6
Ngà siyu̱gui Ma̱ꞌan Señor ni̱ da̱gahuin nej suj hua̱ lij dânj,
riñan rej nej suj ngà riñan nni nej suj;
dadinꞌ huê dânj huin sa ni̱ka̱a.
2 Sun giyiꞌnïnꞌ si̱nï̱n huin nânj:
“Ni̱ gi̱nikaj chre̱j riñan reꞌ ngà riñan nnîꞌ,
dadinꞌ nânj huin sun giyiꞌnïnꞌ si̱nï̱n giꞌhiaj Ma̱ꞌan Ñaꞌanj an ni̱ gata si hua̱ sa ri̱kij;
3 ni̱ si giꞌhiâꞌ dànanj ni̱ ga̱ꞌna̱ꞌ sa hua̱ hueꞌê riñan,
ni̱ ga̱ne nâꞌ riñan hioꞌóo.”
4 Nej suj hua̱ daꞌní,
ni̱ si̱ giꞌhiaj nej suj si gi̱na̱ꞌan ruhuâ nej daꞌní nej suj niꞌin nej sôꞌ nej suj mánj,
gi̱di̱gân nej suj si ga̱huin chru̱n nej sôꞌ gi̱ni̱kaj chre̱j nej sôꞌ riñan nej guiì ni̱ nàgàꞌhuìꞌ nej suj chrej sàꞌ garanꞌ ruhuâ Ma̱ꞌan Señor riñan nej daꞌní nej suj.
5 Nej suj ꞌnï̀nj giꞌhiaj sun chre dânj,
ni̱ ga̱da̱gahuin nej suj riñan si-yi̱ruꞌhue nej suj nne riñan hioꞌó nânj ni̱ gi̱nikaj chrej nej suj riñan nej sôꞌ ni̱ gi̱nun yuꞌhuiꞌ ruhuâ nej suj,
ni̱ ga ninaj ruhuâ nimân nej suj ngà nej sôꞌ,
ni̱ gi̱ꞌhiaj nej suj guenda si riñan Ma̱ꞌan Cristo gadagahuin nej suj;
6 ni̱ si man nga nikïnꞌ si-yi̱ruꞌhue nej suj giniꞌhiaj sôꞌ ni̱ giꞌhiaj nej suj si ûta giꞌhiaj sun nej suj,
dadinꞌ ruhuâ nej suj gùnàj hueꞌê nej suj ngà nej sôꞌ,
ni̱ gi̱ꞌhiaj sun nej suj ngà nda ruhuâ nimân nej suj ni̱ gi̱ꞌhiaj nej suj sa garanꞌ ruhuâ Ma̱ꞌan Ñaꞌanj an,
dadinꞌ dàj rûnꞌ huin si riñan Ma̱ꞌan Cristo huin giꞌhiaj sun nej suj;
7 nda nìhiàꞌ chre ga̱ ruhuâ nej suj ni̱ gu̱na̱nj gi̱tsi nej suj riñan nej sôꞌ ni̱ si̱ ganï̂n ruhuâ nej suj si riñan nej síi gunânj gi̱tsi nej suj dadinꞌ riñan Ma̱ꞌan Ñaꞌanj an gunânj gi̱tsi nej suj,
8 ni̱ si huin nej suj nej sí ꞌnï̱nj giꞌhiaj sun chre nej si hua̱ duꞌhue nej suj,
ni̱ daꞌhui nej suj gi̱ni̱ꞌin nej suj ni̱ gi̱ꞌhiaj nej suj sa sàꞌa,
ni̱ ga̱na̱huin ra̱ꞌa nej suj sa sàꞌaj gi̱ꞌhiaj Ma̱ꞌan Señor.
