6
Huê danj ni̱,
huin nej ñûnj sí giꞌhiaj sun nùguànꞌàn ngà Ma̱ꞌan Ñaꞌanj an,
ni̱ rayiꞌî dan ni̱ dugunïn gàꞌì nej ñûnj nej suj ni̱ si̱ ganahuin ràꞌa chre nej suj si-su̱nu̱j Ma̱ꞌan Ñaꞌanj an mánj;
2 Dadinꞌ huê danj taj riñan ñanj:
Ni̱ hua̱ ꞌngo̱ diû ni̱ huaj ga̱ꞌhue gunḯn,
ni̱ hua̱ ꞌngo̱ gui ni̱ huaj giꞌhia ga̱na̱ni̱nꞌ ni̱ guruguñuꞌun sòꞌ.
Hia̱j huin ꞌngo̱ diû huaj ga̱ra̱n yinaj;
ni̱ hia̱j huin gui huaj gi̱ꞌhia ga̱na̱ni̱nꞌ.
3 Nitaj si gidigân nej ñûnj chrej aꞌnanꞌan riñan gàꞌ si ꞌngo̱ nej suj,
dadinꞌ nun ga̱ra̱nꞌ ruhuâ nej ñûnj si rayiꞌî sa gidigân nej ñûnj ni̱ gi̱ni̱na̱j ruhuâ nej suj rayiꞌî si-su̱n nej ñûnj mánj,
4 sa giꞌhiaj nej ñûnj huin,
ni̱ dagahuin nej ñûnj daranꞌanj ni̱ gidigân nej ñûnj ma̱ꞌan nej ñûnj riñan nej suj si huin nej ñûnj sí giꞌhiaj sun hueꞌê si-su̱n Ma̱ꞌan Ñaꞌanj an,
ni̱ ûta nùkuaj ga ruhuâ nej ñûnj,
ni̱ ûta giranꞌ sa̱ñu̱n nej ñûnj,
ni̱ ûta àko giranꞌ nej ñûnj,
ni̱ ûta gahuin ruhuâ nej ñûnj.
5 Ni̱ ûta gutaꞌ nej sij nneꞌe yichrá nej ñûnj,
ni̱ guneꞌ nej sij dukuâ gaꞌa nej ñûnj,
ni̱ ûta gachej ruhuâ nej ñûnj giꞌhiaj nej sij,
ni̱ ûta giꞌhiaj sun nej ñûnj,
ni̱ ûta ganari nej ñûnj nnej e riñan nej ñûnj,
ni̱ huê danj na̱nj ga gi̱ni̱ne̱j nej ñûnj;
6 gàꞌ si ꞌngo̱ gakï̱nꞌ lij nun gi̱ꞌhiaj nej ñûnj,
ni̱ chru̱n nej ñûnj ga̱ra̱n daꞌnga hueꞌê ruhuâ nej ñûnj,
ni̱ ûta nìchràj ruhuâ nej ñûnj,
ni̱ guruguñuꞌunj nej ñûnj aꞌngô nej guiì,
ni̱ nne Ma̱ꞌan Espíritu Santo ngà nej ñûnj,
ni̱ ꞌì yàngàꞌ ruhuâ nej ñûnj.
7 Ni̱ gaꞌmin nej ñûnj nuguanꞌ yàngàꞌa,
ngà sa nùkuaj rikî Ma̱ꞌan Ñaꞌanj an riñan nej ñûnj,
dàj rûnꞌ dugumîn sí ûtaꞌa neꞌ huàꞌ sôꞌ ni̱ neꞌ chrïn sôꞌ ni̱ huê danj dugumîn nej ñûnj ma̱ꞌan nej ñûnj ni̱ giꞌhiaj nej ñûnj sa nìkà garanꞌ ruhuâ Ma̱ꞌan Ñaꞌanj an;
8 da̱ꞌa̱j ni̱ ni̱ka̱j chre̱j nej sij riñan nej ñûnj,
sani̱ da̱ꞌa̱j ni̱ ranꞌ nej sij nej ñûnj,
da̱ꞌa̱j ni̱ gaꞌmin hueꞌê nej sij rayiꞌî nej ñûnj,
ni̱ aꞌngô ñûn ni̱ gataj nej sij si huin nej ñûnj sí yìꞌìi.
