Guchruj su̱n Pablo riñan nej dinï̂nt
13
Huê nan huin gìsìj huàꞌnï̀nj gùchìj ñan màn nej suj.
Ni̱ daranꞌ nej nuguanꞌ gi̱ꞌhiaj hi̱ôꞌ rayiꞌî ꞌngo̱ guiì giꞌhiaj gakï̱nꞌïn ni̱ daꞌhui ga̱ huìj nej si huàꞌnï̀nj guiì giniꞌin yàngàꞌ sa gahuin.
2 Ni̱ gatâ rayiꞌî nej sí gàꞌ giꞌhiaj gakï̱nꞌïn,
ni̱ gatâ riñan daranꞌ nej suj ni̱ dàj rûnꞌ huin si nìkï̀nj ngà nej suj huin,
sani̱ nitaj si nìkï̀nj ngà nej suj sani̱ gachrûn ñún riñan nej sí gàꞌ giꞌhiaj gakï̱nꞌïn,
ni̱ huê danj na̱nj hua̱j nuguanꞌ nânj riñan nej suj,
ni̱ asàꞌ guchí ñan màn nej suj ni̱ si dànanj huaj siganï̂nj nej suj ni̱ si̱ ginikâ nimân nìko ngà sa giꞌhiaj nej suj mánj.
3 Sa ruhuâ nej suj gi̱ni̱ꞌin nej suj huin si yàngàꞌ hia ni̱ Ma̱ꞌan Cristo huin sa giꞌhiaj gaꞌmînj dànanj riñan nej suj.
Ni̱ Ma̱ꞌan Cristo ni̱ sê do̱j dànanj ga̱ꞌmin riñan nej suj mánj,
dadinꞌ dànanj ûta nùkuaj ga̱ꞌmin riñan nej suj gàꞌ na̱nj ánj.
4 Dadinꞌ yàngàꞌ ni̱ Ma̱ꞌan Cristo ni̱ huin ꞌngo̱ sí nitaj guesâ nga godokoꞌ nej sij riñan rugutsìi Ma̱ꞌan,
sani̱ ngà si-nùkuaj Ma̱ꞌan Ñaꞌanj an ni̱ nne nìꞌnaj.
Ni̱ huê danj na̱nj nej ñûnj ni̱ nitaj guesâ nej ñûnj,
sani̱ ñan ni̱ka̱j duguiꞌ nej ñûnj ngà Ma̱ꞌan Cristo ni̱ ganahuin nùkuaj nej ñûnj giꞌhiaj Ma̱ꞌan Ñaꞌanj an guendâ gu̱na̱nj gi̱tsi nej ñûnj riñan nej suj.
5 Na̱di̱giꞌñûn nej suj ma̱ꞌan nej suj si yàngàꞌ hia guyumân ruhuâ nej suj niꞌin nej suj Ma̱ꞌan Ñaꞌanj an;
ni̱ ga̱na̱ka̱j guendâ nej suj dàj hua nej ma̱ꞌan nej suj.
Ni̱ nun niꞌin nej suj dàj hua nej ma̱ꞌan nej suj ni̱ nun niꞌin nej suj si nne Ma̱ꞌan Cristo ruhuâ nimân nej suj ràꞌ saj ûn.
Ni̱ si nun niꞌin nej suj ni̱ ruhuaj ga̱ta si nitaj Ma̱ꞌan Cristo nne ruhuâ nimân nej suj mánj.
6 Gànàꞌhuì si gi̱ni̱ꞌin nej suj si nun gi̱rë̱ꞌ nej ñûnj dadinꞌ nne Ma̱ꞌan Cristo ruhuâ nimân nej ñûnj.
7 Ni̱ gachín nìꞌhiaj nej ñûnj riñan Ma̱ꞌan Ñaꞌanj an si gu̱ru̱gûñuꞌun ni̱ si̱ giꞌhiaj nej suj gàꞌ si ꞌngo̱ sa aꞌnanꞌan,
ni̱ sê si̱ huin ruhuâ nej ñûnj si ga̱ta̱j nej suj si huin nej ñûnj sí gàꞌ gunukuaj dunahuij si-su̱n,
sa ruhuâ nej ñûnj huin si nej suj ni̱ ga̱huin chru̱n nej suj gi̱ꞌhiaj nej suj sa sàꞌa,
ni̱ nùnj huin si dàj rûnꞌ giꞌhiaj sí girëꞌ giꞌhiaj nej ñûnj sani̱ ga̱ꞌhue gùnùkuaj nej ñûnj du̱nahuij nej ñûnj si-su̱n nej ñûnj.
