Sa ganï̂n Ma̱ꞌan Ñaꞌanj an riñan Pablo
12
Nitaj si dùgùnàj huaj si ga̱ꞌmi̱n hueꞌé rayiꞌí ma̱ꞌán mánj;
sani̱ gànàtàj rayiꞌî sa ganï̂n ma̱ꞌan Ñaꞌanj an riñânj ni̱ rayiꞌî sa gi̱ni̱ꞌín giꞌhiaj Ma̱ꞌan Ñaꞌanj an.
2 Niꞌín ꞌngo̱ sí nìkòꞌ rukû Ma̱ꞌan Cristo,
ni̱ gàꞌ gachín yìgànꞌanj hioꞌo gahuin nga guxun Ma̱ꞌan Ñaꞌanj an gaꞌanj sôꞌ nda ñan hua̱ huàꞌnï̀nj yàtàꞌa,
ni̱ si gaꞌanj sôꞌ hiuj dânj ngà nneè kú sòꞌ nîꞌ.
Ni̱ dàj huaj sani̱ nun niꞌín mánj,
ni̱ si gaꞌanj sôꞌ man ngà nanè nimân sôꞌ hiuj dânj nîꞌ.
Ni̱ dàj huaj sani̱ nun niꞌín mánj;
ꞌngo̱ rïn Ma̱ꞌan Ñaꞌanj an huin sa niꞌin na̱nj ánj.
3 Niꞌín sí dânj sani̱ nun niꞌín si gaꞌanj sôꞌ ngà nneè kú sôꞌ,
nej si man nanè nimân sôꞌ gaꞌanj nîꞌ dàj huaj mánj;
ꞌngo̱ rïn Ma̱ꞌan Ñaꞌanj an huin sa niꞌin na̱nj ánj.
4 Ni̱ ginikaj Ma̱ꞌan Ñaꞌanj an gaꞌanj sôꞌ yumanꞌ ña̱ꞌa̱nj,
ni̱ gunïn sôꞌ nuguanꞌ si̱ girîꞌ gànàtòꞌ mánj,
nuguanꞌ si̱ gaꞌhue gànàrìꞌ síi dàj gànàtàꞌ sôꞌ mánj.
5 Rayiꞌî sí danj huin si ga̱ꞌmi̱n hueꞌê;
sani̱ si̱ gaꞌhue ga̱ꞌmi̱n hueꞌé rayiꞌî ma̱ꞌán mánj,
sa gàtà huin si huín sí ninaj doj.
6 Sani̱ si ruhuâj ga̱ꞌmi̱n hueꞌé,
rayiꞌî ma̱ꞌán ni̱ sê man si gaꞌmînj guendâ nitaj si chrùnj ga̱na̱ka̱j guendâj dàj giꞌhia mánj,
dadinꞌ nuguanꞌ yàngàꞌa huin sa ga̱ꞌmi̱n;
sani̱ si̱ gaꞌmînj nej gàꞌ mánj,
daꞌnga ni̱ si̱ gi̱ꞌhia si ga̱nï̱n ruhuâ aꞌngô nej sôꞌ si ûta gahuín doj àsìj nâ,
gàꞌ daꞌ sa giꞌhia hia̱j,
ni̱ dàj gunïn aꞌngô nej guiì rayiꞌí.
7 Daꞌnga ni̱ sê rayiꞌî sa nìko gidigân Ma̱ꞌan Ñaꞌanj an riñânj gi̱ꞌhiaj si ga̱na̱chi nika maꞌán ni̱ ga̱nï̱n ruhuâj si huín ꞌngo̱ sí nìko xi,
ni̱ dàj rûnꞌ giꞌhiaj tanj an nga gaꞌan nneè ku huê danj ûta giranꞌ sàñùnj,
dadinꞌ garaꞌhui ꞌngo̱ si-musû sichre yiꞌnḯn riñânj;
daꞌnga ni̱ si̱ ganï̂n ruhuâj si ûta huín doj;
8 ni̱ gàꞌ gisîj huàꞌnï̀nj gachín nìꞌhia riñan Ma̱ꞌan Señor si ga̱ꞌne sañun dânj riñânj.
