Dunaꞌhuej Pablo rayiꞌî si-su̱n sôꞌ
10
Ñùnj huin Pablo ni̱ gachín ni̱ꞌhia riñan nej suj ngà nuguanꞌ niꞌñanj an ni̱ ngà nuguanꞌ nìn rikî Ma̱ꞌan Cristo,
ni̱ nùnj huin si ga̱ta̱j nej suj si ngà nné ngà nej suj ni̱ giꞌhia si huín sí yuꞌhuiꞌ chre sani̱ nga nne anê ni̱ huín sí nitaj si yuꞌhuiꞌ ngà nej suj;
2 ni̱ ûta àko gachín nìꞌhia riñan nej suj,
ni̱ si̱ giꞌhiaj nej suj si ga̱huin hué riñan nej suj nga gùchìj ñan màn nej suj,
dadinꞌ aꞌngô nej sôꞌ gataj si ûta nahuij ruhuâj niꞌín siꞌhiaj nej suj sani̱ sê dan huin mánj,
hiôꞌ ni̱ hua̱ ni̱ña̱n ruhuâj si na̱gi̱ꞌhiaj ni̱ka̱j nej sí gaꞌmin dànanj.
3 Yàngàꞌ ni̱ guiì huin nej ñûnj,
sani̱ nitaj si giꞌhiaj nej ñûnj dàj rûn giꞌhiaj nej guiì nitaj si niꞌin Ma̱ꞌan Ñaꞌanj an mánj.
4 Nej rasu̱n garânj sunꞌ nej ñûnj huin si-stadû Ma̱ꞌan Ñaꞌanj an ni̱ sê nej rasu̱n garânj sun nej stadû màn ruhuâ yumiguì nânj huin mánj,
sa garânj sun nej ñûnj huin ngà si-nùkuaj nï̀nꞌ ruhuâ Ma̱ꞌan Ñaꞌanj an guendâ ga̱ꞌhue gu̱du̱rëꞌëj daranꞌ nej si-guesâ sichre na̱nj ánj,
5 ni̱ gudurëꞌëj nej sa anï̂n ruhuâ nej sí garanꞌ ñuꞌunj si gu̱nïn nej guiì si-nùguànꞌ Ma̱ꞌan Ñaꞌanj an,
dadinꞌ ganï̂n ruhuâ nej sôꞌ si ûta huin nej sôꞌ,
ni̱ ngà si-nùkuaj Ma̱ꞌan Ñaꞌanj an garânj sûnj nga gaꞌmînj si-nùguànꞌ Ma̱ꞌan Ñaꞌanj an riñan nej guiì ni̱ guyumân ruhuâ ninj ni̱ dagahuin ninj riñan Ma̱ꞌan Cristo.
6 Nga gunukuaj nej suj nda hueꞌê chre gaꞌhue dagahuin nej suj riñan Ma̱ꞌan Ñaꞌanj an,
ni̱ hua̱ ruhuâ nej ñûnj si raꞌña̱nj gùyùmàn kastîgu riñan aꞌngô da̱ꞌa̱j nej guiì naꞌhuej ruhuâ da̱gahuin riñan Ma̱ꞌan Ñaꞌanj an.
7 Man sa guruguiꞌ neꞌ ye̱ꞌ nej guiì giniꞌhiaj nej suj,
ni̱ si hua̱ ꞌngo̱ nej suj guyumân ruhuâ si hia huin nej suj daꞌní Ma̱ꞌan Cristo,
ni̱ huê danj gùyùmàn hia ruhuâ nej suj niꞌin nej suj ma̱ꞌan nej suj,
ni̱ dàj rûnꞌ huin ruhuâ nej suj niꞌin nej suj ma̱ꞌan nej suj ni̱ huê danj ga̱nï̱n ruhuâ nej suj niꞌin nej suj nej ñûnj si yàngàꞌ huin nej ñûnj daꞌní Ma̱ꞌan Cristo.
8 Dadinꞌ nùnj huin si gatâ si huín doj rayiꞌî guendâ ni̱ka̱j sùnj riñan nej suj,
sani̱ Ma̱ꞌan Señor riki guendâ na̱gi̱ꞌhiaj nùkua ruhuâ nej suj ni̱ sê si̱ giꞌhia guendâ ga̱ꞌanj ni̱ꞌhia nej suj mánj,
huê danj ni̱ nitaj si giriꞌí sinàꞌàj rayiꞌî sa giꞌhiâ mánj;
9 nun ga̱ra̱nꞌ ruhuâj si ga̱nï̱n ruhuâ nej suj si duyuꞌhuí nej suj ngà rayiꞌî nej nuguanꞌ gachrûnj riñan ñanj karta mánj.
