Guchruj su̱n Pablo rayiꞌî nej apóstol gidigañuꞌunj un
11
Gà nùkuaj ruhuâ nej suj dadinꞌ gaꞌmin sinún yàngàj do̱j, sani̱ ga̱ nùkuaj ruhuâ nej suj.
2 Ma̱ꞌan Ñaꞌanj an giꞌhiaj si ûta gahuin ruhuâj niꞌín nej suj; ni̱ giꞌhia si gàꞌ ga yugui nej suj dàj rûnꞌ hua yùgui siyànà ña̱n ga̱ya̱ka̱j nika, ni̱ Ma̱ꞌan Cristo gàhuin nika nej suj.
3 Yuꞌhuí dadinꞌ dàj rûnꞌ ûta sàꞌ mañân yukuáa nga gidigaꞌunj xuj Eva, ni̱ huê danj ga̱ꞌhue gi̱di̱gañuꞌunj nej sí dânj nej suj ni̱ si̱ dagahuin nej suj riñan Ma̱ꞌan Cristo gi̱ꞌhiaj nej sôꞌ mánj.
4 Dadinꞌ si ꞌna̱ꞌ aꞌngô sí ni̱nï̱n gidigân ni̱ nitaj si gidigân sôꞌ dàj rûnꞌ gidigân Ma̱ꞌan Jesús ni̱ ganahuin ràꞌa nej suj sí dânj, nej si ganahuin ràꞌa nej suj aꞌngô espíritu, ni̱ si ganahuin ràꞌa nej suj aꞌngô nuguanꞌ ni̱nï̱n hua gàꞌ daꞌ nuguanꞌ giꞌhiaj ga̱na̱ni̱n nej suj, ni̱ ga̱ nùkuaj ruhuâ nej suj ngà nej sôꞌ.
5 Dadinꞌ sê si̱ huín sí ninaj doj gàꞌ daꞌ nej sôꞌ mánj, nej sí guchiꞌ gi̱di̱gân neꞌ rùkù doj riñan nej suj, dadinꞌ ganï̂n ruhuâ nej sôꞌ si huin nej sôꞌ sí gaꞌanj gi̱di̱gân si̱nï̱n ni̱ ûta huin nej sôꞌ ruhuâ nej sôꞌ.
6 Nùnj huin si ñùnj ni̱ ûta nùkuaj hua nuguanꞌ gaꞌmînj riñan nej suj, sani̱ niꞌín ahuin ràyìꞌì gaꞌmînj, ni̱ huê danj gidigán daꞌ gaꞌmînj riñan nej suj.
7 Aꞌnanꞌ giꞌhia nga gaꞌmin chré si-nùguànꞌ Ma̱ꞌan Ñaꞌanj an riñan nej suj, ni̱ giꞌhia si gahuín sí ninaj doj siganï̂nj nej suj ni̱ nun gàꞌnè duꞌhuêj riñan nej suj na̱nj nîꞌ.
8 Gaꞌnê si-sànꞌànj nej dinï̂nt huin si-nùhuì Ma̱ꞌan Jesús nne aꞌngô lugâ, dadinꞌ garânj yinaj si gu̱ruꞌhue nej sôꞌ duꞌhuej rayiꞌî dan ni̱ giriꞌí gunânj gi̱tsí riñan nej suj na̱nj ánj.
9 Ni̱ nga gané siganï̂nj nej suj, ni̱ hua̱ sa gachin riñânj, sani̱ nun ga̱chra sùnj riñan gàꞌ si ꞌngo̱ nej suj mánj, dadinꞌ sa gachin riñânj, ni̱ guruguñuꞌunj nej dinï̂nt gaꞌnaꞌ riñan hioꞌó Macedonia, ni̱ ga gu̱dadûj ngà ma̱ꞌán, ni̱ hua̱ hia ni̱ nun ga̱chra sùnj riñan nej suj.
10 Hua̱ yï̀tï̀nj ruhuâj dadinꞌ yàngàꞌ hia ni̱ niꞌín sa yàngàꞌa rayiꞌî Ma̱ꞌan Cristo, ni̱ gàꞌ si ꞌngo̱ nej guiì si̱ ga̱ꞌhue ga̱ꞌne̱ si gi̱nikaj chrej nej dinï̂nt rayiꞌí gaꞌanj nï̀nꞌ gàchràꞌ riñan hioꞌó Acaya mánj.
11 Nùnj huin saj ni̱ gaꞌmînj dànanj ràꞌaj. Gaꞌmînj guendâ nitaj si ꞌì ruhuâj niꞌín nej suj nîꞌ. Ñaꞌanj an niꞌin si ꞌì ruhuâj niꞌín nej suj.
