7
Huê danj,
na̱nj nej suj di̱nï̂nj,
ni̱ gàꞌ gataj Ma̱ꞌan Ñaꞌanj an si hua̱ ꞌngo̱ sa ri̱kij riñan nêꞌ,
ni̱ rayiꞌî dan ni̱ na̱gi̱ꞌhiaj sàꞌ nêꞌ ma̱ꞌan nêꞌ riñan daranꞌ nej sa kï̱j hua garanꞌ ruhuâ nneè kûꞌ ni̱ sa kï̱j hua garanꞌ ruhuâ nanè nimûnꞌ,
ni̱ du̱guꞌnï̂nꞌ ni̱ gu̱du̱nôꞌ gakï̱nꞌïn daꞌnga ni̱ ganahuin gèꞌ ni̱ gi̱nun yuꞌhuiꞌ ruhuôꞌ ni̱ si̱ gi̱ꞌhiôꞌ gakï̱nꞌïn riñan Ma̱ꞌan Señor mánj.
Ganahuin nìhiàꞌ ruhuâ Pablo dadinꞌ gananikàj ruhuâ nej guiì màn yumanꞌ Corinto
2 Ga̱na̱huin ràꞌa nej suj nej ñûnj:
Dadinꞌ nun ga̱chi̱n nej ñûnj nuguanꞌan riñan gàꞌ si ꞌngo̱ nej suj;
ni̱ nun gi̱ꞌhiaj nej ñûnj sa yìꞌìi riñan gàꞌ si ꞌngo̱ nej suj;
ni̱ nun gi̱di̱gañuꞌunj nej ñûnj riñan gàꞌ si ꞌngo̱ nej suj.
3 Si gaꞌmînj dànanj ni̱ sê si̱ gata si huin nej suj sí aꞌnanꞌan mánj,
ni̱ gàꞌ gatâ si daranꞌ diû nun ruhuâj niꞌín nej suj,
ni̱ hua̱ ruhuâj gàhuìꞌ nùguànꞌànj ngà nej suj,
ni̱ nga nï̀nꞌ nne nêꞌ riñan hioꞌó nânj ni̱ ga̱ gu̱ña̱n ruhuâ nêꞌ.
4 Gaꞌmin yàngàꞌ hiá ngà nej suj;
ni̱ ûta gaꞌmin hueꞌê rayiꞌî nej suj;
ni̱ ûta gahuin nìhiàꞌ ruhuâj giꞌhiaj nej suj;
ni̱ giranꞌ sa̱ñu̱n nej ñûnj sani̱ ûta gahuin nìhiàꞌ ruhuâj.
5 Dadinꞌ yàngàꞌ hia,
ni̱ nga gaꞌnaꞌ nej ñûnj riñan hioꞌó Macedonia,
ni̱ nitaj àmàn ganarânj ruhuâ nneè kú nej ñûnj,
dadinꞌ daranꞌ hiuj u ni̱ ganariꞌ nej ñûnj sí garanꞌ ñuꞌunj nej ñûnj;
ni̱ gunïnꞌ nej ñûnj ngà nej sí gata rùhuà nej ñûnj,
ni̱ huê danj na̱nj nu̱n yuꞌhuiꞌ ruhuâ nej ñûnj.
6 Sani̱ Ma̱ꞌan Ñaꞌanj an giꞌhiaj ganahuin nìhiàꞌ ruhuâ nej guiì ginichre ruhuâ,
huej huin sa giꞌhiaj ganahuin nìhiàꞌ ruhuâ nej ñûnj nga guyumân Tito ñan nne nej ñûnj;
7 ni̱ sê man nga guyumân sôꞌ ganahuin nìhiàꞌ ruhuâ nej ñûnj mánj,
dadinꞌ huê danj na̱nj ûta ganahuin nìhiàꞌ ruhuâ sôꞌ rayiꞌî nej suj.
Dadinꞌ gananï̂n sij riñânj si ûta huin ruhuâ nej suj gi̱ni̱ꞌin nej suj nej ñûnj;
dadinꞌ ganataꞌ sij riñânj si ûta gananï̂n ruhuâ nej suj ni̱ ûta huin ruhuâ nej suj,
niꞌin nej suj ñùnj ni̱ nga gunḯn nuguanꞌ nânj ni̱ ûta ganahuin nìhiàꞌ ruhuâj.
8 Nùnj huin si gananï̂n ruhuâ nej suj giꞌhiaj ñanj gachrûnj guchiꞌ riñan nej suj,
sani̱ nun gànànìkàj ruhuâj rayiꞌî nuguanꞌ gachrûnj riñan nej suj mánj;
gàꞌ si̱nï̱n ni̱ gananï̂n yàngàꞌ ruhuâj do̱j,
nga gunḯn si gananï̂n ruhuâ nej suj.