10 Dadinꞌ yàngàꞌ hia,
ni̱ gataj da̱ꞌa̱j nej dinï̂nt si nej karta gachrûnj riñan nej suj ni̱ ûta nùkuaj gaꞌmin riñan nej suj,
sani̱ nga nikḯn gaꞌmînj ngà nej suj ni̱ nda na̱j chre gaꞌmînj riñan nej suj,
ni̱ nitaj nej guiì guyumân ruhuâ sa gaꞌmînj dadinꞌ nitaj si chrùnj gàꞌmìn gataj nej sôꞌ.
11 Sani̱ sí gataj dànanj ni̱ ña̱ꞌa̱n huaj si gu̱nïn sôꞌ,
ni̱ dàj rûnꞌ gaꞌmin nej ñûnj nga gachrûn nej ñûnj riñan ñanj karta,
nga nitaj si nne nej ñûnj ngà nej suj,
ni̱ huê danj ga̱ꞌmi̱n nej ñûnj nga nikïnꞌ nej ñûnj riñan nej suj.
12 Dadinꞌ nun gìsìj ruhuâ nej ñûnj ga̱ta̱j nej ñûnj si gu̱ña̱n huin nej ñûnj ngà nej sí gataj si ûta hueꞌê giꞌhiaj nej sôꞌ;
sani̱ giriñun nej sí dânj ma̱ꞌan nej sôꞌ,
ni̱ gataj nej sôꞌ si ûta hueꞌê giꞌhiaj nej sôꞌ,
sani̱ hua̱ na̱nj nitaj si chru̱n nej sôꞌ ga̱ya̱ka̱j guendâ nej sôꞌ mánj.
13 Sani̱ nitaj si ûta gaꞌmin hueꞌê nej ñûnj rayiꞌî nej ma̱ꞌan nej ñûnj,
dadinꞌ gaꞌmin nej ñûnj dàj rûnꞌ hua sun gaꞌnïnꞌ Ma̱ꞌan Ñaꞌanj an riñan nej ñûnj ni̱ nda andaꞌ ga̱ꞌhue gùchìꞌ nej ñûnj,
ni̱ huê Ma̱ꞌan Ñaꞌanj an huin si gaꞌnï̂nj rayiꞌî dan guchiꞌ nej ñûnj nda ñan màn nej suj na̱nj ánj.
14 Dadinꞌ nun ga̱chi̱n nej ñûnj ga̱ꞌa̱nj nej ñûnj ñan gàꞌ gidigân aꞌngô nej sôꞌ si-nùguànꞌ Ma̱ꞌan Ñaꞌanj an mánj,
dadinꞌ gàꞌ si̱nï̱n nej ñûnj guchiꞌ ñan màn nej suj guendâ ga̱ꞌmi̱n nej ñûnj,
nuguanꞌ gi̱ꞌhiaj ga̱na̱ni̱n nej suj rayiꞌî Ma̱ꞌan Cristo.
15 Nitaj si gaꞌmin hueꞌê nej ñûnj rayiꞌî si-su̱n aꞌngô nej síi dadinꞌ nej ñûnj huin sa gaꞌmin si̱nï̱n riñan nej suj,
gànàꞌhuìj nej ñûnj si ga̱huin ran doj ruhuâ nej suj ni̱ gùyùmàn hueꞌê ruhuâ nej suj,
ni̱ ga̱ꞌhue gi̱ꞌhiaj sun nej ñûnj siganï̂nj nej suj sani̱ gùchìꞌ nej ñûnj man ñan daꞌhui nej ñûnj gùchìꞌ nej ñûnj;
16 huê danj na̱nj gànàꞌhuìj nej ñûnj si gùyùmàn ꞌngo̱ gui ni̱ ga̱ꞌa̱nj gànàtàꞌ nej ñûnj si-nùguànꞌ Ma̱ꞌan Ñaꞌanj an nda neꞌ ña̱n doj ñan màn nej suj dânj,
sani̱ nitaj si gi̱ꞌhiaj nej ñûnj ga̱ꞌa̱nj nej ñûnj ñan gàꞌ hua̱ si-nùguànꞌ Ma̱ꞌan Ñaꞌanj an guendâ gìrìꞌ nej ñûnj doj nùguànꞌ ga̱chru̱n nej ñûnj rayiꞌî si-su̱n aꞌngô nej sôꞌ mánj.