Sanꞌanj ofrenda ganachinikaj nej sij guendâ nej dinï̂nt màn Jerusalén
9
Yàngàꞌ hia ni̱ rayiꞌî sanꞌanj ganaranꞌ nêꞌ guendâ nej dinï̂nt,
ni̱ nitaj si gi̱ꞌhia gu̱nu̱na̱ ñún riñan nej suj mánj;
2 dadinꞌ gàꞌ niꞌín si hua̱ ni̱ña̱n ruhuâ nej suj gu̱ru̱gûñuꞌunj nej suj,
ni̱ hueꞌê ni̱ña̱n giꞌhiaj nej suj gatâ nga gununâj rayiꞌî nej suj riñan nej sôꞌ màn Macedonia,
ni̱ nej sôꞌ màn Acaya ni̱ àsìj goj ga ruhuâ nej sôꞌ gu̱ru̱gûñuꞌunj nej sôꞌ;
ni̱ nga gunïn nej sôꞌ màn Macedonia sa ganï̂n ruhuâ nej suj ni̱ gahuin gu̱ꞌma̱n ruhuâ nej sôꞌ gu̱ru̱gûñuꞌunj nej sôꞌ.
3 Huê danj ni̱ gaꞌnï̂n nej dinï̂nt nânj huaj nej sôꞌ riñan nej suj,
guendâ ga̱ta̱j naꞌanj nej sôꞌ si ga̱na̱ranꞌ nej suj ofrenda,
ni̱ gi̱ni̱ꞌin nej sij si yàngàꞌ hia ni̱ hueꞌê ni̱ña̱n giꞌhiaj nej suj dàj rûnꞌ gatâ rayiꞌî nej suj.
4 Dadinꞌ ga̱ꞌhue si gùchìꞌ da̱ꞌa̱j nej sôꞌ màn riñan hioꞌó Macedonia ngàj,
nga huâ ñan màn nej suj ni̱ gi̱ni̱ꞌin nej sôꞌ si nitaj si hua̱ yu̱gui nej suj ngà sanꞌanj ofrenda.
Hiôꞌ ni̱ gi̱ni̱nj nêꞌ riñan sinàꞌàj a,
dadinꞌ ûta hueꞌê giꞌhiaj nej suj gatâ riñan nej sôꞌ.
5 Rayiꞌî dan ni̱ ña̱ꞌa̱n huaj ruhuâj ni̱ gaꞌnï̂n guchiꞌ si̱nï̱n nej dinï̂nt riñan nej suj,
daꞌnga ni̱ guruguñuꞌunj nej sôꞌ ni̱ ga̱na̱chinikaj nùguànꞌàn nej suj ofrenda gàꞌ gataj nej suj gu̱ru̱gûñuꞌunj nej suj,
huê danj ni̱ gàꞌ gitàj chrunj gi̱ꞌhiaj nej suj ni̱ gi̱ni̱ꞌin nej sij si gaꞌhuiꞌ nej suj si sa du̱ꞌhue̱e huin rayiꞌî nuguanꞌ nânj,
daꞌnga ni̱ si̱ ganï̂n ruhuâ nej sij si giꞌhiaj guesâ nej ñûnj riñan nej suj.
6 Sani̱ dànanj gatâ:
Ni̱ sí gunun do̱j,
ni̱ do̱j sa ga̱hiu raa̱ sa gunun sôꞌ dânj ga̱na̱ranꞌ sôꞌ;
ni̱ sí ûta nìko gunun ni̱ ûta nìko sa ga̱hiu raa̱ sa gunun sôꞌ dânj ga̱na̱ra̱nꞌ sôꞌ.
