Gi̱ꞌhiôꞌ dàj rûnꞌ giꞌhiaj nej guiì chru̱n ga̱ra̱n daꞌnga ruhuâ
5
Gi̱ꞌhiaj nej suj,
dàj rûnꞌ giꞌhiaj Ma̱ꞌan Ñaꞌanj an,
ni̱ gùrùguìꞌ si huin nej suj daꞌní Ma̱ꞌan ni̱ ûta ꞌì ga̱ ruhuaj niꞌin nej suj.
2 Ni̱ ga̱ ꞌì ruhuâ nej suj niꞌin nej suj nej duguiꞌ nej suj,
dàj rûnꞌ ꞌì ruhuâ Ma̱ꞌan Cristo niꞌin nej suj,
ni̱ gahuin ꞌngo̱ ofrenda ni̱ nagaꞌhuij Ma̱ꞌan rayiꞌî nej suj ni̱ gahuij riñan Ma̱ꞌan Ñaꞌanj an ni̱ huin datòꞌ gïnꞌ da̱j a riñan Ma̱ꞌan Ñaꞌanj an.
3 Ni̱ si̱ gaché sìgìchràꞌ nej suj ni̱ si̱ gaꞌmin nej suj nuguanꞌ kï̱j huaa ni̱ si̱ ganï̂n ruhuâ nej suj ga̱ doj rasu̱n du̱hue̱e riñan nej suj,
ni̱ si ga nej gakïn nânj siganï̂nj nej suj mánj,
ni̱ gi̱ꞌhiaj nej suj dàj rûnꞌ giꞌhiaj nej sí gèe;
4 ni̱ si̱ gaꞌmin nej suj nuguanꞌ dugu̱ꞌna huaa ni̱ nuguanꞌ laká chre ni̱ nuguanꞌ na̱hia,
dadinꞌ nitaj si dùgùnàj huaj mánj,
ga̱ꞌmi̱n nej suj nuguanꞌ sàꞌa yiꞌî Ma̱ꞌan Ñaꞌanj an.
5 Dadinꞌ ña̱ꞌa̱n huaj si gi̱ni̱ꞌin nej suj,
si gàꞌ si ꞌngo̱ nej guiì aché sìgìchràꞌ ni̱ nej guiì aꞌmin nuguanꞌ kï̱j huaa ni̱ nej guiì ruhuâ gaj doj riñan,
ni̱ huin ninj dàj rûnꞌ huin guiì nnùn ña̱ꞌa̱nj riñan nej ñaꞌanj giꞌhiaj ra̱ꞌa nej síi na̱nj ánj.
Ni̱ si̱ gaꞌhue gìrìꞌ nìꞌhiaj ninj ga̱ne ninj ñan nne Ma̱ꞌan Cristo ni̱ si̱ giriꞌ nìꞌhiaj ninj ga̱ne ninj ñan nne Ma̱ꞌan Ñaꞌanj an mánj.
6 Ni̱ gàꞌ si ꞌngo̱ nej suj si̱ gaꞌhue gi̱di̱gañuꞌunj ngà nuguanꞌ dugùꞌna hua;
dadinꞌ huê rayiꞌî nej nuguanꞌ nânj ni̱ gùyùmàn si-kastigû Ma̱ꞌan Ñaꞌanj an riñan nej guiì nitaj si dagahuin.
7 Ni̱ si̱ gi̱ꞌhiaj nej suj,
dàj rûnꞌ giꞌhiaj nej guiì dânj mánj.
8 Dadinꞌ aꞌngô diû ni̱ gahuin nej suj guiì giꞌhiaj gakï̱nꞌïn,
sani̱ hia̱j ni̱ huin nej suj guiì garânj daꞌngaꞌ ruhuâ dadinꞌ guyumân ruhuâ nej suj niꞌin nej suj Ma̱ꞌan Señor;
ni̱ ga̱che̱ nej suj dàj rûnꞌ gaché nej guiì huin daꞌní Ma̱ꞌan sa garânj daꞌngaꞌ ruhuâ na̱nj ánj,
9 dadinꞌ sa gùrùguìꞌ giꞌhiôꞌ giꞌhiaj Ma̱ꞌan Espíritu Santo huin si gurugûñuꞌunꞌ,
ni̱ giꞌhiôꞌ sa ni̱ka̱a ni̱ ga̱ꞌminꞌ nuguanꞌ yàngàꞌa,
10 na̱di̱giꞌñûn nej suj ahuin sa garanꞌ ruhuâ Ma̱ꞌan Señor gi̱ꞌhiaj nej suj na̱nj ánj.