9 Hia̱j ni̱ ganahuin nìhiàꞌ ruhuâj,
sani̱ sê rayiꞌî guendâ gananï̂n ruhuâ nej suj mánj,
ganahuin nìhiàꞌ ruhuâj guendâ gananikàj ruhuâ nej suj rayiꞌî si-ga̱kïnꞌ nej suj,
dadinꞌ gananï̂n ruhuâ nej suj rayiꞌî si-ga̱kïnꞌ nej suj dàj rûnꞌ garanꞌ ruhuâ Ma̱ꞌan Ñaꞌanj an,
huê danj ni̱ nitaj sa yiꞌìi giꞌhiaj nej ñûnj riñan nej suj mánj.
10 Dadinꞌ si gananï̂n ruhuôꞌ giꞌhiaj Ma̱ꞌan Ñaꞌanj an ni̱ giꞌhia si gànànìkàj ruhuôꞌ rayiꞌî nej si-ga̱kï̂nt guendâ ga̱na̱ni̱nꞌ;
hiôꞌ ni̱ nitaj si gi̱ꞌhiôꞌ ga̱na̱nï̱n ruhuôꞌ gàꞌ mánj,
sani̱ si gananï̂n ruhuôꞌ rayiꞌî nej sa màn ruhuâ yumiguì nânj ni̱ gàhuìꞌ.
11 Ûta dùgùnàj giꞌhiaj Ma̱ꞌan Ñaꞌanj an si gananï̂n ruhuâ nej suj,
dadinꞌ gàꞌ ꞌngo̱ ganadunâ nej suj ma̱ꞌan nej suj giꞌhia,
huê danj ni̱ giniꞌin nej suj si nitaj gakï̱nꞌïn nikâ,
ni̱ dunaꞌhuej nej suj rayiꞌí,
ni̱ ginaꞌan ruhuâ nej suj niꞌin nej suj sí gata gakï̱nꞌïn,
ni̱ gatûj sa yuꞌhuiꞌ dan ruhuâ nimân nej suj guendâ si̱ giꞌhiaj nej suj gakï̱nꞌïn riñan Ma̱ꞌan Ñaꞌanj an.
Sani̱ neꞌ rùkù ni̱ ganï̂n ruhuâ nej suj gi̱ni̱ꞌin nej suj ñùnj,
ni̱ ûta dugumîn nej suj ñùnj ni̱ giꞌhiaj nej suj kastîgu sí ni̱ka̱j gakï̱nꞌïn.
Huê danj ni̱ gidigân nej suj si nitaj gakï̱nꞌïn nikaj nej suj mánj.
12 Huê danj ni̱,
gachrûnj sani̱ sê rayiꞌî sí gata rùhuà,
ni̱ sê rayiꞌî sí giranꞌ sa̱ñu̱n gachrûnj mánj,
gachrûnj rayiꞌî guendâ ûta huin ruhuâj niꞌín nej suj ni̱ huê danj ni̱ gàꞌ niꞌin Ma̱ꞌan Ñaꞌanj an.
13 Huê danj ni̱ ganahuin nùkuaj rûhua nej ñûnj rayiꞌî guendâ ganahuin nùkuaj ruhuâ nej suj.
Sani̱ ñan ganahuin nìhiàꞌ ruhuâ Tito ni̱ huê danj na̱nj ûta ganahuin nìhiàꞌ ruhuâ nej ñûnj,
dadinꞌ nagaꞌhuiꞌ nej suj ꞌngo̱ chrej nùkuaj ruhuâ riñan sôꞌ.
14 Ni̱ gaꞌmin hueꞌé rayiꞌî nej suj riñan Tito,
huê danj ni̱ nitaj sinàꞌàj a giriꞌí,
sani̱ daranꞌ diû ni̱ gaꞌmin nej ñûnj nuguanꞌ yàngàꞌa rayiꞌî nej suj,
huê danj ni̱ gaꞌmin hueꞌê nej ñûnj rayiꞌî nej suj riñan Tito.
15 Ni̱ ûta ꞌì ruhuâ sôꞌ niꞌin sôꞌ nej suj,
nga gananun ruhuâ sôꞌ si ûta hueꞌê dagahuin nej suj,
ni̱ dàj nìko ginikaj chrej nej suj ni̱ dàj hio dagahuin nej suj riñan sôꞌ.
16 Hua̱ nìhiàꞌ ruhuâj ni̱ hua̱ yìtï̀nj ruhuâj niꞌín nej suj.