Ma̱ꞌan Espíritu Santo gi̱ꞌhiaj ni̱ ga̱ꞌhue ga̱ gu̱ña̱n ruhuôꞌ
4
Ni̱ gané dukuâ gaꞌa giꞌhiaj nej sí ni̱ka̱j su̱un rayiꞌî Ma̱ꞌan Señor,
ni̱ dugunïn gàꞌìj nej suj,
ni̱ ga̱che̱ hueꞌê nej suj dàj rûnꞌ gahuin chru̱n nej suj giꞌhiaj Ma̱ꞌan Señor nga gakïn nej suj,
2 gi̱ꞌhiaj nej suj dàj rûnꞌ giꞌhiaj nej sílìj i,
ni̱ nìn gi̱ꞌhiaj nej suj,
ni̱ ga̱ nùkuaj ruhuâ nej suj ni̱ ga̱ ꞌì ruhuâ nej suj niꞌin nej suj daꞌ goꞌngo̱ nej duguiꞌ nej suj,
3 gachín ni̱ꞌhia si du̱guꞌnïnꞌ nej suj ni̱ gi̱ni̱kaj duguiꞌ nej suj ni̱ gu̱ru̱gûñuꞌunj Ma̱ꞌan Espíritu Santo nej suj ni̱ ga̱ nùguànꞌàn ruhuâ nej suj ni̱ ga̱ dïnꞌïnj ruhuâ nej suj ngà nej duguiꞌ nej suj;
4 dadinꞌ dàj rûnꞌ hua ngo̱ rïn nneè kúu ni̱ dàj rûnꞌ hua ꞌngo̱ rïn Ma̱ꞌan Espíritu Santo,
huê danj gakïn nej suj ni̱ gu̱ña̱n gànàꞌhuìj nej suj si ga̱na̱huin ra̱ꞌa Ma̱ꞌan Ñaꞌanj an nej suj;
5 ꞌngo̱ rïn Maꞌan Señor hua,
ni̱ ꞌngo̱ rïn huin sa guyumân ruhuôꞌ;
ni̱ dàj rûnꞌ gidiganj gàtàꞌ nneꞌ huê danj gataꞌ nneꞌ;
6 ni̱ ꞌngo̱ rïn Ma̱ꞌan Ñaꞌanj an hua ni̱ huej huin Rej darûnꞌ,
ni̱ huej huin sa ni̱ka̱j su̱n riñan darûnꞌ,
ni̱ giꞌhiaj sunj ngà darûnꞌ,
ni̱ nne ngà darûnꞌ.
7 Sani̱ rikî Ma̱ꞌan Ñaꞌanj an si-su̱nu riñan daꞌ goꞌngo̱ nêꞌ dàj rûnꞌ garanꞌ ruhuâ Ma̱ꞌan Cristo rikij suun riñunꞌ.
8 Rayiꞌî dan ni̱ gata:
Gahui Ma̱ꞌan Jesús gaꞌan yàtàꞌa,
ni̱ ginika gaꞌan nej guiì giꞌhiaj ga̱nanj,
ni̱ gaꞌhuij gàꞌì yìꞌnï̀nꞌ nej suun riñan nej guiì dânj.
9 Ni̱ nùnj huin si ga̱ta̱j nuguanꞌ “gahui gaꞌan dânj ràꞌaj.”
Sê gàꞌ si̱nï̱n ginin gaꞌan nda gùnùn riki hioꞌóo ràꞌ saj ûnꞌ.
10 Ma̱ꞌan sa gininj gaꞌanj dânj,
huê gè Ma̱ꞌan huin sa gahui gaꞌanj nda yichrá daranꞌ nej yàtàꞌa,
ni̱ nne nikaj sunj riñan nej sa màn yàtàꞌa ngà nej sa màn riñan hioꞌóo.