12 Sani̱ du̱guꞌnḯn gi̱ꞌhia dàj rûnꞌ giꞌhia ni̱ si̱ gaꞌnê sanꞌanj an riñan nej suj, daꞌnga ni̱ si̱ gaꞌnï̂n si gìrìꞌ nej sí dânj gu̱ru̱ꞌman yiꞌî nej sôꞌ ni̱ ga̱ta̱j nej sôꞌ si ûta huin nej sôꞌ, ni̱ gidigân nej sôꞌ si-nùguànꞌ Ma̱ꞌan Ñaꞌanj an dàj rûnꞌ gidigân nej ñûnj nej na̱nj ánj.
13 Dadinꞌ taj nej sôꞌ si huin nej sôꞌ si-musû Ma̱ꞌan Cristo, dadinꞌ gidigân nej sôꞌ si-nùguànꞌ Ma̱ꞌan Ñaꞌanj an sani̱ huin nej sôꞌ sí gidigañuꞌunj un.
14 Ni̱ sê sa ga̱huin ña̱ꞌanj ruhuôꞌ huin, dadinꞌ sichre ni̱ giꞌhia si huin dàj rûnꞌ huin ꞌngo̱ ángel nda yigï̀n chre hua.
15 Huê danj ni̱, si̱ guruguiꞌ chìꞌ ruhuôꞌ si nej sí gunânj gi̱tsi riñan sichre ni̱ giꞌhiaj nej sôꞌ dàj rûnꞌ giꞌhiaj nej sí gunânj gi̱tsi riñan Ma̱ꞌan Ñaꞌanj an; sani̱ neꞌ rùkù ni̱ gùrùguìꞌ si huin nej sôꞌ sí gidigañuꞌunj un.
Dàj rûnꞌ giranꞌ sa̱ñu̱n nej apóstol nìkòꞌ rukû Ma̱ꞌan Jesús huê danj giranꞌ sa̱ñu̱n Pablo
16 Aꞌngô ñûn gatâ: Ni̱ gàꞌ si ꞌngo̱ nej suj si̱ ganï̂n ruhuâ si sinûn mánj; ni̱ si huê danj ganï̂n ruhuâ nej suj, ni̱ ga̱ꞌhue si ga̱nï̱n ruhuâ nej suj si sinûn na̱nj ánj.
17 Nuguanꞌ gaꞌmînj, ni̱ sê Ma̱ꞌan Señor huin sa rikî gaꞌmînj, man si gaꞌmin sinún ma̱ꞌán, si̱ huin ruhuâj ga̱ꞌmi̱n hueꞌê rayiꞌî ma̱ꞌan na̱nj ánj.
18 Dadinꞌ ûta gàꞌì nej síi gaꞌmin hueꞌê rayiꞌî nej ma̱ꞌan nej sôꞌ, huê danj ni̱ gaꞌmin hueꞌê rayiꞌî ma̱ꞌán.
19 Ûta hueꞌê chru̱n nej suj, sani̱ nùkuaj ruhuâ nej suj niꞌin nej suj nej sí aꞌmin sinún.
20 Ni̱ hua̱ nùkuaj ruhuâ nej suj niꞌin nej suj nej sí giꞌhiaj guesâ si gi̱ꞌhiaj sun chre nej suj riñan nej sôꞌ, ni̱ garânj sun nej sôꞌ si guesâ nej suj guendâ ga̱huin yi̱ruꞌhue nej sôꞌ, ni̱ garânj yina nej suj si ga̱na̱ka̱j nej sôꞌ siꞌhiaj nej suj, ni̱ garânj yina nej suj si gàꞌnï̀nꞌ nej sôꞌ riñan nej suj, ni̱ garânj yina nej suj si ga̱ra̱ꞌhui nej sôꞌ riñan nej suj.
21 Ni̱ giriꞌí sinàꞌàj a gàtà dànanj gu̱nïn nej suj, sani̱ nitaj si gisîj ruhuâ nej ñûnj gi̱ꞌhiaj nej ñùnj dànanj nga nej suj mánj.
Sani̱ ñan nitaj si yuꞌhuiꞌ aꞌngô nej sôꞌ ga̱ꞌmi̱n nej sôꞌ ngà nej suj huê danj ni̱ nitaj si guyuꞌhuí ga̱ꞌmi̱n dànanj nga nej suj mánj.
22 Sí aꞌmin nânj hebreo huin nej sij nîꞌ. Huè danj na̱nj gaꞌmînj nânj hebreo na̱nj ánj. Sí israelita huin nej sij nîꞌ. Huê danj huín nej na̱nj ánj. Daꞌnin si̱ꞌnï̱n Abraham huin nej sij nîꞌ. Huê danj huín nej na̱nj ánj.
23 Huin nej sij si-musû Ma̱ꞌan Cristo nîꞌ. Ni̱ dànanj huín doj si-musû Ma̱ꞌan Cristo gàꞌ daꞌ nej sij, (ni̱ gaꞌmînj dàj rûnꞌ gaꞌmin sí sinúun). Sani̱ dànanj ûta giꞌhiaj sûnj gàꞌ daꞌ nej sij, ni̱ dànanj ûta gàꞌì gatu dukuâ gaꞌa gàꞌ daꞌ nej sij. Ni̱ dànanj ûta gàꞌì gañûnj gàꞌ daꞌ nej sij, ni̱ ûta gàꞌì ruhuâ gàhuìj rayiꞌî Ma̱ꞌan Jesús.
