Ruhuâj gùchìj ñan gaꞌnḯn ñanj
3
Huê danj ni̱ ga̱na̱huin nìhiàꞌ ruhuâ nej suj niꞌin nej suj Ma̱ꞌan Señor,
na̱nj di̱nï̂nj:
Dadinꞌ ñùnj ni̱ nitaj si giriñun ruhuâj si ga̱chru̱n ñûn rayiꞌî nej nuguanꞌ gàꞌ gachrûn sìnï̀nj riñan nej suj,
ni̱ dànanj yìtï̀nj huaj si gu̱nïn nej suj aꞌngô ñûn.
2 Ga̱ gu̱dadû nej suj ngà nej sí ganinï̀nꞌ huaa dadinꞌ dàj rûnꞌ ga̱ninï̀nꞌ hua yuhue huê danj hua nej sôꞌ,
ga̱ gudadû nej suj ngà nej sí nitaj si giꞌhiaj sun hueꞌê riñan Ma̱ꞌan Ñaꞌanj an,
ni̱ ga̱ gu̱dadû nej suj ngà nej sí dunaꞌnga si gàꞌnèꞌ nej suj nnïnj arán raa̱ nneè nàꞌàj nej suj.
3 Dadinꞌ nej sí yàngàꞌ,
gaꞌneꞌ nnïnj arán raa̱ nneè nàꞌàj danj huin nêꞌ nnùn ña̱ꞌa̱nj riñan Ma̱ꞌan Ñaꞌanj an giꞌhiaj Ma̱ꞌan Espíritu,
ni̱ gaꞌmin hueꞌêꞌ rayiꞌî Ma̱ꞌan Cristo Jesús,
huê danj ni̱ nitaj si ganahuij ruhuôꞌ si gàꞌnèꞌ nej sij nnïnj arán raa̱ nneè nòꞌòꞌ.
4 Nùnj si ñùnj ni̱ ga ruhuâj ni̱ ganï̂n ruhuâj si ña̱ꞌa̱n huaj si gìyìꞌnèꞌ nnïnj arán raa̱ nneè nàꞌà diû nâ.
Ni̱ si hua̱ sí ûta huin ruhuâ si gìyìꞌnèꞌ raa̱ nneè nàꞌàj nej síi diû hia̱j,
sani̱ ñùnj ni̱ àsìj ni̱ ûta ga ruhuâj rayiꞌî nuguanꞌ nânj dadinꞌ ganï̂n ruhuâj si gi̱ꞌhia dànanj ni̱ ga̱na̱ni̱nj.
5 Dadinꞌ ñùnj ni̱ nga gisîj tï̱nj gui ni̱ gaꞌneꞌ nej sij nnïnj arán raa̱ nneè nàꞌà,
ni̱ nej Israelita huin nej duguiꞌí,
ni̱ gaꞌngâj riki yiꞌnïnꞌ ni̱ka̱j tun Benjamín,
ni̱ nânj hebreo gaꞌmînj,
ni̱ guendâ rayiꞌî ley,
ni̱ giꞌnï̂n riki yiꞌnïnꞌ nej fariseo;
6 ni̱ ûta ga ha̱i̱j ngà ley,
ni̱ rayiꞌî dan ni̱ ûta gata rùhuàj niꞌín nej sôꞌ nìkòꞌ rukû Ma̱ꞌan Jesús,
ni̱ guendâ rayiꞌî sa ni̱ka̱ gidigân ley,
ni̱ nda hueꞌê chre dagahuín.
7 Ni̱ gàꞌì nej rasu̱n nânj ni̱ gahuin sa duꞌhuee riñânj,
sani̱ hia̱j ni̱ rayiꞌî Ma̱ꞌan Jesús,
ni̱ gahuin ꞌngo̱ rasu̱n nitaj si niꞌñanj an riñânj.
8 Yàngàꞌ hia ni̱,
nitaj nùnj huin nej rasu̱n dânj riñânj,
dadinꞌ dànanj ûta du̱ꞌhue̱ guendâ giniꞌín Ma̱ꞌan Cristo,
huin Ma̱ꞌan si-Señoj,
ni̱ rayiꞌî Ma̱ꞌan ni̱ gudunâ daranꞌ nej dânj,
ni̱ dàj rûnꞌ huin akòo huin nej dânj riñânj,
guendâ ruhuâj gi̱ꞌhiaj ga̱nanj Ma̱ꞌan,
9 ni̱ gànàrìꞌìj gi̱nikaj duguiꞌí ngà Ma̱ꞌan Cristo,
sani̱ sê ngà sa ni̱ka̱ giꞌhia guendâ dagahuín sa taj ley mánj,
gaꞌhue giꞌhia sa ni̱ka̱a dadinꞌ guyumân ruhuâj niꞌín Ma̱ꞌan Cristo,
ni̱ sa ni̱ka̱ dânj huin sa garanꞌ ruhuâ Ma̱ꞌan Ñaꞌanj an guendâ guyumân ruhuâj.