11 Ni̱ huê Ma̱ꞌan huin sa giꞌhiaj yu̱gui,
nej sí gaꞌanj gi̱digân si̱nï̱n si-nùguànꞌ Ma̱ꞌan Ñaꞌanj an;
ni̱ giꞌhiaj yu̱gui nej sí ganataꞌ dàj ga̱huin;
ni̱ giꞌhiaj yu̱gui nej sí ganataꞌ nuguanꞌ gi̱ꞌhiaj ga̱na̱ni̱n nej guiì;
ni̱ giꞌhiaj yu̱gui nej sí ganikïnꞌ dugumîn nej sôꞌ ginikòꞌ rukuj,
ni̱ giꞌhiaj yu̱gui nej sí gi̱digân,
12 ni̱ giꞌhiaj yu̱gui nej sí gèe guendâ gi̱ꞌhiaj sun nej sôꞌ si-sùnj,
guendâ na̱gi̱ꞌhiaj hueꞌej nneè kú Ma̱ꞌan Cristo,
13 nda gùchìꞌ darûnꞌ ga̱ gu̱ña̱n ruhuôꞌ ni̱ gu̱ña̱n gùyùmàn ruhuôꞌ,
ni̱ gi̱ni̱ꞌînꞌ nda hueꞌê chre dàj rûnꞌ niꞌin Ma̱ꞌan Cristo,
ni̱ gùchìꞌ ga̱huînꞌ dàj rûnꞌ huin ngo̱ sí giꞌhiaj sa ni̱ka̱a,
ni̱ gi̱ni̱ꞌinꞌ dàj rûnꞌ nìko niꞌin Ma̱ꞌan Cristo,
14 Daꞌnga ni̱ si̱ gi̱ꞌhiôꞌ dàj rûnꞌ giꞌhiaj nej silíj hua̱ lij dadinꞌ nda nanè chre nadunâ nej sôꞌ sa ganï̂n ruhuâ nej sôꞌ,
ni̱ hio ga̱na̱daꞌa nej sôꞌ nej yìꞌnï̀nꞌ nuguanꞌ nàkà gidigân nej sí gidigañuꞌunj un,
ni̱ gunùkuaj nej sí dânj gidigañuꞌunj nej sôꞌ nej sij dadinꞌ ûta sàꞌ mañân nej sôꞌ ni̱ sàꞌ chru̱n nej sôꞌ dàj gi̱di̱gañuꞌunj nej sôꞌ nuguanꞌ gi̱ꞌhiaj ga̱ꞌa̱nj ni̱ꞌhia nej sij,
15 sani̱ ga̱ꞌmi̱nꞌ nuguanꞌ yàngàꞌa ni̱ ga̱ ꞌì ruhuôꞌ niꞌînꞌ nej duguiꞌ,
ni̱ gu̱nꞌ riñan Ma̱ꞌan Cristo ni̱ ga̱chi̱ꞌ gi̱ꞌhia dadinꞌ huej huin sa ni̱ka̱j su̱n riñunꞌ,
16 ni̱ daꞌ hua̱ gè nneè kuꞌ,
ganakaj duguiꞌ ni̱ ni̱ka̱j duguiꞌ hueꞌej ni̱ ꞌnïn siganï̂nj nej duguiꞌij ni̱ gu̱ña̱n ganunj riñan daranꞌ ninj dàj na̱nj hua Ma̱ꞌan suun riñan daꞌ goꞌngo̱ ninj,
ni̱ huê danj gachij gu̱ña̱n nneè kuꞌ guendâ na̱gi̱ꞌhiaj nu̱kua ruhuâ nej ma̱ꞌan nej duguiꞌij ni̱ gu̱ña̱n ꞌì ruhuâ ninj niꞌin ninj nej duguiꞌ ninj.
Ma̱ꞌan Cristo giꞌhiaj ni̱ ganahuin nàkòꞌ
17 Huê danj,
ni̱ gatâ,
ni̱ duguta sùnj riñan nej suj ngà siyu̱gui Ma̱ꞌan Señor:
Ni̱ si̱ giꞌhiaj nej suj dàj rûnꞌ giꞌhiaj aꞌngô nej sí nàsìnùnj un dadinꞌ giꞌhiaj nej sôꞌ sa aꞌnanꞌ ganï̂n ruhuâ daꞌnga nej sôꞌ,
18 dadinꞌ gàꞌ ganahuin ru̱mi̱nꞌ daꞌnga nej sôꞌ,
ni̱ giꞌhiaj anêj nej sôꞌ ma̱ꞌan nej sôꞌ riñan nej sa garanꞌ ruhuâ Ma̱ꞌan Ñaꞌanj an da̱gahuin nej sôꞌ sani̱ nitaj nùnj niꞌin nej sôꞌ,
ni̱ gàꞌ ganahuin sìhiàj nimân nej sôꞌ,
19 nitaj nùnj nàꞌàj ñan nej sôꞌ,
ni̱ nngaj nej sôꞌ ngà ahuin na̱nj nej siyànà ni̱ ûta hio nej sôꞌ guendâ gi̱ꞌhiaj nej sôꞌ ahuin na̱nj gakï̱nꞌ.
20 Sani̱ nej suj ni̱ nun ga̱huin chru̱n nej suj dànanj giꞌhiaj Ma̱ꞌan Cristo mánj,
21 si yàngàꞌ hia gàꞌ gunïn nej suj,
ni̱ gàꞌ gidigân Ma̱ꞌan Jesús nej suj,
ngà sa yàngàꞌ hua riñan Ma̱ꞌan.
