuâ nej suj mánj,
sa gi̱ꞌhiaj nej suj huin si daranꞌ sa hua̱ riñan nej suj ni̱ gànàtàꞌ nej suj gu̱nïn Ma̱ꞌan Señor ni̱ ûta àko gàchìnj nìꞌhiaj nej suj riñanj,
ni̱ huê danj na̱nj daranꞌ diû ni̱ gàꞌhuìꞌ nej suj si guruhuâ Ma̱ꞌan Ñaꞌanj an.
7 Huê danj ni̱ Ma̱ꞌan Ñaꞌanj an gi̱ꞌhiaj si ga̱ dïnꞌïnj ruhuâ nej suj,
dadinꞌ ûta nìko huaj gàꞌ daꞌ sa garânj daꞌngaꞌ ruhuâ nej suj ni̱ huê Ma̱ꞌan du̱gumîn nej suj,
ni̱ du̱guminj sa ganï̂n ruhuâ nej suj ni̱ Ma̱ꞌan Cristo huin sa gu̱ru̱gûñuꞌunj nej suj.
Du̱guꞌnïnꞌ nej suj gi̱ꞌhiaj nej suj sa sàꞌa
8 Do̱j ga̱na̱huij daranꞌanj gàtà,
gu̱nïn nej suj di̱nï̂nj,
ni̱ daranꞌ diû ga̱chru̱n ruhuâ nej suj niꞌin nej suj nuguanꞌ yàngàꞌa,
nuguanꞌ achij i,
sa nìkàa,
si̱ ganï̂n ruhuâ nej suj niꞌin nej suj gakï̱nꞌïn,
ga̱nï̱n ruhuâ nej suj niꞌin nej suj sa sàꞌa,
gi̱ꞌhiaj nej suj sa ràyìꞌì ga̱ꞌmi̱n hueꞌê nej guiì,
ni̱ si gaꞌmin hueꞌê nej guiì guendâ dagahuin nej suj daranꞌanj,
ni̱ si gaꞌmin hueꞌê ninj rayiꞌî sa giꞌhiaj nej suj,
ni̱ rayiꞌî nej dânj huin sa ga̱nï̱n ruhuâ nej suj.
9 Sa gahuin chru̱n nej suj ni̱ sa ganahuin ràꞌa nej suj ni̱ sa gunïn nej suj gaꞌmînj,
ni̱ huê danj da̱gahuin nej suj,
ni̱ Ma̱ꞌan Ñaꞌanj giꞌhiaj hua dïnꞌïnj ruhuâ nêꞌ ga̱ne ngà nej suj.
Ofrenda ganachinikaj nej Filipenses guendâ Pablo
10 Ûta ganahuin nìhiàꞌ ruhuâj ngà Ma̱ꞌan Señor rayiꞌî nej suj,
dadinꞌ gananun ruhuâ nej suj ni̱ guruguñuꞌunj nej suj ñùnj,
sani̱ sê si̱ gatâ si giniꞌñûn nej suj ñùnj mánj;
dadinꞌ àsìj xi ni̱ gàꞌ ga ruhuâ nej suj gu̱ru̱gûñuꞌunj nej suj ñùnj,
sani̱ nun ga̱ꞌhue gùyùmàn diû dânj mánj.
11 Ni̱ sê si̱ gata dànanj guendâ hua̱ sa gàchin riñânj mánj,
dadinꞌ gàꞌ gahuin chrùnj ga̱ nìhiàꞌ ruhuâj,
dàj na̱nj ranꞌ ma̱ꞌán.
12 Chrùnj gi̱ranꞌ àkô,
chrùnj ga̱ nìko xi rasu̱un riñânj;
chrùnj ga̱né dàj na̱nj hua ma̱ꞌan diû,
ga̱ꞌhue si gi̱ranꞌán yiꞌnaa,
nej si ga̱ꞌhue si nitaj nùnj ga̱chin riñânj.
13 Daranꞌanj ga̱ꞌhue gi̱ꞌhia dadinꞌ Ma̱ꞌan Cristo huin sa nagiꞌhiaj nùkuaj ñùnj.
14 Sani̱,
dùgùnàj giꞌhiaj nej suj dadinꞌ gaꞌnḯn nimân nej suj ni̱ gi̱ranꞌ sàñùn nej suj ngàj.
