Nuguanꞌ nàkà guchiꞌ Ma̱ꞌan Ñaꞌanj an ꞌngo̱ duꞌhua ngà nej guiì
3
Gàyìꞌì ñûn nej ñûnj ga̱ꞌmi̱n hueꞌê nej ñûnj rayiꞌî nej ma̱ꞌan nej ñûnj riñan nej suj na̱nj nînꞌ.
Niꞌñanj yàngàꞌ nej ñûnj,
dàj rûnꞌ niꞌñanj aꞌngô nej síi ꞌngo̱ ñanj karta ga̱ꞌmi̱n hueꞌê rayiꞌî nej ñûnj na̱nj nînꞌ.
Dadinꞌ huê danj giꞌhiaj aꞌngô nej síi.
2 Danj nej ñûnj ñanj karta gaꞌmin hueꞌê rayiꞌî nej suj huin nej ma̱ꞌan nej suj,
dadinꞌ nunj ruhuâ nimân nej suj,
ni̱ niꞌin daranꞌ nej guiì dàj giꞌhiaj nej suj,
ni̱ gahia daranꞌ ninj nej suj;
3 ni̱ nda hueꞌê chre guruguiꞌ si huin nej suj ꞌngo̱ ñanj karta gachrûn Ma̱ꞌan Cristo,
dadinꞌ gachrunj sani̱ sê ngà tinta gachrunj nej nuguanꞌ dânj ruhuâ nimân nej suj mánj,
gachrunj ngà si-letra Ma̱ꞌan si-Espíritu Ma̱ꞌan Ñaꞌanj nìꞌnàꞌa;
ni̱ sê riñan ꞌngo̱ hiëj nnûn letra dan giꞌhia mánj,
nnunj riñan nneè nimân nej suj giꞌhia.
4 Ni̱ rayiꞌî Ma̱ꞌan Cristo ni̱ giniꞌin nej ñûnj Ma̱ꞌan Ñaꞌanj an ni̱ hua̱ yìtï̀nj ruhuâ nej ñûnj.
5 Sani̱ nitaj si ganï̂n ruhuâ nej ñûnj si nej ma̱ꞌan nej ñûnj giri rà nej nuguanꞌ chru̱n nej ñûnj ga̱ꞌmi̱n nej ñûnj,
ni̱ nej nuguanꞌ niꞌin hueꞌê nej ñûnj ni̱ Ma̱ꞌan Ñaꞌanj an huin rikî riñan nej ñûnj rayiꞌî dan ni̱ gaꞌhue gaꞌmin nej ñûnj.
6 Ni̱ huê Ma̱ꞌan giꞌhiaj si ga̱ꞌhue gi̱ni̱ꞌin hueꞌê nej ñûnj ni̱ gahuin nej ñûnj sí gànàtàꞌ nuguanꞌ nàkà guchiꞌ Ma̱ꞌan Ñaꞌanj an ꞌngo̱ duꞌhua ngà nej guiì,
ni̱ sê si nnùn ley dan riñan hiëj mánj,
dadinꞌ si-nànè Ma̱ꞌan Espíritu huin,
dadinꞌ ley ni̱ giꞌhia si gahuiꞌ nej guiì,
sani̱ Ma̱ꞌan Espíritu ni̱ ganahuin nìꞌnàꞌ nimân nej guiì giꞌhia.
7 Ni̱ si nda raa̱n chre hua ley nnùn riñanj hiëj ganahuin ra̱ꞌa Moisés ni̱ gahuiꞌ nej guiì giꞌhia,
sani̱ nun gàꞌhue gi̱niꞌhiaj ninj riñan Moisés dadinꞌ nda raa̱n chre hua riñan sôꞌ,
ni̱ si nda raa̱n chre hua ley dan sani̱ gùyùmàn ꞌngo̱ gui ni̱ girëꞌëj.