11 Ni̱ si̱ gi̱ꞌhiaj nej suj dàj rûnꞌ giꞌhiaj nej guiì giꞌhiaj gakï̱nꞌïn mánj,
sa daꞌhui nej suj gi̱ꞌhiaj nej suj huin si du̱gunïn gàꞌì nej suj nej guiì giꞌhiaj gakï̱nꞌïn na̱nj ánj;
12 dadinꞌ giriꞌí sinàꞌàj a ga̱ꞌmi̱nꞌ rayiꞌî nej gakï̱nꞌ giꞌhiaj huì nej guiì dânj.
13 Sani̱ daranꞌ nej gakï̱nꞌ ꞌnï̱nj huì giꞌhiaj nej guiì ni̱ gùrùguìꞌ man gi̱ꞌhiaj sa yigï̀ïn,
dadinꞌ sa yigï̀n dânj giꞌhiaj gùrùguìꞌ daranꞌanj;
14 Rayiꞌî dan ni̱ gatâ:
Gànàꞌnï̀nj ñan sòꞌ,
dadinꞌ atojꞌ,
ni̱ ga̱na̱chîꞌ siganï̂nj nej nîman,
ni̱ gu̱du̱gun Ma̱ꞌan Cristo riñanꞌ ni̱ ga̱ꞌhue ga̱ra̱n daꞌngaꞌ ruhuâꞌ.
15 Niꞌhiaj sòꞌ dàj achêꞌ,
ni̱ ûta gu̱dadû gaꞌ,
ni̱ si̱ giꞌhiaj nej suj dàj rûnꞌ giꞌhiaj nej guiì naꞌhue ga̱ya̱ka̱j guendâ mánj,
gi̱ꞌhiaj nej suj dàj rûnꞌ giꞌhiaj nej guiì hueꞌê chru̱n,
16 ni̱ ga̱ra̱n sun hueꞌê nej suj diû,
dadinꞌ gui nnêꞌ ni̱ gui yìꞌìi huin.
17 Huê danj ni̱,
si̱ gahuin nej suj nej sí gi̱niꞌñûn nda nanè chre mánj,
sa gi̱ꞌhiaj nej suj huin si hio ga̱ra̱n daꞌnga ruhuâ nej suj ahuin sa garanꞌ ruhuâ Ma̱ꞌan Señor.
18 Ni̱ si̱ goꞌo nej suj nne berente,
dadinꞌ nga nagunï̂n nej suj ni̱ nun niꞌin daꞌnga nej suj sa giꞌhiaj nej suj,
ni̱ sa ginùn huin nej suj huin si gàchìnj nej suj ga̱ꞌna̱ꞌ Ma̱ꞌan Espíritu Santo ni̱ ga̱ne ruhuâ nimân nej suj ni̱ ga̱na̱huin nùkuaj nej suj gi̱ꞌhia,
19 ga̱hia̱ nej suj riñan nej duguiꞌ nej suj salmo ngà nej himno ni̱ ga̱chra̱ nej suj chraꞌ garanꞌ ruhuâ Ma̱ꞌan Ñaꞌanj an ngà ruhuâ nimân nej suj;
20 ni̱ daranꞌ diû gàꞌhuìꞌ nej suj siguruhuâ Ma̱ꞌan Ñaꞌanj huin Rej nêꞌ rayiꞌî daran nej rasu̱un,
ngà siyu̱gui Ma̱ꞌan si-Seño nêꞌ Jesucristo.