8 Dadinꞌ nej ñûnj ni̱ si̱ gaꞌhue gu̱nï̱nꞌ nej ñûnj ngà nuguanꞌ yàngàꞌa ni̱ sa giꞌhiaj nej ñûnj huin si du̱naꞌhuej nej ñûnj rayiꞌî nuguanꞌ yàngàꞌa.
9 Ni̱ rayiꞌî dan ni̱ gahuin nìhiàꞌ ruhuâ nej ñûnj si gahuin nej ñûnj sí nitaj guesâ nìko,
ni̱ dànanj garanꞌ ruhuâ nej ñûnj si ganahuin nùkuaj nej suj;
ni̱ hua̱ na̱nj gachín nìꞌhiaj nej ñùnj rayiꞌî nej suj si hueꞌê na̱gi̱ꞌhiaj ni̱ka̱ nej suj ma̱ꞌan nej suj riñan Ma̱ꞌan Ñaꞌanj an.
10 Nga nï̀nꞌ gàchin gùchìj ñan màn nej suj ni̱ gachrûnj ñanj karta nan hua riñan nej suj,
ni̱ nga gùchìj ñan màn nej suj ni̱ si̱ garânj sûnj nuguanꞌ nùkuaj nga gàꞌmìn,
sani̱ si ruhuâj ni̱ ga̱ꞌhue gàꞌmìn nuguanꞌ nùkuaj riñan nej suj dadinꞌ ni̱ka̱j sùnj riñan nej suj giꞌhiaj Ma̱ꞌan Señor guendâ na̱gi̱ꞌhiaj nùkua ruhuâ nej suj,
ni̱ sê si̱ riki Ma̱ꞌan Señor suun riñânj guendâ gi̱ꞌhia si ga̱ꞌa̱nj ni̱ꞌhia nej suj mánj.
Gaꞌnḯn sij nuguanꞌ ni̱ꞌña̱nj ganahuij ni̱ gaꞌmin hueꞌê sij riñan nej dinï̂nt
11 Du̱naꞌhuí nuguanꞌ ga̱ta̱ gu̱nïn nej suj na̱nj di̱nï̂nj,
ga̱ nìhiàꞌ ruhuâ nej suj,
ni̱ na̱gi̱ꞌhiaj ni̱ka̱ nej suj ma̱ꞌan nej suj,
nàgàꞌhuìꞌ nej suj nuguanꞌ nùkuaj rûhua riñan nej duguiꞌ nej suj,
ni̱ gu̱ña̱n ga̱nï̱n ruhuâ nej suj;
ni̱ ga̱ dïnꞌïnj gimàn nej suj ngà nej duguiꞌ nej suj,
ni̱ Ma̱ꞌan Ñaꞌanj an gi̱ꞌhiaj hua dïnꞌïnj ni̱ Ma̱ꞌan Ñaꞌanj hua̱ ꞌì ruhuâ niꞌin nêꞌ ga̱ne ngà nej suj.
12 Ni̱ ga̱ꞌmi̱n nej suj nuguanꞌ ni̱ꞌñanj an ngà ꞌngo̱ ni̱ aꞌngô nej duguiꞌ nej suj ni̱ gi̱daꞌa nej suj raꞌa ꞌngo̱ ni̱ aꞌngô nej duguiꞌ nej suj.
13 Ni̱ gaꞌnḯn daranꞌ nej dinï̂nt nìkòꞌ rukû Ma̱ꞌan Cristo ꞌngo̱ nuguanꞌ ni̱ꞌñanj an huaj riñan nej suj.
14 Si-su̱nu̱j Ma̱ꞌan Señor Jesús,
ni̱ sa ꞌì ruhuâ Ma̱ꞌan Ñaꞌanj an,
ni̱ Ma̱ꞌan Espíritu Santo ga̱ne ni̱ gi̱nikaj duguiꞌij ngà daranꞌ nej suj.
Ni̱ huê danj huin na̱nj ánj.