5
Dadinꞌ gàꞌ niꞌînꞌ si riñan hioꞌó nânj,
ni̱ nneè kuꞌ ni̱ huin dàj rûnꞌ huin ꞌngo̱ hueꞌ nneꞌ sani̱ hua̱ ꞌngo̱ gui ni̱ gi̱rë̱ꞌëj,
sani̱ gàꞌ hua̱ yu̱gui ꞌngo̱ hueꞌ nìko neꞌ yàtàꞌa giꞌhiaj Ma̱ꞌan Ñaꞌanj an ga̱neꞌ nìgùnꞌ,
sani̱ hueꞌ dânj ni̱ sê sa giꞌhiaj ràꞌa nej guiì huin mánj.
2 Rayiꞌî dânj ni̱ gaꞌnaꞌ guchej e yihiôꞌ nga nï̀nꞌ nneꞌ ruhuâ nneè kú nânj,
dadinꞌ ûta huin ruhuôꞌ gùchìꞌ ga̱ne dukôꞌ hueꞌ nne yàtàꞌa.
3 Huê danj ni̱ nneè kûꞌ ni̱ dàj rûn huin reꞌe atsìj i huê danj nahuij man,
sani̱ hua̱ ꞌngo̱ gui ni̱ ga̱na̱huin nàkà ñûn man.
4 Huê danj na̱nj nneè kuꞌ ni̱ huin dàj rûnꞌ huin ꞌngo̱ hueꞌe rayiꞌî dan ni̱ ûta gaꞌmin nùkuôꞌ ni̱ ûta huin ruhuôꞌ;
dadinꞌ nun ga̱ranꞌ ruhuôꞌ si ga̱ꞌa̱nj ni̱ꞌhio̱ꞌ,
sa ruhuôꞌ huin si ga̱na̱huin nàkà ñûnꞌ,
ni̱ nga gàhuìꞌ ni̱ ga̱na̱huin nìꞌnòꞌ ni̱ ga̱ne nìgùnꞌ.
5 Ni̱ Ma̱ꞌan huin sa giꞌhiaj yu̱gui ñùnꞌ ni̱ ga̱ꞌhue gi̱ꞌhia si ga̱na̱huin nàkòꞌ dadinꞌ Ma̱ꞌan huin Ñaꞌanj an,
ni̱ nga rikij Espíritu Santo riñunꞌ ni̱ danj huin ꞌngo̱ daꞌngaꞌa si nagiꞌhiaj yìtïn nimûnꞌ.
6 Huê danj ni̱ daranꞌ diû ni̱ hua̱ nìhiàꞌ ruhuôꞌ,
ni̱ niꞌînꞌ si nga nï̀nꞌ nneꞌ ruhuâ nneè kuꞌ,
ni̱ nne anêꞌ riñan Ma̱ꞌan Señor.
7 Sani̱ nùnj huin si nun gi̱ni̱ꞌînꞌ riñan Ma̱ꞌan Ñaꞌanj an,
sani̱ guyumân ruhuôꞌ niꞌînꞌ Ma̱ꞌan;
8 sani̱ nun ñunꞌ Ma̱ꞌan Ñaꞌanj an,
ni̱ hua̱ ruhuôꞌ gu̱du̱nôꞌ nneè kûꞌ ni̱ gùchìꞌ ga̱neꞌ ngà Ma̱ꞌan Señor.
9 Rayiꞌî dan ni̱ hua̱ ruhuâ nej ñûnj da̱gahuin nej ñûnj daranꞌ sa garanꞌ ruhuâ Ma̱ꞌan Señor,
nga nï̀nꞌ nne nìꞌnàꞌ nej ñûnj nej si nga gàꞌ nne nej ñûnj ñan nne Ma̱ꞌan Señor.
10 Dadinꞌ ña̱ꞌa̱n huaj si ga̱na̱nikïnꞌ daranꞌ nêꞌ riñan Ma̱ꞌan Jesús ñan nne nikaj sunj,
daꞌnga ni̱ ganahuin ro̱ꞌôꞌ dàj na̱nj hua ma̱ꞌan sa giꞌhiôꞌ nga ganeꞌ riñan hioꞌóo,
ga̱ꞌhue si giꞌhiôꞌ sa sàꞌa nej si giꞌhioꞌ sa aꞌnanꞌan.
Duguta sunj si gi̱ꞌhiôꞌ si ga̱na̱ꞌmi̱n nej guiì ngà Ma̱ꞌan
11 Gàꞌ niꞌin nej ñûnj si daꞌhui nej ñûnj ginùn ña̱ꞌa̱nj nej ñûnj riñan Ma̱ꞌan Ñaꞌanj an,
rayiꞌî dan ni̱ nìchràj ruhuâ nej ñûnj ni̱ gi̱ꞌhiaj nej ñûnj si gùyùmàn ruhuâ nej guiì gi̱ni̱ꞌin ninj Ma̱ꞌan Ñaꞌanj an,
ni̱ gàꞌ niꞌin sàꞌ Ma̱ꞌan Ñaꞌanj an nej ñûnj;
ni̱ huê danj na̱nj gàꞌ niꞌin hueꞌê nej suj ni̱ gàꞌ niꞌin hueꞌê sa nu̱n ruhuâ nimân nej ñûnj nej ma̱ꞌan nej ñûnj.
