4
Rayiꞌî dan,
ni̱ ni̱ka̱j su̱n nej ñûnj si-su̱n Ma̱ꞌan Ñaꞌanj an ni̱ chru̱n nej ñûnj gi̱ꞌhiaj sun nej ñûnj dadinꞌ guruguñuꞌunj Ma̱ꞌan Señor rukû nej ñûnj,
ni̱ rayiꞌî dan ni̱ nitaj si ginichre ruhuâ nej ñûnj mánj.
2 Sa si̱nï̱n giꞌhiaj nej ñûnj huin si gudunâj nej ñûnj nej gakï̱nꞌ giꞌhiaj huì nej ñûnj dadinꞌ ûta nàꞌàj hua nej sa giꞌhiaj nej ñûnj,
hia̱j ni̱ nitaj si ni̱ka̱j nej ñûnj mañan guendâ gi̱di̱gañuꞌunj un nej ñûnj nej guiì,
ni̱ nitaj si garânj sun nej ñûnj si-nùguànꞌ Ma̱ꞌan guendâ gi̱di̱gañuꞌunj nej ñûnj nej guiì,
sa giꞌhiaj nej ñûnj daranꞌ diû huin si gaꞌmin nej ñûnj nuguanꞌ yàngàꞌa,
ni̱ duguta su̱n nej ñûnj daranꞌ daꞌngaꞌ nu̱n ruhuâ nimân nej guiì riñan Ma̱ꞌan Ñaꞌanj an.
3 Sani̱ gananï̂n nej ñûnj nuguanꞌ gi̱ꞌhiaj ga̱na̱ni̱n nej guiì,
nuguanꞌ hua̱ nï̀nꞌ giꞌnïnj huì riñan aꞌngô nej guiì,
dadinꞌ hua̱ nï̀nꞌ giꞌnïnj huì man riñan nej guiì gaꞌanj ni̱ꞌhia.
4 Sani̱ ñan nitaj si guyumân ruhuâ nej guiì dânj,
ni̱ ñaꞌanj nne ruhuâ yumiguì nânj giꞌhiaj gahuin ru̱mi̱nꞌ daꞌngaꞌ ninj,
rayiꞌî dan ni̱ naꞌhue gu̱du̱gun nuguanꞌ gi̱ꞌhiaj ga̱na̱ni̱n ninj ruhuâ daꞌngaꞌ ninj dàj nìko hua Ma̱ꞌan Cristo,
dadinꞌ huej huin sa gidigân dàj nìko hua Ma̱ꞌan Ñaꞌanj an.
5 Dadinꞌ nitaj si ganataꞌ nej ñûnj rayiꞌî nej ma̱ꞌan nej ñûnj mánj,
ganataꞌ nej ñûnj rayiꞌî Ma̱ꞌan Jesucristo dadinꞌ huej huin Ma̱ꞌan Señor ni̱ nej ñûnj huin mûsu riñan nej suj rayiꞌî Ma̱ꞌan Jesucristo.
6 Dadinꞌ Ma̱ꞌan Ñaꞌanj an gaꞌnïnꞌ suun,
si gìyìgï̀n ñan rùmìnꞌin,
ni̱ huê Ma̱ꞌan giꞌhiaj gìyìgï̀n ruhuâ nimân nej suj ngà si-nùguànꞌanj,
daꞌnga ni̱ giyigï̀n ni̱ gi̱ni̱ꞌin nej suj dàj nìko ni̱ dàj hueꞌê hua Ma̱ꞌan Ñaꞌanj an ni̱ dàj nìko giràn riñan Ma̱ꞌan Cristo.
Gùyùmàn yìtï̀nj ruhuôꞌ ni̱ ga̱ꞌhue ga̱nikïnꞌ runꞌ
7 Ni̱ si-nùguànꞌ Ma̱ꞌan Ñaꞌanj an huin dàj rûnꞌ huin sanꞌanj oro,
ni̱ nunj ruhuâ nimân nêꞌ ni̱ nimân nêꞌ huin dàj rûnꞌ huin hioꞌó bârru,
ni̱ ga̱ꞌhue gi̱di̱gûnꞌ si si-nùguànꞌ Ma̱ꞌan huin sa ni̱ka̱j su̱n,
ni̱ sê nêꞌ huin sa gaꞌmin nùguànꞌ nùkuaj dânj riñan nej guiì mánj;
8 ni̱ ûta giranꞌ sa̱ñu̱n yàngàꞌ nej ñûnj,
sani̱ nun gi̱ni̱chre ruhuâ nej ñûnj;
ni̱ ûta gahuin yàngàꞌ ruhuâ nej ñûnj sani̱ ga nùkuaj ruhuâ nej ñûnj,
9 gata ràꞌa nej sij nej ñûnj,
sani̱ nun gàꞌnï̀nj raꞌa Ma̱ꞌan Ñaꞌanj an nej ñûnj,
ni̱ giꞌhiaj nej sij si ga̱na̱tu̱ nej ñûnj sani̱ nun ga̱na̱huij nej ñûnj gi̱ꞌhiaj nej sij mánj,
10 dànèꞌ gahuin huaj nej ñûnj,
ni̱ nu̱n ruhuâ nej ñûnj dàj nìko giranꞌ sa̱ñu̱n Ma̱ꞌan Jesús nga gahuij,
ni̱ hua̱ ruhuâ nej ñûnj si dàj rûnꞌ giranꞌanj ni̱ huê danj gi̱ranꞌ nej ñûnj.