24 Gàꞌ gisîj ùnꞌùnꞌ gañûnj giꞌhiaj nej judío, ni̱ daꞌ ñùn gutaꞌ nej sij ko̱ yinunꞌ ga̱ꞌanj nneꞌe yichrâ.
25 Huàꞌnï̀nj duguañun nej sij ngà rutsìi ñùnj; ꞌngo̱ ñùn garrûn nej sij hiëj ñùnj; ni̱ huàꞌnï̀nj ganagaꞌ barkû nùnj huâ ruhuâ nnee, ni̱ ꞌngo̱ ñanꞌan ni̱ ꞌngo̱ gui gitá barkû nùnj hua riñan nne ña̱ꞌa̱nj ni̱ ganï̂n ruhuâj si si̱ gananinj gàꞌ mánj;
26 ûta gaché nûnj, ni̱ ûta ha̱i̱ hua ruhuâ kïn gachînj, ni̱ ûta mân sí tu̱u chrej gachê, ni̱ ûta ha̱i̱ hua riñânj giꞌhiaj nej sí màn yiñân, ni̱ ûta ha̱i̱ hua riñânj giꞌhiaj nej sí nàsìnùnj un, ni̱ huê danj na̱nj ga ha̱i̱ riñânj nga gané ruhuâ yumanꞌ snàꞌànj an giꞌhiaj nej guiì, huê danj na̱nj ga ha̱i̱ riñânj nga gachê riñan hioꞌó nàkòo, huê danj na̱nj ga ha̱i̱ riñânj nga huâ riñan nne ña̱ꞌa̱nj, huê danj na̱nj ga ha̱i̱ nga giꞌnï̂n siganï̂nj nej dinï̂nt huin sí gidigañuꞌunj un;
27 ûta giꞌhiaj sûnj ni̱ ûta gininâ, ûta ganarîj nnej e riñânj, ni̱ huê danj na̱nj ûta ganachinj yiꞌnaa rikí ni̱ ûta ganakó nnee, ûta gàꞌì ga gìnìnè, ni̱ ûta ganûn nuhuij ñùnj ni̱ ganahuij siganꞌán.
28 Sani̱ hua na̱nj ga̱chin gànànï̀nj aꞌngô nej sa giranꞌán, ni̱ daꞌ gui, ni̱ ûta huin ruhuâj niꞌín daranꞌ nej dinï̂nt huin si-nùhuì Ma̱ꞌan Jesús.
29 Hiôꞌ ni̱ man ꞌngo̱ rïn nej suj chru̱n ga̱ꞌna̱nꞌ nga na̱nj nînꞌ, ni̱ ñùnj ni̱ nitaj si chrùnj ga̱ꞌna̱nj nga ûnꞌ, ni̱ si hua̱ ꞌngo̱ sí giꞌhiaj gininj aꞌngô nej dinï̂nt riñan gakï̱nꞌïn, ni̱ nitaj si chrùnj ga̱ꞌman ruhuâj niꞌín sí giꞌhiaj gininj dinï̂nt dânj riñan gakï̱nꞌïn ràꞌ saj ûnꞌ.
30 Ni̱ si hua̱ ꞌngo̱ sa ràyìꞌì ga̱ꞌmi̱n hueꞌé, ni̱ dànanj dùgùnàj huaj si gàtà si huín sí ninaj chre na̱nj ánj.
31 Ni̱ hua̱ ni̱ña̱n si ga̱ꞌmi̱n hueꞌêꞌ ni̱ ga̱chro̱ꞌ chraꞌa riñan Ma̱ꞌan Ñaꞌanj huin Rej Ma̱ꞌan Señor Jesús daranꞌ diû, ni̱ niꞌin Ma̱ꞌan si gaꞌmînj nuguanꞌ yàngàꞌa.
32 Nga gané ruhuâ yumanꞌ snàꞌànj Damasco, ni̱ ganï̂n gobernador ni̱ka̱j su̱n riñan Rey Aretas nej sí du̱gumîn ñùnj, guendâ ruhuâ nej sôꞌ gi̱daꞌa nej sôꞌ ñùnj;
33 ni̱ gaꞌnḯn nej dinï̂nt ñùnj ruhuâ ꞌngo̱ yugûti ni̱ guduninj nej sôꞌ ñùnj riñan bentana tàj riñan hiëj yìngà xi nu̱n rukû yumanꞌ snàꞌànj dânj, huê danj ni̱ gahuij neꞌ ye̱ꞌe ni̱ gananînj ni̱ nun gìrìꞌ nej sij gi̱daꞌa nej sij ñùnj mánj.