9 Ni̱ nej suj,
huin yiruꞌhue dânj,
ni̱ huê dânj gi̱ꞌhiaj nej suj ngà nej sí ꞌnï̱nj giꞌhiaj sun chre riñan nej suj,
ni̱ gu̱du̱nâj nej suj guendâ ga̱ta̱j nej suj si du̱guaꞌì nej suj doj nej sôꞌ,
dadinꞌ gàꞌ niꞌin nej suj si yàtàꞌa nne Ma̱ꞌan si-Seño nej suj ni̱ huêj huin Ma̱ꞌan si-Seño nej sôꞌ nej,
ni̱ gàꞌ niꞌin nej suj sisi̱ si̱ gahuin Ma̱ꞌan Señor ngà si ꞌngo̱ nej guiì mánj.
Nej sa rikî Ma̱ꞌan Ñaꞌanj an garrûnꞌ muꞌûnꞌ
10 Huê danj na̱nj nej suj,
di̱nï̂nj ma̱ꞌanj ngà siyu̱gui Ma̱ꞌan Señor ni̱ gàchìnj nej suj si na̱gi̱ꞌhiaj nùkuaj Ma̱ꞌan Señor nej suj,
ngà si-guesaj ni̱ ngà sa nùkuaj Ma̱ꞌan.
11 Garán nej suj ma̱ꞌan nej suj ngà daranꞌ nej rasu̱n girikî Ma̱ꞌan Ñaꞌanj an ga̱ra̱n sun nej suj,
daꞌnga ni̱ ga̱ꞌhue ga̱nikïnꞌ ran nej suj nga ganï̂n ruhuâ sa nàsàꞌa gi̱di̱gañuꞌunj nej suj.
12 Dadinꞌ sê ngà nej guiì gutôꞌ mánj,
gutôꞌ ngà sí huin ña̱an,
ni̱ gutôꞌ ngà sí nùkuaj,
ni̱ gutôꞌ ngà nej sí giꞌhiaj ga̱nan yumiguì ru̱mi̱nꞌ nânj,
ni̱ gutôꞌ ngà nej stâdu huin si-ꞌhiaj sa kï̱j hua màn riñan nanèe.
13 Rayiꞌî dan,
ni̱ gi̱daꞌa nej suj daranꞌ nej rasu̱n hua̱ yu̱gui giꞌhiaj Ma̱ꞌan Ñaꞌanj an guendâ ga̱ra̱n sun nej suj nga gùtàꞌ nej suj,
daꞌnga ni̱ gaꞌhue gùnùkuaj nej suj nga gùyùmàn gui aꞌnanꞌan ni̱ nga gisîj giꞌhiaj nej suj nej nânj ni̱ ga̱ yìtï̀nj ruhuâ nej suj.
14 Ga̱ yìtï̀nj ruhuâ nej suj,
ni̱ dàj rûnꞌ ꞌnïnj ran nnïnj ꞌnï̱nj gatï̀n stâdu huê danj du̱gumîn hueꞌê nej suj nuguanꞌ yàngàꞌa,
ni̱ garán nej suj ma̱ꞌan nej suj ngà atsîj agaꞌa nânj huin sa ni̱ka̱a daꞌhui nej suj gi̱ꞌhiaj nej suj,
15 ni̱ dàj rûnꞌ giꞌhiaj nej sí ganachrîj siganï̂nj dakó huê danj gi̱ꞌhiaj nej suj daranꞌ diû,
ni̱ ga̱ꞌmi̱n nej suj nuguanꞌ gi̱ꞌhiaj ga̱na̱ni̱n nej guiì ni̱ nuguanꞌ gi̱ꞌhiaj ga̱ dïnꞌïnj ruhuâ nej guiì ni̱ giꞌhiaj yu̱gui nej suj ma̱ꞌan nej suj.
16 Sa daꞌhui nej suj gi̱daꞌa nej suj ni̱ ga̱rán nej suj ma̱ꞌan nej suj huin si gùyùmàn yìtï̀nj ruhuâ nej suj,
daꞌnga ni̱ gaꞌhue gu̱du̱naꞌàj nej suj daranꞌ chrun stuneꞌ nnùn ñaꞌan gaꞌnḯn sí kï̱j huaa gaꞌnaꞌ riñan nej suj.