8 Ni̱ si ga hueꞌê ley sani̱ dànanj hueꞌê staꞌu ga̱ sun gi̱ꞌhiaj Ma̱ꞌan Espíritu Santo.
9 Dadinꞌ ley ni̱ ganahuin ra̱ꞌa nej sij kastîgu giꞌhia sani̱ hueꞌê gaj ni̱ ginunj riñan hiëj,
sani̱ dànanj ûta nùkuaj giꞌhiaj sun Ma̱ꞌan Espíritu dadinꞌ gi̱ꞌhia sisi̱ si̱ gadaꞌhui nej guiì gakï̱nꞌïn riñan Ma̱ꞌan Ñaꞌanj an.
10 Dadinꞌ nùnj huin si hua̱ hueꞌê ley gaꞌhuiꞌ Ma̱ꞌan Ñaꞌanj an riñan Moisés,
sani̱ nitaj si hua̱ hueꞌê man doj dàj rûnꞌ nùkuaj hua nuguanꞌ nagiꞌhiaj nàkà Ma̱ꞌan Ñaꞌanj an ngà nêꞌ mánj.
11 Dadinꞌ si ga hueꞌê si-ley Moisés sani̱ nun ga̱ nìgànj man,
ni̱ dànanj ûta hueꞌê hua ni̱ ga̱ nìgànj nuguanꞌ riki Ma̱ꞌan Ñaꞌanj an riñan nêꞌ.
12 Huê danj ni̱ ànàꞌhuìj nej ñûnj,
rayiꞌî dan ni̱ nitaj si guyuꞌhuiꞌ nej ñûnj nga gaꞌmin nej ñûnj.
13 Ni̱ nitaj si giꞌhiaj nej ñûnj dàj rûnꞌ giꞌhiaj Moisés,
dadinꞌ garán sôꞌ ꞌngo̱ atsîj belo riñan sôꞌ,
guendâ si̱ giniꞌin nej guiì Israelita dàj hua riñan sôꞌ sani̱ sa gànàrë̀ꞌ huin ley.
14 Sani̱ nun ga̱ꞌhue̱ ga̱ra̱n daꞌnga ruhuâ nej sij;
dadinꞌ nda gui hia̱j ni̱ nga gahia nej sij nuguanꞌ nâ guchiꞌ Ma̱ꞌan Ñaꞌanj an ꞌngo̱ duꞌhua ngà nej sij,
ni̱ hua̱ na̱nj garán atsîj belo riñan nej sij,
sani̱ gàꞌ gaꞌnêj Ma̱ꞌan Cristo atsîj belo dânj.
15 Nda gui hia̱j,
ni̱ nga gahia nej sij ñânj librû gachrûn Moisés,
ni̱ hua̱ na̱nj garân atsîj belo dânj riñan nimân nej sij.
16 Sani̱ nga na̱du̱na̱ Ma̱ꞌan Señor nimân nej sij,
ni̱ gi̱yi̱ꞌne̱ atsîj belo riñan nimân nej sij.
17 Sani̱ Ma̱ꞌan Señor ni̱ Espíritu huin;
ni̱ ñan nne si-Espíritu Ma̱ꞌan Señor,
ni̱ hua̱ nîꞌnïnj gu̱na̱nj gitsîꞌ riñan Ma̱ꞌan.
18 Huê danj ni̱,
daranꞌ nêꞌ hua nîꞌnïnj riñan ni̱ dàj rûnꞌ giꞌhiôꞌ nga nagiꞌhiaj hueꞌê riñunꞌ nga giniꞌhioꞌ riñan nne guneꞌïn ni̱ huê danj nagiꞌhiaj hueꞌêꞌ Ma̱ꞌan Señor ñùnꞌ ni̱ ga̱na̱huin hueꞌêꞌ dàj rûnꞌ hua hueꞌê Ma̱ꞌan Señor;
dadinꞌ Ma̱ꞌan si-Espíritu Ma̱ꞌan Señor huin sa na̱gi̱ꞌhiaj hueꞌê ñùnꞌ na̱nj ánj.