7 Daꞌ goꞌngo̱ nej suj gàꞌhuìꞌ dàj garanꞌ ruhuâ nimân nej suj:
Sani̱ si̱ gananï̂n ruhuâ nej suj nga gàꞌhuìꞌ nej suj mánj,
ni̱ si̱ gaꞌhuiꞌ nej suj nda guesâ chre,
dadinꞌ nej guiì nda nìhiàꞌ chre hua ruhuâ gaꞌhuiꞌ ni̱ ꞌì ruhuâ Ma̱ꞌan Ñaꞌanj an niꞌin ninj.
8 Ni̱ ûta nùkuaj Ma̱ꞌan Ñaꞌanj an ni̱ ga̱ꞌhue gi̱ꞌhia si ga̱ nìko sunuj u riñan nej suj,
hiôꞌ ni̱ nga hua daranꞌanj riñan nej suj,
ni̱ ga̱ꞌhue gu̱ru̱gûñuꞌunj nej suj riñan nej dinï̂nt ranꞌ àko.
9 Dàj rûnꞌ nnunj riñan ñanj:
Ni̱ nuchraꞌ da̱ꞌa,
ni̱ gaꞌhuij riñan nej guiì ga̱ni̱ki;
ni̱ nìgànj chre ni̱ ga̱ ni̱ka̱ sa gi̱ꞌhia na̱nj ánj.
10 Ni̱ Ma̱ꞌan gaꞌhuiꞌ ka̱an gunun sí gunuun,
ni̱ Ma̱ꞌan gaꞌhuiꞌ rachrúun ya nej guiì,
ni̱ huej huin sa ri̱ki̱ ni̱ gi̱ꞌhia si gi̱yi̱ꞌna̱nj sa gunun nej suj,
ni̱ gi̱ꞌhia si ga̱huin nìko sa ni̱ka̱ gi̱ꞌhiaj nej suj.
11 Daꞌnga ni̱ gahuin yi̱ruꞌhue nej suj ngà daranꞌanj,
ni̱ ga̱ꞌhue gu̱ru̱gûñuꞌunj nìko nej suj riñan aꞌngô nej guiì ran àko,
ni̱ gàꞌhuìꞌ gàꞌì nej guiì si guruhuâ Ma̱ꞌan Ñaꞌanj an rayiꞌî sa giꞌhiaj nêꞌ.
12 Dadinꞌ si guruguñuꞌunj nej suj riñan nej dinï̂nt,
ni̱ sê man guendâ ga̱chin riñan nej sôꞌ giꞌhiaj nej suj mánj,
giꞌhiaj nej suj dànanj guendâ gàꞌhuìꞌ ûta gàꞌì nej guiì si guruhuâ Ma̱ꞌan Ñaꞌanj an rayiꞌî sa giꞌhiaj nej suj.
13 Ni̱ ga̱ꞌmi̱n hueꞌê nej sôꞌ riñan Ma̱ꞌan Ñaꞌanj an,
ni̱ rayiꞌî nej sa guruguñuꞌunj nej suj ni̱ ganadigân nej suj si niꞌin nej suj nuguanꞌ gi̱ꞌhiaj ga̱na̱ni̱n nej guiì,
ni̱ huê danj na̱nj ginikaj chre̱j nej sôꞌ riñan Ma̱ꞌan Ñaꞌanj an rayiꞌî guendâ guruguñuꞌunj nej suj ngà daranꞌ nej sôꞌ.
14 Huê danj ni̱ ûta ga̱ ꞌì ruhuâ nej sij niꞌin nej sij nej suj ni̱ gàchìnj nìꞌhiaj nej sij rayiꞌî nej suj riñan Ma̱ꞌan Ñaꞌanj an,
rayiꞌî nej sa sàꞌ giꞌhiaj Ma̱ꞌan Ña̱ꞌanj an ngà nej suj.
15 Guruhuâ Ma̱ꞌan Ñaꞌanj an ngà rayiꞌî nej sa rikî chre riñunꞌ ni̱ gahuin ña̱ꞌanj ruhuôꞌ rayiꞌî nej sa giꞌhia ngòꞌ.