9 Ni̱ gata gu̱nḯn:
Ga̱ nùkuaj ruhuâꞌ dadinꞌ ûta nìko sunuj u ri̱kij riñanꞌ,
dadinꞌ nga gininaj ruhuâꞌ ni̱ dànanj nìko gìrìkìj si-guesâj riñanꞌ,
huê rayiꞌî dan ni̱ dànanj ga̱ꞌmi̱n hueꞌé rayiꞌî ma̱ꞌán nga nitaj guesâ riñânj,
daꞌnga ni̱ gùyùmàn si-guesâ Ma̱ꞌan Cristo riñânj.
10 Rayiꞌî dan,
ni̱ guendâ ꞌì ruhuâj niꞌín Ma̱ꞌan Cristo ni̱ dànanj ganahuin nìhiàꞌ ruhuâj nga ꞌhia si ga̱na̱huij si guesâj,
ni̱ huin nìhiàꞌ ruhuâj nga ranꞌ nej guiì ñùnj,
nga hua sa ga̱chin riñânj,
nga gata ra̱ꞌa nej sij ñùnj;
nga ûta huin ruhuâj;
dadin nga ꞌhia si nitaj guesâ riñânj ni̱ dànanj ûta ganahuin nùkua giꞌhiaj Ma̱ꞌan Ñaꞌanj an.
Ûta huin ruhuâ Pablo niꞌin sôꞌ nej dinï̂nt nne ruhuâ yumanꞌ snàꞌànj Corinto
11 Gaꞌmînj dàj rûnꞌ gaꞌmin ꞌngo̱ sí naꞌhue ga̱ya̱ka̱j guendâ rayiꞌî guendâ gaꞌmin hueꞌé rayiꞌî ma̱ꞌán;
ni̱ nej suj giꞌhiaj guesâ si gàꞌmìn dànanj,
nej suj daꞌhui ga̱ꞌmi̱n hueꞌê rayiꞌí;
dadinꞌ sê si̱ huín sí ninaj doj gàꞌ daꞌ nej sí gataj si huin nej sôꞌ sí gaꞌanj gi̱di̱gân si̱nï̱n,
nùnj huin si huín sí ninaj chre.
12 Ni̱ dàj rûnꞌ ga daranꞌ sa giꞌhiaj ꞌngo̱ sí gaꞌanj gi̱di̱gân si̱nï̱n,
huê danj ga nej sa giꞌhia giniꞌin nej suj ni̱ ganahuin nej guiì giꞌhiâ siganï̂nj nej suj ni̱ ûta nùkuaj ga ruhuâj,
ni̱ ga nej daꞌngaꞌa giꞌhiâ,
ni̱ gahuin ña̱ꞌanj ruhuâ nej suj rayiꞌî nej sa giꞌhia dadinꞌ ganahuin nej guiì orâ chre giꞌhia siganï̂nj nej suj.
13 Gi̱nikaj nej suj nimân nìko rayiꞌí si giꞌhia si ginaꞌan ruhuâ nej suj,
sani̱ man ꞌngo̱ rïn sa giꞌhia ngà nej suj huin si gunâj rùkù nej suj riñan aꞌngô nej dinï̂nt huin si-nùhuì Ma̱ꞌan Jesús,
rayiꞌî guendâ nun gàchìn si gu̱ru̱gûñuꞌunj nej suj ñùnj.
Gataj Pablo si ga̱ꞌa̱nj gi̱ni̱ꞌhiaj sôꞌ dukuán huàꞌnï̀nj ñan màn nej dinï̂nt
14 Hia̱j ruꞌhuaj,
ni̱ gàꞌ hua yuguí guendâ gùchìj dukuán huàꞌnï̀nj ïn ñan màn nej suj;
sani̱ si̱ giꞌhia si gùtï̀nꞌ staꞌu nej suj,
dadinꞌ nitaj si gaꞌnḯn ñanj siꞌhiaj nej suj mánj,
ngà nej suj huin ruhuaj gàꞌmìn,
dadinꞌ sê daꞌní sí dânj huin sa gàꞌhuìꞌ sanꞌanj an riñan sôꞌ mánj,
ma̱ꞌan sôꞌ huin si daꞌhui gàꞌhuìꞌ sanꞌanj an riñan daꞌní sôꞌ.