Ni̱ gataj nej sij si gahuin nej ñûnj sí gidigañuꞌunj un sani̱ daranꞌ diû ni̱ gaꞌmin nej ñûnj nuguanꞌ yàngàꞌa;
9 gahuin nej ñûnj dàj rûnꞌ huin ꞌngo̱ sí nitaj si niꞌin nej guiì,
sani̱ ûta hueꞌê niꞌin nej guiì nej ñûnj;
dàj rûnꞌ huin guiì gàꞌ gahuiꞌi gahuin nej ñûnj sani̱ hua̱ nìꞌnàꞌ nej ñûnj,
rikî nej sij kastîgu riñan nej ñûnj sani̱ nitaj si dagahuiꞌ nej sij nej ñûnj;
10 dàj rûnꞌ giꞌhiaj nej guiì gananï̂n ruhuâ giꞌhiaj nej ñûnj,
sani̱ daranꞌ diû ga nìhiàꞌ ruhuâ nej ñûnj;
ni̱ dàj rûnꞌ ꞌhiaj nej guiì ranꞌ àko giꞌhiaj nej ñûnj,
sani̱ giꞌhiaj nej ñûnj si gàꞌì nej guiì gahuin yi̱ruꞌhue ngà si-nùguànꞌ Ma̱ꞌan Ñaꞌanj an,
sani̱ nitaj rasu̱n duꞌhue̱e hua riñan nej ñûnj,
sani̱ hua̱ daranꞌanj riñan nej ñûnj.
11 Naguchraꞌ nej ñûnj duꞌhua nej ñûnj ni̱ gaꞌmin nej ñûnj ngà nej suj màn ruhuâ yumanꞌ snàꞌanj Corinto,
ni̱ huê danj na̱nj ûta nìko ganaꞌnï̂nj nej ñûnj nimân nej ñûnj riñan nej suj.
12 Ni̱ nun gi̱ꞌhiaj chìꞌ nej ñûnj ngà nej suj sani̱ ma̱ꞌan nej suj huin si ûta nagiꞌhiaj chìꞌ ruhuâ nimân ngà nej ñûnj.
13 Huê danj ni̱ gachín nìꞌhia riñan nej suj,
dàj rûnꞌ giꞌhiaj ꞌngo̱ sí gachín nìꞌhiaj riñan nej daꞌní ni̱ gànàꞌnï̀nj nej suj nimân nej suj riñânj dàj rûnꞌ gi̱ꞌhia ngà nej suj.
Nêꞌ huin si-nùhuì Ma̱ꞌan Ñaꞌanj nìꞌnàꞌa
14 Ni̱ si̱ gaꞌhue gi̱ni̱kaj duguiꞌ nej suj ngà nej guiì nitaj si guyumân ruhuâ niꞌin Ma̱ꞌan Ñaꞌanj an mánj.
Hiôꞌ ni̱ ga̱ꞌhue gi̱nikaj duguiꞌ nej guiì giꞌhiaj sa nìkàa ngà nej guiì giꞌhiaj gakï̱nꞌïn na̱nj nînꞌ.
Ni̱ ga̱ꞌhue gi̱ni̱kaj duguiꞌ sa yigï̀ïn ngà sa rùmìnꞌin na̱nj nînꞌ.
15 Ni̱ ga̱ꞌhue gi̱ni̱kaj duguiꞌ Ma̱ꞌan Cristo ngà sichre na̱nj nînꞌ.
Ni̱ ga̱ꞌhue gi̱ni̱kaj duguiꞌ ꞌngo̱ sí nìkòꞌ rukû Ma̱ꞌan Cristo ngà sí nitaj si guyumân ruhuâ niꞌin Ma̱ꞌan Cristo na̱nj nînꞌ.
16 Huê danj na̱nj si̱ gaꞌhue gi̱nikaj duguiꞌ si-nùhuì Ma̱ꞌan Ñaꞌanj an ngà nej ñaꞌanj giꞌhiaj ra̱ꞌa síi.
Dadinꞌ nej suj huin si-nùhuì Ma̱ꞌan Ñaꞌanj nìꞌnàꞌa,
dàj rûnꞌ gataj Ma̱ꞌan Ñaꞌanj an:
Gané ni̱ ga̱che̱ siganï̂nj nej sij;
ni̱ ñùnj ga̱huin Daꞌanj nej sij,
ni̱ nej sij ga̱huin nej guiì gi̱nikòꞌ rukú.
17 Huê danj ni̱ gataj Ma̱ꞌan Señor:
Ga̱hui̱ nej suj siganï̂nj nej sij,
ni̱ gu̱xu̱n nej suj ma̱ꞌan nej suj riñan nej sij,
ni̱ si̱ gaganꞌ raꞌa nej suj sa kï̱j huaa,
hiôꞌ ni̱ ga̱na̱huin raꞌá nej suj.
18 Ni̱ ga̱ꞌhue ga̱huín Rej nej suj,
ni̱ nej suj ga̱huin daꞌni naꞌûj ni̱ daꞌnin yànàj,
huê danj gataj Ma̱ꞌan Señor Ma̱ꞌan sa nùkuaj staꞌu.