Da̱gahuin nej suj riñan ꞌngo̱ ni̱ aꞌngô nej duguiꞌ nej suj
21 Da̱gahuin nej suj riñan ꞌngo̱ ni̱ aꞌngô nej duguiꞌ nej suj ni̱ gi̱nikaj chre̱j nej suj riñan Ma̱ꞌan Ñaꞌanj an.
22 Nej siyànà nne nika ni̱ da̱gahuin ninj riñan nika ninj,
dàj rûnꞌ da̱gahuin ninj riñan Ma̱ꞌan Señor,
23 Dadinꞌ síi huin sa aꞌnïnꞌ riñan nej siyànàa,
dàj rûnꞌ nikaj su̱n Ma̱ꞌan Cristo riñan si-nùhuij,
Ma̱ꞌan gi̱ꞌhiaj ga̱na̱ni̱n nej guiì nìkòꞌ rukuj ni̱ huin ninj dàj rûnꞌ huin nneè kú Ma̱ꞌan.
24 Ni̱ dàj rûnꞌ dagahuin nej guiì huin si-nùhuì Ma̱ꞌan Jesús riñanj,
ni̱ huê danj daꞌhui siyànà nne nika ni̱ ga̱da̱gahuin riñan nikaj ngà daranꞌanj.
25 Nej suj sí nne nika ni̱ ga̱ ꞌì ruhuâ nej suj niꞌin nej suj nika nej suj,
dàj rûnꞌ ꞌì ruhuâ Ma̱ꞌan Cristo niꞌin nej guiì huin si-nùhuij ni̱ nagaꞌhuij Ma̱ꞌan rayiꞌî nej guiì huin si-nùhuij,
26 guendâ na̱gi̱ꞌhiaj gej,
ni̱ na̱gi̱ꞌhiaj sàꞌaj ni̱ ganaꞌnïnj ngà nnee ni̱ ngà nuguanꞌan nej guiì huin si-nùhuij,
27 gàꞌ hua̱ yu̱gui giꞌñanj ga̱ra̱n ràꞌa ngà si-nùhuij,
ni̱ daꞌhui nej guiì huin si-nùhuij ga̱ ninj dàj rûnꞌ hua gàtsì atsîj nitaj si hua̱ díin riñan ni̱ nitaj si ganachranꞌ riñan,
daꞌhui ga̱huin sa gèe ni̱ si̱ ga gakï̱nꞌïn riñanj.
28 Ni̱ huê danj na̱nj daꞌhui nej sí hua̱ nika ni̱ ga̱ ꞌì ruhuâ nej sôꞌ niꞌin nej sôꞌ nika nej sôꞌ,
dàj rûnꞌ ꞌì ruhuâ nej sôꞌ niꞌin nej sôꞌ nneè kú nej sôꞌ.
Ni̱ sí ꞌì ruhuâ niꞌin nika,
ni̱ ma̱ꞌan sôꞌ ꞌì ruhuâ sôꞌ;
29 dadinꞌ gàꞌ si ꞌngo̱ síi nitaj si gininj ꞌì nneè kú riñan,
ni̱ dàñùn guduyâ sôꞌ nneè kú sôꞌ ni̱ dugumîn sôꞌ nneè kú sôꞌ,
ni̱ giꞌhiaj sôꞌ dàj rûnꞌ giꞌhiaj Cristo ngà nej guiì huin si-nùhuij,
30 dadinꞌ huînꞌ nej yiꞌnïnꞌ hua̱ riñan nneè kú Ma̱ꞌan Cristo,
huînꞌ nneè kú Ma̱ꞌan.
31 “Rayiꞌî dânj,
ni̱ gu̱du̱nâj síi rej sôꞌ ngà nni sôꞌ ni̱ ga̱na̱huin nùguànꞌan sôꞌ ngà nika sôꞌ ni̱ ga̱huin nguèj sôꞌ dàj rûnꞌ huin ꞌngo̱ rïn guiì.”
32 Ûta nìko huì hua sa ganï̂n ruhuâ Ma̱ꞌan Ñaꞌanj an,
sani̱ ñùnj ni̱ gaꞌmînj rayiꞌî Ma̱ꞌan Cristo ngà rayiꞌî nej guiì huin si-nùhuij.
33 Huê danj ni̱,
daꞌ goꞌngo̱ nej suj ni̱ ga ꞌì ruhuâ nej suj niꞌin nej suj nika nej suj dàj rûnꞌ ì ruhuâ nej suj niꞌin nej suj ma̱ꞌan nej suj;
ni̱ gi̱nikaj chre̱j nej siyànàa riñan nika ninj.