22 Nga gahuin nej suj sí nàsìnùnj un ni̱ giꞌhiaj nej suj gakï̱nꞌïn,
hia̱j ni̱ gu̱du̱nâj nej suj daranꞌ nej gakï̱nꞌ giꞌhiaj nej suj nga nï̀nꞌ gàchin gi̱ni̱ꞌin nej suj Ma̱ꞌan Cristo,
dadinꞌ gàꞌ guꞌñûn nej suj ngà nej gakï̱nꞌïn sani̱ man si gidigañuꞌunj un nej gakï̱nꞌ dânj na̱nj ánj,
23 ni̱ ganahuin nàkà nanè nimân nej suj ngà daꞌnga nej suj riñan Ma̱ꞌan Ñaꞌanj an,
24 ni̱ ga̱na̱huin nej suj guiì nàkàa,
ni̱ ga̱na̱ka̱j nej suj aꞌngô raa̱ nej suj dàj rûnꞌ garanꞌ ruhuâ Ma̱ꞌan Ñaꞌanj an ni̱ gi̱ꞌhiaj nej suj sa ni̱ka̱a ni̱ si̱ giꞌhiaj nej suj gakï̱nꞌïn ni̱ ga̱huin nej suj guiì ga̱ꞌmi̱n sa yàngàꞌa na̱nj ánj.
25 Rayiꞌî dan,
ni̱ gu̱du̱nâj nej suj nuguanꞌ gidigañuꞌunj un ni̱ ga̱ꞌmi̱n nej suj nuguanꞌ yàngàꞌa ngà daꞌ goꞌngo̱ nej duguiꞌ nej suj,
dadinꞌ ꞌngo̱ nneè kúu huin nej suj.
26 Si nàsìnùnj ginaꞌan ruhuâ nej suj,
niꞌhiaj nej suj ni̱ si̱ ginaꞌan nùgui ruhuâ nej suj,
dadinꞌ si ginaꞌan nùgui ruhuâ nej suj,
ni̱ gakï̱nꞌïn huin na̱nj ánj,
27 ni̱ si̱ gaꞌnï̂nj nej suj si gi̱ꞌhiaj ga̱nân sichre nej suj mánj.
28 Sí giꞌhiaj tu̱,
ni̱ si̱ giꞌhiaj tu̱ sôꞌ gàꞌ mánj,
ña̱ꞌan huaj si gi̱ꞌhiaj sun sôꞌ ngà raꞌa sôꞌ,
ni̱ gi̱ꞌhiaj sôꞌ sa sàꞌa,
daꞌnga ni̱ gaꞌhue gìrìꞌ sôꞌ sa gu̱ru̱gûñuꞌunj sôꞌ riñan nej guiì ga̱ni̱ki.
29 Gàꞌ si ꞌngo̱ nuguanꞌ kï̱j huaa si gahui ruhuâ duꞌhua nej suj mánj,
ga̱ꞌmi̱n nej suj nej nuguanꞌ na̱gi̱ꞌhiaj sàꞌ nej guiì,
daꞌnga ni̱ giꞌhiaj hueꞌej nej guiì gu̱nïn na̱nj ánj.
30 Ni̱ si̱ giꞌhiaj nej suj si ga̱na̱nï̱n ruhuâ Ma̱ꞌan Espíritu Santo huin siꞌhiaj Ma̱ꞌan Ñaꞌanj an,
dadinꞌ gàꞌ gachri daꞌngaꞌa ruhuâ nimân nej suj ni̱ ganahuin nej suj siꞌhia ni̱ nga gùyùmàn gui du̱naninj nej guiì ni̱ ga̱na̱ni̱n nej suj gi̱ꞌhia.
31 Gu̱xu̱n nej suj riñan nej suj,
daranꞌ sa naꞌan chre ruhuâ dan ngà sa gaꞌman ruhuâ dan ngà sa hue chre dan,
ni̱ si̱ gaguâj nej suj nej duguiꞌ nej suj ni̱ si̱ gaꞌmin yìꞌì nej suj riñan nej duguiꞌ nej suj ni̱ si̱ giꞌhiaj yiꞌì nej suj mánj.
32 Sa si̱nï̱n daꞌhui nej suj gi̱ꞌhiaj nej suj huin ni̱ ga̱ ni̱ꞌña̱nj nej suj ngà ꞌngo̱ ni̱ aꞌngô nej duguiꞌ nej suj,
ni̱ gu̱ru̱gûñuꞌunj nej suj ni̱ gi̱nikaj nej suj nimân nìko ngà nej duguiꞌ nej suj,
dàj rûnꞌ ginikaj Ma̱ꞌan Ñaꞌanj an nimân nìko rayiꞌî nej suj dadinꞌ gàꞌ naruꞌhue Cristo Ma̱ꞌan rayiꞌî si-ga̱kïnꞌ nej suj na̱nj ánj.