Nda nìhiàꞌ chre ga̱ ruhuâꞌ nga gàꞌhuìꞌ ofrenda
8
Huê danj ni̱,
ruhuâ nej ñûnj gànàtàꞌ nej ñûnj riñan nej suj di̱nï̂nj,
si giꞌhiaj Ma̱ꞌan Ñaꞌanj an sunuj u riñan nej dinï̂nt huin si-nùhuì Ma̱ꞌan Jesús nne riñan hioꞌó Macedonia;
2 ni̱ nùnj huin si ûta giranꞌ sa̱ñu̱n nej sij,
sani̱ ûta hua nìhiàꞌ ruhuâ nej sij ni̱ huê danj na̱nj ûta àko ranꞌ nej sij,
sani̱ gahuin chru̱n nej sij gaꞌhuiꞌ nìko nej sij ofrenda riñan Ma̱ꞌan Ñaꞌanj an.
3 Ni̱ ganatá sa giꞌhiaj nej sij ni̱ nda nìhiàꞌ chre hua ruhuâ nej sij ni̱ gaꞌhuiꞌ nej sij dàj nìko ma̱ꞌan gaꞌhue gunùkuaj nej sij,
ni̱ nùnj huin si nitaj si huaj nda nìko xi riñan nej sij sani̱ giꞌhiaj guesâ nej sij ma̱ꞌan nej sij ni̱ gaꞌhuiꞌ nej sij ofrenda,
4 ni̱ ûta àko gachín nìꞌhiaj nej sij riñan nej ñûnj si ga̱ra̱n yina nej ñûnj,
si gàꞌhuìꞌ nej sij sa hua̱ riñan nej sij riñan nej dinï̂nt nìkòꞌ rukû Ma̱ꞌan Cristo.
5 Ni̱ ganï̂n ruhuâ nej ñûnj si do̱j gàꞌhuìꞌ nej sij ofrenda sani̱ gaꞌhuiꞌ nìko nej sij ni̱ huê danj na̱nj nagaꞌhuiꞌ nej sij ma̱ꞌan nej sij riñan Ma̱ꞌan Señor,
ni̱ gàꞌ si̱nï̱n gaꞌhuiꞌ nej sij riñan Ma̱ꞌan Señor ni̱ neꞌ rùkù ni̱ gurugûꞌun nej sij nej ñûnj dàj rûnꞌ garanꞌ ruhuâ Ma̱ꞌan Ñaꞌanj an.
6 Huê danj ni̱ dunaꞌnga nej ñûnj riñan Tito si dàj rûnꞌ gayiꞌì sôꞌ ganakaj sôꞌ ofrenda riñan nej suj,
ni̱ huê danj ginùn huin sôꞌ ga̱na̱ka̱j sôꞌ ofrenda riñan nej suj.
7 Hia̱j ni̱ gàꞌ chru̱n nej suj gi̱ꞌhiaj nej suj daranꞌanj,
ni̱ guyumân ruhuâ nej suj,
ni̱ ni̱ka̱j nej suj nuguanꞌan ga̱ꞌmi̱n nej suj,
ni̱ chru̱n nï̀nꞌ ruhuâ nej suj,
ni̱ hua̱ ruhuâ nej suj gu̱na̱nj gi̱ꞌtsi nej suj,
ni̱ ꞌì ruhuâ nej suj niꞌin nej suj ñùnj,
ni̱ du̱guꞌnïnꞌ nej suj ga̱na̱chi nikaj nej suj ofrenda na̱nj ánj.
8 Sê si̱ gàꞌ ꞌngo̱ gaꞌnḯn suun riñan nej suj mánj.
Sa ruhuâj huin si gi̱niꞌhiaj nej suj dàj giꞌhiaj sun aꞌngô nej dinï̂nt,
ni̱ ruhuâj si ginùn huin nej suj gi̱ꞌhiaj nej suj sun dânj daꞌnga ni̱ giniꞌin nej guiì si ꞌì ruhuâ nej suj.