15 Ruhuâj si gi̱ni̱ꞌin nej suj dadinꞌ nga gahui gaꞌân ruhuâ yumanꞌ Macedonia,
ni̱ gaꞌanj gànàtàj nuguanꞌ gi̱ꞌhiaj ga̱na̱ni̱n nej guiì,
ni̱ nitaj aꞌngô nej nûhui guruguñuꞌunj ñùnj,
dadinꞌ màn nej suj huin si-nùhuì Ma̱ꞌan Jesús sa nne ruhuâ yumanꞌ snàꞌànj Filipo huin sa guruguñuꞌunj ñùnj.
16 Nga gané ruhuâ yumanꞌ snàꞌànj Tesalónica,
ni̱ ûta gàꞌì gaꞌnḯn nej suj guchiꞌ sanꞌanj riñânj guendâ gìrànj nej sa gàchin riñânj.
17 Sani̱ sê si̱ huin ruhuâj si ri̱ki̱ chre nej suj doj sanꞌanj an riñânj mánj,
sa ruhuâj huin si gu̱ru̱gûñuꞌunj nej suj aꞌngô nej guiì ni̱ ga̱huin nìko doj riñan si-guentâ nej suj neꞌ yàtàꞌa gi̱ꞌhiaj Ma̱ꞌan Ñaꞌanj an.
18 Sani̱ ûta nìko ganahuin ràꞌá,
ni̱ hua̱ na̱nj huaj riñânj;
ni̱ hua̱ na̱nj dugumîn nìkó sa ganahuin ràꞌá,
dadinꞌ narikî Epafrodito sa gaꞌnḯn nej suj gaꞌnaꞌ riñânj;
ni̱ nej sa rikî nej suj dânj huin dàj rûnꞌ huin datòꞌ gïnꞌ dàj a,
ni̱ huin dàj rûnꞌ huin yuku dagahuiꞌ nej sij riñan Ma̱ꞌan Ñaꞌanj an ni̱ garânj yinaj ni̱ ganahuin ra̱ꞌa,
ni̱ garanꞌ ruhuaj niꞌin sa gaꞌhuiꞌ nej suj riñânj.
19 Ma̱ꞌan Daꞌân,
huin sa ri̱ki̱ daranꞌ sa gàchin riñan nej suj dadinꞌ ûta nìko hua̱ yi̱ruꞌhue Ma̱ꞌan Cristo Jesús nne yàtàꞌa.
20 Ni̱ ga̱chi̱n ꞌngo̱ siêntu hioꞌo ni̱ ga̱chi̱n aꞌngô siêntu hioꞌo ni̱ nìgànj ga̱ꞌmi̱n hueꞌê daranꞌ nêꞌ riñan Ma̱ꞌan Ñaꞌanj huin Rej nêꞌ.
Ni̱ huê danj huin ruꞌhuaj.
Gaꞌnḯn sij nuguanꞌ ni̱ꞌña̱nj ganahuij riñan nej dinï̂nt
21 Gàꞌhuìꞌ nej suj nuguanꞌ ni̱ꞌña̱nj an riñan daranꞌ nej sôꞌ huin si-nùhuì Ma̱ꞌan Jesús.
Ni̱ nej dinï̂nt nne ngàj gaꞌnḯn ꞌngo̱ nuguanꞌan ni̱ꞌña̱nj an huaj riñan nej suj.
22 Ni̱ daranꞌ nej sôꞌ huin si-nùhuì Ma̱ꞌan Jesús gaꞌnḯn ꞌngo̱ nuguanꞌ ni̱ꞌña̱nj an huaj riñan nej suj,
ni̱ ña̱ꞌa̱n doj gaꞌnḯn nej sôꞌ giꞌhiaj sun dukuâ sí aꞌnïnꞌ gùꞌnàj César nuguanꞌ ni̱ꞌña̱nj an huaj riñan nej suj.
23 Si-su̱nu̱j Ma̱ꞌan Señor Jesucristo gùchìꞌ riñan daꞌ goꞌngo̱ nej suj.
Ni̱ huê danj huin rûꞌhuaj na̱nj ánj.