11 Dadinꞌ nej ñûnj hua nìꞌnàꞌ,
ni̱ daranꞌ diû ga̱ꞌhue gàhuìꞌ nej ñûnj rayiꞌî Ma̱ꞌan Jesús,
ni̱ dàj rûnꞌ giranꞌ sa̱ñu̱n Ma̱ꞌan Jesús ngà nneè ku ni̱ huê danj ga̱ꞌhue gi̱ranꞌ sa̱ñu̱n nej ñûnj ngà nneè kú nej ñûnj.
12 Huê danj ni̱ doj huaj gàhuìꞌ nej ñûnj,
sani̱ dànanj ganahuin nìꞌnàꞌ nej suj.
13 Ni̱ gu̱ña̱n guyumân ruhuâ nej sôꞌ ni̱ dàj rûnꞌ nnunj riñan ñanj:
“Ni̱ guyumân ruhuâj”,
ni̱ rayiꞌî dan ni̱ gaꞌmînj,
huê danj na̱nj guyumân ruhuâ nej ñûnj ni̱ rayiꞌî dan ni̱ gaꞌmin nej ñûnj,
14 gàꞌ niꞌin nej ñûnj si Ma̱ꞌan sa giꞌhiaj ganaꞌnï̂nj Ma̱ꞌan Señor Jesús siganï̂nj nej nîman,
ni̱ huê Ma̱ꞌan gi̱ꞌhiaj gànàꞌnï̀nj nej ñûnj siganï̂nj nej nîman dàj rûnꞌ ganaꞌnï̂nj Ma̱ꞌan Jesús,
ni̱ gi̱di̱ganj nej ñûnj riñan nej suj.
15 Dadinꞌ daranꞌ nej sañun nânj guyumân riñan nej ñûnj,
guendâ ꞌì ruhuâ nej ñûnj niꞌin nej ñûnj nej suj,
ni̱ nga ganahuin ràꞌa nej suj sunuj u giꞌhiaj Ma̱ꞌan Ñaꞌanj an,
ni̱ ûta gàꞌì nej guiì gàꞌhuìꞌ si guruhuâ Ma̱ꞌan Ñaꞌanj an,
huê danj ni̱ ga̱na̱huin nìhiàꞌ ruhuâ Ma̱ꞌan Ñaꞌanj an na̱nj ánj.
16 Sani̱ gàꞌ dânj ni̱,
nitaj si ginichre ruhuâ nej ñûnj;
nùnj huin si gàꞌ huaj gi̱ni̱na̱j ruhuâ nneè kú nej ñûnj,
sani̱ nanè nimân nej ñûnj ni̱ daꞌ gui ni̱ dànanj ganahuin nàkà nanè nimân nej ñûnj na̱nj ánj.
17 Dadinꞌ sañun hua̱ riñan nej ñûnj ni̱ do̱j huaj ni̱ râꞌñanj gàchìnj;
sani̱ sa giꞌhia huin si guruguñuꞌun guendâ gùchìꞌ nej ñûnj ga̱ne nìgànj nej ñûnj ngà Ma̱ꞌan Ñaꞌanj an ni̱ dànanj ûta nìko huaj ni̱ ûta hueꞌê huaj na̱nj ánj.
18 Nitaj si gaꞌnḯn ñan nej ñûnj nej rasu̱n guruguiꞌ gi̱ni̱ꞌin nej ñûnj mánj,
gaꞌnḯn ñan nej ñûnj nej rasu̱n nitaj si guruguiꞌ gi̱ni̱ꞌin nej ñûnj,
dadinꞌ nej rasu̱n giniꞌînꞌ ni̱ man do̱j sînj ga̱ hueꞌej,
sani̱ nej rasu̱n nitaj si giniꞌînꞌ ni̱ sa ga̱ nìgànj ga̱huin na̱nj ánj.