10 Ni̱ ruhuâj gi̱ni̱ꞌín Ma̱ꞌan Cristo,
ni̱ ruhuâj gi̱ni̱ꞌín dàj nùkua dadinꞌ ganaꞌnï̂n siganï̂nj nej nîman,
ni̱ hua̱ ruhuâj gi̱ranꞌ sàñùnj dàj rûn giranꞌ sañunj,
ni̱ hua̱ ruhuâj gàhuìj dàj rûnꞌ gahuij,
11 ni̱ gànàꞌhuì si gi̱ꞌhia gànàꞌnï̀n siganï̂nj nej nîman.
Daꞌhuîꞌ gi̱ꞌhiaj guesôꞌ daꞌnga ni̱ gùchìꞌ ñan gaꞌnḯn ñunꞌ
12 Sani̱ sê si̱ gatâ si gàꞌ gunùkua giꞌhiaj ga̱nanj,
nej si gàꞌ huin sí nìkàa dadinꞌ hua̱ na̱nj ga̱chin gùyùmàn diû dânj riñânj;
sani̱ duguꞌnḯn hua neꞌ ñaan dadinꞌ huin ruhuâj gùnùkua,
dadinꞌ gàꞌ gananînj giꞌhiaj Ma̱ꞌan Jesús.
13 Di̱nï̂nj,
nun gàtà si gàꞌ gunukuâ gi̱ꞌhiaj gànanj mánj;
sani̱ sa giꞌhia huin:
Si giniꞌñûnj sa gunâj neꞌ rùkùu,
ni̱ giꞌhiaj guesâj guendâ gunùkua ga̱nikinꞌ ranj nda gui gàhuìj.
14 Huê danj ni̱ duguꞌnḯn hua neꞌ ña̱an nda gùchìj ñan daꞌhuí gùchìj,
ni̱ gùnùkua ga̱na̱huin ràꞌa ꞌngo̱ premiun na̱ri̱ki̱ Ma̱ꞌan Ñaꞌanj an riñânj gi̱ꞌhiaj Ma̱ꞌan Cristo Jesús.
15 Huê danj ni̱,
daranꞌ nêꞌ gàꞌ huin sí ni̱ka̱a,
ni̱ huê dànanj ga̱nï̱n ruhuâ nêꞌ,
ni̱ si hua̱ aꞌngô sa giꞌhiaj chij ruhuâ nej suj,
ni̱ Ma̱ꞌan Ñaꞌanj an ga̱na̱di̱gân riñan nej suj.
16 Ni̱ sa ña̱ꞌa̱n huin si,
gu̱ña̱n da̱gahuin nêꞌ ꞌngo̱ chrej sàꞌ ganahuin ràꞌa nêꞌ.
17 Di̱nï̂nj,
gi̱ꞌhiaj nej suj dàj rûnꞌ giꞌhia,
ni̱ gi̱ꞌhiaj nej suj dàj rûnꞌ giꞌhiaj aꞌngô nej sôꞌ aché ngà Ma̱ꞌan Jesús.
18 Dadinꞌ gàꞌ gatâ si nï̀nꞌ dânj gaché ûta gàꞌì nej sí,
ràyìꞌì ûta gàꞌì gununâj,
ni̱ hua̱ nï̀nꞌ gununâj rayiꞌî nej sôꞌ ni̱ nda dugueꞌé,
dadinꞌ huin nej sôꞌ sí nun ga̱ranꞌ ruhuâ gi̱ranꞌ sàñùn dàj rûnꞌ giranꞌ sàñùn Ma̱ꞌan Cristo.
19 Nga gàhuìꞌ nej sôꞌ ni̱ ga̱ꞌa̱nj ni̱ꞌhia nej sôꞌ,
dadinꞌ daꞌanj nej sôꞌ huin nej sa ûta huin ruhuâ nej sôꞌ ya̱ nej sô,
ni̱ ûta huin nej sôꞌ ruhuâ nej sôꞌ ni̱ sinàꞌàj daꞌhui nej sôꞌ gìrìꞌ nej sôꞌ rayiꞌî sa ganï̂n ruhuâ nej sôꞌ;
dadinꞌ man rayiꞌî nej sa màn riñan hioꞌó nânj ganï̂n ruhuâ nej sôꞌ.
20 Dadinꞌ yiñûnꞌ huin yàtàꞌa,
ñan gànàꞌhuìꞌ gànàrìꞌ duguiꞌ ngà Ma̱ꞌan sa gi̱ꞌhiaj ga̱na̱ni̱nꞌ,
ni̱ huej huin Ma̱ꞌan Señor Jesucristo;
21 ni̱ huê Ma̱ꞌan huin sa na̱gi̱ꞌhiaj nneè kuꞌ sa ninaj chre nânj,
ni̱ ga̱na̱huin hueꞌej dàj rûnꞌ hua hueꞌê nneè kú Ma̱ꞌan ni̱ na̱gi̱ꞌhiaj hueꞌej nneè kûꞌ dadinꞌ ûta nùkuaj Ma̱ꞌan ni̱ ga̱ꞌhue gi̱nikaj sunj riñan daranꞌ nej rasu̱un.