9 Dadinꞌ gàꞌ giniꞌin nej suj dàj hua sunuj u giꞌhiaj Ma̱ꞌan Señor,
ni̱ dàj ꞌì ruhuaj niꞌin nej suj dadinꞌ nga gane yàtàꞌa ni̱ ga yi̱ruꞌhuej sani̱ rayiꞌî nej suj ni̱ ganahuin sí giranꞌ àko,
ni̱ gahuin nej suj guiì giranꞌ àko sani̱ guendâ guyumân ruhuâ nej suj niꞌin nej suj ma̱ꞌan ni̱ ga̱na̱huin nej suj guiì yi̱ruꞌhuee.
10 Ni̱ narikîj ꞌngo̱ chrej e riñan nej suj rayiꞌî nânj;
dadinꞌ dùgùnàj huaj si du̱guꞌnïnꞌ nej suj gi̱ꞌhiaj nej suj dànanj,
dadinꞌ àsìj hioꞌ gâchin gayiꞌì nej suj ganachi nikaj nej suj ofrenda,
ni̱ ûta ginun ña̱ꞌa̱n ruhuâ nej suj.
11 Hia̱j ni̱ dàj gùnùkuaj nej suj gu̱ru̱gûñuꞌunj nej suj,
ni̱ du̱nahuij nej suj sun gayiꞌì nej suj giꞌhiaj nej suj dàj rûnꞌ ga nìhiàꞌ ruhuâ nej suj nga gayiꞌì si̱nï̱n nej suj ngà sun dânj.
12 Dadinꞌ si hua̱ ꞌngo̱ nej guiì ruhuâ gàꞌhuìꞌ ofrenda,
ni̱ ga̱ꞌhue ga̱na̱huin ràꞌa Ma̱ꞌan Ñaꞌanj an dàj nìko ma̱ꞌan gìrìꞌ ninj gàꞌhuìꞌ ninj riñanj,
ni̱ si nitaj sanꞌanj an hua riñan ꞌngo̱ guiì ni̱ nitaj si gachín Ma̱ꞌan Ñaꞌanj an riñan ninj mánj.
13 Sani̱ nun ga̱ra̱nꞌ ruhuâ nej ñûnj si rayiꞌî guendâ gurugûꞌunj nej suj aꞌngô nej guiì ni̱ ga̱chin riñan nej suj mánj,
sa ruhuâ nej ñûnj huin si gu̱ña̱n gaj riñan nej suj.
14 Sani̱ diû nânj,
ni̱ si huaj riñan nej suj ni̱ gu̱ru̱gûñuꞌunj nej suj riñan nej dinï̂nt ranꞌ àko,
ni̱ nga gi̱ranꞌ àko nej suj ni̱ gu̱ru̱gûñuꞌunj nej sôꞌ rukû nej suj,
huê danj ni̱ gu̱ña̱n gaj riñan nej suj,
15 ni̱ huê dàj rûnꞌ nnunj riñanj ñanj:
“Ni̱ sí giriꞌ nìko nej rasu̱un,
ni̱ si̱ gunâj nìko rasu̱un riñan sôꞌ,
ni̱ sí giriꞌ do̱j rasu̱un ni̱ si̱ ga̱chin rasu̱un riñan sôꞌ mánj.”
Tito ni̱ ngà nej sí ni̱ka̱j duguiꞌ ngà sôꞌ
16 Sani̱ guruhuâ Ma̱ꞌan Ñaꞌanj an rayiꞌî Tito,
dadinꞌ huê dàj rûnꞌ ganï̂n ruhuâj huê danj ganï̂n ruhuâ sôꞌ ni̱ gunânj gi̱ꞌtsi sôꞌ riñan nej suj.