12 Sê si̱ naꞌhuiꞌ nej ñûnj guendâ ga̱ꞌmi̱n hueꞌê nej ñûnj rayiꞌî nej ma̱ꞌan nej ñûnj mánj,
sa ruhuâ nej ñûnj huin si ga̱ꞌmi̱n hueꞌê nej suj rayiꞌî nej ñûnj,
daꞌnga ni̱ gìrìꞌ nej suj sa ga̱ꞌmi̱n nej suj riñan nej sí gaꞌmin hueꞌê rayiꞌî ma̱ꞌan,
dadinꞌ sê si̱ yàngàꞌ niꞌin hueꞌê nej sôꞌ dàj hua ruhuâ nimân nej guiì ni̱ rayiꞌî dan ni̱ gaꞌmin hueꞌê nej sôꞌ rayiꞌî ma̱ꞌan nej sôꞌ.
13 Ni̱ si sinún nej ñûnj,
ni̱ guendâ Ma̱ꞌan Ñaꞌanj an sinún nej ñûnj;
ni̱ si huin nej ñûnj sí ûta sàꞌ gayakaj guendâ,
ni̱ guendâ nej suj huin rayiꞌî sa sàꞌ gayakaj guendâ nej ñûnj.
14 Dadinꞌ sa ꞌì ruhuâ Ma̱ꞌan Cristo huin sa giꞌhiaj guesâ riñan nêꞌ,
ni̱ ganï̂n ruhuôꞌ dànanj:
Ni̱ nga gahuiꞌ Ma̱ꞌan Cristo ni̱ dàj rûnꞌ huin si gahuiꞌ darûnꞌ huin;
15 gahuiꞌ Ma̱ꞌan Jesús rayiꞌî daranꞌ nej guiì,
ni̱ nej guiì hua nìꞌnàꞌa,
ni̱ si̱ gane ninj guendâ ma̱ꞌan ninj mánj,
ga̱ne ninj guendâ Ma̱ꞌan sa gahuiꞌ rayiꞌî ninj ni̱ ganaꞌnïn siganï̂nj nej nîman.
16 Àsìj gui hia̱j ni̱ gayakaj gaꞌanj neꞌ ña̱an,
ni̱ si̱ gayakaj guendôꞌ dàj hueꞌê hua nej guiì mánj,
dadinꞌ sa ña̱ꞌa̱n huin si gi̱ni̱ꞌhioꞌ dàj hua ruhuâ nimân ninj;
dadinꞌ àsìj ni̱ giniꞌhiaj nej ñûnj si Cristo ni̱ gahuin ꞌngo̱ sí ûta hueꞌê giꞌhiaj,
sani̱ hia̱j ni̱ garânj daꞌngaꞌ ruhuâ nej ñûnj si Cristo ni̱ Ñaꞌanj an huin Ma̱ꞌan.
17 Huê danj ni̱ guiì ni̱ka̱j duguiꞌ ngà Ma̱ꞌan Cristo ni̱ ganahuin ninj guiì nàkàa;
ni̱ gudunâj ninj nej gakï̱nꞌ giꞌhiaj ninj àsìj nâ,
huê danj ni̱ ganahuin nàkà daranꞌ sa giꞌhiaj ninj.
18 Daranꞌ nej nânj huin si-su̱n Ma̱ꞌan Ñaꞌanj an,
ni̱ giꞌhia si ngà Ma̱ꞌan Cristo ni̱ ga̱na̱ꞌmi̱n Ma̱ꞌan Ñaꞌanj an ngà Ma̱ꞌan,
ni̱ gachrûn sunj nêꞌ si gi̱ꞌhiôꞌ si ga̱na̱ꞌmi̱n nej guiì ngà Ma̱ꞌan Ñaꞌanj an.
19 Ni̱ nne Ma̱ꞌan Ñaꞌanj an ngà Ma̱ꞌan Cristo Jesús rayiꞌî dan giꞌhia si ga̱na̱ꞌmi̱n nej guiì ngà Ma̱ꞌan,
ni̱ nitaj si giriñun ruhuaj rayiꞌî nej gakï̱nꞌ giꞌhiaj nej guiì,
ni̱ duguta sunj si gi̱ꞌhiôꞌ si ga̱na̱ꞌmin nej guiì ngà Ma̱ꞌan.
20 Huê danj ni̱,
ngà siyu̱gui Ma̱ꞌan Cristo ni̱ huînꞌ sí ni̱kï̱nꞌ riñan Ma̱ꞌan Ñaꞌanj an,
ni̱ gi̱ꞌhiôꞌ guendâ si Ma̱ꞌan huin si gachín nìꞌhiaj riñan nej suj,
huê danj ni̱ gachín nìꞌhiaj nej ñûnj riñan nej suj ngà siyu̱gui Ma̱ꞌan Cristo:
Ni̱ ga̱na̱ꞌmi̱n nej suj ngà Ma̱ꞌan Ñaꞌanj an na̱nj ánj.
21 Ma̱ꞌan sa nun gi̱ni̱ꞌin gakï̱nꞌïn,
ni̱ rayiꞌî nêꞌ ni̱ giꞌhia si ga̱huin sí gakï̱nꞌïn,
daꞌnga ni̱ gahuînꞌ sí giꞌhiaj sa ni̱ka̱a riñan Ma̱ꞌan Ñaꞌanj an rayiꞌî Ma̱ꞌan Cristo.