15 Ni̱ rayiꞌî dan ni̱ dànanj nìhiàꞌ hua ruhuâj gùtï̀nj si-sànꞌàn rayiꞌî nej suj,
ni̱ huê danj na̱nj nitaj si ga̱huin si ga̱ra̱n sûnj doj si-guesâj rayiꞌî nej suj dadinꞌ ꞌì ruhuâj niꞌín ma̱ꞌan nimân nej suj.
Nùnj huin si do̱j hua ꞌì ruhuâ nej suj niꞌin nej suj ñùnj.
16 Sani̱ niꞌín si ga̱ ruhuâ nej suj rayiꞌî sa gatâ,
dadinꞌ nun gùtï̀nꞌ nej suj si-sànꞌànj nej suj giꞌhiâ.
Sani̱ hua̱ da̱ꞌa̱j nej sôꞌ taj,
si ûta sàꞌ chrùnj dàj giꞌhia rayiꞌî dan ni̱ gininj nej suj yinùu giꞌhia gataj nej sôꞌ,
17 nga gaꞌnï̂n guchiꞌ gi̱ni̱ꞌhiaj aꞌngô nej sôꞌ ñan màn nej suj ni̱ giꞌhia si gi̱di̱gañuꞌunj nej sôꞌ ni̱ gaꞌnêj nej sôꞌ si-sànꞌànj nej suj na̱nj nînꞌ.
18 Ni̱ gachín nìꞌhia riñan Tito si gùchìꞌ gi̱ni̱ꞌhiaj sôꞌ ñan màn nej suj,
ni̱ gaꞌnï̂n guchiꞌ aꞌngô dinï̂nt ngà sôꞌ.
Ni̱ gaꞌnêj ya̱ꞌ Tito sanꞌanj an riñan nej suj na̱nj nînꞌ.
Ni̱ sê gu̱ña̱n giꞌhiaj sun nguèj ñùnj ràꞌ saj ûnꞌ.
Ni̱ gu̱ña̱n ganï̂n ruhuâ nguèj ñûnj ràꞌ saj ûnꞌ.
19 Ganï̂n ruhuâ nej suj si ga̱na̱chi̱nꞌ nej ñûnj nimân nìko rayiꞌî nej ñûnj nînꞌ.
Sani̱ giniꞌin Ma̱ꞌan Cristo sa gaꞌmin nej ñûnj;
sani̱ daranꞌ nej nuguanꞌ gaꞌmin nej ñûnj ni̱ gaꞌmin nej guendâ ga̱na̱huin nùkuaj ruhuâ nej suj na̱nj ánj.
20 Yuꞌhuí dadinꞌ si nga gùchìj ñan màn nej suj,
ni̱ gànàrìꞌìj si ni̱nï̱n nï̀nꞌ ꞌhiaj nej suj mân nej suj,
ni̱ si̱ garanꞌ ruhuâ nej suj sa gàꞌmìn dadinꞌ man si garán nej suj riñan nej duguiꞌ nej suj,
gahuin yìkòj ruhuâ nej suj,
man si ginaꞌan ruhuâ nej suj,
man si guchraꞌ da̱ꞌa̱j nej suj nej duguiꞌ nej suj,
ni̱ gaꞌmin yìꞌì nej suj riñan nej duguiꞌ nej suj,
gaꞌmin nej suj rayiꞌî nej duguiꞌ nej suj,
ni̱ ûta huin nej suj ruhuâ nej suj,
ûta aguâj nej suj nej duguiꞌ nej suj;
21 ni̱ nga nànìkàj ñún gùchìj ñan màn nej suj ni̱ ûta gìrìꞌìj sinàꞌàj a rayiꞌî gakï̱nꞌ giꞌhiaj da̱ꞌa̱j nej suj,
ga̱huin ni̱ nda du̱gueꞌé rayiꞌî nej sôꞌ giꞌhiaj gakï̱nꞌïn siganï̂nj nej suj,
dadinꞌ nun gànànìkàj ruhuâ nej sôꞌ rayiꞌî nej sa kï̱j giꞌhiaj nej sôꞌ,
ni̱ rayiꞌî guendâ gaché sìgìchràꞌ nej sôꞌ ni̱ ûta gahuin ruhuâ nej sôꞌ nngaj nej sôꞌ ngà ahuin na̱nj nej siyànàa.