17 Dàj rûnꞌ gaꞌnḯn stâdu si-na̱hui a̱gaꞌ sôꞌ ahui sôꞌ huê danj daꞌhui nej suj ga̱ yìtï̀nj ruhuâ nej suj si gàꞌ gananin nej suj giꞌhiaj Ma̱ꞌan Ñaꞌanj an,
ni̱ si niꞌin nej suj si gàꞌ gananin nej suj huê danj ni̱ gi̱daꞌa nej suj si-yitî Ma̱ꞌan Espíritu ni̱ nânj huin si-nùguànꞌ Ma̱ꞌan Ñaꞌanj an;
18 sa ña̱ꞌa̱n doj gi̱ꞌhiaj nej suj huin si ga̱ꞌmi̱n nej suj ngà Ma̱ꞌan Ñaꞌanj an,
ni̱ gàchìnj nej suj,
ni̱ ga̱ꞌmi̱n nej suj daranꞌ diû dàj rûn gidigán Ma̱ꞌan Espíritu Santo ni̱ huê danj na̱nj du̱gumîn hueꞌê nej suj daranꞌ diû ni̱ du̱guꞌnïnꞌ nej suj ni̱ si̱ gininaj ruhuâ nej suj guendâ gàchìnj nìꞌhiaj nej suj riñan Maꞌan Ñaꞌanj an rayiꞌî daranꞌ nej sí gèe,
19 gi̱ꞌhiaj nej suj sunuj u ni̱ gàchìnj nìꞌhiaj nej suj rayiꞌí,
ni̱ nga naguchrá duꞌhuá ni̱ ri̱ki̱ Maꞌan Ñaꞌanj an nuguanꞌan ni̱ gìrìꞌ ruhuâj doj nga ga̱ꞌmi̱n,
daꞌnga ni̱ gidigán nuguanꞌ hua̱ huìi nuguanꞌ gi̱ꞌhiaj ga̱na̱ni̱n nej sí nàsìnùnj un,
20 rayiꞌî nej dânj ni̱ huín sí gi̱ni̱kaj nuguanꞌ ga̱ꞌa̱nj ni̱ anu̱mín ngà agaꞌ kadena ni̱ gìrìꞌ ruhuâj dàj ga̱ꞌmin rayiꞌî Ma̱ꞌan Señor,
dadinꞌ ûta ga̱chin si-nùguànꞌ Ma̱ꞌan Ñaꞌanj an riñânj dàj daꞌhuí ga̱ꞌmi̱n.
Gaꞌnḯn sij nuguanꞌ ni̱ꞌña̱nj ganahuij riñan nej dinï̂nt
21 Daranꞌ nej sun giꞌhiâ,
ni̱ gànàtàꞌ dinï̂nt Tíkiko sôꞌ ꞌì ruhuôꞌ riñan nej suj ni̱ gi̱ni̱ꞌin nej suj dàj huaj rayiꞌî,
ni̱ nùnj huin si giꞌhiâ,
ni̱ huin sôꞌ sí hueꞌê dagahuin ni̱ huin sôꞌ sí ganataꞌ si-nùguànꞌ Ma̱ꞌan Señor,
22 huê rayiꞌî nânj gaꞌnï̂n guchiꞌ sôꞌ riñan nej suj,
daꞌnga ni̱ gaꞌhue gi̱ni̱ꞌin nej suj rayiꞌî nej nûnj ni̱ na̱ri̱ki̱ sôꞌ chrej nùkuaj ruhuâ riñan nimân nej suj.
23 Ga̱ dïnꞌïnj ruhuâ nej suj huin dinï̂nt,
ni̱ gi̱nun sa ꞌì ruhuâ Ma̱ꞌan Ñaꞌanj an ruhuâ nimân nej suj ni̱ gi̱nun ñan nej suj Ma̱ꞌan Ñaꞌanj huin rej Ma̱ꞌan Señor Jesucristo.
24 Gi̱ꞌhiaj hueꞌê Ma̱ꞌan Ñaꞌanj an ngà daranꞌ nej guiì ꞌì ruhuâ niꞌin Ma̱ꞌan Señor ngà sa ꞌì ruhuaj nìgànj nï̀nꞌ.
Ni̱ huê danj huin na̱nj ánj.