17 Ni̱ garânj yina sôꞌ dagahuin sôꞌ su̱n duguta sùnj riñan sôꞌ,
dadinꞌ ûta huin ruhuâ sôꞌ gùchìꞌ sôꞌ ñan màn nej suj,
ni̱ ma̱ꞌan sôꞌ ganï̂n ruhuâ gùchìꞌ ñan màn nej suj.
18 Ni̱ gaꞌnḯn nej ñûnj huaj Tito ngà dinï̂nt ràyìꞌì ûta hueꞌê gaꞌmin aꞌngô nej dinï̂nt huin si-nùhuì Ma̱ꞌan Jesús,
dadinꞌ ûta hueꞌê gananï̂n sôꞌ nuguanꞌ giꞌhiaj ga̱na̱ni̱n nej guiì.
19 Ni̱ sê man ꞌngo̱ rïn sun nânj gi̱ꞌhiaj sij mánj,
dadinꞌ gachrûn su̱n nej dinï̂nt huin si-nùhuì Ma̱ꞌan Jesús,
si ga̱huin sij sí gi̱nikaj duguiꞌ ga̱che̱ nun ngà nej ñûnj guendâ ga̱ꞌa̱nj gànàrë̀ꞌë̀j sij ofrenda,
dadinꞌ nej ñûnj huin si nnùn yikḯn guendâ du̱gumîn nej ñûnj sanꞌanj ofrenda huin guendâ Ma̱ꞌan Señor,
ni̱ gi̱di̱gân nej ñûnj si hua̱ ruhuâ nej suj gu̱ru̱gûñuꞌunj nej suj.
20 Nun ga̱ra̱nꞌ ruhuâ nej ñûnj si ga̱ꞌmi̱n nej guiì yiꞌî nej ñûnj guendâ dugumîn nej ñûnj nìko si-sanꞌanj Ma̱ꞌan Señor mánj.
21 Ûta duguꞌnïnꞌ nej ñûnj ni̱ nda hueꞌê chre dugumîn nej ñûnj sa giꞌhiaj nej ñûnj,
ni̱ sê man riñan Ma̱ꞌan Señor danj giꞌhiaj nej ñûnj dadinꞌ huê danj giꞌhiaj hueꞌê nej ñûnj riñan nej guiì.
22 Ni̱ gaꞌnḯn nej ñûnj aꞌngôꞌ dinï̂nt ga̱ꞌa̱nj ngà nguèj dinï̂nt dânj,
dadinꞌ gàꞌ gisîj gàꞌì gayakaj guendâ nej ñûnj si ûta hio sôꞌ,
sani̱ hia̱j ni̱ dànanj ûta hio gùchìꞌ sôꞌ ñan màn nej suj dadinꞌ hua̱ yìtï̀nj ruhuâ sôꞌ gùchìꞌ sôꞌ ñan màn nej suj.
23 Tito,
huin sí giꞌhiaj sun ngàj ni̱ giꞌhiaj sun nej ñûnj ngà nej suj,
ni̱ aꞌngô nej dinï̂nt dânj huin nej sôꞌ gachrûn su̱n nej dinï̂nt huin si-nùhuì Ma̱ꞌan Jesús,
guendâ gi̱nikaj nej sôꞌ si-nùguànꞌ Ma̱ꞌan Ñaꞌanj an ga̱ꞌanj nej sôꞌ,
ni̱ ni̱ka̱j chrej nej sôꞌ riñan Maꞌan Cristo.
24 Ni̱ guendâ gi̱ni̱ꞌin nej dinï̂nt huin si-nùhuì Ma̱ꞌan Jesús,
ni̱ gi̱di̱gân nej suj si ꞌì yàngàꞌ ruhuâ nej suj niꞌin nej suj nej sôꞌ,
daꞌnga ni̱ ni̱ka̱ hua nuguanꞌ gununâ nej ñûnj rayiꞌî nej suj nga gataj nej sij si ûta hueꞌê giꞌhiaj nej suj.